Ditshupiso Tsa Bukana ya Seboka sa Bophelo le Tshebeletso
© 2024 Watch Tower Bible and Tract Society of Pennsylvania
LA 6-12 JANUARY
MATLOTLO A TSWANG BIBELENG PESALEME YA 127-134
Batswadi, Tswelang Pele ho Hlokomela Bana ba Lona
Ananela ho ba Setho sa Lelapa la Jehova
9 Jehova o file batho bokgoni ba hore ba be le bana ha mmoho le boikarabelo ba hore ba ba rute ho mo rata le ho mo sebeletsa. Haeba o motswadi, na o ananela mpho ee ya bohlokwa? Jehova o file mangeloi bokgoni ba ho etsa dintho tse ngata tse hlollang empa ha a a fa bokgoni ba ho ba le bana. Ka hoo haeba o motswadi, o lokela ho ananela monyetla ona oo Jehova a o fileng wona wa hore o hodise bana. Batswadi ba fuwe boikarabelo ba bohlokwa ba hore ba hodise bana ba bona “ka tayo le kelello e laolwang ke Jehova.” (Baef. 6:4; Deut. 6:5-7; Pes. 127:3) Mokgatlo wa Modimo o fana ka dithulusi tse ngata tse thehilweng Bibeleng tse kang dingolwa, divideo, mmino le dihlooho tse hlahang websaeteng e le hore di thuse batswadi ho hodisa bana ba bona. Ho hlakile hore Ntate wa rona le Mora wa hae ba rata bana haholo. (Luka 18:5-17) Jehova o a thaba ha batswadi ba itshetleha ka yena le ho etsa ka hohle ho hlokomela bana ba bona. Ha batswadi ba etsa jwalo, ba thusa bana ba bona hore ba be le tshepo ya hore le bona e tla ba karolo ya lelapa la Jehova ka ho sa feleng.
Batswadi ba Lokela ho Thusa Bana ba Bona ho Rata Jehova
20 Tseba bana ba hao. Pesaleme ya 127 e tshwantsha bana le metsu. (Bala Pesaleme ya 127:4.) Jwalo ka ha metsu e ka etswa ka dintho tse fapaneng ebile e sa lekane ka boholo, bana le bona ha ba tshwane. Ka hoo, batswadi ba lokela ho tseba hore na ba kwetlise ngwana e mong le e mong jwang. Banyalani ba bang ba mehleng ena ba dulang Iseraele, ba ileng ba atleha ho hodisa bana ba bona ba babedi hore ba sebeletse Jehova, ha ba hlalosa hore na ba ile ba thuswa keng ba re: “Re ne re ruta ngwana e mong le e mong Bibele ka nako ya hae.” Ke nnete hore hlooho ya lelapa ke yona e tla etsa qeto ya hore na ho ruta bana ka tsela eo, ho a kgoneha kapa tjhe.
Matlotlo a Patilweng
it-1-E 543
Dimela Tse Hlahang ka Bibeleng
Mopesaleme o buile ka dintho tseo sefate sa mohlwaare se kgonang ho di etsa ha a ne a bua ka batho ba tshabang Jehova, o ile a re: “Bara ba hao ba tla o potapota jwalo ka mahlomela a sefate sa mohlwaare tafoleng ya hao.” (Ps 128:1-3) Mahlomela kapa makala a sefate sa mohlwaare a a pongwa ebe a sebediswa ho qala difate tse ntjha. Ka nako e nngwe difate tsa mohlwaare tsa kgale di hlahisa difate tse ding tse nyenyane ho tswa methapong ya tsona e le ho ikatisa. Jwalo ka difate tseo tse nyenyane, bara ba ne ba potapota ntate wa bona ebe lelapa lohle le a thaba.
LA 13-19 JANUARY
MATLOTLO A TSWANG BIBELENG PESALEME YA 135-137
“Morena wa Rona o Moholo ho Feta Medimo e Meng Yohle”
it-2-E 661 ¶4-5
Matla, Mesebetsi e Matla
Tsela eo Modimo a laolang dintho tsa tlhaho ka yona e a ikgetha. E le hore Jehova a bontshe hore ke Modimo wa nnete, ke ho utlwahalang hore re lebelle hore a sebedise matla a hae ho laola popo ka tsela e tla bontsha hore ke Modimo ya ikgethang. (Ps 135:5, 6) Letsatsi, kgwedi, dipolanete, dinaledi, maemo a lehodimo (moya, pula le maemo a mang), sehlopha sa ditsie, dinonyana tse fallang le dintho tse ding tse etsahalang ka tsela ya tlhaho, kaofela ha tsona di latela melao ya tlhaho. Ho ntse ho le jwalo ha di fane ka bopaki bo lekaneng ba hore lebitso la Modimo le halaletswe ho batho ba bodumedi ba bohata kapa ba re hanyetsang.
