Hlale Ujabulile Nawunakekela Loyo Lomtsandzako

1-2. Jehova utiva njani ngalabo labanakekela lababatsandzako? (Taga 19:17) (Buka netitfombe.)

LOMUNYE umzalwane waseKorea lokutsiwa nguJin-yeol utsi: “Sekuphele iminyaka lengetulu kwalengu-32 mine nemfati wami sishadile. Kuleminyaka lesihlanu leyendlulile bengisolo ngimnakekela. Unesifo lokutsiwa yiParkinson, futsi akakhoni kahle kunyakata. Ngiyamtsandza umfati wami futsi uligugu kimi, ngiyakujabulela kumnakekela. Njalo ebusuku ulala embhedzeni losetjentiswa esibhedlela losekhaya letfu. Ngilala eceleni kwakhe, futsi nasilele sibambana tandla.”

² Unakekela lomtsandzako yini, kungaba ngumtali wakho, loshade naye, umntfwana nobe umngani? Nangabe kunjalo, kungenteka uyakujabulela kumsita. Nawunakekela lomtsandzako, usuke ukhombisa kutinikela kwakho kuJehova. (1 Thim. 5:4, 8; Jak. 1:27) Kodvwa akuhlali kumelula kunakekela loyo lomtsandzako, ngalesinye sikhatsi uba netinkinga labanye labangati ngato. Kungenteka uhle uva ngatsi nguwe wedvwa lonaletinkinga. Nawunalabanye, kungenteka uyamoyitela, kodvwa nasewuwedvwa tinyembeti tivele nje titehlele. (Hla. 6:6) Nanobe kungenteka labanye ababuboni bumatima lobhekana nabo, Jehova uhlala abubona. (Catsanisa na-Eksodusi 3:7.) Tinyembeti takho nekutidzela kwakho kuligugu kuye. (Hla. 56:8; 126:5) Ubona konkhe lokwentako kuze usite loyo lomtsandzako. Uva shengatsi uyakukweleta futsi wetsembisa kukubhadala.​—Fundza Taga 19:17.

3. Ngutiphi tinkinga Abrahama naSara lokungenteka babhekana nato njengobe bebanakekela Thera?

³ LiBhayibheli linetindzaba letinyenti temadvodza nebesifazane lebebanakekela labo lababatsandzako. Cabanga ngesibonelo sa-Abrahama naSara. Nabahamba e-Uri, babe wabo lokunguThera, bekaneminyaka lengaba ngu-200 budzala. Nanobe kunjalo, wahamba nabo. Bahamba emakhilomitha langaba ngu-960 baya eHarani. (Gen. 11:31, 32) Siyaciniseka kutsi Abrahama naSara bebamtsandza Thera, kodvwa cabanga nje kutsi kungenteka bekumatima kangakanani kumnakekela, ikakhulukati njengobe bebakuloluhambo. Kungenteka bebahamba ngemakamela nobe ngetimbongolo, lebekungenta kube matima kakhulu ngaThera lebesekakhulile. Kungenteka bebadzinwa kakhulu ngaletinye tikhatsi, mhlawumbe bakhatsale baze babe yingcuba. Kunobe ngukuphi, siyaciniseka kutsi Jehova wabapha emandla lebebawadzinga. Njengobe Jehova asekela Abrahama naSara, utakusekela nawe futsi akunikete emandla.​—Hla. 55:22.

4. Sitawucoca ngani kulesihloko?

⁴ Injabulo ingakusita ucinisele njengobe unakekela loyo lomtsandzako. (Taga 15:13) Umuntfu lojabulako angachubeka ajabulile ngisho anetinkinga. (Jak. 1:2, 3) Yini longayenta kuze utfole lenjabulo? Lenye indlela kutsi uthantaze, wetsembele kuJehova futsi umcele akusite kutsi uchubeke unembono lokahle. Kulesihloko, sitawucoca ngaletinye tintfo letingentiwa ngulabo labanakekela lababatsandzako kuze bahlale bajabulile. Sitawuphindze sicoce ngekutsi yini lengentiwa ngulabanye kuze babasite. Ase sicale sicoce ngekutsi kubaluleke ngani kutsi labanakekela lababatsandzako bahlale bajabulile nekutsi yini lengabenta bangajabuli.

