“Wena Uligugu Kakhulu”!

1-2. Yini lesingayenta kuze sibone kutsi siligugu kuJehova?

EMKHATSINI webantfu baJehova labaligugu, kunalabo labatibukela phansi. Kungenteka lotsite wabaphatsa ngendlela leyabenta bativa ngatsi abasilutfo. Ukile yini wativa ngalendlela? Nangabe kunjalo, yini lengakusita ubone kutsi uligugu emehlweni aJehova?

² Kungakusita kufundza tindzaba letiseBhayibhelini letiveta kutsi Jehova ufuna bantfu babukwe njani futsi baphatfwe njani. INdvodzana yakhe Jesu beyibanika sitfunti bantfu futsi ibahlonipha. Ngekwenta njalo, yakhombisa kutsi yona naBabe wayo ibatsatsa njengalababalulekile labo labatfobekile, labangatiboni babaluleke kangako. (Joh. 5:19; Heb. 1:3) Kulesihloko, sitawucoca ngekutsi: (1) Jesu wabasita njani bantfu babona kutsi babalulekile, nekutsi (2) yini lesingayenta kuze siticinisekise tsine kutsi siligugu mbamba kuJehova.​—Hag. 2:7.

INDLELA JESU LASITA NGAYO BANTFU BABONA KUTSI BABALULEKILE

3. Jesu wabaphatsa njani bantfu baseGalile lebebafuna lusito lwakhe?

³ Ngesikhatsi Jesu ashumayela eGalile, bantfu labanyenti baya kuye kuze bamlalele futsi belashwe. Jesu watsi labantfu “bebaphetfwe kabi futsi bahlakatekile njengetimvu letite umelusi.” (Mat. 9:36) Baholi babo benkholo bebabaphatsisa kwebantfu labangenamsebenti, baze bababita ngekutsi ‘bantfu labacalekisiwe.’ (Joh. 7:47-49) Kodvwa Jesu wabaphatsa ngenhlonipho ngekutsi atinikete sikhatsi sekutsi abafundzise futsi abelaphe. (Mat. 9:35) Ngetulu kwaloko, kuze asite bantfu labanyenti, wacecesha baphostoli bakhe emsebentini wekushumayela futsi wabanika ligunya lekwelapha kugula kanye netifo.​—Mat. 10:5-8.

4. Yini lesiyifundzako endleleni Jesu labaphatsa ngayo labo labatfobekile lebebafuna kumlalela?

⁴ Ngekutsi Jesu abahloniphe futsi abacabangele labo bebamlalele, wakhombisa kutsi yena naBabe wakhe babatsatsa njengalabaligugu labo labavame kubukelwa phansi ngulabanye. Nangabe ukhonta Jehova kodvwa ungabata ngekubaluleka kwakho, cabanga ngendlela Jesu labaphatsa ngayo labo labatfobekile lebebafuna kufundza kuye. Kwenta njalo kungakusita ubone kutsi uligugu kanganani kuJehova.

5. Chaza simo salomunye umfati lowahlangana naJesu.

⁵ Jesu akagcinanga nje ngekufundzisa ticumbi tebantfu kodvwa bekaphindze anake umuntfu ngamunye. Sibonelo nje, ngesikhatsi ashumayela eGalile, wahlangana nalomunye umfati lebesekuphele iminyaka lengu-12 anesifo lesingakavami sekopha. (Mak. 5:25) Lomfati bekangakahlanteki ngekusho kweMtsetfo, ngako nobe ngubani lomtsintsako naye bekaba ngumuntfu longakahlanteki. Ngenca yaloko, kungenteka bekangakavami kuba nebantfu. Ngetulu kwaloko, bekangakhoni kuyokhonta Nkulunkulu nalabanye esinagogeni nobe kuya emikhosini. (Lev. 15:19, 25) Ngako siyabona kutsi akusiko nje kutsi lomfati bekagula kuphela kodvwa bekaphindze acindzetelekile.​—Mak. 5:26.