Le ha ho le jwalo, Jehova Modimo a ka kgona ho sebedisa popo le melao ya tlhaho ka tsela e sa tlwaelehang ho phethahatsa merero ya hae ka nako e behilweng ke yena e le ho paka hore ke Modimo wa nnete. Le hoja dintho tse kang komello, pula e nang ka sefefo kapa maemo a mang a lehodimo e le dintho tse tlwaelehileng, tsela eo Jehova a ileng a di sebedisa ka yona ho phethahatsa boprofeta ba hae e ile ya etsa hore e be tse ikgethang. (Bapisa le 1Ma 17:1; 18:1, 2, 41-45.) Le ha ho le jwalo, ka dinako tse ding dintho tsena e ne e eba diketsahalo tse ikgethang hobane di ne di eba matla haholo (Ex 9:24) kapa di etsahala ka tsela e sa tlwaelehang ebile e le ntho eo batho ba qalang ho e bona kapa di etsahala ka dinako tse sa lebellwang.—Ex 34:10; 1Sa 12:16-18.
Mosa o Lerato wa Jehova o o Tswela Molemo Jwang?
16 Ha Jehova e le Setshabelo sa rona re ikutlwa re sireletsehile. Ho ntse ho le jwalo, ka matsatsi a mang re ka nna ra nyahama ha ba ha eba thata ho kgaotsa ho ikutlwa ka tsela eo. Jehova o tla re thusa jwang ha re ikutlwa ka tsela eo? (Bala Pesaleme ya 136:23.) O tla re tshehetsa a be a re thuse hore re se ke ra hlola re ikutlwa ka tsela eo. (Pes. 28:9; 94:18) Re fumana molemo ofe? Ho tseba hore Modimo o dula a re tshehetsa ho re thusa ka ditsela tse pedi. Ya pele, ho sa tsotellehe hore na re dula hokae re a tseba hore Jehova o tla dula a re sireletsa. Ya bobedi, Ntate wa rona ya lerato o re tsotella haholo.
Matlotlo a Patilweng
it-1-E 1248
Jah
Lentswe Jah hangata le sebediswa ha ho roriswa, ho binwa, ho rapelwa ebile ho etswa dithapedi hape batho ba le sebedisa ha ba thabetse ho hlola kapa ho lopollwa kapa nakong eo ba bonang letsoho le matla la Modimo. Mehlala ya moo lentswe lena le sebedisitsweng teng e mengata. Polelo e reng “Rorisang Jah!” (Hallelujah) e sebediswa ha ho roriswa Modimo bukeng ya Dipesaleme mme e qala ho hlaha ho Pesaleme ya 104:35. Dipesalemeng tse ding e hlala qalong feela (Ps 111, 112), ka dinako tse ding e hlaha mahareng (135:3) kapa qetellong feela (Ps 104, 105, 115-117) empa ka dinako tse ding e hlaha qalong le qetellong (Ps 106, 113, 135, 146-150). Bukeng ya Tshenolo batho ba bangata ba lehodimong ba sebedisa polelo ena ka makgetlo ha ba rorisa Jehova.—Tshe 19:1-6.
Ditemaneng tse ding moo lentswe “Jah” le sebedisitsweng, ke moo batho ba neng ba rorisa Jehova ka dipina le moo ba neng ba etsa dithapedi. Ho na le pina eo Moshe a ileng a e bina ka mora ho lopollwa. (Ex 15:2) Ditemaneng tseo Esaia a di ngotseng ho sebedisitswe mabitso “Jah Jehova” ho hatisa taba. (Esa 12:2; 26:4) Ezekiase o ile a rorisa Jehova ka mora hore a mo fodise ka mohlolo nakong eo a neng a kulela lefu, o ile a tshollela pelo ya hae ho Jehova ka ho bitsa Jah ka makgetlo. (Esa 38:9, 11) Ho na le phapang pakeng tsa bafu ba ke keng ba kgona ho rorisa Jah le batho ba ikemiseditseng ho phelela ho mo rorisa. (Ps 115:17, 18; 118:17-19) Dipesaleme tse ding ke dithapelo tse bontshang kananelo ba keng sa ho pholoswa, ho sireletswa le ho kgalemelwa.—Ps 94:12; 118:5, 14.
LA 20-26 JANUARY
MATLOTLO A TSWANG BIBELENG PESALEME YA 138-139
O se ke wa Dumella Letswalo ho o Sitisa ho Arabela ha o le Dibokeng
Rorisa Jehova Hara Phutheho
10 Na o ye o utlwe o sewa ke mala ha o tlameha ho phahamisa letsoho? Haeba ho jwalo, tseba hore ha o mong. Nnete ke hore bongata ba rona re a tshoha ha re arabela. Ho tseba hore na ke hobaneng ha o tshoha ha o tlameha ho araba, ho tla o thusa. Na o tshaba hore o tla tloha o lebala ntho eo o neng o tlo e bua kapa o tshaba hore o tla tloha o fosa karabo? Kapa na o tshwenyeha ka hore karabo ya hao e ke ke ya ba monate jwalo ka tsa ba bang? Ha e le hantle ho tshoha hona ho ka bontsha ho hong. Ho ka bontsha hore o ikokobeditse ebile o nka ba bang ba o phahametse. Hopola hore Jehova o rata batho ba ikokobeditseng. (Pes. 138:6; Bafil. 2:3) Empa o boetse o batla hore o mo rorise o be o kgothatse bara le baradibeno ha o le dibokeng. (1 Bathes. 5:11) O a o rata mme o tla o thusa hore o be sebete.
