Ke Thabela Bophelo Tshebeletsong ya Jehova

Selemo se latelang, barababo rona ba ile ba bolella lelapa la Bethele hore lekala la Afrika Borwa le hloka baithaopi hobane le tlo ba le motjhini o motjha o hatisang. Ke ile ka ithaopa mme ke ile ka thaba haholo ha ke kgethwa. Barababo rona ba bararo ba sebetsang hona moo Bethele ya Canada le bona ba ile ba kgethwa e leng Dennis Leech, Bill McLellan le Ken Nordin. Re ile ra bolellwa hore re tla dula Afrika Borwa nako e telele.

Ke ile ka founela mme wa ka ka re: “Mme, ke o tshwaretse ditaba tse monate, ke ya Afrika Borwa.” Mme wa ka e ne e se motho ya buang hakaalo empa e ne e le mme ya nang le tumelo e matla mme a rata Jehova haholo. Ha a ka a bua dintho tse ngata empa ke ne ke tseba hore o a ntshehetsa. Yena le ntate wa ka ha ba a ka ba eba kgahlanong le qeto eo ke ileng ka e etsa le hoja ba ne ba utlwile bohloko hore ke tlo ba hole le bona.

KE YA AFRIKA BORWA

Nna le barababo rona ba bararo re ile ra fumana kwetliso ya motjhini o hatisang e nkang dikgwedi tse tharo Bethele e Brooklyn. Ka mora moo re ile ra ya Afrika Borwa ka sekepe toropong ya Cape Town. Ke ne ke qeta ho ba dilemo di 20. E ne e le mantsiboya ha re ne re tloha Cape Town re ya Johannesburg ka terene. Re ile ra qala ho ema toropong e nyane ya Karoo e lehwatateng le lenyane. Ho ne ho tjhesa hape ho le lerole. Kaofela ha rona re le bane re ile ra sheba ka fenstere yaba ra ipotsa hore na sebaka sena ke se jwang. Ra ipotsa hore na ebe re ikenya ka hara eng banna. Ka mora dilemo tse mmalwa, re ile ra etela sebaka sena hape mme ra qala ho ananela ditoropo tsena tse ntle tse nyane le tsela eo batho ba moo ba phedisanang ka kgotso ka teng.

Ka dilemo tse mmalwa ke ne ke sebetsa ka motjhini oo ho neng ho le thata ho o sebedisa o bitswang Linotype o neng o hatisa Tora ya ho Lebela le Fadimehang! ebile o etsa hore ntho e ngotsweng e tswe hantle. Ofisi ya lekala e ne e hatisa dimakasine ka dipuo tse ngata tsa Afrika eseng bakeng sa Afrika Borwa feela empa le bakeng sa dinaha tse ding tsa Afrika. Re ne re thabetse hore motjhini ona o motjha o hatisang oo re o tletseng mona o ne o sebetsa hantle.

Ha morao ke ile ka sebetsa ofising e neng e ikarabella mesebetsing e mmalwa e kang ho fetolela dingolwa, ho di hatisa le ho di isa diphuthehong. Ke ne ke le maphathaphathe hape ke thabile.

LENYALO LE MOSEBETSI O MOTJHA

Ka selemo sa 1968 ke ile ka nyalana le moradiwabo rona Laura Bowen wa pulamadiboho ya neng a dula haufi le Bethele. O ne a boetse a thusa ka ho thaepa Lefapheng la Phetolelo. Ka nako eo, batho ba neng ba qeta ho nyalana ba ne ba sa dumellwa hore ba dule Bethele. Ka hoo ofisi ya lekala e ile ya re re ilo ba bopulamadiboho ba kgethehileng. Ke ne ke tshwenyehile hanyane. Ka dilemo tse leshome ke le Bethele ke ne ke fumana bodulo le dijo. Ka hoo ke ne ke ipotsa hore na ke tlo kgona ho lefa dintho tseo re di hlokang jwang ka tjhelete e nyane eo ke tla beng ke e fumana ha ke le pulamadiboho e kgethehileng. Ka kgwedi nna le mohatsa wa ka re ne re fumana R25 motho ka mong haeba feela re finyelletse dihora tse neng di hlokwa le maeto a ho boela hape re tsamaisitse dingolwa tse neng di lebelletswe. Ka tjhelete eo re ne re patala rente, re reka dijo, re palama ka yona, re ya ngakeng ka yona ebile re reka dintho tse ding.

