Kusebentisa Umbhobho

BAZALWANE betfu nabodzadze basebentisa sikhatsi lesinyenti baphindze bente nemetamo yekuba khona emihlanganweni yebuKhristu. Kuze bazuze kuloko lokushiwo kulemihlangano, kufanele bakuve kahle.

Ngesikhatsi sema-Israyeli, bekute imishini yagesi yekukhulisa emavi. Mosi nakakhuluma nesive sema-Israyeli eMatsafeni akaMowabi, ngesikhatsi sisengakangeni eVeni Lesetsembiso, labantfu lebebangaba tigidzi bebamuva njani? Kungenteka kutsi Mosi wasebentisa emadvodza latsite, lebekema etindzaweni letehlukehlukene, kuze kutsi nakakhuluma, lamadvodza endlulisele loko lakushoko kuso sonkhe sive ngaleso sikhatsi. (Dut. 1:1; 31:1) Ngemuva nje kwekutsi ema-Israyeli acale kutsatsa live lelisenshonalanga yeJordane, Joshuwa wahlanganisela lesive embikweNtsaba iGerizimu neNtsaba i-Ebhali, futsi kungenteka kutsi emaLevi bekeme esihosheni lesehlukanisa letintsaba. Kuleyo ndzawo, bonkhe bantfu beva nabatjelwa ngetibusiso neticalekiso futsi bakwemukela loko labakuva. (Josh. 8:33-35) Kungenteka kutsi nakulendzaba, kwasetjentiswa bantfu kute bendlulise umlayeto kulabanye, kodvwa asingabati kutsi indlela lendzawo lebeyime ngayo nayo yasita ekutseni beve kahle.

Ngemuva kweminyaka lengu-1 500 “sicumbi lesikhulu sebantfu seta” eLwandle lwaseGalile kuze silalele loko lokwakushiwo nguJesu. Jesu wagibela esikebheni, wangena kancane elwandle wase uhlala kuso kute akhulume nalesicumbi sebantfu. (Mak. 4:1, 2) Yini leyabangela Jesu kutsi akhulume asesikebheni? Kungenteka wabangelwa kutsi livi lemuntfu livakala kahle nakasemantini lamanyenti.

Kadzeni, kuphakama kwelivi lemuntfu lokhulumako kanye nekuvakala kahle kwalo ngiko lebekuvame kuncuma kutsi bangakhi kubantfu lakhuluma nabo labatawuva loko lakushoko. Nome kunjalo, kusukela ngabo-1920, tinceku taJehova tacala kusebentisa imishini yagesi yekukhulisa emavi emihlanganweni lemikhulu.

Imishini Yekukhulisa Emavi. Leyo mishini ingalikhulisa livi lemuntfu lokhulumako, kodvwa lichubeke livakala kahle futsi lingashintji. Loyo lokhulumako akudzingeki kutsi amemete, futsi nalabo labalalele ngeke babe nebumatima bekuva lokushiwoko. Loku kutawukwenta kutsi bakhone kunaka emaphuzu lokukhulunywa ngawo.

Kwentiwa imetamo leminyenti kuze kucinisekiswe kutsi emihlanganweni lemikhulu nalemincane yaBoFakazi BaJehova iba khona imishini yekukhulisa emavi. Ngetulu kwaloko, emaHholweni eMbuso lamanyenti iyasetjentiswa lemishini kuze kukhuliswe emavi alabo labetfula tinkhulumo, labachuba imihlangano nobe labafundzela libandla. Lamanye emabandla anemibhobho lesetjentiswa nakuphendvulwa emihlanganweni. Nangabe imibhobho ikhona ebandleni lakini, fundza kuyisebentisa kahle.

Ticondziso Letisisekelo. Kuze uwusebentise kahle umbhobho, khumbula lamaphuzu lalandzelako: (1) Umbhobho kufanele ukhweshe emlonyeni ngemasentimitha langu-10 kuya kulangu-15. Nangabe umbhobho usondzele kakhulu kungase kungevakali lokushoko. Nangabe ukhashane kakhulu, nakhona ngeke livakale kahle livi lakho. (2) Umbhobho kufanele ube phambi kwakho hhayi eceleni. Nangabe uhambisa inhloko, kufanele ungakhulumi kodvwa ukhulume kuphela nangabe buso bakho bucondzene nembhobho. (3) Khuluma ngelivi lelitse kuphakama futsi lelinemandla kunalelo longalisebentisa nawucoca, kodvwa kute sidzingo sekutsi umemete. Umbhobho utawukwenta livi lakho kutsi livakale nakubantfu labakhashane nawe. (4) Nangabe ufuna kususa lokutsite emphinjeni nobe ufuna kukhwehlela nobe kutsimula, ciniseka kutsi uyayikweshisa inhloko yakho embhobheni.

Nawetfula Inkhulumo. Nawufika endzaweni yesikhulumi, umzalwane lotsite utakulungisela umbhobho. Nakasawulungisa, mani ngendlela lotakuma ngayo nawetfula lenkhulumo, ubuke labakulalele. Beka luhlaka lwakho etafuleni lesikhulumi, futsi uciniseke kutsi umbhobho awukusitsi nawulubuka.