YINI LENGENTA KUBE MATIMA KUHLALA UJABULILE NAWUNAKEKELA LOTSITE?

5. Kubaluleke ngani kutsi labo labanakekela lotsite kudzingeke bahlale bajabulile?

⁵ Nangabe labo labanakekela labatsite baphelelwa yinjabulo, bangasheshe badzinwe. (Taga 24:10) Nasebadziniwe, bangahle bangabi nemusa futsi bangabi lusito ngendlela labafise ngayo. Ngutiphi tinkinga letingenta kutsi baphelelwe yinjabulo labo labanakekela lotsite?

6. Yini leyenta labo labanakekela labanye badzinwe kakhulu?

⁶ Labo labanakekela lotsite bangahle badzinwe kakhulu. Lomunye dzadze lokutsiwa nguLeah utsi: “Kunakekela lotsite kuyakhandla ngisho nobe lilanga lihamba kahle. Ngalokuvamile litsi lishona, ngisuke sengihhanile. Ngalesinye sikhatsi ngiba bete ngisho nemandla ekuphendvula umlayeto.” Labanye bakutfola kumatima kuphumula ngalokwanele nobe kushaywa ngumoya, lokuyintfo labayidzingako. Lomunye dzadze lokutsiwa ngu-Inés utsi: “Ngikutfola kumatima kulala ngalokwanele. Ebusuku, ngivame kuvuka njalo ngemuva kwema-awa lamabili kuze nginakekele maketala wami. Sekuphele iminyaka mine nemyeni wami singakhoni kuvakasha.” Labanye labanakekela labo lababatsandzako kudzingeka babonge nabamenywa emicimbini letsite kanye nalapho banikwa tabelo enhlanganweni ngenca yekutsi loyo labamnakekelako udzinga kunakekelwa sonkhe sikhatsi. Ngenca yaloko, bangativa babodvwa futsi bangakhoni kwenta loko labafuna kukwenta ngenca yetimo labakuto.

7. Yini leyenta labanye labanakekela lotsite bative banelicala nobe baselusizini?

⁷ Labo labanakekela lotsite bangahle bative banelicala nobe baselusizini. Lomunye dzadze lokutsiwa nguJessica utsi: “Nami nginetinkinga tami. Kutinika sikhatsi ngitinakekela kungenta ngitive nginelicala futsi kube ngatsi ngiticabangela mine.” Labanye labanakekela lotsite bativa banelicala ngenca yekutsi ngalesinye sikhatsi abajabuli ngesimo labakuso. Labanye bakhatsateka ngekutsi abenti lokwenele kuze basite loyo labamtsandzako. Ngetulu kwaloko, labanye bativa banelicala ngenca yekutsi ngesikhatsi batfukutsele, bakhulume intfo lemvise buhlungu loyo labamnakekelako. (Jak. 3:2) Labanye baselusizini ngenca yekutsi lomuntfu akusasuye lona labamatiko, lebekumnandzi kuba naye futsi aphilile. Lomunye dzadze lokutsiwa nguBarbara utsi: “Lenye inkinga lenkhulu kubona lomuntfu lengimtsandzako ahhohloka kancane kancane lilanga nelilanga.”

