Dipaki Tsa Jehova di Kwetliswa Jwang Bakeng sa Tshebeletso ya Tsona?

Dipaki Tsa Jehova di fumana kwetliso e tswelang pele dikarolong tsohle tsa bophelo ba tsona ba Bokreste. Sena se akarelletsa tshebeletso eo ba e etsang phatlalatsa. Tshebeletso ena ke mosebetsi oo Jesu a laetseng balatedi ba hae hore ba o etse, e leng ho phatlalatsa le ho ruta batho ditaba tse monate tsa Mmuso wa Modimo. (Matheu 24:14; 28:19, 20) Re fumana kwetliso dibokeng tsa rona tsa beke le beke le dikopanong tse kgolo le tse nyane tse tshwarwang selemo le selemo. Dipaki Tsa Jehova tse nang le boikarabelo ka phuthethong kapa ka mokgatlong di fumana kwetliso e eketsehileng dikolong tsa Bibele tse kgethehileng.

Sehloohong sena

Dipaki Tsa Jehova di fumana kwetliso jwang?

Diboka tsa Dipaki Tsa Jehova. Beke le beke, re ba le diboka tse pedi dibakeng tsa rona tsa borapedi tse bitswang Diholo Tsa Mmuso. Seboka se seng se ba hara beke; se seng se ba mafelobeke. Batho bohle ba amohelehile hore ba ka kopanela dibokeng tsena mme ha ho na koloke e ntshwang.

Diboka tsa hara beke. Re fumana kwetliso ya ho bala, tsela ya ho buisana le batho, ho bua phatlalatsa, ho paka le ho ruta. Re kwetliswa ka dipuo, dipuisano, dipontsho le divideo. Kwetliso ena e re thusa hore re arolelane le ba bang molaetsa wa Bibele ka tsela e atlehang le ho ithuta Bibele le batho ba thahasellang. Bohle ba yang dibokeng ba fumana molemo kwetlisong ena. Ka hodimo ho tsohle, diboka tsena di matlafatsa tumelo ya rona ho Modimo le lerato la rona ho yena le ho badumedimmoho le rona.
Diboka tsa mafelobeke. Diboka tsena tse dikarolo di pedi, di qala ka puo ya Bibele e reretsweng batho bohle. Karolo ya bobedi ya diboka ke puisano ya dipotso le dikarabo ya Tora ya ho Lebelaa e ithutwang. Dihlooho tse tshohlwang di hlalosa Bibele le melaomotheo e re thusang tshebeletsong ya rona le bophelong ba rona ba letsatsi le letsatsi.

Dikopano tse kgolo le tse nyane. Selemo le selemo re ba le dikopano tse kgolo tse tharo mme ho ya diphutheho tse ngata. Dikopano tsena tse thabisang di thewa sehloohong se itseng sa Bibele mme ho ba le dipuo, dipuisano, dipontsho le divideo. Jwalo ka diboka tsa rona, dikopano tse kgolo le tse nyane di re thusa ho utlwisisa Bibele haholwanyane ebile di re thusa ho ntlafatsa tsela eo re rutang ditaba tse monate ka yona. Dikopanong tsena, motho e mong le e mong o amohelehile mme ha ho na koleke e ntshwang.

Dikolo tsa Bibele tsa Dipaki Tsa Jehova

Bakeng sa kwetliso e eketsehileng, Dipaki Tsa Jehova tse ding di memelwa ho ya dikolong tsa Bibele tse fapaneng. Dikolo tsee ke dife? Morero wa tsona ke ofe mme di nka nako e kae? Ke bomang ba ka tshwanelehang ho ya ho tsona?

Sekolo sa Tshebeletso sa Bopulamadiboho

Morero: Ho kwetlisa ba tshebeletsong ya nako e tletseng, ba bitswang bo pulamadiboho.b Ba thuswa hore ba ntlafatse tsela ya ho paka le ya ho ruta. Kwetliso ena e kenyelleditse dipuisano, dipontsho le dipuo.
Nako: Matsatsi a tsheletseng.
Ditshwaneleho: Ho mengwa ba seng ba qetile selemo e le bo pulamadiboho. Bopulamadiboho ba seng ba ena le dilemo tse hlano ba ile ba ya sekolong sena, ba mengwa hape.

Baithuti ba babedi ba etsa pontsho Sekolong sa Tshebeletso sa Bopulamadiboho. Baithuti ba bang ba mametse ka hloko.

Sekolo sa Baevangedi ba Mmuso

Morero: Ho fana ka kwetliso e kgethehileng ho batho ba nang le boiphihlelo tshebeletsong ya nako e tletseng. Baithuti ba boetse ba kwetliswa ho tjhorisa tsebo ya bona ya ho paka le ho ruta mme ba ithuta ka botebo dithuto tsa Bibele. Ba bangata ha ba qetile sekolong sena, ba iswa dibakeng tseo ho hlokahalang batho ba eketsehileng ba ka rutang ba bang ka Bibele.
Nako: Dikgwedi tse pedi.
Ditshwaneleho: Bopulamadiboho ba ka kenya kopo ya ho ya sekolong sena haeba ba tshwaneleha ebile maemo a bona a ba dumella hore ba ka ya moo ho nang le tlhokahalo ya batho ba rutang Bibele.

