Lebitso la Jehova le Bolelang ho Jesu?

1, 2. (a) Jesu o ile a etsa eng bosiung ba ho qetela pele a bolawa? (b) Re tlo hlahloba dipotso dife sehloohong see?

E NE e le mantsiboya a Labone, Nisane 14, selemong sa 33 mehleng ya Jesu, mme Jesu o ne a le haufi le ho ekwa, ho ahlolwa, ho hlokofatswa le ho bolawa. O ne a sa tswa qeta ho ja Dijo Tsa Shwalane Tsa Morena le baapostola ba hae ba tshepahalang kamoreng e ka hodimo. Ka mora moo, Jesu o ile a kgothatsa baapostola ba hae pele a arohana le bona. Nakwana pele ba tsamaya, Jesu o ile a etsa thapelo e tebileng. Moapostola Johanne o ile a tlaleha thapelo eo lengolong la Johanne kgaolo ya 17.

² Thapelo ya Jesu e senola eng mabapi le seo a neng a amehile ka sona ka nako eo? Ke jwang thapelo eo e bontshang seo a neng a se nka e le sa bohlokwa tshebeletsong ya hae ha a ntse a le lefatsheng? A re hlahlobeng dikarabo tsa dipotso tsena.

“KE BA TSEBISITSE LEBITSO LA HAO”

3. Jesu o ile a reng ka lebitso la Jehova, hona o ne a bolelang? (Johanne 17:​6, 26)

³ Thapelong ya hae, Jesu o ile a re: “Ke ba tsebisitse lebitso la hao.” Ha e le hantle, o ile a bolela ka makgetlo a mabedi thapelong eo hore o ile a tsebisa barutuwa ba hae lebitso la Jehova. (Bala Johanne 17:​6, 26.) O ne a bolelang? Na o ba tsebisitse lebitso leo ba neng ba sa le tsebe? Barutuwa ba Jesu e ne e le Bajuda, ka hoo ba ne ba se ba ntse ba tseba hore lebitso la Modimo ke Jehova. Lebitso leo le ne le hlaha ka makgetlo a diketekete ka Mangolong a Seheberu. Ka hoo, Jesu o ne a sa bue ka lebitso la Modimo ka ho toba empa o ne a bua ka hore na lebitso leo le emelang. Jesu o ne a tsebahaditse makgabane a Monga lebitso leo, merero ya hae le mesebetsi ya hae ka tsela eo motho le ha e le ofe a neng a ke ke a kgona ho a tsebahatsa ka yona.

4, 5. (a) Re ka fana ka mohlala ofe o bontshang hore na lebitso la motho e ka ba la bohlokwa haholo jwang ho rona? (b) Ke ka tsela efe balatedi ba Jesu ba ileng ba tseba lebitso la Jehova?

⁴ Ka mohlala, a re re ho na le moholo eo e leng ngaka phuthehong ya heno eo lebitso la hae e leng David. E se e le dilemo jwale o mo tseba. Empa ka le leng o iphumana o hloka thuso e potlakileng ya dingaka. O potlakisetswa sepetlele moo morabo rona eo a sebetsang teng, mme o sebedisa ditsebo tsa hae tsa bongaka ho pholosa bophelo ba hao. Na o ke ke wa utlwa o mo rata le ho feta ha o utlwa lebitso la hae ka mora moo? Le jwale o ka utlwa o mo rata. Morabo rona David ha e sa le moholo feela eo o mo tsebang empa hape ke ngaka e pholositseng bophelo ba hao.

⁵ Ka tsela e tshwanang, barutuwa ba Jesu ba ne ba se ba ntse ba tseba lebitso la Jehova. Empa lebitso leo e ile ya eba ntho ya bohlokwa ka ho fetisisa ho bona ka lebaka la tshebeletso ya Jesu. Ke hobaneng ha re ka tjho jwalo? Hobane Jesu o ile a bontsha makgabane a Ntate wa hae dinthong tsohle tseo a ileng a di bua le ho di etsa. Ka hoo, baapostola ba hae ba ile ba “tseba” Jehova haholwanyane ka ho mamela ka moo Jesu a neng a ruta ka teng le ka ho sheba tsela eo a neng a tshwara batho ka yona.—Joh. 14:9; 17:3.