8. Chaza kutsi labanye bativa njani nababongwa ngulabo lababanakekelako.

⁸ Labanye labanakekela lotsite beva ngatsi ababongwa. Ngasiphi sizatfu? Ngenca yekutsi abakavami kubongwa nobe kunconywa ngemsebenti wabo lomatima kanye nekutidzela kwabo. Emavi lambalwa ekubonga angadlala indzima lenkhulu. (1 Thes. 5:18) Lomunye dzadze lokutsiwa nguMelissa utsi: “Ngalesinye sikhatsi, bengikhala ngenca yekutsi ngidziniwe. Kodvwa nangabe lona lengimnakekelako atsi: ‘Ngiyabonga ngako konkhe longentela kona,’ loko kuyangijabulisa! Lamavi angisita kutsi ngivuke ngelilanga lelilandzelako ngilungele kumsita futsi nginesifiso lesikhulu sekumnakekela.” Lomunye umzalwane lokutsiwa ngu-Ahmadu uchaza indlela lativa ngayo nakabongwa. Yena nemkakhe banakekela umshana wabo lohlala nabo lonesifo sekuwa. Ahmadu utsi: “Ngisho nobe angakucondzi kahle kutsi kungakanani lesikudzelako kuze simnakekele, kungijabulisa kakhulu kumuva atsi uyabonga nobe abhale phasi emavi latsi ‘Ngiyanitsandza.’”

YINI LONGAYENTA KUZE UHLALE UJABULILE?

9. Yini lengentiwa ngulonakekela lotsite kuze akhombise kutsi uyakwati loko langakhona kukwenta nalangeke akhone kukwenta?

⁹ Kwati loko longakhona kukwenta nalongeke ukhone kukwenta. (Taga 11:2) Kute umuntfu longakhona kwenta konkhe lafuna kukwenta. Ngako kufanele sitibekele imincele yalesingakhona kukwenta nalesingeke sikhone kukwenta, futsi sihle sitsi cha kuletinye tintfo. Loko kukahle! Nawenta njalo, ukhombisa kutsi uyakwati longakhona kukwenta nalongeke ukhone kukwenta. Nangabe labanye bacela kukusita, lwemukele lusito lwabo. Lomunye umzalwane lokutsiwa nguJay utsi: “Angeke sikhone kwenta tonkhe tintfo ngasikhatsi sinye. Kwati loko longakhona kukwenta nalongeke ukhone kukwenta futsi ungenti lokungetulu kwaloko, kutakusita kutsi uhlale ujabulile.”

10. Kubaluleke ngani kutsi lonakekela lotsite abe nekucondza? (Taga 19:11)

¹⁰ Bani nekucondza. (Fundza Taga 19:11.) Nawunekucondza, uyavama kwehlisa umoya nabakutfukutselisa. Umuntfu lonekucondza wetama kutfola kutsi yini leyenta umuntfu ente ngendlela lenta ngayo. Lokunye kugula kungenta umuntfu ente tintfo langakavami kutenta. (Shu. 7:7) Sibonelo nje, umuntfu lebekanemusa futsi acabangela angabese utsandza kususa imphikiswano nobe lutfutfuva. Nobe angabese ufuna tintfo ngenkhani, akhonone nobe kube matima kumjabulisa. Nangabe usita lotsite logula kakhulu, kungakusita kufundza ngalokugula kwakhe. Nawukucondza kancono lokugula kwakhe, kutawuba melula kubona kutsi lokubangela ente ngendlela lenta ngayo ngulokugula, hhayi kutsi ungumuntfu lonjalo.​—Taga 14:29.

11. Ngutiphi tintfo letibalulekile labo labanakekela lotsite lokufanele batinike sikhatsi sekutenta njalo ngelilanga? (Tihlabelelo 132:4, 5)

¹¹ Tinike sikhatsi sekucinisa buhlobo bakho naJehova. Kutawuhle kudzingeka ubeke letinye tintfo eceleni kuze wente tintfo “letibaluleke kakhulu.” (Fil. 1:10) Lenye yaletintfo letibaluleke kakhulu kucinisa buhlobo bakho naJehova. INkhosi Davide yenta kukhonta Jehova kwaba yintfo lebaluleke kakhulu ekuphileni kwayo. (Fundza Tihlabelelo 132:4, 5.) Ngendlela lefanako, kubalulekile kutsi utinikete sikhatsi njalo ngelilanga kuze ufundze liBhayibheli futsi uthantaze. Lomunye dzadze lokutsiwa ngu-Elisha utsi: “Kuthantaza nekucabangisisa ngetihlabelelo letidvudvutako, kuyangisita kutsi ngihlale ngijabulile. Umthantazo ungisita kakhulu. Ngititfola ngithantaza kuJehova tikhatsi letinyenti ngelilanga kuze ngehlise umoya.”

