Cabanga NgaJesu UmPhristi Wetfu Lophakeme Loneluvelo

1-2. (a) Yini leyenta Jehova watfumela iNdvodzana yakhe emhlabeni? (b) Sitawucoca ngani kulesihloko? (KumaHebheru 5:7-9)

EMINYAKENI lengaba ngu-2 000 leyendlulile, Jehova Nkulunkulu watfumela iNdvodzana yakhe leligugu kakhulu kutsi ite emhlabeni. Ngasiphi sizatfu? Kuletinye tato, kutsi bekafuna kukhulula bantfu esonweni nasekufeni futsi alungise umonakalo lowabangelwa nguSathane. (Joh. 3:16; 1 Joh. 3:8) Jehova bekati nekutsi loko Jesu bekatawubhekana nako nakalamhlabeni bekutamlungiselela kutsi abe ngumPhristi wetfu Lophakeme loneluvelo, lonesihawu kanye nemusa. Jesu wacala kwenta lomsebenti ngemuva kwekubhajatiswa nga-29 C.E.a

² Kulesihloko, sitawucoca ngekutsi loko lokwenteka kuJesu ngesikhatsi alamhlabeni kwamsita njani kutsi akufanele kahle kuba ngumPhristi Lophakeme loneluvelo. Njengobe sikhulisa indlela lesicondza ngayo kutsi Jesu “wapheleliswa” njani kuze ente lomsebenti, sitakutfola kumelula kusondzela kuJehova ngisho nobe sidvunyatwa tono tetfu nobe emaphutsa etfu.​—Fundza KumaHebheru 5:7-9.

INDVODZANA YANKULUNKULU LAYITSANDZAKO ITA EMHLABENI

3-4. Nguluphi lushintjo lolukhulu Jesu labhekana nalo ngesikhatsi alamhlabeni?

³ Linyenti letfu like lashintjelwa timo ekuphileni, njengekutfutsa sishiye likhaya lesilitsandzako, imindeni yetfu kanye nebangani. Akusimelula kubhekana nelushintjo lolunjalo. Kodvwa kute umuntfu loke washintjelwa timo njengaJesu. Jesu bekanesikhundla lesiphakeme kakhulu kwendlula onkhe emadvodzana aJehova langumoya ezulwini. Jehova bekamtsandza kakhulu futsi bekahlale ajabulile njengobe bekasebenta “esandleni [saNkulunkulu] sangesekudla.” (Hla. 16:11; Taga 8:30) Nobe kunjalo, umbhalo waKubaseFiliphi 2:7 utsi Jesu “watidzela” ngekutitsandzela, washiya sikhundla lesiphakeme ezulwini kuze aphile nebantfu labanesono emhlabeni.

⁴ Cabanga futsi nangetimo Jesu latalelwa kuto kanye neminyaka yekucala angumuntfu lamhlabeni. Watalelwa emndenini loweswele njengobe loko kubonakala kulomnikelo lophansi lowentiwa batali bakhe ngemuva kwekutsi atalwe. (Lev. 12:8; Luk. 2:24) Ngesikhatsi iNkhosi Herodi lembi iva ngekutalwa kwaJesu, yetama kumbulala. Kuze umndeni wakubo uphunyule kuHerodi, wabalekela eGibhithe sikhatsi lesitsite. (Mat. 2:13, 15) Loku bekulushintjo lolukhulu kakhulu endleleni Jesu bekaphila ngayo ezulwini!

5. Yini Jesu layibona nakalamhlabeni, futsi loko labhekana nako kwamlungiselela njani umsebenti wakhe wekuba ngumPhristi Lophakeme? (Buka nesitfombe.)

⁵ Ngesikhatsi Jesu alamhlabeni, wabona bantfu labanyenti bahlupheka. Siyaciniseka kutsi washonelwa nabantfu labatsandzako, lokungenteka bekufaka ekhatsi nababe wakhe Josefa. Nakenta umsebenti wekushumayela, wahlangana nebantfu labanebulephelo, labangaboni emehlweni, labakhubatekile kanye nebatali labashonelwe bantfwana, futsi wabavela. (Mat. 9:2, 6; 15:30; 20:34; Mak. 1:40, 41; Luk. 7:13) Kuliciniso kutsi lokuhlupheka bekakubona nakasezulwini. Kodvwa nyalo njengobe besekangumuntfu emhlabeni, lokuhlupheka kwebantfu wakubona ngeliso lelehlukile. (Isa. 53:4) Loko Jesu labhekana nako ngesikhatsi alamhlabeni kwamsita kutsi ayicondze indlela bantfu labativa ngayo, tintfo letibakhatsatako kanye nelusizi lwabo. Naye matfupha bekativa ngendlela bantfu bebativa ngayo, lokufaka ekhatsi kuva buhlungu, kudzinwa kanye nelusizi.

