Ho Hlophisetswa ho Sebeletsa “Modimo wa Kgotso”

1, 2. Makasine ya Zion’s Watch Tower e ile ya e ba le phetoho efe ka January 1895, hona barababo rona ba ile ba reng?

JOHN A. BOHNET, eo e neng e le Moithuti wa Bibele ya tjhesehang, o ile a amohela makasine ya Zion’s Watch Tower ya January 1895 yaba o thaba haholo ha a e bona. Sekwahelo sa makasine se ne se fetohile, se ne se e na le setshwantsho sa tora e lewatleng le mabifi e kgantshitseng lefifing. Tsebiso e mabapi le sekwahelo se setjha sa makasine e ne e e na le sehlooho se reng, “Sekwahelo sa Rona se Setjha.”

² A kgahlilwe ke seo a se boneng, Morabo rona Bohnet o ile a ngolla Morabo rona Russell lengolo. O ile a re: “Ke thabela ho bona kamoo makasine ya Watchtower e shebahalang kateng. E ntle.” Morabo rona, John H. Brown yena o ile a re: “E kgahla mahlo. Ke kgahlwa ke kamoo motheo wa tora eo o tiileng kateng ha maqhubu le difefo di ntse di e otla.” Ho fetoha ha sekwahelo sa makasine e ile ya e ba phetoho ya pele eo barababo rona ba ileng ba e bona selemong seo, empa ha ya ka ya e ba ya ho qetela. Ka November ho ile ha boela ha e ba le phetoho e kgolo. Ho thahasellisang ke hore e ne e amana le lewatle le mabifi.

3, 4. Ke bothata bofe bo ileng ba pepeswa makasineng ya Watch Tower ya November 15, 1895, hona ho ile ha phatlalatswa phetoho efe e kgolo?

³ Ho ile ha e ba le sehlooho se seholo se ileng sa hatiswa makasineng ya Watch Tower ya November 15, 1895, se ileng sa pepesa bothata bo itseng: Ho ne ho e na le maqhubu a mabifi a neng a sitisa kgotso mokgatlong wa Baithuti ba Bibele. Barababo rona ba ne ba dula ba ngangisana ka hore na ke mang eo e lokelang ho ba moetapele ka phuthehong. E le hore barababo rona ba thuswe ho lokisa ditsekisano tseo tse neng di baka dikarohano, sehlooho seo se ile sa tshwantsha mokgatlo le sekepe. Yaba, se sa hlathe kwana le kwana, se bontsha hore batho ba neng ba etella pele mokgatlong ba hlolehile ho etsa hore mokgatlo o tshwantshetswang ke sekepe o itokisetse difefo. Keng se neng se lokela ho etswa?

⁴ Sehlooho seo se ile sa bontsha hore motsamaisi wa sekepe o lokela ho etsa bonnete ba hore ho na le dintho tse tla sebediswa ho pholosa batho le hore basebetsi ba sekepeng ba itokisetse ho thusa batho ha sefefo se tla. Ka ho tshwanang, batho ba etellang pele mokgatlong ba ne ba lokela ho etsa bonnete ba hore diphutheho tsohle di itokiseditse ho sebetsana le maemo a kang sefefo. E le hore ho finyellwe seo, sehlooho seo se ile sa phatlalatsa phetoho e kgolo. Se ile sa bolela hore hanghang “phuthehong e nngwe le e nngwe ho lokela ho kgethwa baholo e le hore “‘ba lebele’ mohlape.”—Lik. 20:28.

5. (a) Ke hobaneng ha tokisetso ya ho kgetha baholo e ile ya e ba nakong? (b) Re tla tshohla dipotso dife?

⁵ Tokisetso ena ya ho kgetha baholo e ile ya e ba mohato o nakong bakeng sa ho theha diphutheho tse tsitsitseng. E ile ya thusa barababo rona ho feta maqhubung a ileng a fehlwa ke Ntwa ya Pele ya Lefatshe. Dilemo tse mashome tse ileng tsa latela, ho ile ha e ba le diphetoho mokgatlong tse ileng tsa thusa batho ba Modimo hore ba sebeletse Jehova hamolemo. Ke boprofeta bofe ba Bibele bo ileng ba bolela ka phetoho ye? Ke diphetoho dife tseo o di boneng? Diphetoho tseo di o thusitse jwang?

