Kusetjentiswe Imali Lengetulu Kwa-$2 Trillion Kuze Kusekelwe Timphi—Litsini LiBhayibheli?

Nga-2022, bohulumende emhlabeni wonkhe basebentise imali lengetulu kwa-$2.24 trillion dollars kuze basekele timphi. Loku kubangelwe kulwa lokusemkhatsini weRussia kanye ne-Ukraine. Nga-April 2023, i-Stockholm International Peace Research Institute (SIPRI), ikhiphe umbiko lotsi ngemnyaka wa-2022:

• Imali leyacitfwa ngumbutfo wetemphi e-Europe “yenyuka ngemaphesenti langu-13, lokwaba linani lelikhulu kakhulu lemali leyacitfwa ngemave ase-Europe ngemnyaka munye kusukela nga-1991.”

• “IRussia isebentise imali lengetulu ngemaphesenti langu-9.2 emalini levamise kuyisebentisa, lokuyente yasuka ekubeni live lesihlanu lelicitsa kakhulu imali emhlabeni, yaba live lesitsatfu.”

• I-United States ilive lelihamba embili emaveni lasebentisa imali lenyenti kutemphi, lokungemaphesenti langu-39 “emali lecitfwa emhlabeni wonkhe kuze kwakhiwe tikhali.”

“Kwenyuka kwemali lesetjentiswa ekwakheni tikhali emhlabeni wonkhe kuleminyaka yakamuva, kuyinkhomba yekutsi umhlaba lesiphila kuwo awusaphephanga,” kusho Dr. Nan Tian, longulomunye walababhala umbiko we-SIPRI.

LiBhayibheli laphrofetha ngekwandza kwebutsa emkhatsini wemibuso lemikhulu emhlaba, futsi liphindze livete likhambi lokukuphela kwalo lelingaletsa kuthula.

Kwandza kwetimphi kwaphrofethwa

• LiBhayibheli libita lamalanga lesiphila kuwo ngekutsi ‘sikhatsi sekugcina.’—Danyela 8:19.

• Incwadzi yaDanyela yaphrofetha kutsi etikhatsini tekugcina bekutawuba nemibuso lemikhulu lebeyitawubanga kubusa umhlaba. Lemibuso ‘beyitawufucana’ nobe ilwele kuba nemandla ekulawula umhlaba wonkhe. Lokulwa bekutawenta lamave kutsi asebentise “tintfo letiligugu” nobe imali lenyenti.—Danyela 11:40, 42, 43.

Kuze utfole lokunyenti ngalesiphrofetho seliBhayibheli lesimangalisako, bukela i-video letsi Siphrofetho Lesesigcwalisekile—Danyela Sehluko 11.

Indlela kuthula lokutawutfolakala ngayo

• LiBhayibheli liveta kutsi Nkulunkulu utawususa imibuso yebantfu. “Utawubeka umbuso longeke uze ubhujiswe, futsi angeke uniketwe labanye bantfu. Utawupitjita yonkhe lemibuso uyicedze futsi ngiwo wodvwa lotawuma kuze kube phakadze.”—Danyela 2:44.

• Ngekushesha, Jehovaa Nkulunkulu utawenta loko bantfu labehlulekako kukwenta, lokukuletsa kuthula sibili nalokuhlala njalo. Kanjani? Hulumende wakhe losezulwini utawucedza tonkhe tikhali kanye nabo bonkhe budlova.—Tihlabelelo 46:8, 9.

Kuze ufundze kabanti ngaloko uMbuso waNkulunkulu lotakufeza, fundza sihloko lesitsi “Lapho Sekubusa UMbuso KaNkulunkulu ‘Kuyochichima Ukuthula,’” lesitfolakala ngesiZulu.