Buka ya Pele ya Dikronike

20 Ha selemo* se qala, nakong eo marena a yang ntweng, Joabe+ a etella pele lebotho la sesole ho ya naheng ya Baamone mme a e fedisa. O ile a tla mme a dikadiketsa Raba+ ha Davida a ne a setse Jerusalema.+ Joabe a hlasela Raba mme a e fedisa.+ 2 Ka mora moo, Davida a nka korone e neng e le hloohong ya Malkame.* A fumana boima ba korone eo bo lekana le ba kgauta e ka etsang dikhilokramo tse 34,* ebile e ena le majwe a bohlokwa yaba e behwa hloohong ya Davida. O ile a boela a nka thepa e ngata eo a e hapileng motseng oo.+ 3 A ntsha batho ba neng ba le motseng oo mme a ba fa mosebetsi+ wa ho betla majwe, wa ho sebetsa ka disebediswa tse bohale tsa tshepe le ka dilepe. Davida a etsa sena metseng yohle ya Baamone. Qetellong Davida le masole ohle ba kgutlela Jerusalema.

4 Ka mora moo, ba lwana le Bafilista Gezere. Yaba Sibekai+ wa Mohushathe o bolaya Sipai setloholo sa Barefaime+ mme Bafilista ba hlolwa.

5 Ba boela ba lwana le Bafilista mme Elkanane mora wa Jaire a bolaya Lahmi ngwanabo Goliathe+ wa Mogathe, eo lerumo la hae le neng le ena le mofeng o jwalo ka thupa ya foreimi e etsang masela.+

6 Ha boela ha eba le ntwa Gathe.+ Ntweng eo, ho ne ho ena le monna ya boholo bo sa tlwaelehang,+ a ena le menwana e tsheletseng letsohong ka leng le menwana e tsheletseng leotong ka leng, kaofela ha yona e le 24. Le yena e ne e le setloholo sa Barefaime.+ 7 A nna a nyefola+ Iseraele. Ka hoo, Jonathane mora wa Shimea,+ abuti wa Davida, a mo bolaya.

8 Tsena e ne e le ditloholo tsa Barefaime+ tse dulang Gathe+ mme di ile tsa bolawa ke Davida le bahlanka ba hae.