O KA ETSANG HA DITHEKO DI NTSE DI PHAHAMA?
Amohela Boemo
Ha ditheko tsa dintho di ntse di eketseha hanyane ka hanyane, ho ka ba thata hore re lemohe, haholo haeba mokgolo le wona o ntse o eketseha. Ka lehlakoreng le leng, haeba ditheko tsa dintho di ntse di phahama empa mokgolo wona o ntse o tshwana, re ka tshwenyeha ra ba ra imelwa kelellong. Sena se ka etsahala haholo haeba re e na le lelapa leo re lokelang ho le hlokomela.
Re ke ke ra thibela ditheko ho phahama. Empa haeba re amohela boemo bona, re tla itswela molemo.
KE HOBANENG HA SEE E LE SA BOHLOKWA?
Batho ba nang le pono e nepahetseng ka ditheko tse ntseng di phahama, ho ba bonolo hore . . .
ba dule ba kgobile matshwafo. Ha re kgobile matshwafo, re nahana hantle ebile re etsa diqeto tse nepahetseng.
ba qobe mekgwa e seng bohlale. Ka mohlala, ha se bohlale ho iphapanyetsa ho patala ditshenyehelo tsa rona kapa ho sebedisa tjhelete hampe.
ba qobe ho ngangisana le ba lelapa ka tjhelete.
ba hlokomele seo ba ka se etsang e le hore ba reke dintho tseo ba di hlokang mme seo se ka ba thusa hore ba se ke ba senya tjhelete.
SEO O KA SE ETSANG
Ikemisetse ho fetoha le maemo. Nakong eo ditheko di phahamang haholo, ke bohlale ho fokotsa tsela eo re sebedisang tjhelete ka yona. Batho ba bang ba sebedisa tjhelete e ngata ho feta eo ba nang le yona mme seo se etsa hore bophelo ba bona bo be thata jwalo ka ha e ka ba sesa kgahlanong le maqhubu a noka e phallang haholo! Qetellong, sena se etsa hore ba imelwe haholo. Haeba o na le lelapa, ho loketse hore o tshwenyehe ka ho le hlokomela. Empa hopola sena: Ditho tsa lelapa la hao di hloka lerato le nako ya hao ho feta ntho le ha e le efe.
Ho phela bophelo bo mabothobotho ka tjhelete eo o se nang yona ho jwalo ka ho sesa kgahlanong le maqhubu a noka e phallang