October

Sonkhe singasifaka sandla kuze imihlangano yelibandla iphumelele ngekutsi sihlabele ngemdlandla futsi siphendvule. Labanye bakutfola kumatima kuhlabela nobe kuphendvula emihlanganweni yelibandla. Nawe ukutfola kumatima yini? Nangabe kunjalo, cabanga ngaloko labanye labakwentile kuze bakuncobe loko. Labanye bakutfola kulusito kuhlabela ngalokusuka enhlitiyweni. Nasihlabela tingoma teMbuso, lokubaluleke kakhulu kitsi kudvumisa Jehova. Ngako nawulungiselela imihlangano yelibandla ungaphindze uphrakthize tingoma letitawuhlatjelwa. Yetama kuhlobanisa emavi lakulengoma naloko lokutawube kukhulunywa ngako emihlanganweni. Ngetulu kwaloko, naka kakhulu emavi lakulengoma kunekunaka indlela lohlabela ngayo. Labanye bakutfola kumatima kakhulu kuphendvula. Yini lengakusita? Yetama kuphendvula njalo. Khumbula kutsi kukahle nanobe imphendvulo yakho iyimfisha, imelula futsi ishaya emhlolweni. Jehova ujabula kakhulu nasenta konkhe lesingakwenta kuze siphendvule emihlanganweni ngisho nobe sesaba. w22.04 7-8 ¶12-15

Ligama lelitsi ‘umsiti’ lisho umuntfu logijimela kuyosita lomunye umuntfu lokhalela lusito. Mbone ngeliso lengcondvo Jehova agijimela kuyosita umuntfu locindzetelekile. Lesitfombe lonaso engcondvweni siveta kahle kutsi Jehova unesifiso lesikhulu sekusisita futsi uyakulangatelela. Nasisitwa nguJehova, singakhona kubeketelela tinkinga tetfu sibe sijabulile. Ngutiphi letinye tindlela Jehova latisebentisako kuze asisite? Kuze siphendvule, asesicoce ngencwadzi ya-Isaya. Leni? Ngobe tiphrofetho letinyenti Isaya laphefumulelwa kutsi atibhale tiyasebenta kubantfu baNkulunkulu lamuhla. Ngetulu kwaloko, Isaya nakachaza Jehova uvame kusebentisa emagama lamelula kutsi siwacondze. Sibonelo saloko siku-Isaya sehluko 30. Kulesehluko, Isaya usebentisa imifanekiso lemelula kuze achaze indlela Jehova lasisita ngayo (1) ngekutsi asilalelisise futsi aphendvule imithantazo yetfu, (2) ngekutsi asinike sicondziso, (3) nangekutsi asibusise nyalo nasesikhatsini lesitako. w22.11 8 ¶2-3

Kulomlayeto waJesu loya ebandleni laseSmuna nelaseFiladelfiya, watjela emaKhristu lakulamabandla kutsi angakwesabi kuphatfwa kabi, ngobe atawubusiswa ngekwetsembeka kwawo. (Semb. 3:10) Kufanele sikulindzele kuphatfwa kabi futsi sikulungele nekukubeketelela. (Mat. 24:9, 13; 2 Khor. 12:10) Incwadzi yeSembulo isitjela kutsi bantfu baNkulunkulu batawuphatfwa kabi emalangeni etfu, ‘lokulilanga leNkhosi.’ (Semb. 1:10) Sembulo sehluko 12 sikhuluma ngemphi leyaba khona ezulwini ngekushesha nje ngemuva kwekutsi Jesu abe yiNkhosi yeMbuso waNkulunkulu. Mikhayeli, lokunguJesu Khristu longcwelisiwe kanye nelibutfo lakhe, balwa naSathane nemadimoni. (Semb. 12:7, 8) Letitsa taNkulunkulu tancotjwa futsi tajikwa lamhlabeni, latibanga khona kuhlupheka lokukhulu kubantfu.—Semb. 12:9, 12. w22.05 5 ¶12-13

Indlela Jehova lehlulela ngayo ihlale ilungile futsi ikahle. Akakhetsi. Nakacolela lotsite akayi ngendlela labukeka ngayo, ngekutsi unjingile yini, ngekutsi ubalulekile yini nobe ngemakhono lanawo. (1 Sam. 16:7; Jak. 2:1-4) Kute longacindzetela Jehova kutsi ente intfo letsite nobe amfumbatsise. Tincumo takhe atiyi ngekutsi utfukutsele yini nobe ngendlela lativa ngayo. (Eks. 34:7) Siyaciniseka kutsi Jehova unguMehluleli lokahle kakhulu ngobe wati konkhe ngatsi nangesimo setfu. (Dut. 32:4) Babhali bemiBhalo yesiHebheru bebati kutsi Jehova ucolela ngendlela leyehlukile. Kuletinye timo, bebasebentisa ligama lesiHebheru lenye incwadzi letsi “belisetjentiswa kuphela nakuchazwa indlela Nkulunkulu lacolela ngayo toni. Leligama alisetjentiswa nakuchazwa indlela bantfu labacolela ngayo labanye.” NguJehova kuphela lonemandla ekucolela ngalokuphelele soni lesiphendvukako. w22.06 4 ¶10-11