Kgothatsa ba Bang ha o le Dibokeng
7 O ka thuswa ke ho sheba ditlhahiso tse ding tse hlahang dimakasineng tsa Tora ya ho Lebela tse fetileng. Ka mohlala, lokisetsa hantle. (Diprov. 21:5) Ha o utlwisisa hantle hore na sehlooho se bua ka eng, o ke ke wa tshoha haholo ha o arabela. Lokisetsa hore o fane ka dikarabo tse kgutshwanyane. (Diprov. 15:23; 17:27) Ha o fana ka dikarabo tse kgutshwanyane, o ke ke wa tshoha haholo ho feta ha o fana ka tse telele. Karabo e kgutshwanyane e ka etsa hore ho be bonolo hore Bakrestemmoho ba utlwisise seo o se buang ho feta ho fana ka karabo e telele e nang le dintlha tse ngata. Ha karabo ya hao e le kgutshwanyane ebile o e beha ka mantswe a hao, o tla be o bontsha hore o lokiseditse hantle ebile o utlwisisa seo ho buuwang ka sona.
Matlotlo a Patilweng
it-1-E 862 ¶4
Ho Tshwarela
Mokreste o lokela ho tshwarela batho ba bang ha ba mo foseditse ho sa tsotellehe makgetlo ao ba mo foseditseng ka ona. (Lu 17:3, 4; Ef 4:32; Kol 3:13) Jehova ha a tshwarele batho ba sa tshwareleng batho ba bang. (Mat 6:14, 15) Le ha ho le jwalo, haeba motho a etsa sebe se tebileng mme “moetsadibe” ya jwalo a tloswa ka phuthehong ebe ka mora nako e itseng o bontsha hore o bakile e le ka nnete, a ka tshwarelwa. Ka hoo, bohle ba ka phuthehong ba ka mo kgodisa hore ba a mo rata. (1Ko 5:13; 2Ko 2:6-11) Le ha ho le jwalo, ha ho a lebellwa hore Bakreste ba tshwarele batho ba ratang ho utlwisa batho ba bang bohloko le ba tlwaetseng ho etsa sebe ka boomo ba sa bake. Batho ba jwalo e ba dira tsa Modimo.—Heb 10:26-31; Ps 139:21, 22.
LA 27 JANUARY–LA 2 FEBRUARY
MATLOTLO A TSWANG BIBELENG PESALEME YA 140-143
Etsa Dintho Tumellanong le Dithapelo Tsa Hao
Mamela “Mantswe a ba Bohlale”
13 Nka keletso e le tsela eo Modimo a o bontshang hore o a o rata. Jehova o re batlela se molemo. (Liprov. 4:20-22) O bontsha hore o a re rata ka ho re fa keletso a sebedisa Lentswe la hae, dingolwa tse thehilweng Bibeleng kapa Bakreste ba nang le boiphihlelo. Baheberu 12:9, 10 e re: “O etsa jwalo molemong wa rona.”
14 Nahana ka keletso eseng tsela eo e fanweng ka yona. Ka dinako tse ding, re ka nna ra nahana hore ha re a fuwa keletso ka tsela e nepahetseng. Ke nnete hore motho ya fanang ka keletso o lokela ho etsa hore ho be bonolo hore motho e mong a e amohele. (Bagal. 6:1) Le ha ho le jwalo, haeba e le rona ba eletswang re lokela ho nahana ka keletso eo re e fuwang le hoja re ka nka hore re ka be re eleditswe ka tsela e fapaneng. Re ka nna ra ipotsa dipotso tsena: ‘Le hoja ke sa rata tsela eo keletso e fanweng ka yona, na ho na le ntho eo nka ithutang yona ho yona? Na nka iphapanyetsa diphoso tsa motho ya nkeletsang ebe ke ithuta ho hong ho keletso eo a mphang yona?’ E ka ba bohlale hore re fumane ntho eo re ka ithutang yona ho keletso le ha e le efe eo re e fumanang.—Liprov. 15:31.
w10 3/15 32 ¶4
Lula U E-na le “Pelo e Hloekileng” Linakong Tsena Tse Mahlonoko
Bahlanka ba bang ba Molimo ba ’nile ba nyahama ka lebaka la ho hatelloa ke bahanyetsi, mathata a moruo le ho kula haholo. Ka linako tse ling, lipelo tsa bona le tsona li ’nile tsa ameha hampe. Esita le Morena Davida o ile a etsahalloa ke seo, ’me o ile a re: “Moea oa ka oa tepella ka hare ho ’na; pelo ea ka e iponahatsa e feletsoe ke matla ka hare ho ’na.” (Pes. 143:4) O ile a thusoa ke eng linakong tse thata joalo? Davida o ile a hopola tsela eo Molimo a ileng a sebetsana le bahlanka ba Hae ka eona le kamoo eena ka boeena a ’nileng a lopolloa kateng. O ile a nahanisisa ka seo Jehova a neng a se entse molemong oa lebitso la Hae le leholo. Davida o ile a lula a tšoarehile ka mesebetsi ea Molimo. (Pes. 143:5) Ka tsela e tšoanang, ho nahanisisa ka ’Mopi oa rona le ka sohle seo a re etselitseng sona le seo a ntseng a tsoela pele ho re etsetsa sona, ho tla re thusa leha re thulana le liteko.
w15 3/15 32 ¶2
Na ho Nyala “Feela Moreneng” e sa Ntse e le Ntho e Utloahalang?