Baithuti ba phahamisa matsoho ho araba Sekolong sa Baevangedi ba Mmuso.

Sekolo sa Baholo ba Phutheho

Morero: Ho thusa baholoc hore ba jare boikarabelo ba bona ka phuthehong, Jwalo ka ho ruta, ho kgothatsa ba bang le ho eketsa lerato la bona ho Modimo le ho badumedimmoho le bona.—1 Petrose 5:2, 3.
Nako: Matsatsi a mahlano.
Ditshwaneleho: Baholo ba qetang ho kgethwa le ba seng ba ena le boiphihlelo ba eso ka ba ya sekolong sena dilemong tse hlano tse fetileng ba mengwa hore ba ye ho sona.

Moithuti o fana ka karabo Sekolong sa Baholo ba Phutheho.

Sekolo sa Balebedi ba Potoloho le Basadi ba Bona

Morero: Ho kwetlisa balebedi ba tsamayang, ba bitswang balebedi ba potoloho,d hore ba phethe boikarabelo ba bona ka katleho. (1 Timothea 5:17) Kwetliso ena e thusa baholo bana ba Bakreste le basadi ba bona hore ba be le tsebo e eketsehileng ka Mangolo.
Nako: Kgwedi e le nngwe.
Ditshwaneleho: Balebedi ba potoloho ba batjha le basadi ba bona ba mengwa hore ba ka ya ka mora selemo ba le kabelong ya bona. Ka mora moo, ba mengwa ka mora dilemo tse ding le tse ding tse hlano.

Baithuti ba mametse ka hloko Sekolong sa Balebedi ba Potoloho le Basadi ba Bona.

Sekolo sa Tshebeletso sa Mmuso

Morero: Ho thusa baholo le bahlanka ba sebeletsange ho phetha boikarabelo ba bona ka phuthehong ba shebile maemo le dintho tse etsahalang ka nako eo hammoho le ditlhoko tsa phutheho. (2 Timothea 3:1) Sekolo sena se tshwarwa ka mora dilemo tse ding le tse ding tse pedi kapa tse tharo.
Nako: E a fapana, hangata e ba letsatsi le le leng.
Ditshwaneleho: Balebedi ba potoloho, baholo le bahlanka ba sebeletsang.

Baithuti Sekolong sa Tshebeletso sa Mmuso ba nkwa foto e le tlelase.

Sekolo sa Tshebeletso sa Bethele

Morero: Ho thusa bana ba bo rona ba sebeletsang Bethelef hore ba etse mosebetsi wa bona ka bokgabane le ho ba thusa ho matlafatsa lerato la bona ho Modimo le ho batho ba bang.
Nako: Matsatsi a mahlano le halofo.
Ditshwaneleho: Bana ba bo rona ba qalang ho sebeletsa Bethele ba lokela ho ba sekolong sena. Bao e leng kgale ba le Bethele ba ka mengwa hape ka mora dilemo tse ding le tse ding tse hlano.

Moithuti Sekolong sa Tshebeletso sa Bethele o fana ka puo mme morupedi le baithuti ba bang ba mametse.

Sekolo sa Bibele sa Gileade sa Watchtower

Morero: Ho thusa baithuti ho ba le tsebo le kananelo e tebileng ya Lentswe la Modimo le ho ba thusa ho sebedisa seo ba ithutileng sona. (1 Bathesalonika 2:13) Banna le basadi ba Bakreste ba hodileng moyeng ba yang sekolong sena sa Gileade, ba sebediswa ka tsela e kgethehileng ka mokgatlong wa Jehova le mosebetsing wa lefatshe lohle wa ho ruta batho Bibele. Ha ba tswa sekolong sena ba abelwa ho sebeletsa dibakeng tse fapaneng kapa ofising ya lekala, ebang ke naheng ya habo bona kapa naheng e nngwe.
Nako: Dikgwedi tse hlano.
Ditshwaneleho: Ofisi ya lekala e mema ba tshebeletsong ya nako e tletseng hore ba etse dikopo tsa ho ya sekolong sena. Sekolo sena se tshwarelwa Amerika, Setsing sa Thupelo sa Watchtower se Patterson, New York.

Morupedi Sekolong sa Bibele sa Gileade sa Watchtower, o ruta baithuti a sebedisa setshwantsho sa tempele e Jerusalema.

Sekolo sa Bara ba bo Rona ba Komiti ya Lekala le Basadi ba Bona

Morero: Ho kwetlisa ditho tsa Komiti ya Lekalag ho hlokomela mosebetsi o etswang ofising ya lekala le mesebetsi e meng e ka hahang tumelo ya Dipaki Tsa Jehova naheng kapa dinaheng tse tlasa lekala leo.
Nako: Dikgwedi tse pedi.
Ditshwaneleho: Ntlokgolo ya Dipaki Tsa Jehova e kgetha bara ba bo rona ba Komiti ya Lekala le basadi ba bona ho ya sekolong, se tshwarelwang Setsing sa Thupelo sa Watchtower se Patterson, New York.