“Ke Tla Beha Kgotso Hore e be Balebedi ba Hao”

6, 7. (a) Esaia 60:17 e bolelang? (b) Jehova o ne bontshang ha a ne a bua ka “balebedi” le “ba o abelang mosebetsi”?

⁶ Jwalokaha re bone Kgaolong ya 9, Esaia o ile a bolela esale pele hore Jehova o ne a tla hlohonolofatsa batho ba hae ka hore ba eketsehe. (Esa. 60:22) Empa Jehova o ile a tshepisa ho etsa se fetang seo. Boprofeteng bona boo, o ile a re: “Ke tla tlisa kgauta ho e na le koporo, ke tla tlisa silevera ho e na le tshepe, mme ke tla tlisa koporo, ho e na le lehong, ke tlise tshepe, ho e na le majwe; ke tla beha kgotso hore e be balebedi ba hao le ho loka hore e be ba o abelang mosebetsi.” (Esa. 60:17) Boprofeta boo bo bolelang? Bo re ama jwang kajeno?

⁷ Boprofeta ba Esaia bo bolela hore serafshwa se seng se ne se nkelwa sebaka ke se seng. Empa hlokomela hore ho nkelwa sebaka hona ke diphetoho, hase hore se sebe se nkelwa sebaka ke se molemo empa se molemo se nkelwa sebaka ke se molemo le ho feta. Ha koporo e nkelwa sebaka ke kgauta, seo ke ntlafatso mme se tshwanang se etsahala ka dirafshwa tse ding tseo ho builweng ka tsona. Kahoo, ha Jehova a etsa papiso ena, o ne a bolela hore boemo ba batho ba hae bo ne bo tla ntlafala mohato ka mohato. Boprofeta bo bua ka ho ntlafala ha mofuta ofe? Ha Jehova a bua ka “balebedi” le “ba o abelang mosebetsi” o ne a bontsha hore ntlafatso ena e ne e tla ba ka tsela eo batho ba hae ba neng ba tla hlokomelwa le ho hlophiswa ka yona.

8. (a) Dintlafatso tseo ho builweng ka tsona boprofeteng ba Esaia di tlisitswe ke mang? (b) Re rua molemo jwang diphetohong tseo? (Sheba le lebokose le reng, “O Ile a Amohela Kgalemelo ka Boikokobetso.”)

⁸ Ke mang ya etsang hore ho be le tswelo pele e jwalo ka hara mokgatlo? Jehova o re: “Ke tla tlisa kgauta, . . . ke tla tlisa silevera, . . . ke tla beha kgotso.” Ka sebele, diphetoho tse bileng teng tsa ho hlophisa phutheho, ha dia etswa ke batho empa di entswe ke Jehova. Hape, ka mora hore Jesu a hlomamiswe jwaloka Morena, Jehova o ile a nna a tlisa diphetoho tseo a sebedisa Mora wa hae. Re rua molemo jwang diphetohong tseo? Lengolo lona leo le bontsha hore diphetoho tsena di tlisa “kgotso” le “ho loka.” Ha re amohela tataiso ya Modimo mme re etsa diphetoho, ho rena kgotso hara rona mme ho rata ho loka ho tla re susumelletsa hore re sebeletse Jehova, eo Pauluse a ileng a re ke “Modimo wa kgotso.”—Bafil. 4:9.