Nangabe ukhulisa bantfwana bakho uwedvwa nobe usemndenini lonetinkholo letingafani, ciniseka kutsi sibonelo sakho lesihle siyabacinisa labanye futsi siyabakhutsata. Kutsiwani nangabe umntfwana wakho angasitakali ngisho nobe wetama kamatima kumsita? Khumbula kutsi kutsatsa sikhatsi kucecesha umntfwana. Nawuhlanyela inhlanyelo, ungahle utibute kutsi itawumila yini futsi ikhule igcine itselile. Nanobe ungati kutsi kutawentekani, uyachubeka uyinisela, uyinikete litfuba lekutsi ikhule. (Mak. 4:26-29) Ngendlela lefanako, nawungumake kungenteka uhle utibuta kutsi loko lokwentako kuyabasita yini bantfwana bakho kutsi batsandze Jehova. Angeke ukulawule loko lokutawuncunywa bantfwana bakho. Kodvwa nawuchubeka wenta konkhe longakwenta kuze ubaceceshe, ubaniketa litfuba lekutsi babe bangani baNkulunkulu. w22.04 19-20 ¶16-17

Ngesikhatsi Solomoni asikhonti saJehova lesetsembekile, bekatibona ngendlela lekahle. Nakaselijaha, wavuma kutsi kunetintfo langakhoni kutenta kahle futsi wacela Jehova kutsi amcondzise. (1 Khos. 3:7-9) Ngasekucaleni kwekubusa kwakhe, Solomoni bekayati nengoti yekutigcabha. Lokubuhlungu kutsi ngekuhamba kwesikhatsi wehluleka kwenta loku lakusho. Ngesikhatsi sekuphele iminyaka ayinkhosi, wacala kutigcabha futsi wangasayinaki imitsetfo yaNkulunkulu. Sibonelo nje, lomunye umtsetfo bewutsi inkhosi lengumHebheru akukafaneli ‘ititsatsele bafati labanyenti, kuze inhlitiyo yayo ingaphambuki.’ (Dut. 17:17) Nobe kunjalo, Solomoni akazange awunake lomtsetfo, watsatsa bafati labangu-700 nemaphovela langu-300, futsi linyenti labo belingamkhonti Nkulunkulu! (1 Khos. 11:1-3) Kungenteka Solomoni bekatitjela kutsi loko angeke kube yinkinga kuye. Kunobe ngukuphi, Solomoni wabhekana nemiphumela lebuhlungu ngekuhamba kwesikhatsi leyabangelwa kushiya Jehova.—1 Khos. 11:9-13. w22.05 23 ¶12

Bantfu lamuhla kufanele bente sincumo lesibalulekile. Batamsekela yini Jehova Nkulunkulu njengobe anelilungelo lekubusa indalo yonkhe, nobe batawusekela sitsa sakhe lesibi lesinguSathane Develi? Kute lotawuba semkhatsini. Sincumo labatasenta sitawuncuma kutsi bayakutfola yini kuphila lokuphakadze nobe cha. (Mat. 25:31-33, 46) Ngesikhatsi ‘sekuhlupheka lokukhulu,’ batawubekwa luphawu lwekusindza nobe lwekubhujiswa. (Semb. 7:14; 14:9-11; Hez. 9:4, 6) Nangabe ukhetse kusekela kubusa kwaJehova, wente sincumo lesihle. Nyalo utimisele kusita labanye kutsi nabo bente lesincumo lesihle. Tibusiso titawutfolwa ngulabo labasekela kubusa kwakhe ngekwetsembeka. Kufanele siwadadishe lamaciniso labalulekile. Kwenta njalo kutawenta kutsi sitimisele kakhulu kuchubeka sikhonta Jehova. Ngetulu kwaloko, singasebentisa loko lesikufundzile kuze sisite labanye kutsi nabo bente lesincumo lesihle futsi banamatsele kuso. w22.05 15 ¶1-2

Kufanele silalele Jehova hhayi titsa tetfu. Jobe walalelisisa ngesikhatsi Jehova akhuluma naye. Nkulunkulu wabonisana naye, futsi bekungatsi utsi: ‘Ngikwati konkhe lokwenteke kuwe. Ngako ucabanga kutsi angeke ngikhone yini kukunakekela?’ Jobe waphendvula ngendlela letfobekile nalebeyikhombisa kutsi bekabonga kakhulu ngebuhle baJehova. Watsi: “Tindlebe tami tivile ngawe, kodvwa nyalo sengiyakubona ngemehlo ami.” (Jobe 42:5) Ngesikhatsi Jobe asho lamavi, kungenteka bekahleti emlotseni, agcwele tilondza emtimbeni. Nobe kunjalo, Jehova wamcinisekisa ngekutsi uyamtsandza nekutsi uyamemukela. (Jobe 42:7, 8) Nalamuhla, bantfu bangasetfuka, futsi basiphatsise kwetintfo letingenamsebenti. Bangetama kulimata lidvumela letfu nobe lenhlangano. Kuloku lokwenteka kuJobe, siyafundza kutsi Jehova uyaciniseka kutsi sitawuhlale setsembekile kuye nasivivinywa. w22.06 24 ¶15-16