“LEBITSO LA HAO LEO O MPHILENG LONA”

6. Ho latela Johanne 17:​11, 12, Jesu o ne a bolela eng ha a re Jehova o mo file lebitso la hae?

⁶ Jesu o ile a rapella balatedi ba hae, a re: “Ke kopa o ba sireletse molemong wa lebitso la hao leo o mphileng lona.” (Bala Johanne 17:​11, 12.) Na see se bolela hore Jesu o ne a se a tla tsejwa e le Jehova? Tjhe. Hlokomela hore thapelong ya hae, Jesu o bua ka lebitso la Jehova e le “lebitso la hao.” Ka hoo, lebitso la Jehova ha eya ka ya eba lebitso la Jesu ka ho toba. Jwale Jesu o ne a bolelang ha a re o ile a fuwa lebitso la Modimo? Ka hodima tsohle, Jesu e ne e le moemedi le Mmuelli wa Jehova. O ne a tlile ka lebitso la Ntate wa hae ebile o ne a etsa mesebetsi e matla ka lona. (Joh. 5:43; 10:25) Ho ekelletsa moo, lebitso Jesu le bolela “Jehova ke Poloko.” E, lebitso la Jesu le ne le amana haholo le lebitso la Jehova.

7. Fana ka mohlala wa ka moo Jesu a neng a ka bua bakeng sa Jehova ka teng.

⁷ Ka mohlala, ka ha moemedi wa naha o emetse mopresidente, a ka bua bakeng sa mopresidente. Ka hoo, mantswe a moemedi wa naha a na le matla a tshwanang le a mopresidente. Ka ho tshwanang, Jesu o ne a emetse Jehova mme o ile a bua le batho bakeng sa Jehova.—Mat. 21:9; Luka 13:35.

8. Lebitso la Jehova le ne le le “ho” Jesu jwang pele a tla lefatsheng? (Exoda 23:​20, 21)

⁸ Jwalo ka ha Jesu e le Lentswe, e ile ya eba Mmuelli wa Jehova ka hore a fetisetse molaetsa wa Modimo le ditaelo tsa hae ho mangeloi le ho batho. (Joh. 1:​1-3) Ho ka etsahala hore ebe Jesu e ne e le lengeloi leo Jehova a ileng a le romela ho hlokomela Baiseraele nakong eo ba leng lefeelleng. Ha Jehova a bolella Baiseraele hore ba mamele lengeloi leo, o ile a re: “Ka ha lebitso la ka le ho lengeloi leo.”a (Bala Exoda 23:​20, 21.) Lebitso la Jehova le ne le le “ho” Jesu ka hore o emela Jehova ebile ke yena ya ka sehloohong ya halaletsang lebitso la Ntate wa hae le ho pakahatsa hore ntho e nngwe le e nngwe eo a e etsang e nepahetse.

“NTATE, TLOTLISA LEBITSO LA HAO”

9. Hlalosa hore na lebitso la Jehova le ne le le bohlokwa hakae ho Jesu.

⁹ Jwalo ka ha re se re hlalositse, lebitso la Jehova e ne e le yona ntho ya bohlokwa ka ho fetisisa ho Jesu le pele a ka tla lefatsheng. Ha ho makatse hore ebe o ile a bontsha ka ntho e nngwe le e nngwe eo a ileng a e etsa ha a le lefatsheng hore lebitso la Jehova le bohlokwa ho yena. Ho elella qetellong ya tshebeletso ya hae, Jesu o ile a re: “Ntate, tlotlisa lebitso la hao.” Hanghang, Ntate wa hae o ile a arabela ka lentswe le thwathwaretsang a le lehodimong, a re: “Ke le tlotlisitse mme ke tla boela ke le tlotlise.”—Joh. 12:28.

10, 11. (a) Jesu o ile a tlotlisa lebitso la Jehova jwang? (Sheba setshwantsho.) (b) Ke hobaneng ha ho hlokahala hore ho tloswe qoso lebitsong la Jehova le hore le halaletswe?

¹⁰ Jesu le yena o ile a tlotlisa lebitso la Ntate wa hae. Jwang? Tsela e nngwe ke ka ho bolella ba bang diketso le makgabane a babatsehang a Ntate wa hae. Le ha ho le jwalo, ho ne ho hlokahala ho hongata hore lebitso leo le tlotliswe. Ho ne ho hlokahala hore ho halaletswe le ho tloswa qoso lebitsong la Jehova.b Jesu o ile a bontsha hore na taba ena e bohlokwa hakae ha a ne a ruta balatedi ba hae ho rapela. O ile a re: “Ntate wa rona ya mahodimong, lebitso la hao le halaletswe.”—Mat. 6:9.

