Lahla Mekgwa Yohle eo Modimo a e Hloileng!

1. Ke keletso efe eo moapostola Pauluse a ileng a e fa Bakreste ba tlotsitsweng?

MOAPOSTOLA PAULUSE o ile a fana ka keletso ena: “Le kgaotse ho ba ka sebopeho sa tsamaiso ena ya dintho.” (Bar. 12:2) Pauluse o ile a fana ka keletso ena ho Bakreste ba mehleng ya hae. Ebe ke hobaneng ha a ile a fana ka kgalemelo e matla hakaalo ho banna le basadi ba neng ba inehetse ho Modimo, ba bile ba tlotsitswe ka moya o halalelang?​—⁠Bar. 1:⁠7.

2-3. Satane o leka jwang ho re kgelosa hore re se ke ra mamela Jehova, hona re ka tlosa mekgwa e “metseng ka matla” menahanong ya rona jwang?

² Pauluse o ne a kgathatsehile hobane mekgwa e mebe ya lefatshe la Satane e ne e se e susumetsa Bakreste ba bang. (Baef. 4:17-19) Sena se ka etsahalla e mong le e mong wa rona. Ka ha Satane ke yena mmusi wa lefatshe lena, o sebedisa maqheka a mangata ho leka ho re kgelosa. Ka mohlala, haeba re batla ho tuma, Satane o sebedisa seo ho etsa hore re se ke ra mamela Jehova. A ka boela a sebedisa dintho tse re etsahalletseng bophelong, setso sa rona le boemo ba rona ba thuto ho etsa hore re nahane ka tsela eo a nahanang ka yona.

³ Na re ka kgona ho tlosa mekgwa e “metseng ka matla” menahanong ya rona? (2 Bakor. 10:⁠4) Bona ka moo Pauluse a arabang potso ena ka teng: “Re phethola menahano le ntho e nngwe le e nngwe e phahameng e phahamiswang kgahlanong le tsebo ya Modimo; mme re tlisa monahano o mong le o mong kgolehong ho o etsa hore o mamele Kreste.” (2 Bakor. 10:⁠5) Ka thuso ya Jehova, re ka kgona ho tlosa mekgwa ena e mebe. Feela jwalo ka ha moriana o ka tlosa tjhefu mmeleng wa motho, ka tsela e tshwanang, Lentswe la Modimo le ka re thusa ho ntsha tjhefu eo lefatshe la Satane le re tshetseng yona.

‘FETOLANG DIKELELLO TSA LONA’

4. Ke diphetoho dife tseo bongata ba rona re ileng ra lokela ho di etsa ha re ne re qala ho ithuta nnete?

⁴ Nahana ka diphetoho tseo o ileng wa lokela ho di etsa ha o ne o qala ho ithuta Bibele le ha o etsa qeto ya ho sebeletsa Jehova. E le hore re sebeletse Jehova, bongata ba rona re ile ra lokela ho kgaotsa ho etsa mekgwa e mebe. (1 Bakor. 6:​9-11) Ka hoo, re thaba hakaakang hore ebe Jehova o re thusitse ho kgaotsa ho etsa dintho tse sa mo thabiseng.

5. Ho ya ka Baroma 12:2, ke dintho dife tse pedi tseo re lokelang ho di etsa?

⁵ Ha re a lokela ho nahana hore ha ho sa hlokahala hore re etse diphetoho tse ding. Le hoja re se re tlohetse ho etsa dibe tse tebileng tseo re neng re di etsa pele re kolobetswa, re lokela ho ikemisetsa ka hohlehohle ho qoba dintho tse ka re kgutlisetsang diketsong tseo. Ebe re ka thuswa keng? Pauluse o re: “Le kgaotse ho ba ka sebopeho sa tsamaiso ena ya dintho, empa le fetohe ka ho fetola dikelello tsa lona.” (Bar. 12:⁠2) Ka hoo, re hloka ho etsa dintho tsena tse pedi: Ya pele, re lokela hore re “kgaotse ho ba ka sebopeho” sa lefatshe lena. Ya bobedi, re lokela hore re “fetohe” ka ho fetola menahano ya rona.