Ka linako tse ling u ka ’na ua ikutloa joaloka Davida, ea ileng a re: “Potlaka, u nkarabe, Jehova. Moea oa ka o felile. U se ke ua mpatela sefahleho sa hao.” (Pes. 143:5-7, 10) U se ke ua felloa ke tšepo. E fa Jehova nako ea hore a u bontše seo a batlang hore u se etse. Mamela Jehova ka ho bala Bibele le ka ho thuisa ka seo u se balileng. Sena se tla u thusa hore u tsebe seo Jehova a se hlokang ho uena le kamoo a ileng a thusa bahlanka ba hae nakong e fetileng. Ha u mamela litaelo tsa hae, seo se tla u matlafalletsa ho lula u mo mamela.
Matlotlo a Patilweng
it-2-E 1151
Tjhefo ya Noha
Ka Tsela ya Tshwantshetso. Mashano le diketselletso tsa batho ba kgopo tse senyang botumo ba motho e mong di tshwantshwa le tjhefo ya noha e bolayang. (Ps 58:3, 4) Bibele ha e bua ka baetselletsi e re: “Dintho tseo ba di buang di kotsi jwalo ka tjhefo ya noha ya marabe.” Le hoja tjhefo ya noha e le menong a yona, e ntse e le kotsi. (Ps 140:3;Bar 3:13) Ha motho a sebedisa leleme la hae hampe ka hore a etselletse batho ba bang, a ba bua ha mpe, a ruta mashano kapa a bua dintho tse kotsi, leleme la hae “le tletse tjhefo.”—Jak 3:8.
LA 3-9 FEBRUARY
MATLOTLO A TSWANG BIBELENG PESALEME YA 144-146
“Ho Thaba Batho Bao Modimo wa Bona e Leng Jehova!”
Dipotso Tse Tswang Ho Babadi
2. Mantswe a ntlafaditsweng a dumellana hantle le pesaleme yohle. Tshebediso ya lentswe “jwale” ho temana ya 12, e bontsha hore ditlhohonolofatso tse temaneng ya 12 ho ya ho 14, di sebetsa ho ba lokileng ba reng Modimo a ba pholose ho ba kgopo bao temana ya 11 e buang ka bona. Molemo wa phetoho ena o boetse hape o a hlahella temaneng ya 15 moo mantswe “ho thaba,” a buang ka sehlopha se le seng sa batho “bao Modimo wa bona e leng Jehova!” Hape o lokela ho hopola hore mongolo wa qalong wa Seheberu o ne a se na matshwao a puo. Ka lebaka leo, e le hore bafetoledi ba etse mosebetsi ka nepo, ba lokela ho tseba hantle setaele le melao ya puo ya Seheberu esita le ditlaleho tsa Bibele tse buang ka taba eo.
3. Phetoho e entsweng temaneng ena, e nyallana hantle le ditemana tse ding tsa Bibele, tse buang ka ditlhohonolofatso tseo Modimo a di tshepisitseng bahlanka ba hae ba tshepahalang. Ka hona, phetoho ena e etsa hore pesaleme ena, e dumellane hantle le mantswe a mongodi wa yona e leng Davida. O ne a ile a bontsha hore ka mora hore Modimo a pholose Baiseraele direng tsa bona, o ne a tla ba hlohonolofatsa ka thabo le kgotso. (Lev. 26:9, 10; Deut. 7:13; Pes. 128:1-6) Nka ka mohlala, Deuteronoma 28:4 e re: “Ditholwana tsa mpa ya hao di tla hlohonolofatswa le ditholwana tsa naha ya hao le ditholwana tsa phoofolo ya hao e ruuwang, namane ya kgomo ya hao le se tswetsweng ke mohlape wa hao.” Ka sebele, ho ile ha fela ha ba jwalo, nakong eo mora wa Davida Solomone e neng e le morena, batho ba ile ba thabela kgotso le katleho e tshwarellang. Ho feta moo, dintho tseo tse ileng tsa etsahala pusong ya Solomone, e ile ya ba selelekela sa se tla etsahala pusong ya Mesia.—1 Mar. 4:20, 21; Pes. 72:1-20.
Dula o Ena le Tshepo e Tiileng
16 Tshepo ya rona ya bophelo bo sa feleng ke mpho e tswang ho Modimo. Re lebelletse bokamoso bo thabisang haholo boo re tsebang hantle hore bo a tla, ho bata kapa ho tjhesa. Tshepo ena e tshwana le ankora ka ha e re thusa hore re se ke ra tsukutlwa ke mathata, re mamelle ha re hloriswa esita le ha re tobane le lefu. E tshwana le helmete ka ha e sireletsa dikelello tsa rona e le hore re se ke ra ba le menahano e ka etsang hore re etse dintho tse fosahetseng. E boetse e re thusa hore re etse dintho tse nepahetseng. Tshepo eo Bibele e re fang yona e re atametsa ho Modimo ebile e re thusa ho bona hore na o re rata haholo hakae. Re fumana molemo o moholo haeba re dula re ena le tshepo e matla.
