Batho ba Thusang ba Bang ba Tla Fumana Ditlhohonolofatso dife?

Batho ba bangata lefatsheng kaofela ha ba na dijo le moo ba ka dulang teng. Ba bang ha ba na tshepo ya hore dintho di tla loka. Boiteko ba rona ba ho thusa batho ba jwalo bo tla etsa hore Modimo a re amohele mme a re hlohonolofatse.

KE ENG SEO MANGOLO A HALALELANG A SE BUANG?

“Ya bontshang mohau ho ya tlaase o adima Jehova, mme o tla mo buseletsa tshwaro ya hae.”​—LIPROVERBIA 19:17.

HO BOLELANG HO THUSA MOTHO YA HLOKANG?

Jesu o ile a bua ka pale e nngwe ya monna ya ileng a otlwa ke mashodu yaba ba mo siya moo a le makgatheng a ho shwa. (Luka 10:29-37) Ho ile ha fihla monna e mong ya neng a sa tsebe monna eo mme o ile a mo thusa mme a tlamisa maqeba a hae. Monna eo o ile a mo thusa le hoja ba ne ba sa tswe morabeng o tshwanang.

Monna eo ha a ka a thusa monna ya lemetseng ka hore a mo tlamise maqeba le ho mo fa dintho tseo a di hlokang feela, empa o ile a boela a mo tshedisa le ho mo imolla bohlokong boo a neng a bo utlwile.

Re ithutang paleng ee? Ha Jesu a ne a bua ka pale ena, o ne a re hlokomedisa hore re lokela ho thusa batho ka dintho tseo ba di hlokang. (Liproverbia 14:31) Mangolo a Halalelang a re ruta hore haufinyane Modimo o tla fedisa ho sotleha le mathata ohle a re hlahelang. Empa re ka nna ra ipotsa hore Modimo o tla etsa dintho tsena neng le hore na jwang? Sehlooho se latelang se tla bua ka ditlhohonolofatso tseo Mmopi wa rona ya lerato a re tshepisang tsona.