Kuliciniso kutsi kutawuba nemsindvo wenjabulo ezulwini ngemuva kwekubhujiswa kweBhabhulona Lenkhulu, kodvwa kunalokunye lokutawenta kutsi kube nekuhalalisa lokukhulu. (Semb. 19:1-3) Indzaba ‘yemshado weliWundlu’ ngiyo lebaluleke kakhulu encwadzini yeSembulo. Bonkhe labangu-144 000 batawube basezulwini ngaphambi nje kwekutsi kucale imphi ye-Amagedoni. Nobe kunjalo, leso kutawube kungasiso sikhatsi sekutsi kube ngumshado weliWundlu. (Semb. 21:1, 2) Umshado weliWundlu utawuba ngemuva kwemphi ye-Amagedoni futsi tonkhe titsa taNkulunkulu setibhujisiwe. (Hla. 45:3, 4, 13-17) Usho kutsini umshado weliWundlu kulabo labatawuba nencenye kuwo? Njengobe nje umshado uhlanganisa indvodza nemfati ndzawonye, lomshado longumfanekiso utawuhlanganisa Jesu Khristu loyiNkhosi kanye ‘namakoti’ wakhe, lokungulabo labangu-144 000. Loku lokubalulekile lokutawenteka kutawusho kubekwa kwembuso lomusha lotawubusa umhlaba iminyaka lengu-1 000.—Semb. 20:6. w22.05 17 ¶11-13

Jesu watsi emalangeni ekugcina utawubeka ‘sisebenti lesetsembekile nalesihlakaniphile’ kuze sisinike sicondziso lesivela eVini laNkulunkulu. (Mat. 24:45) Nguloko kanye lesikwentako. Umholi wetfu usebentise lelicembu lelincane lemadvodza lagcotjiwe kuze linike bantfu baNkulunkulu “kudla ngesikhatsi lesifanele” liphindze likunike nalabo labafuna kufundza liciniso. Lamadvodza awatenti emakhosi ekukholweni kwabo. (2 Khor. 1:24) Kunaloko, ayati kutsi Jesu Khristu ‘ungumholi nembusi’ webantfu baNkulunkulu. (Isa. 55:4) Kusukela nga-1919, lesisebenti lesetsembekile sikhicite tincwadzi letehlukahlukene letisite labo labafuna kufundza liciniso eVini laNkulunkulu. Nga-1921, lesisebenti sakhicita incwadzi letsi The Harp of God leyasita labo bebafuna kufundza liciniso kutsi bafundze timfundziso letisisekelo teliBhayibheli. Njengobe tikhatsi tishintja, kukhicitwe letinye tincwadzi. Nguyiphi kuletincwadzi leyakusita kutsi wati Babe wetfu wasezulwini futsi umtsandze? w22.07 10 ¶9-10

Jehova wephana kakhulu. Kunobe yini longamupha yona, yena utawuhlale akubuyisela ngalokungetulu kakhulu kwaloko lomuphe kona. (Mak. 10:29, 30) Utakunika imphilo lejabulisako, lenhle nalekwenetisako ngisho nanyalo kulelive lelibi. Kodvwa leso kutawube nje kusicalo. Ungachubeka ukhonta Babe wakho lomtsandzako kuze kube phakadze. Lutsandvo lolukhona emkhatsini wakho naBabe wakho lutawuchubeka lukhula. Ngetulu kwaloko, nangabe nje asaphila, nawe utawuchubeka uphila kuze kube phakadze. Ukunikete tintfo letinyenti letinhle, waba netikhatsi letijabulisako. Ngako unganika uMnikati wemazulu nemhlaba intfo lete yona, lokukumkhonta ngekwetsembeka ngobe ufuna. (Jobe 1:8; 41:11; Taga 27:11) Yini nje lenye lencono longabuye uyente ngekuphila kwakho? w23.03 6 ¶16-17

Nawuseminyakeni yekutfomba, ungase ube nesifiso lesikhulu sekuya ecansini futsi labanye bangahle bakucindzetele kutsi utiphatse kabi. Nguloko kanye Sathane lafuna kutsi ukwente. Yini lengakusita kutsi umelane nalesilingo? (1 Thes. 4:3, 4) Emithantazweni yakho, tjela Jehova indlela lotiva ngayo futsi umcele kutsi akuphe emandla. (Mat. 6:13) Khumbula kutsi Jehova ufuna kukusita, hhayi kukusola. (Hla. 103:13, 14) Ungetami kuticatulula wedvwa tinkinga takho. Khuluma nebatali bakho ngenkinga lonayo. Kuliciniso kutsi akusimelula kukhuluma ngaletindzaba, kodvwa kubalulekile kutsi wente kanjalo. Nangabe ufundza liBhayibheli futsi uzindla ngetimiso letikulo, kutawuba melula kwenta tincumo letijabulisa Jehova. Utawubona kutsi awudzingi umtsetfo kuto tonkhe timo lobhekana nato ekuphileni ngobe utawube sewuyati indlela Jehova lacabanga ngayo. w22.08 5 ¶10-12