6. Re ithutang mantsweng ao Jesu a a buileng ho Matheu 12:43-45?

⁶ Ho fetoha hoo Pauluse a neng a bua ka hona, ho akarelletsa ho fetang ho fetola ponahalo ya ka ntle empa ho ama karolo e nngwe le e nngwe ya bophelo ba rona. (Sheba lebokose le reng “Na o Fetohile Kapa o Pata Seo o Leng Sona?”) Re lokela ho fetola menahano ya rona ka ho felletseng, maikutlo le tsela eo re etsang dintho ka yona. Ka lebaka leo, re lokela ho ipotsa: ‘Na diphetoho tseo ke di etsang hore ke be Mokreste di ama feela tsela eo ke bonahalang ka yona ho ba bang kapa di ama motho eo ke leng yena ka hare?’ Lengolong la Matheu 12:​43-45, Jesu o hlalosa seo re lokelang ho se etsa. (E bale.) Ha e le hantle, mantswe ao Jesu a a buileng a re ruta thuto ena ya bohlokwa: Ha ho a lekana hore re tlose menahano e fosahetseng feela empa re lokela ho e nkela sebaka ka e thabisang Modimo.

“LE NTJHAFALE MATLENG A SUSUMETSANG DIKELELLO TSA LONA”

7. Re ka etsang hore re fetole motho eo re leng yena ka hare?

⁷ Na ho a kgoneha hore re fetole motho eo re leng yena ka hare? Ho a kgoneha, hobane Bibele e re: “Le ntjhafale matleng a susumetsang dikelello tsa lona, le hore le apare botho bo botjha bo ileng ba boptjwa ho ya ka thato ya Modimo ho lokeng ha nnete le botshepehing.” (Baef. 4:23, 24) Ka hoo, re ka kgona ho fetola motho eo re leng yena ka hare, le hoja ho se bonolo ho etsa jwalo. Ha ho a lekana hore feela re hanele ditakatso tse mpe kapa hona ho qoba ho etsa dintho tse fosahetseng, empa re lokela ho fetola ‘matla a susumetsang dikelello tsa rona.’ Sena se akarelletsa ho fetola ditakatso, boitshwaro le mabaka ao re etsang dintho ka ona. Ka lebaka leo, re lokela ho dula re itlhahloba nako le nako.

8-9. Se ileng sa etsahalla morabo rona e mong, se bontsha bohlokwa ba ho fetola motho eo re leng yena ka hare jwang?

⁸ A re ke re hlahlobe mohlala wa morabo rona e mong ya neng a le mabifi. Pele a ithuta Bibele, o ne a nwa jwala haholo mme a rata ntwa. Empa ka mora hore a ithute Bibele mme a tshwanelehe ho kolobetswa, o ile a kgaotsa ho etsa dintho tseo. Sena se ile sa fana ka bopaki ho batho ba dulang sebakeng sa habo. Nakwana ka mora hore a kolobetswe, o ile a kopana le teko eo a neng a sa e lebella. Monna e mong ya neng a tahilwe, o ile a tla ntlong ya hae mme a re ba lwane. Qalong, morabo rona o ile a hanela boikutlo ba ho batla ho lwana. Eitse ha monna eo a qala ho rohaka Jehova, yaba o qadile noha mokoting. Morabo rona o ile a tswa mme a mo otla. Ke hobaneng ha a ile a etsa jwalo? Le hoja ho ithuta Bibele ho ile ha mo thusa hore a ithibe ha a utlwa a batla ho lwana, o ne a e so fetole tsela eo a nahanang ka yona. Ka mantswe a mang, o ne a e so fetole motho eo e leng yena ka hare.

⁹ Le ha ho le jwalo, morabo rona ha a ka a nyahama. (Liprov. 24:16) Ka thuso ya baholo, o ile a tswelapele ho ntlafatsa botho ba hae mme qetellong ya e ba moholo. Eitse mantsiboya a mang ha a tswa Holong ya Mmuso, a tobana le teko e tshwanang le eo a ileng a tobana le yona dilemong tsa ho feta. Monna e mong ya neng a tahilwe o ile a batla ho lwantsha moholo e mong. Keng seo morabo rona a ileng a se etsa lekgetlong lena? Ka boikokobetso o ile a bua le monna eo ya tahilweng, a mo thusa hore a kgobe matshwafo a ba a mo thusa hore a ye lapeng. Ebe ke hobaneng ha morabo rona a ile a etsa dintho ka tsela e fapaneng kgetlong lee? O ne a se a fetotse motho eo e leng yena ka hare. Ka thuso ya Jehova, o ile a fetoha hore ebe motho ya nang le kgotso le ya ikokobeditseng.