9. Motheo wa ho ba le taolo le bonngwe ka phuthehong ke ofe, hona hobaneng?

⁹ Ha a bua ka Jehova, Pauluse o ile a boela a re: “Modimo hase Modimo wa ho hloka taolo, empa ke wa kgotso.” (1 Bakor. 14:33) Hlokomela hore Pauluse ha aa ka a bapisa ho hloka taolo le ho ba le taolo, empa o ile a bapisa ho ba le taolo le kgotso. Hobaneng? Nahana ka sena: Hase kamehla ho ba le taolo ho fellang ka kgotso. Ka mohlala, masole a ka matjha ka taolo ho ya moleng wa ntwa empa taolo eo e fella ka ntwa, eseng kgotso. Ke kahoo, rona jwaloka Bakreste re batlang ho dula re hopola sena: Ha re ka ba le taolo empa motheo wa yona e se kgotso, taolo eo e ke ke ya tshwarella. Ho fapana le hoo, kgotso ya Modimo e etsa hore ho be le taolo e tshwarellang. Kahoo, re thaba hakaakang hore ebe mokgatlo wa rona o tataiswa le ho hlwekiswa ke “Modimo ya fanang ka kgotso”! (Bar. 15:33) Kgotso eo Modimo a re fang yona e etsa hore re be le taolo mme re be le bonngwe boo re bo thabelang diphuthehong tsa rona lefatsheng lohle.—Pes. 29:11.

10. (a) Ke diphetoho dife tse ileng tsa ba mokgatlong wa rona dilemong tsa pele? (Sheba lebokose le reng, “Kamoo ho Kgethwa ha Baholo ho Ileng ha Ntlafala Kateng.”) (b) Re tla tshohla dipotso dife?

¹⁰ Ha re hlahloba lebokose le reng, “Kamoo ho Kgethwa ha Baholo ho Ileng ha Ntlafala Kateng,” re bona kamoo diphetoho tse ileng tsa ba mokgatlong wa rona dilemong tseo tsa pele di ileng tsa ba molemo mme tsa tlisa taolo kateng. Empa morao tjee, ke diphetoho dife tse tshwanang le ho tlisa “kgauta ho e na le koporo” tseo Jehova a ileng a di tlisa ka Morena wa rona? Diphetoho tseo tse mabapi le bolebedi di ile tsa matlafatsa kgotso le bonngwe ba diphutheho lefatsheng lohle jwang? Di o thusa jwang hore o sebeletse “Modimo wa kgotso”?

Kreste o Etella Pele Phutheho Jwang?

11. (a) Lenaneo la thuto ya Bibele le ile la etsa hore sehlopha se busang se etse phetoho efe? (b) Barababo rona ba sehlopha se busang ba ile ba ikemisetsa ho etsang?

¹¹ Ho tloha ka 1964 ho ya ho 1971 sehlopha se busang se ile sa hlophisa hore ho be le lenaneo la thuto ya Bibele le pharalletseng mme hara tse ding tsa dintho tse neng di hlahlojwa e ne e le kamoo phutheho ya Bokreste ya mehleng ya baapostola e neng e sebetsa kateng.a Thuto eo e ile ya bontsha hore mehleng ya baapostola, phutheho e ne e sa hlokomelwe ke moholo kapa molebedi a le mong empa e ne e hlokomelwa ke sehlopha sa baholo. (Bala Bafilipi 1:1; 1 Timothea 4:14.) Ha barababo rona ba sehlopha se busang ba se ba utlwisisitse taba eo hantle, ba ile ba hlokomela hore Morena Jesu, o ne a ba tataisetsa hore ba ntlafatse tsela eo ba hlophisang batho ba Modimo ka yona, mme ba ile ba ikemisetsa ho ikokobelletsa tataiso eo. Ntle ho tshenyo ya nako ba ile ba etsa diphetoho mme ba latela tataiso ya Mangolo ha ba kgetha baholo. Tse ding tsa diphetoho tse ileng tsa etswa qalong ya 1970 ke dife?

12. (a) Ke phetoho efe e ileng ya etswa ho sehlopha se busang? (b) Hlalosa hore na Sehlopha se Busang se hlophisitswe jwang kajeno. (Sheba le lebokose le reng “Sehlopha se Busang se Hlokomela Ditlhoko Tsa Mmuso Jwang?” leqepheng la 130.)