Inhloko yemndeni lengumKhristu iwutsatsa njengalobalulekile umsebenti wayo wekunakekela umndeni wayo. Nangabe uyinhloko yemndeni, kungenteka ukhatsateke ngekondla umndeni wakho nobe kuwunika indzawo yekuhlala. Kungenteka futsi wesaba kutsi nawungalahlekelwa ngumsebenti wakho angeke uze uwutfole lomunye. Nobe kungenteka bewucabanga kutsi angeke ukhone kuphila ngemali lencane. Sathane uphumelele kakhulu ekusebentiseni kwesaba lokunjengaloku. Sathane wetama kusenta sikholwe kutsi Jehova akanendzaba natsi nekutsi angeke asisite sinakekele imindeni yetfu. Ngenca yaloko, singahle sicabange kutsi kudzingeka sente konkhe lesingakwenta kuze singalahlekelwa yimisebenti yetfu ngisho loko kungasho kungatinaki timiso letiseBhayibhelini. w22.06 15 ¶5-6

Siyati kutsi Nkulunkulu wetfu ‘unesihawu neluvelo, uyephuta kutfukutsela futsi uchichima lutsandvo lolucotfo neliciniso.’ (Eks. 34:6) Jehova uyakutsandza kulunga. (Isa. 61:8) Kumvisa buhlungu kusibona sihlupheka futsi uyakulangatelela kukucedza konkhe kuhlupheka. (Jer. 29:11) Sisibuke ngalabovu leso sikhatsi! Kungako simtsandza kangaka Jehova! Ngusiphi lesinye sizatfu lesisenta silitsandze liciniso? Liciniso lisisita kakhulu. Cabanga nganasi sibonelo. Liciniso leliseBhayibhelini, lifaka ekhatsi litsemba letfu ngelikusasa. Njengobe lihhuka lemkhumbi liwubamba, litsemba letfu lelisekelwe eBhayibhelini lingasicinisa nasibhekene netinkinga ekuphileni. Kulombhalo welusuku lwalamuhla, umphostoli Pawula bekakhuluma ngelitsemba lemaKhristu lagcotjiwe lekuphila ezulwini. Kodvwa loko lakusho kuyasebenta nakumaKhristu lanelitsemba lekuphila phakadze emhlabeni lolipharadisi. (Joh. 3:16) Kufundza ngelitsemba lekuphila phakadze emhlabeni kwente kuphila kwetfu kwaba nenjongo. w22.08 14-15 ¶3-5

Lutsandvo lungasisita kutsi sibetsembe labanye. Incwadzi yaKubaseKhorinte bekucala sehluko 13, ikhuluma ngetintfo letinyenti letentiwa lutsandvo letingasisita kuze sibetsembe labanye futsi siphindze sibetsembe nangabe bebasidvumatile. (1 Khor. 13:4-8) Sibonelo nje, vesi 4 utsi “lutsandvo luyabeketela futsi lunemusa.” Jehova uyasibeketelela nasona ngako natsi kufanele sibabeketelele bazalwane nabodzadze nabasho nobe nabenta tintfo letisiphatsa kabi nobe letisivisa buhlungu. Vesi 5 uchubeka atsi: “[Lutsandvo] alucansuki. Lute emagcubu.” Ngako asifuni kukugcina engcondvweni loko labasente kona kwasivisa buhlungu. Umshumayeli 7:9 utsi akukafaneli ‘sisheshe sitfukutsele.’ Yetama kubuka bazalwane bakho nabodzadze ngendlela Jehova lababuka ngayo. Nkulunkulu uyabatsandza futsi tono tabo akatigcini engcondvweni. Natsi kufanele sente lokufanako. (Hla. 130:3) Kunekutsi sinake emaphutsa abo, kufanele sibuke buntfu babo lobuhle.—Mat. 7:1-5. w22.09 3-4 ¶6-7

Incwadzi yaDanyela isitjela kutsi tintfo letitawenteka ngesikhatsi sekuphela titawulandzelana kanjani. Sibonelo nje, Danyela 12:1 usitjela kutsi Mikhayeli, lokunguJesu Khristu ‘usita bantfu’ baNkulunkulu. Lencenye yalesiphrofetho yacala kugcwaliseka nga-1914 ngesikhatsi Jesu abekwa kutsi abe yiNkhosi yeMbuso waNkulunkulu ezulwini. Nobe kunjalo, Danyela waphindze watjelwa kutsi Jesu ‘utawuvela’ ngesikhatsi “sekucindzeteleka lesingazange sesibe khona kusukela kwacala kuba khona sive kuze kube nguleso sikhatsi.” ‘Lesikhatsi sekucindzeteleka’ sikhatsi ‘sekuhlupheka lokukhulu’ lokukhulunywa ngako kuMatewu 24:21. Jesu utawuvikela bantfu baNkulunkulu ngasekupheleni kwalesikhatsi sekucindzeteleka, lokutawube kuyi-Amagedoni. Nayikhuluma ngalabantfu, incwadzi yeSembulo ibabita ngekutsi ‘sicumbi lesikhulu lesiphume ekuhluphekeni lokukhulu.’—Semb. 7:9, 14. w22.09 21 ¶4-5

