Litsini LiBhayibheli Ngekushintja Kwesimo Selitulu Kanye Nangelikusasa Letfu
“Kushintja kwesimo selitulu sekusehlakalo semvelo. Iplanethi lenguMhlaba akusahlaleki kuyo.”—I-The Guardian.
Bantfu babhekene nenhlekelele labatibangele yona. Bososayensi labanyenti bayavuma kutsi tento tebantfu ngito letibangele kutsi kube nekushintja kwesimo selitulu. Lokwenyuka kwemazinga ekushisa kubangele kushintja kwesimo selitulu, kwaletsa nemiphumela lebuhlungu, lefaka ekhatsi nayi lelandzelako:
Tentakalo tekushintja kwesimo selitulu letinyenti futsi letinkhulu, njengekushisa lokukhulu, somiso netiphepho, lokubangela tikhukhula kanye nemlilo wemadlelo.
Kuncibilika kwelichwa etindzaweni letibandzako.
Kwenyuka kwemanti elwandle.
Lenhlekelele yekushintja kwesimo selitulu ihlasele umhlaba wonkhe. Ngemuva kwekubhala ngesimo selitulu emaveni langu-193, umbiko we-New York Times utsi: “Lephalethi ikhalela lusito.” Ngenca yekufa kwebantfu kanye nekuhlupheka lokubangelwe kushintja kwesimo selitulu, i-World Health Organization ibite simo selitulu ngekutsi “kuphela kwenkinga lesongela kuphila kwebantfu.”
Nobe kunjalo, sinesizatfu sekuba nelitsemba ngelikusasa. LiBhayibheli laphrofetha ngetentakalo lesitibonako lamuhla, nekutsi kungani singalindzela kutsi Nkulunkulu atsatse sinyatselo kanye nekutsi yini latawuyenta kuze avikele likusasa letfu.
Kushintja kwesimo selitulu kugcwalisa tiphrofetho teliBhayibheli yini?
Yebo. Tinhlekelele letibangelwa kushintja kwesimo selitulu tivumelana netentakalo liBhayibheli lelaphrofetha kutsi titawukwenteka kulesikhatsi setfu.
Siphrofetho: Nkulunkulu ‘utawubhubhisa labo lababhubhisa umhlaba.’—Sembulo 11:18, umbhalo longentasi.
LiBhayibheli laphrofetha ngesikhatsi lapho khona tento tebantfu titawucishe tibhubhise umhlaba. Ngenca yekushintja kwesimo selitulu, bantfu lamuhla bonakalisa umhlaba ngelizinga lelingazange selibonwe.
Lesiphrofetho sikhombisa sizatfu lesisenta singagadzi bantfu kutsi basindzise lomhlaba. Naka, Nkulunkulu utawungenela njengobe bantfu “babhubhisa umhlaba.” Nobe ngabe yini bantfu labanetinhloso letinhle labangazama kuyenta kuze balwe nekushintja kwesimo selitulu, angeke baze babayekelise labanye bantfu kuchubeka babhubhisa lomhlaba.
Siphrofetho: “Batawubona tintfo letetfusako.”—Lukha 21:11.
LiBhayibheli laphrofetha kutsi “tintfo letetfusako” nobe tentakalo letetfusako titawubonakala esikhatsini setfu. Kushintja kwesimo selitulu kubangele tentakalo letihambisana nako letetfusako emhlabeni wonkhe. Lamuhla, labanye bantfu bahlushwa sifo sekukhatsateka ngendalo, lokukwesaba ngalokwecile kutsi lomhlaba utawubhubha ngenca yekungcoliswa bantfu.
Siphrofetho: “Emalangeni ekugcina kutawuba netikhatsi letibucayi lokumatima kubhekana nato. Ngobe bantfu batawutitsandza bona, batsandze imali, . . . bangetsembeki, . . . bangavumi kwenta tivumelwane, . . . batsengise ngalabanye, babe nenkhani.”—2 KuThimothi 3:1-4.
LiBhayibheli laphrofetha ngetintfo nangendlela yekuphila lebangele inhlekelele yekushintja kwesimo selitulu. Bohulumende kanye nabosomabhinisi banaka kakhulu imali kunekunaka likusasa lebantfu. Ngisho nobe betama kusebenta ngekubambisana, abavumelani ngaloko lokufanele bakwente kuze kucedvwe kushintja kwesimo selitulu.