¹² Phetoho ya pele e ile ya ama sehlopha se busang ka ho toba. Ho fihlela ka nako eo, sehlopha seo sa barababo rona ba batlotsuwa e ne e le ditho tse supileng tsa batsamaisi ba Watch Tower Bible and Tract Society of Pennsylvania. Leha ho le jwalo, ka 1971, sehlopha se busang se ile sa eketseha ho tloha ho ditho tse 7 ho ya ho tse 11 mme ho ile ha e ba le phapang pakeng tsa sehlopha se busang le sehlopha sa batsamaisi. Ditho tseo di ne di nka hore ha ho ya phahametseng e mong mme selemo le selemo di ne di fapanyetsana ka ho ba modulasetulo ho ya ka tatellano ya ditlhaku tse qalang tsa mabitso a bona.

13. (a) Ho ile ha e ba le tokisetso efe e ileng ya sebetsa ho tloha ka 1932 ho ya ho 1972? (b) Sehlopha se Busang se ile sa etsang ka 1972?

¹³ Phetoho e ileng ya latela e ile ya ama diphutheho. Jwang? Ho tloha ka 1932 ho ya ho 1972 phutheho e ne e etellwa pele ke morabo rona a le mong. Ho fihlela ka 1936, morabo rona eo ya kgethilweng o ne a bitswa motsamaisi wa tshebeletso. Ka mora moo o ile a bitswa mohlanka wa phutheho mme qetellong a bitswa molebedi wa phutheho. Ka tjheseho bara bao babo rona ba ile ba hlokomela mohlape moyeng. Hangata molebedi o ne a etsa diqeto a le mong ntle le hore a buisane le bahlanka ba bang ba phutheho. Leha ho le jwalo, selemong sa 1972, Sehlopha se Busang se ile sa lokisetsa phetoho e nngwe e kgolo. Phetoho eo e ne e le efe?

14. (a) Ke tokisetso efe e ntjha e ileng ya qala ho sebetsa ka la 1 October, 1972? (b) Mohokahanyi wa sehlopha sa baholo o sebedisa keletso e ho Bafilipi 2:3 jwang?

¹⁴ Ho e na le hore ebe morabo rona a le mong ya sebeletsang e le molebedi wa phutheho, barababo rona ba bang ba neng ba tshwaneleha ho latela Mangolo le bona ba ne ba kgethwa ka tsela ya puso ya Modimo hore ba sebeletse e le baholo ba Bakreste. E ne e tla ba sehlopha sa baholo se neng se tla lebela phutheho. Tokisetso eo e ntjha ya ho kgetha baholo e ile ya qala ho sebetsa ka la 1 October, 1972. Kajeno mohokahanyi wa sehlopha sa baholo ha a inke e le wa bohlokwa ho feta baholo ba bang empa o inka e le “e monyenyane.” (Luka 9:48) Ke tlhohonolofatso e kaakang ho ba le barababo rona ba ikokobeditseng jwalo mokgatlong wa rona wa lefatsheng lohle wa bara ba motho!—Bafil. 2:3.

15. (a) Tokisetso ya hore ho be le sehlopha sa baholo ka diphuthehong e hlahisitse melemo efe? (b) Keng se bontshang hore Morena wa rona o bohlale?

¹⁵ Tokisetso ya hore dihlopha tsa baholo di arolelane boikarabelo ba phutheho e ile ya nna ya e ba ntlafatso e kgolo. Nahana ka melemo ena e meraro: Wa pele e leng wa bohlokwa ka ho fetisisa, ke hore tokisetso ena e thusa baholo bohle, ho sa tsotellehe hore na boikarabelo ba phutheho bo boima hakae, hore ba ele hloko hore Jesu ke Hlooho ya phutheho. (Baef. 5:23) Wa bobedi, jwalokaha Liproverbia 11:14 e bolela: “Ho na le poloko ha baeletsi ba le bangata.” Ha baholo ba buisana ka dintho tse amanang le hore na phutheho e ka sebeletsa Modimo jwang ebile ba ela hloko ditlhahiso tsa baholo ba bang, ba ka kgona ho fihlela diqeto tse dumellanang le melaomotheo ya Bibele. (Liprov. 27:17) Jehova o hlohonolofatsa diqeto tse jwalo mme dia atleha. Wa boraro, kaha barababo rona ba tshwanelehang ho sebeletsa jwaloka baholo ba ntse ba eketseha, seo se thusitse mokgatlo hore o kgone ho thusa diphutheho tse ntseng di eketseha hore di fumane baholo ba tla di disa. (Esa. 60:3-5) A ko nahane ka sena, palo ya diphutheho tsa lefatsheng lohle e ile ya eketseha ho tloha ho tse fetang 27 000 ka 1971 ho ya ho tse fetang 113 000 ka 2013! Ho hlakile hore Morena wa rona ya bohlale o ile a nna a fa balatedi ba hae badisa ka nako e nepahetseng.—Mik. 5:5.