17 Pauluse o ile a kgothalletsa Baroma hore ba ‘thabe ka lebaka la tshepo eo ba nang le yona.’ (Bar. 12:12) Pauluse o ne a thabile hobane o ne a tseba hore o tla phela ka ho sa feleng lehodimong hafeela a ntse a tshepahala. Le rona re ka thabela tshepo eo re nang le yona hobane re a tseba hore Jehova o tla phethahatsa ditshepiso tsa hae. Mopesaleme o ile a ngola a re: “Ho thaba motho . . . ya tshepileng Jehova Modimo wa hae . . . ya dulang a tshepahala.”—Pes. 146:5, 6.
Ke Lerato la Mofuta Ofe le Tlisang Thabo ya Sebele?
19 E se e le dilemo tse ka bang 6 000 batho ba sotleha lefatsheng lena la Satane. Lefatshe le tletse batho ba ratang tjhelete le menyaka esita le ba ithatang ka ho fetelletseng. Batho bana ba dula ba nahana ka ditakatso tsa bona ebile ke tsona tse tlang pele bophelong ba bona. Ha ho mohla batho ba jwalo ba tla thaba e le kannete. Ho fapana le hoo, Bibele e re: “Ho thaba eo Modimo wa Jakobo e leng thuso ya hae, eo tshepo ya hae e leng ho Jehova Modimo wa hae.”—Ps. 146:5.
20 Ka phuthehong, batho ba ratang Modimo ba ntse ba eketseha selemo le selemo. Sena ke bopaki ba hore Mmuso wa Modimo o a busa ebile haufinyane o tla etsetsa batho dintho tse ntle. Re fumana thabo ya sebele ha re etsa thato ya Modimo, re tseba hore re kgahlisa Ya Phahameng ka ho fetisisa. Ho ekelletsa moo, ba ratang Jehova ba tla thaba ka ho sa feleng! Sehloohong se latelang re tla bona hore na boithati bo etsa hore motho a be le mekgwa efe e mebe. Re tla boela re bone hore na mekgwa ena e fapane jwang le makgabane a bahlanka ba Jehova.
Matlotlo a Patilweng
it-1-E 111 ¶9
Diphoofolo
Bibele e re re lokela ho tshwara diphoofolo hantle le ho di hlokomela. Jehova o itsebahatsa e le yena ya di fang bophelo le ya di hlokomelang. (Pr 12:10; Ps 145:15, 16) Molao wa Moshe o ne o hatisa bohlokwa ba ho hlokomela diphoofolo tse ruuwang. Haeba motho a fumana diphoofolo tse hlahlathetseng o ne a lokela ho li kgutlisetsa ho monga tsona le haeba a fumana di tshwasehile o ne a lokela ho di thusa. (Ex 23:4, 5) Di ne di lokela ho tshwarwa hantle. (De 22:10; 25:4) Le tsona di ne di lokela ho phomola ka Sabatha. (Ex 20:10; 23:12; De 5:14) Diphoofolo tse neng di le kotsi di ne di lokela ho kwallwa kapa di bolawe. (Ge 9:5; Ex 21:28, 29) Ho ne ho sa dumellwa hore diphoofolo tsa mefuta e mmedi di tlolelane.—Le 19:19.
LA 10-16 FEBRUARY
MATLOTLO A TSWANG BIBELENG PESALEME YA 147-150
Re na le Mabaka a Mangata a Hore re Rorise Jah
Ke Hobaneng ha re Lokela ho Rorisa Jehova?
5 Jehova o ile a fana ka matshediso ho setjhaba sa Iseraele ka kakaretso esita le ho batho ka bomong. Ho jwalo le kajeno. Mongodi wa pesaleme o ile a re ka Modimo: “O fodisa ba robehileng dipelo, o tlamisa maqeba a bona a bohloko.” (Pes. 147:3) E, Jehova o tsotella ba kulang le ba tepelletseng. O ikemiseditse ho re thusa ha re utlwile bohloko le ha re imetswe maikutlong. (Pes. 34:18; Esa. 57:15) O re fa matla le bohlale ba ho sebetsana le mathata a rona.—Jak. 1:5.
6 Jwale mongodi wa pesaleme o lebisa tlhokomelo lehodimong mme o re Jehova “o bala palo ya dinaledi” le hore “kaofela ha tsona o di bitsa ka mabitso.” (Pes. 147:4.) Ke hobaneng ha mongodi a se a bua ka dinaledi? Nahana ka sena: Mongodi enwa o ne a bona dinaledi empa o ne a sa tsebe hore di kae ka palo. Dilemong tsa morao tjena, theknoloji e re thusa ho bona dinaledi tse ngata ho feta pele. Ba bang ba nahana hore sehlopheng sa rona feela sa dinaledi se bitswang Milky Way, ho na le dinaledi tse dibilione. Ka kakaretso, ho ka etsahala hore ho na le dihlopha tsa dinaledi tse dibilione ka dibilione! E, palo ya dinaledi e bonahala e le kgolo haholo ho rona batho! Empa Mmopi yena o tseba palo le mabitso a tsona. Sena se bolela hore naledi ka nngwe ke ya bohlokwa ho Jehova. (1 Bakor. 15:41) Ho thweng ka batho? Haeba Modimo a tseba dinaledi hakaalo, ho hlakile hore o tseba tsohle ka wena, hore o hokae, ka nako efe le hore na o ikutlwa jwang!