Emagama nyalo lasencwadzini yekuphila angesulwa nobe acishwe kulencwadzi, kube shengatsi Jehova uwabhale ngempenseli. (Semb. 3:5, umbhalo longentasi) Kufanele sente konkhe lokusemandleni etfu kuze emagama etfu ahlale abhalwe kulencwadzi kuze kube ngulapho abhalwa nge-inki. Labanye lababhalwe kulencwadzi yekuphila ngulabo labakhetfwe kutsi bayobusa naJesu ezulwini. Ngekusho kwemavi emphostoli Pawula lawatjela ‘tisebenti lakanye nato’ taseFiliphi, emagama alabagcotjiwe labakhetfwe kutsi bayobusa naJesu abhaliwe kulencwadzi yekuphila. (Fil. 4:3) Kodvwa kuze emagama abo ahlale akulencwadzi kufanele bahlale betsembekile. Ngemuva kwekutsi babekwe luphawu lwekugcina, emagama abo atawubhalwa angacishwa kulencwadzi. Loku kwenteka ngaphambi kwekutsi bafe nobe kutawenteka ngaphambi kwekutsi kucale kuhlupheka lokukhulu.—Semb. 7:3. w22.09 14 ¶3; 15 ¶5-6

Kuke kwenteka yini kuwe loku? Lotsite upheka kudla lokutsandzako. Kodvwa ngenca yekutsi ujakile, nobe kukhona lomatasa ngako, ukudla ngekushesha, ungakunambitsi kahle. Nase ucedzile, ubese uyabona kutsi ukudle ngekushesha futsi ufise kutsi kube mane ukudle ungakajaki kuze utokujabulela. Uke walifundza yini liBhayibheli ujakile, futsi wangasakuboni loko lelikufundzisa kona? Tinike sikhatsi kuze ujabulele kufundza liVi laNkulunkulu; tibone ngeliso lengcondvo tintfo lotifundzako, uve emaphimbo ebantfu futsi ucabange ngaloko lokufundzako. Nawenta loku, utawujabula kakhulu. Jesu wabeka ‘sisebenti lesetsembekile nalesihlakaniphile’ kuze sisinikete kudla ngesikhatsi lesifanele, futsi asikwesweli. (Mat. 24:45) Sisebenti lesetsembekile sisebentisa kakhulu umiBhalo lephefumulelwe nasilungiselela lokudla.—1 Thes. 2:13. w22.10 7-8 ¶6-8

LiBhayibheli litsi emalangeni ekugcina batawuba banyenti bantfu labaphukutanako. (2 Phet. 3:3, 4) Loko bakwenta ngenca yekutsi “balandzela tifiso tabo tetintfo letimbi.” (Juda 7, 17, 18) Yini lesingayenta kuze natsi singagcini sesibaphukuti? Lokunye lesingakwenta kutsi singatihlanganisi nebantfu labatsandza kukhonona. (Hla. 1:1) Loku kusho kutsi angeke sitilalele tintfo letishiwo tihlubuki nobe sifundze tintfo letitibhalile. Siyati kutsi nangabe singakanaki, singatikhandza sesinemoya wekukhonona futsi sicale kungabata Jehova kanye neticondziso lasiniketa tona asebentisa inhlangano yakhe. Kuze loko kungenteki, kufanele sitibute: ‘Ngivame kukhonona yini nasitfola sicondziso lesisha nobe nasitfola inchazelo lensha? Ngivame kubona emaphutsa yini kulabo labaholako?’ Nangabe sisheshe sikuyekela kukwenta loko, Jehova utawujabula ngatsi.—Taga 3:34, 35. w22.10 20 ¶9-10

Umoya waNkulunkulu waniketa Hezekeli emandla ekushumayela bantfu ‘labanetingcondvo letilukhuni netinhlitiyo letilukhuni.’ Jehova watjela Hezekeli watsi: “Ngente buso bakho bacina njengebuso babo, ngenta nelibunti lakho lacina njengemabunti abo. Ngente libunti lakho lafanana nedayimane, lacina kwendlula litje lelicinile. Ungabesabi nobe wetfuswe buso babo.” (Hez. 3:8, 9) Bekungatsi Jehova utjela Hezekeli utsi: ‘Ungavumeli labantfu labanetingcondvo letilukhuni bakucedze emandla. Mine ngitakusita.’ Ngemuva kwaloko, umoya waNkulunkulu wasita Hezekeli kutsi awente lomsebenti wekushumayela. Hezekeli wabhala watsi: “Emandla aJehova asebenta ngelizinga lelikhulu kimi.” Kwamtsatsa liviki lomphrofethi kutsi awucondze kahle lomlayeto kuze atoshumayela ngesibindzi. (Hez. 3:14, 15) Jehova wabese umtjela kutsi akaye esihosheni futsi nakefika lapho, “umoya waNkulunkulu wabese uyangena” kuye. (Hez. 3:23, 24) Hezekeli besekakulungele kucala lomsebenti wekushumayela. w22.11 4-5 ¶8-9