“Le e ba Mehlala ho Mohlape”

16. (a) Baholo ba na le boikarabelo bofe? (b) Baithuti ba Bibele ba ile ba tadima keletso ya Jesu e reng ‘disa dinku’ jwang?

¹⁶ Morao kwana matsatsing a Baithuti ba Bibele, baholo ba ne ba se ntse ba utlwisisa hore ba ne ba ikarabella ho thusa badumedimmoho le bona hore ba dule ba sebeletsa Modimo. (Bala Bagalata 6:10.) Ka 1908, makasine ya Watch Tower e ile ya ba le sehlooho se neng se e na le keletso ya Jesu e reng: “Disa dinku tsa ka tse nyenyane.” (Joh. 21:15-17) Sehlooho seo se ile sa bua le baholo sa re: “Ke habohlokwa hore mosebetsi oo Monga rona a re fileng wona wa ho hlokomela mohlape o tle pele bophelong ba rona mme re ho nke e le tokelo ho fepa le ho hlokomela balatedi ba Morena.” Ka 1925, makasine ya The Watch Tower e ile ya boela ya hatisa bohlokwa ba hore baholo ba sebeletse e le badisa, e ile ya re: “Kereke ke ya Modimo, . . . mme bohle ba tla ikarabella ho Modimo ka tokelo ya bona ya ho sebeletsa barababo bona.”

17. Balebedi ba ile ba nna ba thuswa jwang hore ba etse mosebetsi wa bona wa bodisa ka katleho?

¹⁷ Mokgatlo wa Jehova o ile wa thusa baholo jwang hore ba ntlafatse tsebo ya bona ya bodisa jwalokaha eka ba ile ba fumana “silevera ho e na le tshepe”? Ka ho ba kwetlisa. Ka lekgetlo la pele ka 1959, ho ile ha tshwarwa Sekolo sa Tshebeletso sa Mmuso sa baholo. Karolo e nngwe e ile ya tshohla sehlooho se reng, “Ho Hlokomela Batho ka Bomong.” Bara bao babo rona ba ile ba kgothalletswa ho “etsa kemiso ya ho etela ditho tsa phutheho malapeng a bona.” Karolo eo e ile ya bua ka ditsela tse fapaneng tseo badisa ba ka etsang hore bahweletsi ba rue molemo maetong ao. Ka 1966 ho ile ha qala Sekolo sa Tshebeletso sa Mmuso se ntjhafaditsweng. Ho ile ha tshohlwa sehlooho se reng “Bohlokwa ba Mosebetsi wa Bodisa.” Morero o ka sehloohong wa karolo eo e ne e le ofe? E ne e le ho ruta hore ba etellang pele “ba lokela ho hlokomela mohlape wa Modimo ka lerato empa ha ba a lokela ho hlokomoloha malapa a bona le ho ya tshebeletsong ya tshimo.” Dilemong tsa morao tjena ho ile ha nna ha tshwarwa dikolo tsa baholo tse eketsehileng. Kwetliso eo mokgatlo wa Jehova o faneng ka yona e bile le diphello dife? Kajeno, diphutheho tsa Bokreste di na le barababo rona ba tshwanelehang ba dikete, ba sebetsang e le badisa ba moya.

18. (a) Baholo ba fuwe boikarabelo bofe bo boima? (b) Ke hobaneng Jehova le Jesu ba rata baholo ba sebetsang ka thata?