Ke Hobaneng ha re Lokela ho Rorisa Jehova?
7 Ntle le ho o thahasella, Jehova o boetse o na le qenehelo mme o na le matla a ho o thusa ha o na le mathata. (Bala Pesaleme ya 147:5.) O ka nna wa nahana hore mathata a hao ha a na tharollo mme wa ikutlwa o imetswe. Modimo o utlwisisa mefokolo ya hao kaha o ‘hopola hore o lerole.’ (Pes. 103:14) Re etsa diphoso kgafetsa ka lebaka la ho se phethahale. Ka mohlala, re utlwa bohloko ha re kgopisa ba bang ka seo re se buang kapa ha re hlolwa ke ditakatso tse fosahetseng. Le hoja Jehova a se na mefokolo e jwalo, o utlwisisa botho ba rona ho feta motho le ha e le ofe.—Esa. 40:28.
Ke Hobaneng ha re Lokela ho Rorisa Jehova?
18 Mongodi wa Pesaleme ya 147 o ne a tseba kamoo Modimo a neng a rata setjhaba sa hae sa boholoholo kateng. E ne e le sona setjhaba seo Modimo a neng a se file “lentswe” le “melao ya hae ya tsamaiso le diqeto tsa hae tsa boahlodi.” (Bala Pesaleme ya 147:19, 20.) Kajeno ke rona feela batho ba nang le tlotla ya ho bitswa ka lebitso la Modimo mona lefatsheng. Kaha re tseba Jehova ebile re sebedisa Lentswe la hae, re na le kamano e ntle le yena. E, jwalo ka mongodi wa Pesaleme ya 147, le wena o na le mabaka a mangata a ho rorisa Jehova le ho kgothatsa ba bang hore ba etse ka ho tshwanang.
Matlotlo a Patilweng
it-1-E 316
Dinonyana
Mopesaleme o ile a re “dinonyana” di rorise Jehova. (Ps 148:1, 10) Di etsa sena ka tsela e hlollang le e rarahaneng eo di entsweng ka yona. Nonyana e le nngwe e ka ba le masiba a sekete ho isa ho a ka hodimo ho 20 000. Karolo e bohareng ya lesiba e na le mela e fapanyetsanang e bitswang di-barb. Di tshwarwa ke dihakisi tse nyenyane tse makgolo tse bitswang di-barbule, tse itshwarellang dihakising tse ding tse bitswang di-barbicels. Ho hakanngwa hore lesiba le le leng le ka etsang disenthimithara tse 15 la leeba le na le di-barbule tse ka bang makgolo a dikete le di-barbicels tse dimilione. Tsela eo dinonyana di fofang ka yona le eo mmele ya tsona e entsweng ka yona e rarahane haholo le ho feta eo difofane tsa moraorao di entsweng ka yona. Masapo a nonyana a bobebe mme a etsa hore e se ke ya eba boima. Mapheo a dinonyana tsa lewatle tse bitswang frigate ha a phukaletse a etsa bolelele ba dimithara tse pedi, ho ntse ho le jwalo e ka ba boima bo ka etsang dikramo tse 110. Masapo a mapheo a dinonyana tse ding tse kgolo a na le masapo a mang a manyenyane ka hare a a tshehetsang a jwalo ka ditshepe tse tshehetsang mapheo a sefofane se seholo.
LA 17-23 FEBRUARY
MATLOTLO A TSWANG BIBELENG DIPROVERBIA 1
Batjha, le Tla Mamela Mang?
O se ke wa Dumella Letho ho o Amoha Moputso
16 Jwalo ka motjha, na o na le ho utlwa eka batswadi ba hao ha ba o utlwisise le hore ba o behela melao e mengata haholo? Boemo boo bo ka nna ba o ferekanya hoo o ka qetellang o se o sa bone bohlokwa ba ho tswela pele o sebeletsa Jehova. Empa o tla be o etsa phoso e kgolo ha o ka kgaotsa ho sebeletsa Jehova mme ha morao o tla hlokomela hore batswadi ba hao ba Bakreste le phutheho ya heno ba ne ba hlile ba o rata e le ka nnete.
