BATJHA BA A BOTSA

Na ke Lokela ho Kolobetswa?—Karolo ya 1: Ho Kolobetswa ho Bolelang?

Selemo le selemo, batjha ba bangata ba hodisitsweng ke batswadi ba Dipaki Tsa Jehova ba a kolobetswa. Na le wena o ntse o nahana ka ho kolobetswa? Haeba ho jwalo, o tlameha ho utlwisisa pele hore na ho inehela le ho kolobetswa ho bolelang.

Ho kolobetswa ho bolelang?

Kolobetso eo ho buuwang ka yona ka Bibeleng ha se ho fafatswa feela ka metsi empa ke ho qwediswa ka ho feletseng ka metsing. Ho qwediswa ka metsing ho emela ntho ya bohlokwa haholo.

Ha o qwediswa ka metsing, o bontsha phatlalatsa hore ha o sa tla phelela ho etsa thato ya hao.
Ha o tswa ka metsing, o bontsha hore o se o qadile bophelo bo botjha ba ho phelela ho etsa thato ya Modimo.

Ha o kolobetswa, o bontsha hore Jehova o na le matla a ho o behela melao ya se lokileng le se fosahetseng hape o bontsha hore o tla phela tumellanong le tshepiso eo o ileng wa e etsa ka ho rata ya hore o tla etsa dintho tseo a reng o di etse.

Ipotse: Ke hobaneng ha ke lokela ho bontsha phatlalatsa hore ke batla ho phelela ho mamela Jehova? Bala 1 Johanne 4:19 le Tshenolo 4:11.

Ho inehela ho bolelang?

Pele o kolobetswa, o lokela ho inehela ho Jehova. O ka etsa seo jwang?

Ka hore o rapele Jehova boinotshing, o mo tshepise hore o tla mo sebeletsa bophelo bohle ba hao le hore o tla etsa seo a se batlang ho sa tsotellehe maemo le hore na batho ba bang ba kgetha ho etsang.

Kolobetso ke ketso ya phatlalatsa e bontshang hore o inehetse ho Jehova ka ho mo rapela boinotshing. O bontsha ba bang hore ha o sa iphelela empa o se o phelela Jehova.—Matheu 16:24.

Ipotse: Ke tla fumana melemo efe ha ke phelela Jehova? Bala Esaia 48:17, 18 le Baheberu 11:6.

Ke hobaneng ha ho kolobetswa ho le bohlokwa?

Jesu o itse barutuwa ba hae ba lokela ho kolobetswa. (Matheu 28:19, 20) Ka hoo, Bakreste ba lokela ho kolobetswa. Ha e le hantle, Bibele e re re lokela ho kolobetswa e le hore re pholohe.—1 Petrose 3:21.

Le ha ho le jwalo, sepheo sa hao sa ho batla ho kolobetswa e lokela hore e be hobane o rata Jehova. Hape o be le boikutlo bo tshwanang le ba mopesaleme ya ileng a ngola a re: “Ke tla patala Jehova ka eng bakeng sa dintho tsohle tse molemo tseo a nketseditseng tsona? . . . Ke tla bitsa lebitso la Jehova. Ke tla phetha dikano tsa ka ho Jehova.”—Pesaleme ya 116:12-14.

Ipotse: Jehova o nketseditse dintho dife tse molemo mme ke tla mo patala ka eng bakeng sa tsona? Bala Deuteronoma 10:12, 13 le Baroma 12:1.

Seo e seng nnete le seo e leng nnete

SEO E SENG NNETE — Ke batho ba baholo feela ba ka bang le tumelo e matla e le hore ba kolobetswe.

SEO E LENG NNETE — Motho ha a be le tumelo e matla hobane feela a hodile empa o ba le tumelo e matla hobane a rata Jehova ebile a ikemiseditse ho mo mamela. Josefa, Samuele le Josiase ba ne ba ena le tumelo e matla ha e ntse e le batjha. Le kajeno ho na le batjha ba bangata ba nang le tumelo e matla jwalo ka bona.

Bibele e re: “Esita le ngwana o tsebahala ka diketso tsa hae hore na boitshwaro ba hae bo hlwekile ebile bo lokile.”—Diproverbia 20:11.

SEO E SENG NNETE — Haeba metswalle ya hao e kolobetswa, le wena o lokela ho kolobetswa.

SEO E LENG NNETE — Ha o a lokela ho kolobetswa hobane feela metswalle ya hao e kolobetswa, o le dilemong tse itseng kapa hobane o nahana hore batho ba bang ba lebeletse hore o kolobetswe. Motho e mong le e mong o lokela ho etsa qeto ya ho inehela le ho kolobetswa ka ho rata.

Bibele e re: “Batho ba [Modimo] ba tla ithaopa.”—Pesaleme ya 110:3.

SEO E SENG NNETE — Haeba o sa kolobetswa, o ka etsa ntho e nngwe le e nngwe eo o e batlang.

SEO E LENG NNETE — O qala ho ikarabella ho Jehova ho tloha ha o tseba ho kgetholla ntho e nepahetseng le e fosahetseng, eseng ha o kolobetswa.

Bibele e re: “Haeba motho a tseba ntho e nepahetseng empa a sa e etse, o etsa sebe.”—Jakobo 4:17.

KELETSO: Haeba o utlwa eka o ke ke wa kgona ho ba Mokreste ya inehetseng le ya kolobeditsweng, nahanisisa ka hore na ke hobaneng ha o ikutlwa ka tsela ena le hore na ke eng e ka o thusang hore o se ke wa ikutlwa ka tsela eo. Bala buka ya Lipotso—Bacha Baa Botsa—Likarabo Tse Sebetsang, Buka ea 2, Kgaolo ya 37.