6. Welapheka njani lomfati lebekanesifo sekopha?

⁶ Lomfati lebekacindzetelwe ngulokugula bekafuna kutsi Jesu amelaphe. Kodvwa akazange aye kuye ngalokucondzile ayomcela kutsi amelaphe. Ngasiphi sizatfu? Mhlawumbe bekativa anemahloni nobe ahlazekile ngenca yekugula kwakhe. Nobe kungenteka bekesaba kutsi Jesu utamcosha ngobe uye esicumbini sebantfu kantsi akahlanteki ngekusho kweMtsetfo. Ngako wamane watsintsa ingubo yaJesu yangetulu, aciniseka kutsi loko nje kukodvwa bekutamelapha. (Mak. 5:27, 28) Wabusiswa ngenca yekukholwa kwakhe ngobe welapheka. Jesu wabese uyabuta kutsi ngubani lomtsintsile, futsi lomfati wavuma kutsi nguye. Wamphatsa njani Jesu?

7. Jesu wamphatsa njani lomfati lebekacindzetelekile? (Makho 5:34)

⁷ Jesu wamphatsa ngemusa nangenhlonipho lomfati. Wabona kutsi ‘beketfukile futsi esaba.’ (Mak. 5:33) Acabanga ngendlela bekativa ngayo, wamkhulumisa ngemusa futsi wamkhutsata. Waze wambita ngekutsi “ndvodzakati,” lokuligama lelimnandzi, lelingagcini nje ngekuveta lutsandvo kodvwa liphindze livete nemusa. (Fundza Makho 5:34.) Kulana kuphela eBhayibhelini lapho Jesu abita khona umuntfu wesifazane ngekutsi “ndvodzakati.” Kungenteka wasebentisa leligama lelinemusa kulesimo ngobe bekabona kutsi lomfati bekesaba kakhulu. Cabanga nje ngendlela lokungenteka wativa akhululeke ngayo! Kube Jesu akazange amkhulumise ngemusa, kungenteka bekatawuhamba elaphekile kodvwa abe ativa anelicala. Kunaloko, Jesu wamsita kutsi atibone anguloko langiko mbamba, atibone ayindvodzakati leligugu yaBabe wasezulwini lonelutsandvo.

8. Ngutiphi tinkinga lomunye dzadze waseBrazil labhekana nato?

⁸ Nalamuhla, labanye bantfu baNkulunkulu banekugula lokubenta bative bacindzetelekile futsi bangasilutfo. Lelinye lihlahlandlela laseBrazil lokutsiwa nguMaria,a latalwa lite imilente nesandla sangesencele. Maria utsi: “Esikolweni bebavame kungihlukubeta ngenca yekukhubateka kwami. Besebangetse ngisho nemagama labuhlungu. Bengiphatfwa kabi ngisho nangemalunga emndeni wakitsi.”

9. Yini leyasita Maria wabona kutsi uligugu kuJehova?

⁹ Yini leyasita Maria? Ngesikhatsi aba nguFakazi waJehova, bazalwane nabodzadze bamdvudvuta futsi bamsita watibona ngendlela Jehova lambona ngayo. Utsi: “Angaphela onkhe emakhasi ebhukwini lami nangingabhala bonkhe labo labangisitile! Ngimbonga ngenhlitiyo yami yonkhe Jehova ngekunginiketa umndeni lomuhle nakangaka.” Bazalwane nabodzadze bamsita Maria wabona kutsi uligugu emehlweni aNkulunkulu.

10. Ngutiphi tinkinga lebekanato Mariya waseMagdala? (Buka netitfombe.)

¹⁰ Cabanga ngendlela Jesu lasita ngayo lomunye wesifazane lokutsiwa nguMariya waseMagdala. Bekangenwe ngemadimoni langu-7! (Luk. 8:2) Kungenteka bekenta tintfo letingakavami ngenca yalamadimoni, lokwenta kutsi bantfu bambalekele. Kuleso sikhatsi lesimatima ekuphileni kwakhe, kungenteka wativa alahliwe, angasetsembi lutfo futsi angenabani. Kubonakala ngatsi Jesu wawakhipha lamadimoni, futsi waba ngumfundzi wakhe lotinikele. Nguyiphi lenye indlela Jesu lamsita ngayo Mariya waseMagdala kuze abone kutsi bekaligugu kanganani kuNkulunkulu?