10. Ho hlokahala hore re etseng e le hore re fetole motho eo re leng yena ka hare?

¹⁰ Re ke ke ra fetoha ka ho panya ha leihlo kapa ka mohlolo. Ka hoo, ho hlokahala hore re etse “boiteko bohle bo tiileng” ka dilemo tse ngata, e le hore re fetohe. (2 Pet. 1:5) Ho etsa diphetoho tsena ho ke ke ha etsahala hobane feela re ena le dilemo tse ngata re sebeletsa Jehova. Empa re lokela ho leka ka matla hore re fetole motho eo re leng yena ka hare. Jwale, a re hlahlobeng e meng ya mehato ya bohlokwa e ka re thusang ho etsa diphetoho tsena.

RE KA FETOLA MATLA A SUSUMETSANG DIKELELLO TSA RONA JWANG?

11. Thapelo e ka re thusa jwang ho fetola tsela eo re nahanang ka yona?

¹¹ Mohato wa pele oo re lokelang ho nka, ke ho rapela. Re lokela ho rapela feela jwalo ka ha mongodi wa Pesaleme a ile a rapela a re: “Modimo, bopa ka ho nna pelo e hlwekileng, o kenye ka hare ho nna moya o motjha, o tiileng.” (Pes. 51:10) Re lokela ho dumela hore re hloka ho fetola tsela eo re nahanang ka yona mme re kope Jehova hore a re thuse. Empa re ka kgodiseha jwang hore Jehova a ka re thusa hore re fetohe? Re ka kgodiswa ke tshepiso eo Jehova a ileng a e etsa mabapi le Baiseraele ba hlooho di thata ba mehleng ya Ezekiele, ha a ne a re: “Ke tla ba fa pelo e le nngwe, mme ke tla kenya moya o motjha ka hare ho bona . . . mme ke ba fe pelo ya nama.” (Ezek. 11:19) Jehova o ne a ikemiseditse ho thusa Baiseraele hore ba fetohe mme o ikemiseditse ho re thusa le rona.

12-13. (a) Ho ya ka Pesaleme ya 119:59, keng eo re lokelang ho nahanisisa ka yona? (b) Ke dipotso dife tseo o lokelang ho ipotsa tsona?

¹² Mohato wa bobedi wa bohlokwa oo re lokelang ho o nka, ke ho nahanisisa. Ha re ntse re ithuta Lentswe la Modimo letsatsi le letsatsi, re lokela ho ba le nako ya ho nahanisisa ka seo re se balang, e le hore re ka lemoha maikutlo le menahano eo re lokelang ho e fetola. (Bala Pesaleme ya 119:59; Baheb. 4:12; Jak. 1:25) Re lokela ho hlokomela mekgwa le ha e le efe eo e ka nnang yaba e susumetswa ke tsela eo lefatshe le etsang dintho ka yona. Ka hona, re lokela ho tseba mefokolo ya rona mme re leke ka matla ho e lwantsha.

¹³ Ka mohlala, o lokela ho ipotsa: ‘Na ke motho ya mona?’ (1 Pet. 2:1) ‘Na ke inka ke le wa bohlokwa ho feta ba bang ka lebaka la moo ke tswang teng, boemo ba ka ba thuto kapa tjhelete eo ke nang le yona?’ (Liprov. 16:5) ‘Na ke kgella batho ba bang fatshe hobane feela ba sena dintho tseo ke nang le tsona kapa ba tswa morabeng o mong?’ (Jak. 2:2-4) ‘Na ke utlwa ke rata dintho tseo lefatshe la Satane le di kgothalletsang?’ (1 Joh. 2:15-17) ‘Na ke thabela boithabiso bo hlahisang pefo le boitshwaro bo bobe?’ (Pes. 97:10; 101:3; Amose 5:15) Jwale, ha o ntse o araba dipotso tsena, o tla hlokomela moo o lokelang ho ntlafatsa teng. Ka hoo, ha re hlola menahano e “metseng ka matla” dipelong tsa rona, re tla thabisa Ntate wa rona ya lehodimong.​—Pes. 19:14.

