Borapeli ba Litšoantšo bo se Nang Thuso

Lehlabuleng la 1986, William Murray, mongoli oa makasine oa The New Yorker, o ile a etela Spreronga, Itali, motse oa boholo-holo moo ho tšoasoang lihlapi lebōpong le ka bophirima la Itali le ka bang lik’hilomithara tse 121 boroabochabela ho Roma. Hoseng ho hong, ha Murray a ntse a eme lebenkeleng le rekisang linomapholi a ntse a noa kofi, o ile a kopana le monna ea lilemo tse mahareng ea bitsoang Fernando De Fabritiis. Moqoqong oa bona, monghali De Fabritiis, ea phetseng bophelo ba hae kaofela Spreronga, o ile a pheta pale e tšehisang eo e saleng a e tseba ho tloha bonyenyaneng.

“Monna o ne a ena le tšimo ea lifate tsa lipieere, empa se seng sa lifate tseo se ne se sa behe, kahoo a se khaola ’me a se rekisetsa ’metli,” ho bolela De Fabritiis.” ’Metli o ile a betla seemahale sa St. Joseph ka sona ’me a se fa kereke ea moo. Monna ea neng a ena le sefate a ea kerekeng ka Sontaha se seng, ’me moo e mong le e mong a ne a rapela seemahale sa St. Joseph. Monna o ile a hana ho rapela. O ne a tseba sekotoana seo sa patsi. ‘Se ne se sa tsebe ho beha le tholoana ea pieere leha e le ’ngoe. Ke joang se ka etsang mohlolo?” o ile a bolella motho e mong le e mong.

Pale ea monghali De Fabritiis e tšoana hantle le mohlala oo Jehova Molimo a o sebelisitseng ho ruta Iseraele ea boholo-holo ka borapeli ba litšoantšo bo se nang thuso. Ke hobane’ng ha u sa nke Bibele ’me ua bala ho Esaia 44:14-20?