11. Jesu wamkhombisa njani Mariya waseMagdala kutsi bekaligugu kuNkulunkulu? (Buka netitfombe.)

¹¹ Jesu wacela Mariya waseMagdala kutsi ahambe naye kanye nebaphostoli bakhe nabayoshumayela.b Ngenca yaloko, wachubeka asitakala nakeva Jesu afundzisa labanye. Ngetulu kwaloko, Jesu wabonakala kuye ngalelilanga lavuswa ngalo ekufeni. Bekangulomunye webafundzi bakhe bekucala lakhuluma naye ngalelo langa. Jesu waphindze wamnika nemsebenti wekuyotjela baphostoli bakhe kutsi uvusiwe. Konkhe loku kukhombisa kutsi Mariya waseMagdala bekaligugu mbamba kuJehova!​—Joh. 20:11-18.

12. Chaza kutsi indlela Lidia lakhula ngayo yamenta njani wativa angafunwa ngumuntu.

¹² NjengaMariya waseMagdala, labanyenti lamuhla balwa nemiva yekungafunwa. Lomunye dzadze waseSpain lokutsiwa nguLidia utsi ngaphambi kwekutsi atalwe, make wakhe bekacabanga kukhipha sisu. Uyakhumbula kutsi ngisho asesemncane make wakhe bekangamnaki futsi bekamhlukubeta ngemavi. Utsi: “Umgomo wami ekuphileni bekukutsi ngemukelwe bantfu futsi bangitsandze. Bengesaba kutsi angiyuze ngifanelwe kutsandvwa ngobe make bekangente ngetsemba kutsi ngingumuntfu lomubi.”

13. Yini leyasita Lidia wabona kutsi uligugu kuJehova?

¹³ Ngemuva kwekutsi Lidia afundze liciniso, kuthantaza, kudadisha kanye nemavi lamnandzi ebazalwane nabodzadze kanye netintfo letinhle lebebamentela tona kwamsita wabona kutsi uligugu kuJehova. Utsi: “Indvodza yami ivame kungitjela kutsi ingitsandza kakhulu kangakanani. Ihlale ingikhumbuta ngebuntfu bami lobuhle. Nalabanye bangani bami benta lokufanako.” Ukhona yini lomcabangako lodzinga kusitwa abone kutsi uligugu kanganani emehlweni aJehova?

UNGATIBONA NJANI NGENDLELA JEHOVA LAKUBONA NGAYO?

14. Umbhalo wa-1 Samuweli 16:7 usisita njani kutsi sibone indlela Jehova labuka ngayo bantfu? (Buka nelibhokisi lelitsi “Yini Leyenta Bantfu BaJehova Babe Ligugu Kuye?”)

¹⁴ Khumbula kutsi Jehova akakubuki ngendlela lelive lelikubuka ngayo. (Fundza 1 Samuweli 16:7.) Kubaluleka kwakho kuye akuyi ngendlela lobukeka ngayo, sigaba lonaso emmangweni nobe kutsi ufundze kanganani. (Isa. 55:8, 9) Kunekutsi kubaluleka kwakho ukubuke ngendlela lelive lelikubuka ngayo, sebentisa timiso taJehova kuze ubone kutsi ubaluleke kanganani. Ungaze ufundze tindzaba letiseBhayibhelini letikhombisa kutsi bebabalulekile kuJehova labo bebahle bangabata kutsi babalulekile, njenga-Elija, Nawomi, naHana. Ungaze ubhale phansi tintfo letenteke kuwe letikhombisa kutsi Jehova ukutsandza mbamba futsi ubalulekile kuye. Ngetulu kwaloko, ungabuka tihloko letikhuluma ngekungatibukeli phansi etincwadzini tetfu.c