Lesiphrofetho siveta kutsi akukafaneli silindzele bantfu kutsi bashintje loko labakwentako futsi bavikele umhlaba. Kunaloko, liBhayibheli liveta kutsi bantfu labakhombisa tento tebugovu “batawudlanga ngebubi.”—2 KuThimothi 3:13.
Yini lesenta siciniseke kutsi Nkulunkulu utawutsatsa sinyatselo?
LiBhayibheli liveta kutsi Jehovaa Nkulunkulu, uMdali wetfu, unendzaba kakhulu ngaleplanethi kanye nalabo labahlala kuyo. Cabanga nganankha emavesi lamatsatfu lakhombisa kutsi Nkulunkulu utawutsatsa sinyatselo.
1. Nkulunkulu “Longazange awudalele lite nje [umhlaba], kodvwa lawudalela kutsi kuhlalwe kuwo.”—Isaya 45:18.
Nkulunkulu utayifeza injongo yakhe ngemhlaba. (Isaya 55:11) Ngeke avume kutsi ubhujiswe nobe kungahlaleki kuwo.
2. “Labamnene batawudla lifa lemhlaba, futsi batawujabulela kuthula lokukhulu. Labalungile batawudla lifa lemhlaba, futsi bahlale kuwo kuze kube phakadze.”—Tihlabelelo 37:11, 29
Nkulunkulu wetsembisa kutsi bantfu batawuhlala emhlabeni kuze kube phakadze ngaphansi kwetimo letinekuthula.
3. “Kodvwa lababi batawucedvwa emhlabeni.”—Taga 2:22.
Nkulunkulu wetsembisa kucedza labo labachubeka nekwenta tintfo letimbi, lokufaka ekhatsi labo lababhubhisa umhlaba.
Loko Nkulunkulu latasentela kona ngelikusasa letfu
Nkulunkulu utasigcwalisa njani setsembiso sakhe ngalomhlaba? Utasigcwalisa ngekusebentisa hulumende lotawubusa umhlaba wonkhe, lowatiwa ngekutsi nguMbuso waNkulunkulu. (Matewu 6:10) LoMbuso utawubusa usezulwini. Ngeke wente tivumelwane nabohulumende bebantfu endzabeni yemhlaba kanye netintfo letikuwo. Kunaloko, uMbuso waNkulunkulu utawutsatsa sikhundla sabohulumende bebantfu.—Danyela 2:44.
UMbuso waNkulunkulu utawentela bantfu kanye nendalo yonkhe tintfo letinhle. (Tihlabelelo 96:10-13) Cabanga ngaloko Jehova Nkulunkulu latakufeza asebentisa uMbuso wakhe.
Utawulungisa umhlaba
Lokushiwo liBhayibheli: “Lihlane nendzawo leyomile kutawujabula, indzawo lebekile lelugwadvule itawujabula kakhulu, ichakaze njengembali.”—Isaya 35:1.
Lokukushoko ngelikusasa letfu: Jehova utawulungisa leplanethi lengumhlaba, alungise netindzawo letonakaliswe bantfu.
Utawulawula simo selitulu
Lokushiwo liBhayibheli: ‘Jehova Uthulisa sivunguvungu; bese emagagasi aselwandle ayabindza.’—Tihlabelelo 107:29.
Lokukushoko ngelikusasa letfu: Jehova unemandla ekulawula emandla emvelo. Bantfu ngeke basahlushwa simo selitulu lesingalawuleki.
Utawufundzisa bantfu kuwunakekela kahle umhlaba
Lokushiwo liBhayibheli: “Ngitakunika kucondza futsi ngikukhombise indlela lokufanele uhambe ngayo.”—Tihlabelelo 32:8.
Lokukushoko ngelikusasa letfu: Jehova unikete bantfu umsebenti wekunakekela umhlaba. (Genesisi 1:28; 2:15) Utasifundzisa indlela yekuyinakekela kahle lendalo yakhe futsi siphile kuyo ngekuthula.
a Jehova ligama laNkulunkulu. (Tihlabelelo 83:18) Buka sihloko lesitsi: “Ungubani Jehova?”