17 Haeba batswadi ba hao ba ne ba ka itholela feela ha o etsa diphoso, ho ne ho tla hlaka hore ha ba o rate. (Baheb. 12:8) Ho ka etsahala hore ha o rate tsela eo batswadi ba hao ba o kgalemelang ka yona. Ho e na le ho tshwenyeha ka tsela eo ba buang le wena ka yona, ho ka ba bohlale ho nka keletso ya bona le ho hopola hore ba amehile maikutlo hobane ba o rata. Ka hoo kgoba matshwafo mme o bontshe hore o ananela keletso ya bona. Lentswe la Modimo le re: “Mang kapa mang ya tshwarang dipolelo tsa hae o na le tsebo, mme motho ya nang le temoho o na le moya o kgutsitseng.” (Liprov. 17:27) Ka hoo lwanela ho ba motho ya kgobang matshwafo ha o kgalemelwa mme o amohele keletso ho e na le ho tshwenyeha ka tsela eo e fanweng ka yona. (Liprov. 1:8) Ananela hore o na le batswadi ba ratang Jehova e le kannete. Ba batla ho o thusa hore le wena o fumane moputso wa bophelo.
w05 2/15 19-20 ¶11-12
Ho Sireletsa Boitsebahatso ba Rona ba Bokreste
11 Batla ho thabisa Molimo, eseng motho. Empa feela e le ntho ea tlhaho hore ka tsela e itseng re batle ho tsebahala re e-na le sehlopha seo re oelang ho sona. E mong le e mong o batla metsoalle, ’me ho amoheloa ke batho ho etsa hore re ikutloe re thabile re bile re sireletsehile. Nakong ea bocha—esita le hamorao bophelong—khatello ea lithaka e ka ba matla, ea etsa hore motho a be le takatso e matla ea ho etsisa ba bang kapa ho ba khahlisa. Empa ha se kamehla bao e leng metsoalle le lithaka tsa rona ba hlileng ba amehileng ka se tla re tsoela molemo. Ka linako tse ling ba mpa ba ipatlela ea ba tlatsang ha ba etsa ntho e fosahetseng. (Liproverbia 1:11-19) Ha Mokreste a inehela khatellong e mpe ea lithaka, hangata o leka ho pata boitsebahatso ba hae. (Pesaleme ea 26:4) Moapostola Pauluse o ile a re lemosa: “Le se ke la itšoantša le boitšoaro ba lefatše le le potolohileng.” (Baroma 12:2, The Jerusalem Bible) Jehova o re fa matla a ka hare ao re a hlokang e le hore re ka loantša khatello leha e le efe e hlahang ka ntle e ka etsang hore re inehele.—Baheberu 13:6.
12 Ha khatello e hlahang ka ntle e batla ho senya pono ea rona ka boitsebahatso ba rona ba Bokreste, re lokela ho hopola hore botšepehi ba rona ho Molimo ke ba bohlokoa haholo ho feta maikutlo a batho kapa tloaelo e atileng ea ba bangata. Mantsoe a Exoda 23:2 ke molao-motheo o re sireletsang: “U se ke ua latela bongata bakeng sa sepheo se sebe.” Ha boholo ba Baiseraele-’moho le Kalebe bo belaella bokhoni ba Jehova ba ho phethahatsa litšepiso tsa Hae, Kalebe o ile a lomahanya meno ha a hana ho latela bongata. O ne a kholisehile hore litšepiso tsa Molimo lia tšepahala, ’me o ile a putsoa haholo ka lebaka la ho ema a tiile. (Numere 13:30; Joshua 14:6-11) Na le uena u ikemiselitse ho loantša khatello ea boikutlo bo atileng e le hore u sireletse kamano ea hao le Molimo?
Matlotlo a Patilweng
it-1-E 846
Ya se Nang Kelello
Ha Bibele e sebedisa polelwana ‘ya se nang kelello’ ha e bue ka motho ya haellwang ke bokgoni ba ho sebedisa kelello empa e bua ka motho ya qhelelang ka thoko melaomotheo ya Modimo e lokileng mme a kgetha ho phela ka tsela e sa hlwekang. Mantswe a fapaneng a Seheberu a kang kesilʹ (“ba hlokang kelello”; Pr 1:22, bi12), ʼewilʹ (“lewatla”; Pr 12:15), na·valʹ (‘ya se nang kelello’; Pr 17:7), le lets (“mosomi”; Pr 13:1, bi12) a sebedisitswe ha ho hlaloswa motho ya jwalo. Lentswe la Segerike aʹphron le bolela “ya se nang kahlolo e molemo” (Lu 12:20, bi12), a·noʹe·tos “ba se nang kelello” (Gal 3:1), le mo·rosʹ le bolelang “mawatla” (Mat 23:17; 25:2).
LA 24 FEBRUARY–LA 2 MARCH
MATLOTLO A TSWANG BIBELENG DIPROVERBIA 2
Ke Hobaneng ha o Lokela ho Rata ho Etsa Thuto ya Botho?
“Tswela Pele ho Tsamaya Nneteng”
16 Ha se kaofela ha rona re ratang ho bala le ho ithuta. Le ha ho le jwalo, Jehova o batla hore re tswele pele ho “batla” le ho “batlisisa” e le hore re utlwisise nnete haholwanyane. (Bala Liproverbia 2:4-6.) Ho etsa boiteko boo ho dula ho re tswela molemo. Morabo rona Corey o re ha a bala Bibele o hlahloba temana e le nngwe ka nako. O re: “Ke bala dintlha tsohle tse mongolong o botlaseng ba leqephe, ke sheba ditshupiso tse bohareng ba leqephe mme ke etsa le dipatlisiso. . . . Ke ithuta dintho tse ngata ha ke bala ka tsela ena!” Re bontsha hore re ananela nnete ha re ipha nako ebile re etsa boiteko ba ho ithuta yona ebang re sebedisa mokgwa ona kapa o mong.—Pes. 1:1-3.