14. Ke hobaneng ha e le ha bohlokwa hore re kgethe metswalle e nepahetseng?

¹⁴ Mohato wa boraro wa bohlokwa oo re lokelang ho o nka, ke ho kgetha metswalle e nepahetseng. Ebang re a hlokomela kapa tjhe, re etsa dintho tseo metswalle ya rona e di etsang. (Liprov. 13:20) Ka mohlala, ha re le mosebetsing kapa sekolong, re ba hara batho ba sa re kgothalletseng ho etsa dintho ka tsela eo Modimo a e amohelang. Le ha ho le jwalo, dibokeng tsa rona tsa Bokreste teng, re ka fumana metswalle e nepahetseng. Ke hona moo re ka susumelletsehang “leratong le mesebetsing e metle.”​—Baheb. 10:24, 25.

LE BE MATLA TUMELONG

15-16. Satane o leka ho fetola menahano ya rona jwang?

¹⁵ Hopola hore Satane o ikemiseditse ho fetola menahano ya rona. O sebedisa mekgwa efe kapa efe ho re kgelosa hore re se ke ra etsa dintho ho latela seo Bibele e se rutang.

¹⁶ Satane o ntse a tswelapele ho botsa potso eo a ileng a e botsa Eva kwana serapeng sa Edene, ha a ne a re: “Na ehlile Modimo o itse . . . ?” (Gen. 3:1) Lefatsheng lena le buswang ke Satane, re dula re utlwa batho ba botsa dipotso tsena tse ka etsang hore re belaelle seo re se dumelang: ‘Na ehlile Modimo ha a batle hore batho ba bong bo tshwanang ba nyalane? Na ehlile ha a batle le keteke Keresemese kapa matsatsi a tswalo? Na ehlile Modimo wa lona o re le se ke la tshelwa madi? Na ehlile Modimo ya lerato o lebelletse hore le se ke la tlwaelana le metswalle kapa ba lelapa ba kgaotsweng?’

17. Re lokela ho etsang ha batho ba re botsa dipotso tse ka etsang hore re belaelle seo re se dumelang, hona Bakolose 2:​6, 7 e re diphello e tla ba dife?

¹⁷ Re lokela ho kgodiseha le ho tshepa seo re se dumelang. Haeba re sa fumane dikarabo tsa dipotso tse mabapi le tumelo ya rona, re ka qala ho belaela seo re se dumelang mme dipelaelo tseo di ka fetola menahano ya rona le ho senya tumelo ya rona. Jwale re lokelang ho etsang? Bibele e re re lokela ho fetola dikelello tsa rona, e le hore re ka ipakela e le rona “thato ya Modimo e molemo le e amohelehang le e phethahetseng.” (Bar. 12:2) Ka hoo, ha re ntse re ithuta ka mehla, re tla kgodiseha hore seo Bibele e se rutang ke nnete le hore melao ya Jehova e nepahetse. Jwalo ka sefate se nang le metso e tiileng, le rona re tla tiya tumelong.​—Bala Bakolose 2:6, 7.

18. Keng e tla re thusa hore re se ke ra kgeloswa ke lefatshe la Satane?

¹⁸ Nnete ke hore ke rona feela ba ka etsang hore tumelo ya rona e be matla. Ka lebaka leo, re lokela ho dula re ntlafatsa tsela eo re nahanang le ho etsa dintho ka yona. Ka hona, rapela ka mehla mme o kope Jehova hore a o thuse ka moya wa hae o halalelang. Nahanisisa mme o hlahlobe menahano ya hao le mabaka ao o etsang dintho ka ona. Hape, batla metswalle e nepahetseng, e tla o thusa hore o fetole tsela eo o nahanang ka yona. Ha o etsa dintho tsena, o ke ke wa kgeloswa ke lefatshe la Satane mme o tla kgona ho fetola “menahano le ntho e nngwe le e nngwe e phahameng e phahamiswang kgahlanong le tsebo ya Modimo.”​—2 Bakor. 10:5.