JESU WAKHOMBISA KUTSI UYAVELANA NEBANTFU

6. Imifanekiso yemphrofethi Isaya isifundzisani ngeluvelo lwaJesu nemusa wakhe? (Isaya 42:3)

⁶ Kuso sonkhe sikhatsi Jesu lasicitsa ashumayela, wabakhombisa luvelo lolukhulu labo bebabutsakatsaka futsi baphatfwa kabi. Ngekwenta njalo, bekagcwalisa siphrofetho. EmiBhalweni yesiHebheru, bantfu labaphumelelako futsi labacinile bahle bafananiswa nengadze levundzile, nobe netihlahla letinkhulu letinhle. (Hla. 92:12; Isa. 61:3; Jer. 31:12) Kodvwa labeswele nalabacindzetelwako bafananiswa nemhlanga lofafabukile kanye nentsambo yesibane lelotitako, lokutintfo letingakabaluleki kangako kubantfu. (Fundza Isaya 42:3; Mat. 12:20) Aphefumulelwe, umphrofethi Isaya wasebentisa lemifanekiso kuze aphrofethe ngelutsandvo nemusa Jesu bekatakukhombisa bonkhe labo bebabukelwa phansi.

7-8. Jesu wasigcwalisa njani siphrofetho sa-Isaya?

⁷ Umbhali weliVangeli lokunguMatewu wawasebentisa kuJesu lamavi a-Isaya latsi: “Ngeke iwufohlote umhlanga lofafabukile, ngeke iyicime nentsambo yesibane lelotitako.” Letinye timangaliso letentiwa nguJesu betisita labo labacindzetelwako lokungenteka bebeva ngatsi bangumhlanga lofafabukile, nobe labo bebete litsemba lebebativa ngatsi bayintsambo yesibane lelotitako lengacisha nobe kunini. Emkhatsini wabo, bekunendvodza lebeyigcwele bulephelo. Beyinalo yini litsemba lekutsi itawelapheka futsi icitse sikhatsi lesimnandzi nemndeni wayo kanye nebangani? (Luk. 5:12, 13) Phindze ucabange nangalendvodza lebeyingeva etindlebeni futsi lengakhoni kukhuluma kahle. Cabanga nje kutsi beyitiva njani nayibona labanye bacoca ibe yona ingeva lutfo. (Mak. 7:32, 33) Kodvwa akusiko loko kuphela.

⁸ Ngemalanga aJesu, emaJuda lamanyenti bekakholelwa kutsi nangabe umuntfu agula nobe akhubatekile, bekasuke ajeziselwa tono takhe nobe tebatali bakhe. (Joh. 9:2) Ngenca yalenkholelo lengemanga, labantfu bebentiwa bative bangasilutfo. Agcwalisa siphrofetho sa-Isaya, Jesu wabelapha futsi wabasita kutsi babe nelitsemba kuNkulunkulu. Loku kusifundzisani ngendlela Jesu lativa ngayo ngatsi lamuhla?

9. Umbhalo waKumaHebheru 4:15, 16 ukhombisa njani kutsi umPhristi wetfu Lophakeme uvelana mbamba nebantfu labanesono?

⁹ Fundza KumaHebheru 4:15, 16. Singaciniseka kutsi Jesu utawuhlale avelana natsi. Kusho kutsini loko? Umuntfu loneluvelo uyatsintseka nakabona lomunye ahlupheka nobe asebuhlungwini. Ligama lesiGriki lelitsi “kuvelana” lisho kutifaka eticatfulweni talomunye umuntfu futsi utive ngendlela lativa ngayo. (Buka nembhalo waKumaHebheru 10:34, lapho khona Pawula asebentisa sento sesiGriki lesifanako.) Tindzaba letimayelana netimangaliso letentiwa nguJesu tikhombisa kutsi bekumtsintsa kangakanani kubona labanye bahlupheka. Akazange nje abelaphe ngobe bekufanele akwente loko. Bekanendzaba mbamba nabo futsi afuna kubasita. Sibonelo nje, ngesikhatsi elapha lendvodza lenebulephelo, loko bekangakwenta akhashane, kodvwa wakhetsa kuyitsintsa, futsi kungenteka bekukwekucala ngemuva kweminyaka leminyenti yagcina kutsintfwa ngulomunye umuntfu! Jesu wayicabangela nalendvodza lebeyingaboni emehlweni ngobe wayisusa esicumbini sebantfu lebesinemsindvo futsi wayelapha babodvwa. Ngesikhatsi lomunye umFarisi abukela phansi lomunye umfati lophendvukile lebekageza tinyawo taJesu ngetinyembeti takhe futsi atisula ngetinwele takhe, Jesu wamvikela lomfati. (Mat. 8:3; Mak. 7:33; Luk. 7:44) Bekangatehlukanisi kubantfu labagulako nobe kulabente tono letinkhulu. Kunaloko, bekafuna kutsi bete kuye futsi abakhombisa kutsi uyabatsandza. Singaciniseka kutsi uvelana mbamba natsi!