Morupedi o fa baithuti puo Sekolong sa Bara ba bo Rona ba Komiti ya Lekala le Basadi ba Bona.

Kwetliso eo Dipaki Tsa Jehova di e fumanang e thehilwe hokae?

Bibele ke buka e ka sehloohong e sebediswang ho kwetlisa Dipaki Tsa Jehova. Re dumela hore Bibele e tswa ho Modimo le hore e na le dikeletso tse molemo ka ho fetisisa tseo Bakreste ba ka di sebedisang bophelong ba bona ba letsatsi le letsatsi.—2 Timothea 3:16, 17.

Na Dipaki Tsa Jehova di lokela ho patalla kwetliso eo di e fumanang?

Tjhe. Thupelo ena ke mahala. Mosebetsi o etswang ke Dipaki Tsa Jehova o tshehetswa ka menehelo ya boithatelo.—2 Bakorinthe 9:7.

a Bibele le dintho tsohle tse re thusang ho e utlwisisa, ho akarelletsa le divideo di a fumaneha websaeteng ya rona ya jw.org.

b Pulamadiboho ke Paki e kolobeditsweng e behang mohlala. E ka ba motho e motona kapa e motshehadi ya nang le boikemisetso ba ho qeta dihora tse itseng kgwedi e nngwe le e nngwe a bolella batho molaetsa wa Bibele.

c Baholo ke banna ba Bakreste ba hodileng moyeng. Ba ruta ba sebedisa Bibele mme ba boetse ba disa batho ba Jehova ka ho ba thusa le ho ba kgothatsa. Ha ba patallwe ho etsa mosebetsi wa bona.

d Molebedi wa potoloho ke mosebeletsi wa nako e tletseng ya etelang diphutheho tse fapaneng beke le beke potolohong ya hae. O kgothatsa batho ba phutheho ka ho ba fa dipuo tse thehilweng Bibeleng le ho tsamaya le bona ha ba ilo ruta batho Bibele.

e Bahlanka ba sebeletsang ba etsa mesebetsi e fapaneng ba thusa badumedimmoho le bona. Ka hoo, sena se thusa baholo ho ba le nako e eketsehileng ya ho ruta le ho kgothatsa phutheho.

f Bethele ke lebitso le fuweng diofisi tsa lekala tsa Dipaki Tsa Jehova. Batho ba sebetsang moo ba etsa mesebetsi e tshehetsang Dipaki tse tlasa lekala leo.

g Komiti ya Lekala e etswa ke banna ba bararo kapa ho feta moo ba matla tumelong.

Dipaki Tsa Jehova di ruile molemo ofe kwetlisong eo di e fumanang?

“Ke motho ya dihlong mme ho thata hore ke bue le batho bao ke sa ba tsebeng ka molaetsa wa Bibele. Le ha ho le jwalo, kwetliso eo ke e fumanang dibokeng tsa hara beke e nthusitse hore ke itshepe haholwanyane le hore ke ntlafatse tsela eo ke rutang ka yona. Ke boetse ke ntlafaditse tsela eo ke buang le batho ba bang ka yona ka phuthehong le mosebetsing.”—Natasha, Amerika.
“Ho ya Sekolong sa Baevangedi ba Mmuso ho nthutsitse hore ke be le makgabane a bomodimo, a kang lerato, mamello le mosa. Ka hoo, sena se etsa hore ke ikutlwe ke le Mokreste, motswalle le moahisani ya molemo. Sekolo sena se nthutile ho iketsetsa dipatlisiso ka dintho tse hlahang ka Bibeleng le ho hlalosa Lentswe la Modimo ka tsela e tla finyella dipelo tsa batho.”—Stephen, Nigeria.
“Sekolo sa Baholo ba Phutheho se nthusitse ho hlaolela boikokobetso, e leng ntho e tla nthusa hore ke sebeletse ke le moholo. Dipuo tse fanweng moo di nthusitse ho bona bohlokwa ba ho latela mohlala wa Jesu.”—Luca, Italy.
“Sekolo sa Tshebeletso sa Mmuso se nthusitse ho bona bohlokwa ba ho ba motho ya atamelehang, ya mosa le ya botswalle ha ke sebedisana le ba bang. Ke ile ka ithuta ho etsetsa batho ba bang dintho ke susumetswa ke lerato eseng hobane ke tlamehile.”—Samuel, United Kingdom.
“Sekolo sa Gileade se re thusitse hore re itlhahlobe re sebedisa Lentswe la Modimo. (Jakobo 1:22-25) Se boetse se re thusitse ho bona moo re lokelang ho ho fetola botho ba rona le ho ntlafatsa tshebeletso ya rona ho Jehova. Ho phaella moo, re ithutile hore ha re a lokela ho itjheba borona feela empa re lokela ho nahanela ba bang le hore dintho tsohle tseo re di etsang le ho di bua di lokela ho susumetswa ke lerato.”—Elnathan le Princess, Philippines.