¹⁸ Jehova o sebedisa Morena wa rona Jesu ho kgetha baholo ba Bakreste hore ba etse mosebetsi o boima. Mosebetsi oo ke ofe? Ke wa ho etella pele dinku tsa Modimo nakong ena e mahlonoko ka ho fetisisa. (Baef. 4:11, 12; 2 Tim. 3:1) Jehova le Jesu ba rata baholo bana ba sebetsang ka thata hobane bara bana babo rona ba mamela keletso ya Mangolo e reng: “Disang mohlape wa Modimo o tlhokomelong ya lona . . . ka ho rata . . . , ka tabatabelo . . . , le e ba mehlala ho mohlape.” (1 Pet. 5:2, 3) A re ke re hlahlobe ditsela tse pedi hara tse ngata tseo badisa ba Bakreste e leng mehlala ho mohlape le kamoo ba etsang hore ho be le kgotso le thabo ka phuthehong.

Kajeno Baholo ba Disa Mohlape wa Modimo Jwang?

19. Re ikutlwa jwang ha baholo ba sebetsa le rona tshebeletsong?

¹⁹ Tsela ya pele, baholo ba sebetsa le ditho tsa phutheho. Mongodi wa Kosepele Luka o ile a bua ka Jesu a re: “A qala ho tsamaya ho tloha motseng o mong ho ya ho o mong le ho tloha motsaneng o mong ho ya ho o mong, a bolela mme a phatlalatsa ditaba tse molemo tsa mmuso wa Modimo. Ba leshome le metso e mmedi ba ne ba e na le yena.” (Luka 8:1) Jwalokaha Jesu a ile a sebetsa mahetla a bapile le baapostola ba hae, baholo ba behang mohlala kajeno ba sebetsa hammoho le badumedimmoho le bona mosebetsing wa boboledi. Ba a hlokomela hore ha ba etsa jwalo, seo se etsa hore ho be le moya o motle ka phuthehong. Ditho tsa phutheho di ikutlwa jwang ka baholo bao? Jeannine, moradiwabo rona ya dilemong tsa bo 80, o re: “Ha ke sebetsa hammoho le moholo tshebeletsong ya tshimo, seo se mpha monyetla wa hore re buisane le hore ke mo tsebe hamolemo.” Steven, morabo rona ya dilemong tsa bo 30, o re: “Ha moholo a sebetsa le nna tshebeletsong ya ntlo le ntlo, ke ikutlwa eka o batla ho nthusa. Ke a thaba ha ke fumana thuso e jwalo.”

20, 21. Baholo ba ka etsisa modisa ya papisong ya Jesu jwang? Fana ka mohlala. (Sheba le lebokose le reng, “Maeto a Ileng a Beha Ditholwana.”)

²⁰ Tsela ya bobedi, mokgatlo wa Jehova o kwetlisitse baholo hore ba hlokomele batho ba seng ba sa kopanele le phutheho. (Baheb. 12:12) Ke hobaneng ha baholo ba lokela ho thusa batho bao ba fokolang moyeng, hona ba lokela ho ba thusa jwang? Papiso ya Jesu e buang ka modisa le nku e lahlehileng e fana ka dikarabo. (Bala Luka 15:4-7.) Ha modisa wa papisong eo a hlokomela hore ho na le nku e lahlehileng, o e batla jwalokaha eka nku eo ke yona feela eo a nang le yona. Kajeno baholo ba Bakreste ba etsisa mohlala wa modisa eo jwang? Jwalokaha nku e lahlehileng e le ya bohlokwa ho modisa, batho ba seng ba sa kopanele le batho ba Modimo le bona ke ba bohlokwa ho baholo. Ba nka motho ya fokolang e le nku e lahlehileng, ha ba nke hore ho batla nku eo ke tshenyo ya nako. Ho feta moo, jwalokaha modisa a “batla [nku] e lahlehileng ho fihlela a e fumana,” baholo ba ithaopela ho batla batho ba fokolang moyeng le ho ba thusa.