Umphrofethi Habakhuki wabhekana netinkinga letinyenti. Ngalesinye sikhatsi, kubonakala ngatsi bekangasetsembi kutsi Jehova unendzaba naye. Ngako watjela Jehova indlela bekativa ngayo. Jehova wawuphendvula umthantazo walenceku yakhe leyetsembekile. (Hab. 2:2, 3) Ngemuva kwekucabangisisa ngendlela Jehova bekabasindzise ngayo bantfu bakhe, Habakhuki waphindze wajabula. Waciniseka kutsi Jehova unendzaba naye nekutsi utamsita akhone kubhekana nanobe nguyiphi inkinga. (Hab. 3:17-19) Yini lesiyifundzako? Nawubhekene netinkinga, thantaza kuJehova umtjele indlela lotiva ngayo, bese wetsembela kuye. Nawenta njalo, ungaciniseka kutsi Jehova utakuniketa emandla lowadzingako kuze ukhone kubeketela. Utametsemba kakhulu nawubona kutsi uyakusita. Nangabe uchubeka neluhlelo lwakho lwekukhonta Nkulunkulu, angeke uvumele tinkinga nobe kungabata kukwehlukanise naJehova.—1 Thim. 6:6-8. w22.11 15 ¶6-7

Jesu netigebengu letimbili lebetiseceleni kwakhe bebasetinhlungwini njengobe kufa kwabo bekusondzela kancane kancane. (Luk. 23:32, 33) Totimbili letigebengu betimphukuta Jesu. (Mat. 27:44; Mak. 15:32) Kodvwa sinye sabese siyashintja. Satsi: “Jesu, ungikhumbule nawufika eMbusweni wakho.” Jesu wasiphendvula ngalamavi lakulombhalo welusuku lwalamuhla. (Luk. 23:39-42) Loko lokwashiwo nguJesu kulesigebengu kufanele kusente sicabange kutsi kutawuba njani kuphila ePharadisi. Ecinisweni, singafundza lokutsite ngeliPharadisi ekubuseni kweNkhosi Solomoni lebekunekuthula. Singalindzela kutsi Jesu, njengobe amkhulu kunaSolomoni, utawusebenta nalabo latawubusa nabo kuze bente tintfo tibe tinhle kakhulu emhlabeni. (Mat. 12:42) Kusebaleni kutsi ‘letinye timvu’ kufanele tibe nendzaba naloko lokufanele tikwente kuze tiphile phakadze ePharadisi.—Joh. 10:16. w22.12 8 ¶1; 9 ¶4

Isaya uyasicinisekisa kutsi Jehova utasilalelisisa nakasiva sikhala kuye futsi utayiphendvula ngekushesha imithantazo yetfu. Isaya wengeta watsi: “Utaniphendvula ngekushesha.” Lamavi lasicinisekisako ayasikhumbuta kutsi Babe wetfu unesifiso lesikhulu futsi utimisele kusisita nasicela lusito. Kwati loku kusisita kutsi sicinisele sibe sijabulile. Jehova ulalela umthantazo wangamunye nangamunye wetfu. Sisho ngani? Encenyeni yekucala ya-Isaya sehluko 30, akukhulunywa nemuntfu munye, kodvwa Jehova ukhuluma nebantfu bakhe balicembu. Nobe kunjalo, ngesiHebheru, kuvesi 19 Jehova ukhuluma nemuntfu ngamunye. Isaya wabhala watsi: “Angeke ukhale”; “nakanjani utakwentela umusa”; “utakuphendvula ngekushesha.” Njengobe Jehova anguBabe lonelutsandvo, unendzaba nemuntfu ngamunye futsi ulalela umthantazo wangamunye nangamunye wetfu.—Hla. 116:1; Isa. 57:15. w22.11 9 ¶5-6

Siyajabula futsi sitive sinekuthula nasishumayela nalapho sifundzisa labanye ngisho nobe siphikiswa. Ngesikhatsi semaKhristu ekucala, baholi bemaJuda batjela baphostoli kutsi bayekele kushumayela, lamadvodza letsembekile akhetsa kulalela Nkulunkulu. Bachubeka bashumayela, futsi lomsebenti bewubajabulisa. (Imis. 5:27-29, 41, 42) Kuliciniso kutsi kufanele sicaphele nasishumayela nangabe umsebenti wetfu uvinjelwe. Kodvwa nasenta konkhe lokusemandleni etfu, sitawuba nekuthula ngenca yekutsi sitawube sijabulisa Jehova futsi sicocela labanye umlayeto losindzisa kuphila. Singaciniseka kutsi singaba nekuthula ngisho sibhekene netimo letimatima. Etikhatsini letinjalo, kufanele sikhumbule kutsi sidzinga kuthula lesingakunikwa nguJehova kuphela. Yetsembela kuye nakubhedvuka sifo, nakunesehlakalo nobe nawuphatfwa kabi. Hlale usondzelene nenhlangano yakhe. Hlale ulibuke ngalabovu likusasa lelihle lelikumele. Nawenta njalo, ‘Nkulunkulu wekuthula utawuba nawe.’—Fil. 4:9. w22.12 21 ¶17-18

