Batho ba Robedi ba Pholoha Morwallo

Noe o ile a kena ka arekeng le ba lelapa la hae le diphoofolo. Yaba Jehova o kwala monyako mme pula ya qala ho na. Ya na haholo hoo areka e ileng ya qala ho dula ka hodima metsi. Qetellong lefatshe kaofela la kwahelwa ke metsi. Batho bohle ba ka ntle ho areka ba ile ba shwa. Empa Noe le ba lelapa la hae ba ne ba sireletsehile ka arekeng. Ba ne ba thabile haholo hore ebe ba mametse Jehova.

Pula e ile ya na bosiu le motshehare ka matsatsi a 40. Ka mora moo ya emisa. Yaba metsi a fokotseha butlebutle. Qetellong areka ya dula hodima thaba. Noe le ba lelapa la hae ha ba a ka ba tswa ka arekeng hanghang hobane metsi a ne a ntse a le mangata.

Ha nako e ntse e ya, metsi a nna a fokotseha. Noe le ba lelapa la hae ba qetile nako e fetang selemo ba le ka arekeng. Yaba Jehova o re ba tswe ka arekeng mme ha ba tswela ka ntle ba bona botle feela. Ba ne ba thabile hore ebe Jehova o ba pholositse yaba ba mo etsetsa sehlabelo.

Jehova le yena o ile a thabela sehlabelo seo. A ba tshepisa hore a ke ke a hlola a bolaya batho le diphoofolo ka morwallo. Jehova o ile a etsa mookodi ho bontsha hore a ke ke a hlola a tlisa morwallo. Na o kile wa bona mookodi?

Yaba Jehova o bolella Noe le ba lelapa la hae hore ba be le bana mme ba ngatafale lefatsheng.