²¹ Modisa ya papisong o etsang ha a fumana nku? O e phahamisa ka mosa, “o e jara mahetleng,” mme o e kgutlisetsa mohlapeng. Ka ho tshwanang, ha moholo a bua ka tsela e bontshang hore o amehile ka motho eo ya fokolang, a ka mo phahamisa moyeng mme a mo thusa hore a kgutlele ka phuthehong. Ke sona se ileng sa etsahalla Victor, morabo rona ya dulang Afrika ya ileng a kgaotsa ho kopanela le phutheho. O re: “Dilemong tse robedi tseo ke neng ke sa kopanele ka tsona baholo ba ne ba ntse ba leka ho nthusa.” Ke eng se ileng sa mo ama maikutlo ka ho kgetheha? O re: “Ka letsatsi le leng, John, moholo eo re neng re le Sekolong sa Tshebeletso sa Bopulamadiboho le yena, o ile a nketela yaba o mpontsha tse ding tsa dinepe tseo re ileng ra di nka ha re le sekolong. Ke ile ka hopola dinako tseo tse monate hoo ke ileng ka labalabela ho ba le thabo eo ke neng ke na le yona ha ke ntse ke sebeletsa Jehova.” Victor, o ile a kgutlela ka phuthehong nakwana ka mora hore John a mo etele. Kajeno ke pulamadiboho hape. Ka sebele ha baholo ba Bakreste ba re tsotella rea thaba.—2 Bakor. 1:24.b

Diphetoho tse Amanang le Baholo di Matlafatsa Bonngwe ba Batho ba Modimo

22. Ho loka le kgotso ho matlafatsa bonngwe ba phutheho ya Bokreste jwang? (Sheba le lebokose le reng “Re ne re Hloletswe.”)

²² Jwalokaha re bone pejana, Jehova o ile a bolela esale pele hore ho loka le kgotso di ne di tla eketseha hara batho ba Modimo. (Esa. 60:17) Dintho tsena ka bobedi di matlafatsa bonngwe ka diphuthehong. Jwang? Tabeng ya ho loka, ‘Modimo ke Jehova a le mong.’ (Deut. 6:4) Melao ya hae e lokileng e sebediswa ka tsela e tshwanang diphuthehong tsa dinaheng tse fapaneng. Molao wa hae wa se nepahetseng le se fosahetseng o mong mme o a tshwana “diphuthehong tsohle tsa bahalaledi.” (1 Bakor. 14:33) Kahoo, diphutheho dia hola hafeela ho sebediswa melao ya Modimo. Morena wa rona o boetse o batla hore re se ke ra thabela feela ho ba le kgotso ka phuthehong empa re be batho ba bopang kgotso. (Mat. 5:9) Kahoo re ‘phehella dintho tse tlisang kgotso.’ Re ithaopela ho rarolla mathata a ka hlahang hara rona. (Bar. 14:19) Ha re etsa jwalo re etsa hore ho be le kgotso le bonngwe ka hara phutheho.—Esa. 60:18.

23. Keng eo re e thabelang re le bahlanka ba Jehova kajeno?

²³ Morao kwana ka November 1895, ha makasine ya Watch Tower e phatlalatsa tokisetso ya pele ya ho kgetha baholo, barababo rona ba ile ba e amohela ka pelo yohle. Ba ile ba bontsha seo jwang? Ba ne ba labalabela ba bile ba rapella hore tokisetso ena e ntjha e thuse batho ba Modimo hore “ba tle ka potlako e le hore ba be bonngweng tumelong.” Ha re nahana ka dilemo tse mashome tse fetileng, ka sebele re thabiswa ke ho bona hore diphetoho tseo Jehova a di tlisitseng ka Morena wa rona di matlafaditse bonngwe ba borapedi ba rona. (Pes. 99:4) Seo se entse hore kajeno batho ba Jehova ba tsamaye ka “moya o tshwanang,” ba latele “mehato e tshwanang” ba sebeletse “Modimo wa kgotso” ‘mahetla a bapile.’—2 Bakor. 12:18; bala Sofonia 3:9.