Kuze sikwente loko kufanele sisebente kamatima. Loku kufaka ekhatsi kuyekela buntfu lobubi, lobufana nenzondo, intfukutselo nelulaka. (Ef. 4:31, 32) Yini lengenta kube lukhuni kukuyekela loku? Ngobe kungenteka lobunye buntfu lobubi sesinesikhatsi lesidze sinabo. Sibonelo nje, liBhayibheli litsi labanye bantfu ‘basheshe batfukutsele’ futsi ‘basheshe bakwate.’ (Taga 29:22) Umuntfu lonalobuntfu lobubi kungahle kudzingeke achubeke alwa kamatima kuze ashintje, ngisho nangemuva kwekubhajatiswa. (Rom. 7:21-23) Thantaza kuJehova umtjele ngebuntfu lokutfola kumatima kubukhumula, wetsembe kutsi utakuva futsi akusite. (1 Joh. 5:14, 15) Ngisho nobe Jehova angeke abususe ngalokusimangaliso lobuntfu, angakuniketa emandla kuze ukhone kubuyekela. (1 Phet. 5:10) Kwanyalo, yenta ngekuvumelana nemithantazo yakho ngekutsi ungatenti tintfo letingahle tente kutsi lobuntfu lobudzala buphindze bubuye. Ungayivumeli ingcondvo yakho kutsi ihlale icabanga tintfo letimbi.—Fil. 4:8; Khol. 3:2. w23.01 10 ¶7, 9-10

Lenye indlela lesikwenta ngayo loku kutsi siwente ngekutimisela umsebenti wekushumayela. Sikhuluma nabo bonkhe bantfu. Asikhetsi kutsi umuntfu usive sini, unjingile yini nobe uphuyile, ufundzile yini nobe akafundzi. Nasenta njalo, sitawube senta ngekuvumelana nentsandvo yaJehova, lekutsi “tonkhe tinhlobo tebantfu tisindziswe, titfole nelwati lolungulonalona lweliciniso.” (1 Thim. 2:4) Siphindze sikhombise kutsi siyamtsandza Nkulunkulu naKhristu ngekutsi sikhombise kutsi siyabatsandza bazalwane betfu nabodzadze. Siba nendzaba nabo futsi sibasite nababhekene netinkinga. Siyabadvudvuta nabashonelwe ngulotsite labamtsandzako, sibavakashele nabagula futsi sente konkhe lesingakhona kukwenta kuze sibadvudvute nabadvumatekile. (2 Khor. 1:3-7; 1 Thes. 5:11, 14) Siyachubeka sibathantazela, ngobe siyati kutsi “kuncusa kwemuntfu lolungile kunemandla kakhulu.”—Jak. 5:16. w23.01 28-29 ¶7-8

Umakhi uyatfutfuka emsebentini wakhe njengobe sikhatsi sichubeka, natsi singatfutfuka endleleni lesakha ngayo labanye. Singabasita labanye kutsi batfole emandla ekubeketelela tinkinga ngekutsi sibatjele ngalabanye labakhona kubeketela esikhatsini lesendlulile. (Heb. 11:32-35; 12:1) Singakhutsata kuthula ngekukhuluma ngetintfo letinhle letentiwa ngulabanye, ngekutsi silondvolote kuthula nakuvela timo letifuna kukucedza nangekutsi sakhe kuthula nakwenteka kuba nekungevani. (Ef. 4:3) Singachubeka sakha kukholwa kwebazalwane betfu nabodzadze ngekubacocela emaciniso labalulekile laseBhayibhelini, ngekubasita ngetintfo labatidzingako nangekusita labo lasebanekukholwa lokubutsakatsaka. Natsi singajabula futsi senetiseke nasakha bazalwane betfu. Ngalokungafani netakhiwo letigcina tonakele, umsebenti wetfu wekwakha ungahlala kuze kube phakadze! w22.08 22 ¶6; 25 ¶17-18