12. Kubaluleke ngani kutsi labo labanakekela lotsite batinike sikhatsi sekunakekela imphilo yabo?

¹² Tinike sikhatsi sekunakekela imphilo yakho. Bantfu labamatasatasa, lokufaka ekhatsi labo labanakekela labanye, bangahle bakutfole kumatima kuhlale badla kudla lokunemphilo ngenca yekutsi banesikhatsi lesincane sekuyotsenga kudla lokukahle nekulungisa kudla lokunemphilo. Kudla kahle nekushukumisa umtimba kubalulekile kuze uphile emtimbeni nasengcondvweni. Ngako yetama kusebentisa sikhatsi lesincane lonaso kuze udle kudla lokunemphilo futsi ushukumise umtimba njalo. (Ef. 5:15, 16) Ngetulu kwaloko, yetama kulala ngalokwanele. (Shu. 4:6) Lucwaningo luveta kutsi kulala kusita ingcondvo ikhone kutivusetela. Lesinye sihloko lesikhuluma ngetekwelapha satsi nangabe umuntfu alala ngalokwanele, litawuncipha lizinga lakhatsateka ngalo futsi utawukhona kuhlala ehlise umoya etimeni letimatima. Ngetulu kwaloko, kutawudzingeka utinike sikhatsi sekutijabulisa. (Shu. 8:15) Lomunye lonakekela lotsite waveta kutsi yini lemsitako kuze ahlale ajabulile. Utsi: “Nangabe libalele kamnandzi, ngiphumela ngaphandle futsi ngive bunandzi belilanga. Lokungenani kanye ngenyanga ngibeka lilanga lekutijabulisa nalotsite longumngani.”

13. Kuhle ngani kuhleka? (Taga 17:22)

¹³ Ungakhohlwa kuhleka. (Fundza Taga 17:22; Shu. 3:1, 4) Kuhleka kuyasita kuze uphile emtimbeni nasengcondvweni. Nangabe unakekela lotsite, akukavami kutsi tonkhe tintfo tenteke ngendlela loyihlelile. Kodvwa nangabe utfola intfo lehlekisako ngisho nasesimeni lesimatima, kutawuba melula kutsi ukhone kusibeketelela. Ngetulu kwaloko, kuhleka nalona lomnakekelako kungacinisa budlelwane benu.

14. Kungakusita njani kukhuluma nemngani lometsembako?

¹⁴ Khuluma nemngani lometsembako. Nanobe ungetama kamatima kuhlala ujabulile, ngalesinye sikhatsi utawukhatsateka kakhulu. Etikhatsini letinjalo, kungakusita kutjela umngani wakho indlela lotiva ngayo, umngani longeke akwehlulele nobe ente lesimo sibonakale sisibi kakhulu. (Taga 17:17) Kukunika kwakhe indlebe kanye nemavi akhe lakucinisekisako kungaba nguloko kanye lokudzingako kuze uhlale ujabulile.​—Taga 12:25.

15. Kungakujabulisa njani kunaka kakhulu litsemba lonalo?

¹⁵ Cabangani kutsi kutawuba njani kuphila kwenu ePharadisi. Khumbula kutsi umsebenti wekunakekela loyo lomtsandzako wesikhashana, futsi akusiwo umsebenti Jehova lebekawudalele bantfu. (2 Khor. 4:16-18) “Kuphila lokungukonakona” kuseta. (1 Thim. 6:19) Kungenteka kungakujabulisa kakhulu kucoca naloyo lomnakekelako mayelana nekutsi yini lenitawuyenta ndzawonye ePharadisi. (Isa. 33:24; 65:21) Lomunye dzadze lokutsiwa nguHeather utsi: “Ngivame kutjela labo lengibanakekelako kutsi esikhatsini lesitako sitawutfunga ndzawonye, sigijime futsi sigibele emabhayisikili ndzawonye. Sitawubabhakela sinkhwa labo lesibatsandzako labavusiwe futsi sibaphekele kudla. Sibese sibonga Jehova kanye kanye ngalelitsemba letfu.”

