Gideone o Ile a Hlola Bamidiane

Ha nako e ntse e ya, Baiseraele ba ile ba boela ba se ke ba mamela Jehova mme ba qala ho rapela medimo ya bohata. Bamidiane ba ile ba utswa diphoofolo tsa Baiseraele mme ba senya dijalo tsa bona ka dilemo tse supileng. Ka hoo, Baiseraele ba ipatela Bamidiane ka mahaheng le dithabeng. Ba kopa Jehova hore a ba thuse. Yaba Jehova o romella lengeloi ho mohlankana ya bitswang Gideone. Lengeloi leo la re: ‘Jehova o o kgethile hore o be lesole le matla.’ Gideone a re: ‘Ke tla thusa Baiseraele jwang ke se letho?’

Gideone o ile a tseba jwang hore Jehova o mo kgethile? O ile a beha boya fatshe yaba o re ho Jehova: ‘Hoseng ha nka fumana boya bona bo le metsi ke phoka empa fatshe ho omme, ke tla tseba hore o nkgethile hore ke thuse Baiseraele.’ Hoseng ho ne ho omme fatshe empa boya bo le metsi. Ka le hlahlamang, Gideone a kopa Jehova hore a etse hore fatshe ho be metsi empa boya bo ome. Ho ile ha eba jwalo. Ka hoo Gideone a dumela hore ehlile Jehova o kgethile yena. A tsamaya le masole a hae ho ya lwantsha Bamidiane.

Jehova o ile a re ho Gideone: ‘Baiseraele ba tla hlola Bamidiane. Empa ka ha masole a hao a mangata, o ka nna wa nahana hore o hlotse Bamidiane ka matla a hao. Bolella masole a tshabang ho ya ntweng hore a kgutlele hae.’ Ka hoo, masole a 22 000 a kgutlela hae mme ha sala a 10 000. Yaba Jehova o re: ‘Masole a setseng a ntse a le mangata haholo. Ere a ye nokeng ho ya nwa metsi. O siye feela masole a nwang metsi a ntse a shebile dira tsa bona.’ Ho ile ha sala masole a 300 feela. Jehova o ile a re masole ao a 300 a tla hlola masole a 135 000 a Bamidiane.

Bosiung boo, Jehova o ile a re ho Gideone: ‘Jwale ke nako ya hore o lwantshe Bamidiane.’ Gideone o ile a fa masole a hae manaka le dinkgo tse kentseng mabone ka hare. A re ho ona: ‘Ntjhebeng, le etse seo ke se etsang.’ Gideone o ile a letsa lenaka la hae, a pshatla nkgo ya hae, a tsoka lebone la hae yaba o a hweletsa o re: ‘Sabole ya Jehova le ya Gideone!’ Masole ao a 300 a ile a mo etsisa. Bamidiane ba ile ba tshoha yaba ba a baleha. Ha ba ntse ba baleha jwalo, ba qala ho lwantshana ka bobona. Jehova o ile a thusa Baiseraele hape hore ba hlole dira tsa bona.