Jesu waveta buntfu lobubalulekile lokufanele sibe nabo nasifundza liVi laNkulunkulu lokukucondza. (Mat. 24:15) Kuyini kucondza? Likhono lekubona kutsi umcondvo lotsite uhlangana njani nalomunye, nekutsi wehluka njani kulomunye kanye nekubona intfo lengakashiwo. Ngetulu kwaloko, njengobe Jesu aveta, siyakudzinga kucondza kuze sibone tintfo letentekako letigcwalisa tiphrofetho letiseBhayibhelini. Siphindze sibudzinge lobuntfu kuze sizuze ngalokugcwele kuloko lesikufundza eBhayibhelini. Jehova uyabanika bantfu bakhe kucondza. Ngako thantaza kuye, umcele akusite ube nalobuntfu. Yini longayenta kuze wente ngekuvumelana nemithantazo yakho? Hlatiya loko lokufundzako futsi unake kutsi kuhlangana njani naletinye tintfo lotatiko. Letincwadzi titakusita kutsi ukucondze loko lokufundzako eBhayibhelini nekutsi ubone kutsi ungakusebentisa njani ekuphileni kwakho. (Heb. 5:14) Nawunekucondza, utakuva kancono loko lokushiwo yimiBhalo. w23.02 10 ¶7-8

Asewucabange umngani wakho akupha umdvwebo wakadzeni lodulile. Lomdvwebo sewuhhwabile, sewunemabala futsi udzabuke kancane. Nanobe ukulesimo, kodvwa ubita tigidzi tema-dollar. Siyaciniseka kutsi ungawuphatsa kahle futsi uwuvikele. Ngendlela lefanako, Jehova usiphe sipho lesiligugu kakhulu, lokukuphila. Ecinisweni, Jehova ukhombisile kutsi kuphila kwetfu kubaluleke kakhulu kuye ngekutsi anikele ngeNdvodzana yakhe kuze ibe yinhlawulo yetfu. (Joh. 3:16) Jehova unguMtfombo wekuphila. (Hla. 36:9) Umphostoli Pawula walivuma leliciniso ngesikhatsi atsi: “Ngaye siyaphila, siyanyakata, futsi sikhona.” (Imis. 17:25, 28) Ngako singasho kutsi kuphila kwetfu kusipho lesivela kuNkulunkulu. Ngelutsandvo, usipha loko lesikudzingako kuze sihlale siphilile. (Imis. 14:15-17) Kodvwa Jehova akenti simangaliso kuze asigcine siphilile. Kunaloko, ulindzele kutsi sente konkhe lesingakwenta kuze sihlale siphilile emtimbeni futsi sichubeke simkhonta.—2 Khor. 7:1. w23.02 20 ¶1-2

Sibonga kakhulu ngekutsi Jehova Nkulunkulu usinike liBhayibheli! Ngalo, usinika seluleko lesihlakaniphile lesingasisita kutsi sikhone kubeketelela tinkinga lesibhekana nato lamuhla. Uphindze asinike litsemba lelihle ngelikusasa. Kantsi lokubaluleke kakhulu kutsi usebentise liBhayibheli kuze avete buntfu bakhe lobehlukahlukene. Nasicabangisisa ngebuntfu bakhe lobuhle, sitsintseka tinhlitiyo futsi loko kusenta sifune kuba bangani bakhe labakhulu. (Hla. 25:14) Jehova ufuna bantfu bamati. Kadzeni wenta kutsi labanye bantfu bakhe babe nemaphupho, babone imibono futsi watfumela tingilosi kutsi tibanike imilayeto levela kuye. (Num. 12:6; Imis. 10:3, 4) Besingeke sikhone kufundza ngalamaphupho, ngalemibono nangalemilayeto layitfumela ngetingilosi kube loko akuzange kubhalwe phansi. Kungako Jehova enta kutsi kube nemadvodza ‘labhala encwadzini’ loko lafuna kutsi sikwati. Ngenca yekutsi “indlela yaNkulunkulu weliciniso iphelele,” singaciniseka kutsi lendlela layisebentisako kuze akhulume natsi ikahle kakhulu futsi ilusito.—Hla. 18:30. w23.02 2 ¶1-2

Tibekele imigomo letakusita. Tibekele imigomo letawucinisa kukholwa kwakho futsi ikusite ube ngumKhristu lovutsiwe. (Ef. 3:16) Sibonelo nje, ungancuma kunamatsela kakhudlwana eluhlelweni lwakho lwekutidadishela liBhayibheli nekulifundza. (Hla. 1:2, 3) Ungetama nekuthantaza tikhatsi letinyenti ngalokusuka enhlitiyweni. Mhlawumbe kungadzingeka ulunake kakhudlwana luhlobo lwekutijabulisa lolukhetsako nendlela losisebentisa ngayo sikhatsi sakho. (Ef. 5:15, 16) Utawuba ngumKhristu lovutsiwe nawusita labanye. Sibonelo nje, ungatibekela umgomo wekusita labakhulile nalabagulako ebandleni. Mhlawumbe ungabentela lokutsite nobe ubasite kuze bakhone kusebentisa tintfo tabo tebuchwephesha. Usuke ukhombisa kutsi uyabatsandza nalabo labangasibo boFakazi ngekutsi ubacocele tindzaba letimnandzi teMbuso. (Mat. 9:36, 37) Nangabe kungenteka, tibekele umgomo wekuba semsebentini wasikhatsi sonkhe. w22.08 6 ¶16-17