15. Yini leyenta Jehova watsi Danyela “uligugu kakhulu”? (Danyela 9:23)

¹⁵ Hlale ukhumbula kutsi kwetsembeka kwakho kukwenta ube ligugu emehlweni aJehova. Ngalesinye sikhatsi, mhlawumbe nasekayocedza iminyaka yabo-90, umphrofethi Danyela wativa ‘adzinwe kakhulu’ futsi advumatekile. (Dan. 9:20, 21) Wamkhutsata njani Jehova? Nkulunkulu watfumela ingilosi Gabriyeli kutsi imtjele kutsi “uligugu kakhulu” nekutsi bekayivile imithantazo yakhe. (Fundza Danyela 9:23.) Yini leyenta Danyela waba ligugu kuNkulunkulu? Emkhatsini walobunye buntfu bakhe lobunyenti lobuhle, kutsi bekakutsandza lokulungile futsi etsembekile. (Hez. 14:14) Jehova wayibhala eVini lakhe lendzaba kuze isidvudvute. (Rom. 15:4) Jehova uyayilalela nemithantazo yakho futsi uligugu kuye ngobe uyakutsandza lokulungile futsi umkhonta ngekwetsembeka.​—Mik. 6:8, imibhalo lengentasi; Heb. 6:10.

16. Yini lengakusita ubuke Jehova njengaBabe lonelutsandvo?

¹⁶ Buka Jehova njengaBabe lokutsandzako. Ufuna kukusita, hhayi kutsi ufuna emaphutsa kuwe. (Hla. 130:3; Mat. 7:11; Luk. 12:6, 7) Kucabangisisa ngaloko kusite labanyenti labebatibukela phansi. Sibonelo nje, cabanga ngalomunye dzadze waseSpain lokutsiwa nguMichelle, lokwaphela iminyaka leminyenti indvodza yakhe imhlukubeta ngemavi. Utsi: “Nobe nini nangitiva ngingasilutfo, ngetama kucabanga Jehova angigodlile, anginika lutsandvo futsi angivikela.” (Hla. 28:9) Naku latikhumbuta kona lomunye dzadze waseSouth Africa lokutsiwa nguLauren: “Nangabe Jehova angidvonsele kuye kwaba ngatsi ungidvonsa ngetintsambo telutsandvo, wangigcina ngisondzelene naye yonkhe leminyaka, futsi waze wangisebentisa kuze ngifundzise labanye, nakanjani loko kuyangicinisekisa kutsi ngibalulekile kuye futsi ngilusito.”​—Hos. 11:4.

17. Yini lengakusita ikucinisekise kutsi Jehova uyakwemukela? (Tihlabelelo 5:12) (Buka nesitfombe.)

¹⁷ Ciniseka kutsi Jehova uyakwemukela. (Fundza Tihlabelelo 5:12.) Davide wafananisa kwemukelwa nguJehova ‘nelihawu lelikhulu’ lelivikela bantfu labalungile. Kwati kutsi Jehova uyakwemukela futsi uyakusekela, kungakuvikela kutsi ungancotjwa kutiva ungasilutfo. Yini lengakusita ubone kutsi Jehova uyakwemukela? Njengobe sesibonile, Jehova uyakucinisekisa asebentisa liVi lakhe. Ngetulu kwaloko, usebentisa labadzala belibandla, bangani bakho labakhulu kanye nalabanye kuze bakukhumbute kutsi uligugu emehlweni akhe. Yini lokufanele uyente nabakukhutsata?

18. Kubaluleke ngani kutsi wemukele emavi ekunconywa?

¹⁸ Ungawali emavi lasuka enhlitiyweni ekuncoma lowatjelwa bantfu labakwatiko futsi labakutsandzako. Hlale ukhumbula kutsi kungenteka Jehova usebentisa bona kuze akusite ubone kutsi uyakwemukela. Michelle, lesike sakhuluma ngaye utsi: “Kancane kancane sengifundze kuwemukela emavi lanemusa lashiwo ngulabanye. Kona kumatima, kodvwa ngiyati kutsi nguloko Jehova lafuna ngikwente.” Labadzala belibandla baphindze bamsita Michelle wabona kutsi Jehova uyamemukela. Nyalo ulihlahlandlela futsi wenta umsebenti waseBethel asekhaya.

19. Yini lengakwenta uciniseke kutsi uligugu emehlweni aNkulunkulu?

¹⁹ Ngemusa Jesu uyasikhumbuta kutsi sibaluleke kakhulu kuBabe wetfu wasezulwini. (Luk. 12:24) Ngako singaciniseka kutsi siligugu kuJehova. Shengatsi singete sakukhohlwa loko! Ngetulu kwaloko, shengatsi singenta konkhe lokusemandleni etfu kuze sisite labanye babone kutsi babaluleke kanganani emehlweni aJehova!