Bohlale ba Nnete bo Ntse bo Hweletsa Haholo
3 Bohlale ke bokgoni ba ho sebedisa seo re se tsebang ho etsa diqeto tse nepahetseng. Empa bohlale ba nnete bo bolela ho fetang hoo. Bibele e re: “Mohato wa pele wa ho fumana bohlale ke ho hlompha Jehova. Ho tseba Ya Halalelang ka ho Fetisisa ho bolela kutlwisiso.” (Diprov. 9:10) Ka hoo, ha ho ena le qeto ya bohlokwa eo re lokelang ho e etsa re lokela ho tseba hore na Jehova o ikutlwa jwang ka yona. Re ka etsa jwalo ka ho ithuta Bibele le dingolwa tsa rona tse thehilweng Bibeleng. Ha re etsa jwalo re bontsha hore re bohlale.—Diprov. 2:5-7.
4 Jehova ke yena ya ka re fang bohlale ba nnete. (Bar. 16:27) Ke hobaneng ha re re Jehova ke Mohlodi wa bohlale? Ntlha ya pele, ka ha Jehova ke Mmopi, o tseba ntho e nngwe le e nngwe ka popo ya hae. (Pes. 104:24) Ntlha ya bobedi, ntho e nngwe le e nngwe eo Jehova a e etsang e bontsha hore o bohlale. (Bar. 11:33) Ntlha ya boraro, re rua molemo haeba re mamela dikeletso tse bohlale tse tswang ho Jehova. (Diprov. 2:10-12) Haeba re batla ho ba le bohlale ba nnete, re tlameha ho dumella Jehova hore a re tataise ka Lentswe la hae ha re etsa diqeto.
w16.09 23 ¶2-3
Bacha, Matlafatsang Tumelo ea Lona
2 Joaloka mocha ea sebeletsang Jehova kapa ea ntseng a ithuta ka eena, na u ikutloa u le tlas’a khatello ea ho lumela seo bongata bo se lumelang, joaloka hore lintho li iphetotse, ho e-na le ho lumela hore li entsoe ke Molimo? Haeba ho joalo, ho na le mehato eo u ka e nkang ho matlafatsa tumelo ea hao le ho e boloka e le matla. Har’a tse ling u ka sebelisa matla a ho nahana ao Molimo a u fileng ’ona, kaha “a tla u lebela.” A tla u sireletsa lifilosofing tsa lefatše tse ka u lihang tumelong.—Bala Liproverbia 2:10-12.
3 Tumelo ea sebele e thehiloe tsebong e nepahetseng ka Molimo. (1 Tim. 2:4) Kahoo, u se ke ua okola boitsebiso ka holimo feela ha u ithuta Lentsoe la Molimo le lingoliloeng tsa rona tsa Bokreste. Sebelisa matla a ho nahana e le hore ‘u utloisise’ seo u se balang. (Mat. 13:23) A re bone kamoo ho etsa seo ho ka u thusang kateng ho matlafatsa tumelo ea hao tabeng ea hore Molimo ke ’Mopi le hore seo Bibele e se buang ke ’nete, etsoe ho na le bopaki bo bongata bo kholisang lintlheng tsena.—Baheb. 11:1.
Matlotlo a Patilweng
it-1-E 1211 ¶4
Botshepehi
Ho ka kgonahala hore motho a tshepahale, eseng ka bokgoni kapa matla a hae empa haeba feela a ena le tumelo e matla ho Jehova, a mo tshepa a bile a tshepa matla a Hae a pholosang. (Ps 25:21) Modimo o tshepisa hore e tla ba “thebe” le “tshireletso,” a lebele tsela ya ba tshepahalang. (Pr 2:6-8; 10:29; Ps 41:12) Batho ba tshepahalang dula ba amehile ka ho tshepahalla Jehova mme seo se etsa hore ba phele ka tsela e tla etsa hore a ba amohele. (Ps 26:1-3; Pr 11:5; 28:18) Jwalo ka ha Jobo a ile a hlokomela, ho ka etsahala hore motho ya se nang molato a hlahelwe ke dintho tse bohloko hobane ho busa motho ya kgopo hape a ka shwa ha mmoho le ba kgopo. Jehova o re kgodisa hore o bona dintho tse etsahallang batho ba se nang molato mme o tshepisa hore lefa la bona e tla ba le sa feleng, ba tla phela ka kgotso nakong e tlang mme ba putswe ka se molemo. (Job 9:20-22; Ps 37:18, 19, 37; 84:11; Pr 28:10) Jwalo ka Jobo, ho molemo hore motho e be ya tshepahalang ho ena le ho ba le maruo mme ke yona ntho e etsang hore motho e be wa bohlokwa le ya hlomphehang. (Pr 19:1; 28:6) Bana ba motho ya tshepahalang jwalo ba a thaba (Pr 20:7) hobane o ba behetse mohlala o motle, ba thabela ho bitswa ka lebitso la hae le ho hlomphuwa ka lebaka la hae.