INDLELA LESILINGISA NGAYO UMPHRISTI WETFU LOPHAKEME LAMUHLA

10. Yini lesingayisebentisa lamuhla kuze sisite labangeva etindlebeni nalabangaboni emehlweni? (Buka netitfombe.)

¹⁰ Njengobe sibalandzeli baJesu labetsembekile, setama kumlingisa ngekutsi sikhombise labanye lutsandvo, luvelo, kanye nemusa. (1 Phet. 2:21; 3:8) Ngisho nobe singeke sikhone kwelapha labo labangeva etindlebeni nalabo labangaboni emehlweni, singabasita kutsi bati Nkulunkulu. Sibonelo nje, tincwadzi letisekelwe eBhayibhelini nyalo setitfolakala ngetilwimi tetandla letingetulu kwa-100. Ngetulu kwaloko, kuze kusitwe labangaboni kahle, sekukhicitwe tincwadzi te-braille ngetilwimi letingetulu kwa-60, nekuchazwa kwalokwenteka kuma-video (audio descriptions) sekukhichitwe ngetilwimi letingetulu kwa-100. Loku kusita labangeva etindlebeni nalabangaboni emehlwemi kutsi basondzelane naJehova kanye neNdvodzana yakhe.

11. Inhlangano yaJehova ikhombise njani kutsi ineluvelo ngabo bonkhe bantfu njengaJesu? (Imisebenti 2:5-7, 33) (Buka netitfombe.)

¹¹ Inhlangano yaJehova yenta konkhe lokusemandleni kuze isite tonkhe tinhlobo tebantfu. Khumbula kutsi ngemuva kwekuvuswa kwakhe, Jesu watfululela umoya longcwele kuze bonkhe labo lebebete emkhosini weliPhentekhoste beve tindzaba letimnandzi, nguloyo naloyo ‘ngelulwimi lwakhe.’ (Fundza Imisebenti 2:5-7, 33.) Ilandzela sibonelo sakhe, inhlangano yaJehova ishicilele tincwadzi letisekelwe eBhayibhelini ngetilwimi letingetulu kwa-1 000, letinye tato tikhulunywa bantfu labambalwa. Sibonelo nje, letinye tilwimi temdzabu tikhulunywa bantfu labambalwa labahlala eNyakatfo naseNingizimu yeMelika. Nobe kunjalo, sekutfolakala tincwadzi ngetilwimi temdzabu letingetulu kwa-160 kuze kucinisekiswe kutsi bantfu labanyenti kakhulu bayativa tindzaba letimnandzi. Ngetulu kwaloko, tincwadzi tetfu tiphindze titfolakale ngetilwimi letingetulu kwa-20 tesiRomany. Bantfu labanyenti kakhulu labakhuluma letilwimi balemukele liciniso.

12. Ngukuphi lokunye inhlangano lekwentela bazalwane nabodzadze?

¹² Ngetulu nje kwekucondzisa umsebenti wekushumayela tindzaba letimnandzi, inhlangano yaJehova iphindze isite labo lababhekene netehlakalo. Kuze loko kwenteke, tinkhulungwane tebazalwane nabodzadze tiyavolontiya kuze tisite labo labadzinga lusito. Inhlangano iphindze isite ekwakheni tindzawo letikahle tekukhontela Nkulunkulu lapho bantfu bangahlangana khona ndzawonye kuze bafundze lokunyenti ngelutsandvo Nkulunkulu lanalo ngabo.