¹¹ Ke hobaneng ha ho hlokahala hore ho tloswe qoso lebitsong la Jehova le hore le halaletswe? Hobane serapeng sa Edene, Satane Diabolose o ile a hlompholla Jehova Modimo le ho bua mashano ka yena. O ile a boela a re Jehova o leshano mme ha a batlele Adama le Eva se molemo. (Gen. 3:​1-5) Satane o ile a boela a fana ka maikutlo a hore tsela eo Jehova a etsang dintho ka yona ha e a nepahala. Mashano ana a Satane a ile a senya botumo ba Jehova kapa lebitso la hae. Ha morao mehleng ya Jobo, Satane o ile a bolela hore batho ba sebeletsang Jehova ba mo sebeletsa hobane ba lebelletse ho hong ho yena. Ho ekelletsa moo, moetselletsi eo o ile a re ha ho na motho ya ratang Jehova e le ka nnete hoo a ka tswelang pele ho mo sebeletsa le ha a le tlasa teko. (Jobo 1:​9-11; 2:4) Ho ne ho hlokahala nako e le hore ho ka hlaka hore na ke mang ya leshano, Jehova kapa Satane.

“KE TELA BOPHELO BA KA”

12. Jesu o ne a ikemiseditse ho etsang hobane a rata lebitso la Jehova?

¹² Jesu o ne a ikemiseditse ho etsa sohle seo a ka se kgonang ho halaletsa le ho tlosa qoso lebitsong la Jehova, hobane o ne a mo rata. Jesu o ile a re: “Ke tela bophelo ba ka.” (Joh. 10:​17, 18) Ka nnete o ne a ikemiseditse ho shwela lebitso la Jehova.c Adama le Eva, e leng batho ba pele ba neng ba phethahetse, ba ile ba fetohela Jehova mme ba nka lehlakore la Satane. Ho fapana le bona, Jesu o ne a ikemiseditse ho tla lefatsheng mme a tlo bontsha hore o rata Jehova. O ile a etsa seo ka hore a tshepahale bophelo bohle ba hae. (Baheb. 4:15; 5:​7-10) O ile a dula a tshepahala ha a ntse a phela ho fihlela a bolaelwa palong. (Baheb. 12:2) Ka tsela ena, o ile a paka hore o rata Jehova le lebitso la hae.

13. Ke hobaneng ha Jesu e ne e le yena motho ya nepahetseng ka ho fetisisa ya ka pakang hore Satane o leshano? (Sheba setshwantsho.)

¹³ Tsela eo Jesu a phetseng ka yona e ile ya totobatsa ka ho felletseng hore Satane ke yena ya leshano, eseng Jehova. (Joh. 8:44) Jesu o ne a tseba Jehova ho feta mang kapa mang ya kileng a phela. Haeba diqoso tsa Satane kgahlanong le Jehova e ne e le nnete, Jesu a ka be a tsebile. Empa Jesu o ile a ema a tiile e le hore a sireletse botumo kapa lebitso la Jehova. Le nakong eo ho neng ho bonahala eka Jehova o mo lahlile, o ne a ikemiseditse ho shwa ho ena le ho fetohela Ntate wa hae ya lerato.—Mat. 27:46.d

“KE QETILE MOSEBETSI OO O MPHILENG WONA”

14. Jehova o ile a putsa Jesu jwang hobane a ile a tshepahala?

¹⁴ Bosiung ba pele Jesu a shwa, o ile a rapela Jehova a re: “Ke qetile mosebetsi oo o mphileng wona.” O ne a tshepile hore Jehova o tla mo putsa hobane a ile a tshepahala. (Joh. 17:​4, 5) Jesu o ne a sa fosa ka hore a tshepe Ntate wa hae. Jehova ha a ka a mo tlohella hore a dule lebitleng. (Dik. 2:​23, 24) O ile a mo tsosa yaba o mo fa boemo bo phahameng lehodimong. (Bafil. 2:​8, 9) Ha nako e ntse e ya, Jesu o ile a qala ho busa e le Morena wa Mmuso wa Modimo. Mmuso oo o ne o tla finyella eng? Karolo ya bobedi ya thapelo eo a ileng a e ruta barutuwa ba hae e re: “Mmuso wa hao o tle. Thato ya hao [Jehova] e etswe lefatsheng jwalo ka ha e etswa lehodimong.”—Mat. 6:10.