Re ile ra abelwa hore re ilo ba bopulamadiboho sehlopheng se senyenyane sa bahweletsi haufi le toropo ya Durban e Indian Ocean. Ho ne ho ena le Maindia a mangata mme bongata ba ona e ne e le bana ba batho ba neng ba tlile Afrika Borwa ba neng ba tlo sebetsa difemeng tsa ho etsa tswekere hoo e ka bang ka selemo sa 1875. Ba ne ba se ba sebetsa mesebetsi e meng empa ba ntse ba tshepahalletse setso sa bona, tsela eo ba phehang ka yona ho akarelletsa le setjhu sa bona se monate. Ba ne ba bua Senyesemane mme ho ne ho eba bonolo hore re bue le bona ka Bibele.

Bopulamadiboho ba kgethehileng ba ne ba lebelletswe hore ba etse dihora tse 150 kgwedi le kgwedi tshebeletsong ya tshimo. Ka hoo nna le Laura re ile ra ipolella hore re tla etsa tse tsheletseng ka letsatsi la pele. Ho ne ho tjhesa haholo. Re ne re se na maeto a ho boela kapa batho bao re ithutang Bibele le bona ka hoo re ne re tlameha ho etsa dihora tse tsheletseng ka ho ya ka ntlo le ntlo. Nakwana ka mora hore re qale ke ile ka sheba nako mme ka hlokomela hore ho se ho fetile metsotso e ka bang 40 feela. Ke ile ka ipotsa hore na re tlo kgona jwang ho ba bopulamadiboho ba kgethehileng.

Kapelenyana feela re ile ra kgona ho ba le tsela ya ho finyella se neng se lebelletswe. Letsatsi le letsatsi re ne re etsa mofao wa bohobe le sopho kapa kofi. Ha re ne re hloka ho phomola, re ne re paka koloi ya rona e nyane ya Volkswagen ka thoko tlasa moriti wa sefate mme ka dinako tse ding re ne re bokanelwa ke bana ba Maindia ba batle, ba re makalletse hobane re sa tshwane le bona. Matsatsi a mmalwa re le moo, re ile ra hlokomela hore ka mora hore re sebetse dihora tse pedi kapa tse tharo letsatsi le fela kapele.

Ho ne ho thabisa haholo ho ruta batho ba dulang moo Bibele ba neng ba amohela baeti. Batho ba Maindia ba a hlompha, ba mosa ebile ba tshaba Modimo. Batho ba bangata ba Mahindu ba ne ba amohela molaetsa wa rona. Ba ne ba rata ho ithuta ka Jehova, Jesu, Bibele, lefatshe le letjha le nang le kgotso le ka tshepo eo re nang le yona ka batho ba hlokahetseng. Ka mora selemo re ile ra ba le batho ba 20 bao re ithutang Bibele le bona. Letsatsi le leng le le leng re ne re eja dijo tsa motshehare le lelapa le leng ho ao re ithutang Bibele le ona mme re ne re thabile haholo.

Ka mora nako e seng kae re ile ra fuwa mosebetsi o motjha. Re ile ra kopuwa hore re ilo etsa mosebetsi wa potoloho haufinyane le Indian Ocean. Beke le beke re ne re fihlela malapeng a sa tshwaneng, re etela bara le baradibabo rona, re sebetsa le bona tshebeletsong ya tshimo ebile re ba kgothatsa. Ba ne ba re tshwara jwalo ka ha eka re karolo ya lelapa la bona mme re ne re thabela ho qeta nako le bona le bana ba bona le diphoofolo tsa bona. Dilemo tse pedi tse monate di ile tsa feta mme ka mora nako e seng kae ofisi ya lekala e ile ya re founela. Morabo rona ya neng a re founetse o ile a re: “Re kopa hore le kgutlele Bethele.” Ke ile ka re: “Re thabela ho ba mona haholo.” Ho bua nnete re ne re ntse re ikemiseditse ho sebeletsa hohle moo ho thweng re sebetse teng.