UMPHISTI WETFU LOPHAKEME ANGAKUSITA

13. Ngutiphi letinye tindlela Jesu lasisita ngato?

¹³ Njengobe Jesu angumelusi wetfu lomuhle, unaka sidzingo semuntfu ngamunye sekwati Nkulunkulu. (Joh. 10:14; Ef. 4:7) Ngaletinye tikhatsi, timo ekuphileni tingenta kutsi sive ngatsi sifana nentsambo yesibane lelotitako nobe nemhlanga lofafabukile. Singahle sidvumateke kakhulu ngenca yekutsi sigula kakhulu, ngenca yemaphutsa lesiwentile nobe ngenca yekutsi sicabene nemzalwane nobe dzadze. Singahle sikutfole kumatima kunaka litsemba letfu lesikhatsi lesitako, futsi sicabange nje kuphela ngetinkinga tetfu kanye nekuhlupheka kwetfu lesibhekene nako nyalo. Kodvwa khumbula kutsi Jesu uyakubona loko lobhekene nako futsi uyabucondza bumatima lobhekene nabo, nendlela lotiva ngayo. Umusa wakhe wenta kutsi akusite. Sibonelo nje, angasebentisa umoya longcwele kuze ukunike emandla nawubutsakatsaka. (Joh. 16:7; Thit. 3:6) Ngetulu kwaloko, Jesu angasebentisa “tipho letibantfu” kanye nebazalwane bakho nabodzadze kuze bakukhutsate, bakusekele futsi bakusite.​—Ef. 4:8.

14. Yini lesingayenta nasitiva sidvumatekile?

¹⁴ Nangabe udvumatekile, khumbula kutsi Jesu ungumPhristi wetfu Lophakeme, futsi ucabange ngalokujulile ngekutsi loko kusho kutsini kuwe. Khumbula kutsi Jehova akamtfumelanga nje kuphela emhlabeni kuze atonikela ngekuphila kwakhe kube yinhlawulo, kodvwa wamtfumela nekutsi atawuticondza kancono tinkinga bantfu labanesono lababhekene nato. Nasidvumatekile ngenca yetono tetfu nobe ngenca yebutsakatsaka betfu, Jesu uhlale akulungele kusisita “ngesikhatsi lesifanele” futsi uyafuna kukwenta loko.​—Heb. 4:15, 16.

15. Shano lokwenteka lokukhombisa indlela labangasitwa ngayo kutsi babuyele ebandleni labo labashiye umhlambi waJehova.

¹⁵ Jesu uphindze asebentise bantfu bakhe kuze asite labo labashiye Jehova kutsi babuyele kuye. (Mat. 18:12, 13) Cabanga nganaku lokwenteka kuStefano.b Ngemuva kwekutsi sekuphele iminyaka lengu-12 asusiwe ebandleni, wancuma kuya emihlanganweni. Utsi: “Bekungasimelula, kodvwa bengifuna kuphindze ngibe yincenye yemndeni waJehova lonelutsandvo. Labadzala belibandla lebebangivakashela bangenta ngativa ngemukelekile. Ngalesinye sikhatsi bengitiva ngingasilutfo, futsi bengifuna kuphonsa lithawula. Kodvwa labazalwane bangikhumbuta kutsi Jehova naJesu bafuna ngingapheli emandla. Ngesikhatsi ngibuyiselwa ebandleni, lonkhe libandla lemukela mine nemndeni wami ngetandla letifutfumele. Ekugcineni, umfati wami wavuma kuchutjelwa sifundvo seliBhayibheli, futsi lamuhla sikhonta Jehova singumndeni.” Siyaciniseka kutsi umPhristi wetfu Lophakeme lonelutsandvo ujabula kakhulu nakabona labo labaphendvukile batfola lusito labaludzingako kuze babuyele ebandleni!

16. Yini lekwenta ubonge ngekuba nemPhristi Lophakeme lovelana natsi kangaka?

¹⁶ Nakalamhlabeni, Jesu wasita bantfu labanyenti kakhulu ngesikhatsi lesifanele. Lamuhla, singaciniseka ngalokuphelele kutsi utasisita nobe nini nasidzinga lusito. Ngetulu kwaloko, emhlabeni lomusha lota ngekushesha, utawusita bantfu labalalelako kutsi babe bete sono. Sibonga kakhulu kuNkulunkulu wetfu Jehova, lokwatsi ngelutsandvo lwakhe lolukhulu nangemusa wakhe lomkhulu wabeka iNdvodzana yakhe kutsi ibe ngumPhristi wetfu Lophakeme lovelana natsi!