KGAOLO YA 33
Mmuso wa Modimo o Tlo Etsang?
Mmuso wa Modimo o se o qadile ho busa. Haufinyane o tlo etsa diphetoho tse kgolo mona lefatsheng. Re tlo ithuta ka diphetoho tse ding tse thabisang tseo o ka di lebellang Mmusong wa Modimo.
1. Mmuso wa Modimo o tla etsang e le hore ho be le kgotso le toka lefatsheng?
Morena wa Mmuso wa Modimo e leng Jesu, o tlo fedisa batho ba kgopo le mebuso ntweng ya Armagedone. (Tšenolo 16:14, 16) Ka nako eo, tshepiso ena e tswang ka Bibeleng e tla phethahala: “Ho setse nakwana e seng kae mme ya kgopo ha a sa tla hlola a ba teng.” (Pesaleme ya 37:10) Tlasa Mmuso ona, Jesu o tla etsa bonnete ba hore ho ba le kgotso le toka lefatsheng lohle.—Bala Esaia 11:4.
2. Bophelo bo tla ba jwang ha ho se ho etsahala thato ya Modimo lefatsheng?
Ha Mmuso wa Modimo o se o busa, batho “ba lokileng ba tla rua lefatshe, ba tla dula ho lona ka ho sa feleng.” (Pesaleme ya 37:29) Nahana o se o phela lefatsheng leo ho lona ho dulang batho ba lokileng feela, ba ratang Jehova le ba ratang batho ba bang. Ka nako eo, ho tla be ho se na motho ya kulang ebile batho bohle ba tla phela ka ho sa feleng.
3. Mmuso wa Modimo o tla etsang ka mora hore batho ba kgopo ba fediswe?
Ka mora hore batho ba kgopo ba fediswe, Jesu o tla busa e le Morena ka dilemo tse 1 000. Ka nako eo, Jesu le ba 144 000 ba tla beng ba busa le yena ba tla thusa batho hore ba phethahale. Qetellong ya dilemo tseo, lefatshe e tla be e le paradeise ebile ho dula batho ba thabileng hobane ba mamela melao ya Jehova. Ka mora moo, Jesu o tla kgutlisetsa mmuso ho Ntate wa hae Jehova. Lebitso la Jehova le tla halaletswa ka ho felletseng. (Matheu 6:9, 10) Ho tla be ho hlakile hore Jehova ke Mmusi ya lokileng ya kgathallang batho ba hae. Jehova o tla fedisa Satane, bademona le batho bohle ba kgethang ho fetohela bobusi ba hae. (Tšenolo 20:7-10) Dintho tse thabisang tseo Mmuso wa Modimo o tlo di etsa di tla dula di le teng.
ITHUTE DINTLHA TSE DING
Ithute hore na ke hobaneng ha re ka tshepa hore Modimo o tla sebedisa Mmuso wa hae ho phethahatsa ditshepiso tsohle tse ka Bibeleng.
4. Mmuso wa Modimo o tla fedisa mebuso ya batho
‘Motho o busitse motho ho mo ntsha kotsi.’ (Moeklesia 8:9) Jehova o tla sebedisa Mmuso wa hae ho fedisa bothata bona.
Bala Daniele 2:44 le 2 Bathesalonika 1:6-8 ebe le buisana ka dipotso tsena:
Jehova le Mora wa hae Jesu ba tla etsang ka mebuso ya batho le batho ba e tshehetsang?
Dintho tseo o ithutileng tsona ka Jehova le Jesu di o kgodisa jwang hore ba tla etsa dintho ka toka?
5. Jesu ke Morena ya molemo
Ka ha Jesu ke Morena wa Mmuso wa Modimo, o tla thusa batho ka ditsela tse ngata. Bapala VIDEO e le hore o bone ka moo Jesu a bontshitseng ka teng hore o batla ho thusa batho le hore Modimo o mo file matla a ho etsa jwalo.
Ha Jesu a ne a le lefatsheng, o ile a bontsha hore na Mmuso wa Modimo o tla etsang. Ditlhohonolofatsong tsena tse latelang, ke dife tseo o di lebelletseng ka ho fetisisa? Bala mangolo a tsamaisanang le tsona.
HA JESU A NE A LE LEFATSHENG, O ILE A . . . |
NAKONG E TLANG JESU O TLA . . . |
|---|---|
|
|
|
|
|
|
|
|
6. Mmuso wa Modimo o tlo etsa hore re thabele bophelo
Mmusong wa Modimo, batho ba tlo thabela bophelo feela jwalo ka ha Jehova a ne a batla. Ba tla phela ka ho sa feleng lefatshe e se e le paradeise. Bapala VIDEO e le hore o bone hore na Jehova o sebedisa Mora wa hae Jesu jwang ho phethahatsa morero wa hae.
Bala Pesaleme ya 145:16 ebe le buisana ka potso e latelang:
Ho tseba hore Jehova o tla “kgotsofatsa takatso ya ntho e nngwe le e nngwe e phelang” ho etsa hore o ikutlwe jwang?
BATHO BA BANG BA RE: “Ha re sebetsa ha mmoho, re ka kgona ho fedisa mathata a teng lefatsheng.”
Mmuso wa Modimo o tla fedisa mathata afe ao mebuso ya batho e sa kgoneng ho a fedisa?
KAKARETSO
Mmuso wa Modimo o tla etsa dintho tseo a di batlang. Lefatshe lohle e tla ba paradeise mme ho tla phela batho ba lokileng feela ba tla beng ba sebeletsa Jehova ka ho sa feleng.
Re Ithutileng?
Mmuso wa Modimo o tla halaletsa lebitso la Jehova jwang?
Keng e etsang hore re dumele hore Mmusong wa Modimo ditshepiso tse ka Bibeleng di tla phethahala?
Dinthong tsohle tse ntle tseo Mmuso wa Modimo o tla di etsa, ke efe eo o e lebelletseng ka ho fetisisa?
BATLA
Ithute hore na Armagedone ke eng.
Bala ka dintho tse tla etsahala nakong eo Jesu a e bitsitseng “mahlomola a maholo.”—Matheu 24:21.
Hlokomela hore na malapa a ka etsang e le hore a ipone a le Paradeiseng.
Sehloohong se reng “Ke ne ke Ena le Dipotso Tse Ngata Tse Ntshwenyang,” hlokomela hore na ke jwang ntate e mong ya neng a rata dipolotiki a ileng a fumana dikarabo tsa dipotso tsa hae.