Nasewucala kukhuluma, lalela kutsi livi lakho livakala njani. Livakala lisetulu kakhulu yini nobe nawusho lamanye emagama kuba nemisindvo lelimata tindlebe? Nakunjalo, kungase kudzingeke ukhweshe kancane kuwo ngemasentimitha lamabili nehhafu kuya kulasihlanu. Nawubuka luhlaka lwakho khumbula kutsi kufanele ukhulume uphindze ufundze kuphela nangabe buso bakho bucondzene nembhobho nobe nangabe ungenhla kancane kwemlomo wakho, kodvwa ungabi ngentansi.

Nawufundzela Libandla. Kuhle kutsi liBhayibheli lakho nobe incwadzi loyifundzako uyibambele etulu kuze buso bakho bubheke kulabo labakulalele. Njengobe umbhobho utawube uphambi kwakho, kungase kudzingeke kutsi ukubambele eceleni kancane lokufundzako. Loku kutawudzinga kutsi buso bakho bubheke eceleni kancane. Ngako-ke nasewufundza, livi lakho litawucondza embhobheni.

Bazalwane labanyenti labafundza tigaba eSifundvweni se-Sicongosekulindza bafundza bemile basebentise umbhobho lomiswe embikwabo. Loku kubasita kutsi baphefumule ngekukhululeka baphindze bavete imiva nabafundza. Khumbula kutsi kufundvwa kwetigaba kubalulekile kulesifundvo. Kuze labo labalalele bazuze, kudzingeka bakuve kahle loko lokufundvwako.

Nawuphendvula Esifundvweni. Nangabe ebandleni lakini kusetjentiswa imibhobho nakuphendvulwa, khumbula kutsi kusenesidzingo sekutsi uvakale kahle nawukhuluma futsi uphakamise livi ngelizinga lelifanele. Nawuphendvula, yetama kutsi uyibambe ngesandla incwadzi lefundvwako nobe liBhayibheli. Kwenta njalo kutakusita kutsi uyibone kahle leyo ncwadzi, ube ukhuluma embhobheni.

Kulamanye emabandla bazalwane babelwa kutsi bahambise imibhobho kulabo labatawuphendvula. Nangabe kunjalo ebandleni lakini, nawukhonjwa phakamisa sandla ungasehlisi kuze umzalwane lota nembhobho akubone, futsi afike kuwe ngekushesha. Nangabe lombhobho unguloluhlobo lotibambela lona, kulungele kuwutsatsa nawufika. Cala kuphendvula nase uwubambe kahle umbhobho. Nasewucedzile kuphendvula wubuyisele kulomzalwane ngekushesha.

Nawenta Umboniso. Ngaphambi kwekutsi uyokwenta umboniso kufanele ucabange kahle ngendlela lotawusebentisa ngayo umbhobho. Nangabe umbhobho umiswa etafuleni, tandla takho totimbili utatisebentisela kubamba liBhayibheli neluhlaka lwakho. Nawusebentisa umbhobho lotibambela wona ungakhona kushukumisa umtimba ngekukhululeka, kodvwa kungase kudzingeke kutsi ucele lotawube wenta naye umboniso akubambele. Ngaleyo ndlela tandla takho titawukhona kubamba liBhayibheli. Kufanele nikuphrakthize loku kuze loyo lowenta naye lomboniso akhone kukubambela lombhobho ngendlela lefanele. Khumbula nekutsi nawusendzaweni yesikhulumi akukafaneli ubafulatsele labakulalele, ikakhulukati nawukhuluma.

Emibonisweni leyentiwa eMhlanganweni Wemsebenti, kungase kube nebantfu labanyentana labayentako futsi bangase bahambahambe endzaweni yesikhulumi. Nakunjalo, kungase kudzingeke imibhobho leminyenti. Lemibhobho kufanele ibekwe kusenesikhatsi nobe iniketwe labenta imiboniso nasebaya endzaweni yesikhulumi. Kudzingeka kuhlelwe kusenesikhatsi kuze imibhobho ibe sendzaweni lefanele, nangesikhatsi lesifanele. Kuhlola imiboniso isengakentiwa esifundvweni, kuveta litfuba lekutsi ukhombise labo labatawuyenta kutsi kufanele bayisebentise njani imibhobho. Nangabe kungeke kukhonakale kutsi umboniso uphrakthizelwe endzaweni yesikhulumi, kungase kube kuhle kutsi labo labatawenta baphatse intfo lelingana nembhobho kuze baphrakthize ngayo kutsi umbhobho ubanjwa njani. Nase bacedzile kwenta lomboniso esifundvweni, kufanele bayibeke kahle imibhobho, bagadze nekutsi tingabagili tintsambo tayo nabesuka endzaweni yesikhulumi.

Kunaka indlela lesisebentisa ngayo umbhobho kusita ekufezeni lomunye wemigomo leyinhloko yemihlangano yetfu, lokukutsi sizuzise labanye nakucocwa ngeliVi laNkulunkulu. (Heb. 10:24, 25) Ngekufundza kuwusebentisa kahle umbhobho, singafaka sandla ekufezeni lomgomo lobalulekile.