Leka ho Fumana Dintho Tse Ntjha ha o Ithuta

Ha re ntse re itokisetsa ho ithuta, re ka nna ra ipotsa, ‘Ke eng seo ke lebeletseng ho ithuta sona?’ Empa re lokela ho hopola hore le hoja ho ena le dintho tseo re lebeletseng ho ithuta tsona, seo ha se bolele hore ha ho na dintho tse ntjha tseo Jehova a batlang ho re ruta tsona. Ke eng e tla re thusa ho mamela seo Jehova a batlang hore re ithute sona?

Rapella bohlale. Kopa Jehova hore a o thuse ho utlwisisa dintho tseo a batlang hore o ithute tsona hona jwale. (Jak. 1:5) Ikemisetse ho ithuta dintho tse ntjha.—Diprov. 3:​5, 6.

Dumella matla a lentswe la Modimo hore a sebetse bophelong ba hao. “Lentswe la Modimo le a phela.” (Baheb. 4:12) Ka hona, nako le nako ha re bala Bibele, re ka ithuta dintho tse itseng tse ntjha le ho fumana dintlha tse fapaneng tse ka re thusang bophelong. Le ha ho le jwalo, seo se tla etsahala feela ha re dumella lentswe la Modimo hore le re rute.

Ananela dintho tsohle tseo Jehova a di sebedisang ho re ruta. Dintho tseo a re fang tsona ho matlafatsa tumelo ya rona di tshwana le “mokete wa dijo tsa maemo.” (Esa. 25:6) O se ke wa qoba ho bala dihlooho tseo o nahanang hore o ke ke wa thabela ho ithuta tsona. Ha o etsa jwalo o tla be o dumella Modimo hore a o thuse o be motho ya molemo mme o tla thabela ho ithuta.