RE KGUTLELA BETHELE

Ke ne ke sebetsa Lefapheng la Tshebeletso mme ke ile ka sebetsa le barababo rona ba bangata ba nang le boiphihlelo. Mehleng eo molebedi wa potoloho ha a ne a etetse diphutheho o ne a romela tlaleho ho lekala ebe ka mora moo Lefapha la Tshebeletso le romela lengolo ho phutheho mabapi le tlaleho eo a e rometseng. Lengolo leo le ne le kgothatsa bara le baradibabo rona kapa le fana ka tataiso e neng e hlokahala. Ntho ena e ne e bakela bangodi mosebetsi o mongata hobane ba ne ba tlameha ho fetolela ditlaleho tse tswang ho balebedi ba potoloho ho tloha ho Sexhosa, Sezulu le dipuo tse ding ho ya ho Senyesemane ebe ka mora moo ba fetolela mangolo a tswang ho lekala ho tloha ho Senyesemane ho ya ho dipuo tse ding tse buuwang Afrika. Ke ananela mosebetsi o thata o neng o etswa ke barababo rona ba neng ba fetolela ba ileng ba nthusa ho utlwisisa maemo a thata ao bara le baradibabo rona ba Afrika ba batsho ba neng ba ena le ona.

Ka nako eo ho ne ho ena le kgethollo ya merabe Afrika Borwa. Morabe o mong le o mong o ne o dula sebakeng seo o neng o kgethetswe ho dula ho sona ka hoo batho ba merabe e sa tshwaneng ba ne ba sa qete nako ha mmoho. Barababo rona ba batsho ba ne ba bua dipuo tsa bona, ba ruta molaetsa wa Bibele ebile ba ya diphuthehong tsa dipuo tsa habo bona.

Ke ne ke sa tsebe batho ba bangata ba batsho ka ha esale ke kopanela phuthehong ya Senyesemane. Hona jwale ke ne ke se ke ena le monyetla wa ho ithuta ka setso sa bona le tsela eo ba etsang dintho ka yona. Ke ne ke se ke tseba mathata ao bara le baradibabo rona ba bang le ona ka lebaka la meetlo le bodumedi ba sebaka seo ba dulang ho sona. Ba ne ba le sebete haholo, ba sa etse meetlo kapa ntho le ha e le efe e kgahlanong le mangolo le hoja ba lelapa kapa batho ba motseng ba ne ba ba hanyetsa. Batho ba mahaeng ba ne ba sotlehile, ba bangata ba bona ba ne ba sa ruteha empa ba ne ba hlompha Bibele.

Ke ile ka ba le monyetla wa ho sebetsa dinyeweng tsa molao tse amanang le bolokolohi ba borapedi le ho se nke karolo dipolotiking. E ne e le ntho e matlafatsang tumelo ho bona bana ba Dipaki ba tshepahalang le ba sebete ba tebetsweng sekolong hobane ba hana ho rapela kapa ho bina difela.

Barababo rona ba ile ba eba le bothata bo bong naheng e nyane ya Afrika e neng e bitswa Swaziland ka nako eo. Ka mora hore Morena Sobhuza II a hlokahale, batho bohle ba ne ba lebelletswe hore ba etse meetlo e neng e etswa ka mora hore motho a hlokahale. Banna ba ne ba tlameha ho kuta moriri wa bona, basadi bona ba tlameha ho o fokotsa. Bara le baradibabo rona ba ile ba hloriswa ka lebaka la ho hana ho etsa meetlo ena e amanang le ho rapela badimo. Tsela eo ba ileng ba tshepahalla Jehova ka yona e ile ya re thabisa. Re ile ra ithuta dintho tse ngata ka ho tshepahala le ho mamella ho barababo rona ba Afrika mme ntho eo e ile ya re matlafatsa tumelo haholo.

KE KGUTLELA MOO HO HATISWANG DINGOLWA

Ka selemo sa 1981 ke ile ka ilo sebetsa lefapheng la moo ho hatiswang dingolwa hape. Ke ne ke sebetsa ka khomphiyutha. Ho ne ho le monate haholo. Mekgwa ya ho hatisa e ne e fetoha haholo. Motho ya rekisang metjhini o ile a fa lekala motjhini o bitswang phototypesetter hore le bone hore na o sebetsa hantle, ntle le ho lefa letho. Taba eo e ile ya etsa hore metjhini e robong ya Linotype e nkelwe sebaka ke metjhini e metjha e mehlano ya phototypesetter. Ho ile ha kenngwa motjhini o mong o motjha o hatisang. Re ne re hatisa dingolwa tse ngata ho feta le ha e le neng pele.

