Na ho na le Mmuso o Tsitsitseng o ka Busang Lefatshe?​—Bibele e Reng?

Mebuso e mengata lefatsheng ka bophara e ferekane. Le dinaheng tseo ho bonahalang eka e busa hantle, mebuso eo e ile ya tlotlollwa ke ditlaleho tse sa thabiseng tsa boradipolotiki, dikgetho tse sa tsamayeng hantle, ho lwantshana ha dihlopha tsa dipolotiki le dintwa tse bakwang ke batho ba ipelaetsang.

Bibele e a bontsha hore ho na le mmuso o le mong feela o tsitsitseng. Mohlomong o se o kile wa utlwa ka mmuso ona. Ke mmuso oo Jesu Kreste a ileng a bua ka wona thapelong ya mohlala.

• “Lona le rapele tjena: ‘Ntate wa rona ya mahodimong, lebitso la hao le halaletswe. Mmuso wa hao o tle. Thato ya hao e etswe lefatsheng jwalo ka ha e etswa lehodimong.’ ”​—Matheu 6:​9, 10.

Bibele e reng ka Mmuso oo?

Ke Mmuso o tsitsitseng

Mmuso ona o busa o le lehodimong.

• Jesu o ile a bitsa mmuso oo “Mmuso wa mahodimo.” (Matheu 4:​17; 5:​3, 10, 19, 20) Ka lebaka lena o ile a re: “Mmuso wa ka ha se wa lefatshe lena.”​—Johanne 18:36.

Mmuso oo o tla nkela mebuso ya batho sebaka.

• Bibele e re: “Mmuso ona . . . o tla silakanya o fedise mebuso ena [ya batho] kaofela mme ke wona feela o tla dula o le teng ka ho sa feleng.”​—Daniele 2:44.

Mmuso oo Morena wa wona e leng Jesu Kreste o ke ke wa fediswa le ka mohla.

• Bibele e re: “Bobusi ba hae ke bo ke keng ba fela kapa ba feta le mmuso wa hae o ke ke wa fediswa.”​—Daniele 7:​13, 14.

Mmuso oo o tla tlisa kgotso le tshireletseho lefatsheng.

• Bibele e re: “E mong le e mong o tla dula tlasa sefate sa hae sa morara le sa feie. Ha ho na motho ya tla ba tshosa.”​—Mikea 4:4.

Ithute ho eketsehileng ka Mmuso

Ha Jesu a le lefatsheng o ile a qeta nako ya hae e ngata “a bolella batho ditaba tse monate tsa Mmuso.” (Matheu 9:​35) O ile a boela a bolela esale pele hore:

• “Ditaba tse monate tsa Mmuso di tla bolelwa lefatsheng lohle hore batho ba ditjhaba tsohle ba di utlwe ebe ke hona bofelo bo tlang.”​—Matheu 24:14.

Kajeno, ditaba tsena tse monate tsa Mmuso di bolelwa dinaheng tse fetang 240. Re a o mema hore o ithute ho eketsehileng ka mmuso le ka moo o ka ruang molemo ho wona.

Ka kopo shebella video e reng Mmuso wa Modimo ke Eng?