INDLELA LABANYE LABANGASITA NGAYO

16. Singamsita njani loyo lonakekela lotsite ebandleni? (Buka nesitfombe.)

¹⁶ Sita labanakekela lotsite kutsi babe nesikhatsi sabo. Tsine lesisebandleni singasita ngekutsi sisite lona lonakekela lotsite. Nasenta njalo, simniketa sikhatsi sekutsi ashaywe ngumoya futsi akhone kwenta tintfo takhe. (Gal. 6:2) Labanye bamemeteli bakha luhlelo lweliviki kuze bakhone kwenta loku. Lomunye dzadze lokutsiwa nguNatalya, lonakekela indvodza yakhe lekhubatekile utsi: “Lomunye umzalwane ebandleni uta kanye nobe kabili ngeliviki kuze acitse sikhatsi nendvodza yami. Bashumayela ndzawonye, bacoce futsi baze babukele ema-movie. Umyeni wami utijabulela kakhulu letikhatsi leti futsi kunginiketa sikhatsi sekutsi ngikhone kwenta tintfo tami, njengekulula tinyawo.” Kuletinye timo, ungaze ucele kucitsa busuku bunye ekhaya lalona lonakekela lotsite kuze akhone kuphumula kahle.

17. Singabasita njani labo labanakekela lotsite emihlanganweni yelibandla?

¹⁷ Sita labo labanakekela lotsite emihlanganweni yelibandla. Kungahle kube kuncane kakhulu labakuvako labo labanakekela lotsite emihlanganweni yelibandla, emihlanganweni yesigodzi nasemihlanganweni yesifundza ngenca yekutsi basuke bamatasa banakekela lona labamtsandzako. Labo labasebandleni bangacela kusita ngekutsi bahlale nalona lonakekelwako kumunye walemihlangano nobe incenye yayo. Nangabe lona lonakekelwako angaphumi endlini, ungacela kuya ekhaya labo futsi ungene naye emihlanganweni ngetintfo tebuchwephesha kuze kutsi lona lomnakekelako akhone kuya matfupha emihlanganweni.

18. Yini lenye lesingayentela labo labanakekela labanye?

¹⁸ Bancome futsi ubathantazele labo labanakekela labanye. Labadzala belibandla benta kahle ngekuhlale bavakashela labo labanakekela labanye kuze babakhutsate. (Taga 27:23) Ngisho nobe timo tetfu tinjani, sonkhe ebandleni singahlale sibancoma labo labanakekela labanye. Ngetulu kwaloko, singacela Jehova kutsi achubeke abacinisa futsi abasite kutsi bahlale bajabulile.​—2 Khor. 1:11.

19. Yini lokufanele sibuke phambili kuyo?

¹⁹ Ngekushesha, Jehova utawesula tinyembeti letibangelwa buhlungu kubo bonkhe bantfu. Kugula nekuguga angeke kusaba khona. (Semb. 21:3, 4) “Labachutako bayawugcumagcuma njengenyamatane.” (Isa. 35:5, 6) Imiphumela lebuhlungu lebangelwa kukhula ngeminyaka kanye nebuhlungu lobubangelwa kunakekela loyo lesimtsandzako logulako ‘kutawuba tintfo lesetendlulile letingeke tisakhunjulwa.’ (Isa. 65:17) Ngisho nanyalo njengobe sisalindzele kutsi kufezeke lelitsemba letfu lelihle, Jehova ngeke aze asishiye. Nangabe sichubeka setsembela kuye kuze asinikete emandla, utasisita kutsi ‘sicinisele ngalokuphelele ngekubeketela nangenjabulo.’​—Khol. 1:11.