Marangrang a ne a re thusa ho fumana mekgwa e metjha eo dingolwa tsa rona di lokelang ho ngolwa ka yona a sebedisa Multilanguage Electronic Publishing System e leng MEPS. Nna le barababo rona ba bararo re ile ra sebetsa ka metjhini e mengata e ntlafaditsweng haesale re tloha Canada re tla Afrika Borwa. (Esa. 60:​17) Kaofela ha rona re ne re se re nyetse baradibabo rona ba bopulamadiboho ba ratang Jehova haholo. Nna le morabo rona Bill re ne re ntse re sebeletsa Bethele. Morabo rona Ken le morabo rona Dennis ba ne ba se ba ntse ba hodisa bana.

Mosebetsi o neng o etswa lekaleng o ne o eketseha. Dingolwa tse thehilweng Bibeleng di ne di fetolelwa, di hatiswa ka dipuo tse ntseng di eketseha ebile di iswa makaleng a mang. Ka lebaka la mosebetsi oo o mongata ho ile ha hlokahala Bethele e ntjha. Barababo rona ba ile ba e haha sebakeng se setle se ka bophirimela Johannesburg mme e ile ya nehelwa ka 1987. E ne e le ho thabisang ho ba karolo ya diphetoho tsena tse ileng tsa etsahala le ho ba setho sa Komiti ya Lekala la Afrika Borwa ka dilemo tse ngata.

RE ILE RA FUMANA MOSEBETSI O MONG O MOTJHA

Ka 2001, ho ile ha etsahala ntho e nngwe eo ke sa e lebellang, ke ile ka kgethwa hore ke ilo ba setho sa Komiti ya Lekala la United States le sa tswa thehwa. Le hoja re ne re utlwile bohloko hobane re tlohela mosebetsi wa rona le metswalle ya rona Afrika Borwa, re ne re thabetse ho qala bophelo bo botjha le lelapa la Bethele United States.

Le hoja re ne re thabile, re ne re tshwenyehile hobane re ne re siya mme wa mohatsa wa ka ya seng a hodile. Re ne re sa kgone ho mo thusa hakaalo ha re le New York empa banababo Laura ba bararo ba ile ba ithaopa hore ba tla mo thusa ka dintho tseo a di hlokang. Ba ile ba re: “Ha re kgone ho ba tshebeletsong ya nako e tletseng empa haeba re hlokomela mme wa rona o tla kgona ho tswela pele ka mosebetsi wa hao.” Ka nnete re a ba leboha.

Abuti wa ka le mohatsa wa hae ba dulang Toronto, Canada le bona ba ne ba hlokomela mme wa ka wa mohlolohadi. Ka nako eo, mme wa ka o ne a se a dutse le bona dilemo tse fetang 20. Re ananela haholo tsela eo ba ileng ba mo hlokomela ka yona ho fihlela a ba a hlokahala nakwana ka mora hore re fihle New York. Ke ntho e thabisang hakaakang ho ba le ba lelapa ba ikemiseditseng ho fetola bophelo ba bona e le hore ba ka hlokomela batswadi ba bona ba seng ba hodile, e leng ntho eo e ka bang thata ka dinako tse ding.

Ka dilemo tse mmalwa ke ile ka sebetsa lefapheng le neng le hatisa dingolwa mona United States mme mosebetsi oo o ne o dula o ntlafatswa nako le nako. Morao tjena ke ntse ke sebetsa Lefapheng la Theko. E bile ntho e thabisang haholo ho sebetsa mona lekaleng le leholo ka dilemo tse fetang 20 le nang le ditho tsa Bethele tse ka bang 5 000 le baithaopi ba tlang ka matsatsi ba ka bang 2 000.

Dilemo tse 60 tse fetileng ke ne ke sa nahana hore ke tla be ke le mona. Mohatsa wa ka o ile a ntshehetsa ka hohle ka moo a ka kgonang dilemo tsena tsohle. Bophelo ba ka bo ne bo le monate haholo. Re thabetse mesebetsi e fapaneng eo re ileng ra e etsa le ho sebetsa le bara le baradibabo rona ba hantle ba akarelletsang ba makaleng a mangata ao re ileng ra a etela ka mosebetsi dikarolong tse ngata tsa lefatshe. Ka ha hona jwale dilemo tsa ka di se di feta 80 ha ke sa etsa mosebetsi o mokaalo hobane ho na le barababo rona ba batjha ba kwetliseditsweng ho o etsa.

Mopesaleme o ile a ngola a re: “Ho thaba setjhaba seo Modimo wa sona e leng Jehova.” (Pes. 33:​12) Taba ena ke nnete. Ke thabile haholo hore ebe ke ile ka kgona ho sebeletsa Jehova le bahlanka ba hae ba thabileng.