KGAOLO YA 37
Bibele e Reng ka Mosebetsi le Tjhelete?
Na o kile wa tshwenyeha ka mosebetsi kapa tjhelete? Ho ka ba thata ho sebeletsa Jehova ka dipelo tsohle tsa rona ha ka nako e tshwanang re sebetsa ka thata hore re fumane dintho tseo re di hlokang bophelong. Bibele e na le dikeletso tse ka re thusang.
1. Bibele e re mosebetsi o bohlokwa hakae?
Modimo o batla hore re thabele mosebetsi wa rona. Bibele e re “ho motho ha ho letho le molemo ho feta hore a . . . bone se molemo ka lebaka la mosebetsi wa hae o boima.” (Moeklesia 2:24) Jehova o sebetsa ka thata. Ha re mo etsisa ka hore le rona re sebetse ka thata, re tla mo thabisa hape re tla kgotsofala.
Mosebetsi o bohlokwa empa le ka mohla ha re a lokela ho o dumella hore e be wa bohlokwa ho feta ho sebeletsa Jehova. (Johanne 6:27) Modimo o re tshepisa hore haeba re nka e le yena wa bohlokwa ka ho fetisisa bophelong ba rona, o tla re fa dintho tseo re di hlokang.
2. Re lokela ho nka tjhelete e le bohlokwa hakae?
Le hoja Bibele e re ‘tjhelete ke tshireletso,’ e boetse e a re hlokomedisa hore motho a ke ke a thaba hobane feela a na le tjhelete. (Moeklesia 7:12) Ka hoo, e re kgothalletsa hore re se ke ra rata tjhelete empa re ‘kgotsofalle dintho tse teng.’ (Bala Baheberu 13:5.) Ha re kgotsofalla dintho tseo re nang le tsona, re ke ke ra tshwenyeha ka dintho tseo re se nang tsona. Hape re ke ke ra etsa dikoloto ho sa hlokahale. (Liproverbia 22:7) Re tla boela re qobe dintho tse kotsi tse kang ho betjha le ho kena dikgwebong tseo ho thweng o tla rua kapele o sa sebetsa ka thata.
3. Re ka ba seatla se bulehileng jwang ka tjhelete ya rona?
Jehova ke Modimo ya seatla se bulehileng, re a mo etsisa haeba re le “seatla se bulehileng” ebile re “itokiseditse ho arolelana” le batho ba bang. (1 Timothea 6:18) Re tla be re bontsha hore re seatla se bulehileng haeba re sebedisa tjhelete ya rona ho tshehetsa mesebetsi ya phutheho le batho ba hlokang, haholoholo Bakrestemmoho le rona. Ntho ya bohlokwa ho Jehova ke hore na ke hobaneng ha re fana, eseng hore na re fana hakae. Ha re fana ka dipelo tsohle, re tla thaba re be re thabise Jehova.—Bala Liketso 20:35.
ITHUTE DINTLHA TSE DING
Bona hore na re tla fumana melemo efe haeba re kgotsofalla dintho tseo re nang le tsona ebile mosebetsi o sa tle pele bophelong ba rona.
4. Tlotlisa Jehova ka tsela eo o sebetsang ka yona
Setswalle sa rona le Jehova se lokela ho susumetsa tsela eo re ikutlwang ka yona ka mosebetsi. Bapala VIDEO ebe le buisana ka dipotso tse latelang.
Videong ee, keng e o kgahlileng ka tsela eo Jason a itshwarang ka yona ha a le mosebetsing?
O entseng hore mosebetsi e se ke ya ba wona o tlang pele bophelong ba hae?
Bala Bakolose 3:23, 24 ebe le buisana ka potso ena:
Ke hobaneng ha tsela eo re ikutlwang ka yona ka mosebetsi e le bohlokwa?
Mosebetsi o bohlokwa empa le ka mohla ha re a lokela ho dumella hore e be wa bohlokwa ho feta ho sebeletsa Jehova
5. Ho kgotsofala ho re tswela molemo
Batho ba bangata ba batla ho ba le tjhelete e ngata ka moo ba ka kgonang, empa Bibele e re fa keletso e fapaneng. Bala 1 Timothea 6:6-8 ebe le buisana ka potso ena:
Bibele e re kgothaletsa ho etsang?
Re ka thaba le haeba re futsanehile. Bapala VIDEO ebe le buisana ka potso e latelang.
Keng e etsang hore malapa aa a thabe le hoja a futsanehile?
Ho thweng haeba re e na le tjhelete e ngata empa re ntse re batla e nngwe? Jesu o ile a etsa papiso e bontshang kotsi ya sena. Bala Luka 12:15-21 ebe le buisana ka potso ena:
O ithutileng papisong ya Jesu? (Sheba temana ya 15.)
Bala Liproverbia 10:22 le 1 Timothea 6:10 ebe o a di bapisa. Ka mora moo le buisane ka dipotso tse latelang:
O nahana hore ntho ya bohlokwa ka ho fetisisa ke ho ba motswalle wa Jehova kapa ke ho ba le tjhelete e ngata? Ke hobaneng ha o tjho jwalo?
Ho ka ba le mathata afe ha motho a lelekisa ho rua?
6. Jehova o tla re fa dintho tseo re di hlokang
Ho ba le mathata a mosebetsi le tjhelete ho ka leka tumelo ya rona ho Jehova. Bapala VIDEO ho bona hore na re ka hlola teko ena jwang, ka mora moo le buisane ka dipotso tse latelang.
Videong ee, morabo rona o ile a thulana le mathata afe?
O ile a thuswa keng hore a hlole mathata a hae?
Bala Matheu 6:25-34 ebe le buisana ka potso ena:
Jehova o re tshepisa eng haeba re mo beha pele bophelong ba rona?
BATHO BA BANG BA RE: “Ke lokela ho sebetsa ka thata hore ke hlokomele lelapa la ka. Nke ke ka kgona ho ya dibokeng beke e nngwe le e nngwe.”
Ke lengolo lefe le o kgodisang hore ha o beha Jehova pele bophelong ba hao o tla be o entse qeto ya bohlokwa ka ho fetisisa?
KAKARETSO
Mosebetsi le tjhelete di bohlokwa, empa ha re a lokela hore le ka mohla re di dumelle ho re sitisa ho sebeletsa Jehova.
Re Ithutileng?
Keng e ka o thusang hore mosebetsi o se ke wa ba bohlokwa ho feta ho sebeletsa Jehova?
Ho kgotsofala ho ka o thusa jwang?
O ka bontsha jwang hore o dumela tshepiso ya Jehova ya hore o tla hlokomela bahlanka ba hae?
BATLA
Na Bibele e re tjhelete e fosahetse? Bona hore na Bibele e reng.
“Na Tjhelete ke Motso wa Mefuta Yohle ya Dintho Tse Mpe?” (Sehlooho se websaeteng)
Ithute hore na re ka sebedisa tjhelete ya rona jwang ho thabisa Modimo.
Na ho betjha ho kotsi?
Bona hore na ntate e mong o ile a susumetswa keng ho tlohela ho betjha le ho utswa.
“Ke ne ke Rata Mojaho wa Dipere ka Pelo Yohle ya ka” (Molula-Qhooa, November 1, 2011)