15. Jesu o tla boela a etseng?

¹⁵ Haufinyane, Jesu o tlo lwana le dira tsa Modimo mme a fedise batho ba kgopo ka ntwa ya Armagedone. (Tshen. 16:​14, 16; 19:​11-16) Nakwana ka mora moo, o tla lahlela Satane “ka sekoting se tebileng,” moo a sa tlo kgona ho etsa letho jwalo ka ha eka o shwele. (Tshen. 20:​1-3) Ka mora moo, Jesu o tla etsa hore batho ba phethahale le hore ba be le kgotso nakong ya Puso ya Hae ya Dilemo Tse Sekete. O tla tsosa bafu a be a etse hore lefatshe lohle ebe paradeise. Morero wa Jehova o tla be o phethahetse.—Tshen. 21:​1-4.

16. Ho tla be ho finyelletswe eng qetellong ya Puso ya Dilemo Tse Sekete?

¹⁶ Re ka lebella hore ho etsahale eng qetellong ya Puso ya Dilemo Tse Sekete? Ho se phethahale le sebe e tla be e le pale ya maobane. Batho ha ba sa tla hlola ba kopa tshwarelo ya dibe tsa bona motheong wa tefo ya topollo, kapa hona ho hloka mmuelli kapa moprista. “Sera sa ho qetela e leng lefu [le bakilweng ke Adama, se tla be se ile sa] fediswa.” Mabitla a tla be a ntse a re na o ne o nnehileng. Bafu ba tla be ba tsositswe. Motho e mong le e mong lefatsheng o tla be a phethahetse.—1 Bakor. 15:​25, 26.

17, 18. (a) Ho tla etsahalang qetellong ya Puso ya Dilemo Tse Sekete? (b) Jesu o tla etsang ha nako ya hae ya ho busa e fela? (1 Bakorinthe 15:​24, 28) (Sheba setshwantsho.)

¹⁷ Ho tla boela ho etsahale eng qetellong ya Puso ya Dilemo Tse Sekete? Ka nako eo, ho tla etsahala ntho e ikgethang haholo. Tsekisano e mabapi le ho halaletswa ha lebitso la Jehova e tla fela. Jwang? Serapeng sa Edene, Satane o ile a re Jehova o leshano hape ha a buse batho ka lerato. Ho tloha ka nako eo, haesale lebitso la hae le ntse le halaletswa ke batho ba mo hlomphang. Ka hoo, qetellong ya Puso ya Dilemo Tse Sekete, qoso lebitsong la Jehova e tla be e tlositswe ka ho felletseng. Jehova o tla be a bontshitse ntle ho qeaqeo hore ke Ntate ya lehodimong ya lerato.

¹⁸ Qetellong ho tla bonahala hore dintho tseo Satane a ileng a di bua ke leshano. Jesu o tla etsang ha nako ya hae ya ho busa e fela? Na o tla etsisa Satane mme a fetohele Jehova? Tjhe! (Bala 1 Bakorinthe 15:​24, 28.) Jesu o tla kgutlisetsa Mmuso ho Ntate wa hae. O tla ikokobelletsa puso ya Jehova. Ho fapana le Satane, ka nnete Jesu o ikemiseditse ho tela ntho e nngwe le e nngwe hobane o rata Jehova.

19. Lebitso la Jehova le bolelang ho Jesu?

¹⁹ Ha ho makatse hore ebe Jehova o ne a ikemiseditse ho fa Jesu lebitso la hae. Jesu o bontshitse ka ho phethahetseng hore na Ntate wa hae o jwang. Ka hoo, lebitso la Jehova le bolelang ho Jesu? Ke la bohlokwa ho feta dintho tsohle. O ne a ikemiseditse ho shwela lebitso leo ebile o tla ikemisetsa ho kgutlisetsa ntho e nngwe le e nngwe ho Jehova qetellong ya Puso ya Dilemo Tse Sekete. Re ka etsisa Jesu jwang? Re tlo araba potso ena sehloohong se latelang.