Dipesaleme
Pina ya ho kgakola ntlo. Pesaleme ya Davida.
30 Ke tla o phahamisa Jehova hobane o ile wa mpholosa.*
Ha o a ka wa dumella hore dira tsa ka di thabe ka lebaka la ka.+
2 Jehova Modimo wa ka, ke ile ka llela ho wena ke kopa thuso yaba o a mphodisa.+
3 Jehova, o nnyollotse Lebitleng.*+
O mpolokile ke phela, wa mpholosa hore ke se ke ka wela ka sekoting.*+
4 Binelang Jehova dithoriso, lona batho ba hae ba tshepahalang,+
Rorisang lebitso la hae le halalelang*+
5 Hobane Modimo o halefela motho ka nakwana+
Empa ha a hauhela motho, o mo hauhela bophelo bohle.+
Le ha ho ka ba le sello mantsiboya, hoseng ho ba le thabo.+
6 Ha ke ne ke se na mathata, ke ile ka re:
“Nke ke ka sisinngwa le ka mohla.”
7 Ka lebaka la mosa wa hao Jehova, o entse hore ke be matla jwalo ka thaba.+
Empa ha o mpatela sefahleho sa hao, ke ile ka tshoha haholo.+
8 Jehova, ke ile ka nna ka o bitsa.+
Ka nna ka kopa hore o nkgauhele, Jehova.
9 Ho na le molemo ofe haeba ke shwa, haeba ke theohela sekoting?*+
Na lerole le tla o rorisa?+ Na le tla bua hore o a tshepahala?+
10 Utlwa hle Jehova mme o nkgauhele.+
Nthuse hle Jehova.+
11 O entse hore ke tantshe ke thabile ho ena le hore ke utlwe bohloko.
O tlositse lesela la ka le hwashang,* wa nkapesa thabo,
12 E le hore ke o binele dithoriso mme ke se ke ka thola.
Jehova Modimo wa ka, ke tla o rorisa ka ho sa feleng.