December

Moapostola Petrose o ile a bua mantsoe ao e le ha a khothatsa Bakreste hore ba mamelle liteko tse ngata tsa Satane. Mohlala oa “ba mameletseng” o re bontša hore na re ka etsa’ng e le hore re lule re tšepahala, ’me o re tiisetsa hore re ka atleha ebile o re hopotsa hore ha re mamella re tla putsoa. (Jak. 5:11) Mohlomong u thulana le khanyetso kapa mahloriso ho lira tsa bahlanka ba Jehova. Kapa u moholo ka phuthehong kapa molebeli oa potoloho ea imetsoeng ke mosebetsi oa phutheho. Haeba ho joalo, mohlala oa Pauluse o ka u thusa. Pauluse o ne a hlorisoa ka sehloho, ’me a lula a tšoenyehile ka barab’abo rona liphuthehong. (2 Bakor. 11:23-29) Empa Pauluse ha aa ka a tela ’me mohlala oa hae o ile oa matlafatsa ba bang. (2 Bakor. 1:6) Le uena ha u mamella, u ka susumetsa ba bang hore le bona ba mamelle. w16.04 2:11, 14

Lipaki Tsa Jehova li tsebahala ka ho bolela litaba tse molemo. Batho ba bang ba thabela molaetsa oo re o phatlalatsang ’me ba bang ha ba o thabele. Empa le ba bang ba sa o thabeleng, ba hlompha mosebetsi oo re o etsang. Jesu o ile a bolela esale pele hore matsatsing a ho qetela, litaba tse molemo tsa ’Muso li tla boleloa lefatšeng lohle (Mat. 24:14) Malumeli a mangata a bolela hore a phatlalatsa molaetsa oo Jesu a neng a o phatlalatsa. Empa baruti ba ’ona ba ruta feela ha ba le kerekeng, thelevisheneng, Inthaneteng, kapa ba bua feela ka hore na ba amohetse Jesu joang. Ba bang ba lumela hore hafeela ba thusa batho ba hlokang kapa ba fana ka liphallelo, ba ithaopela ho ba lingaka, baoki, kapa matichere, ba etsa mosebetsi oo Jesu a buileng ka oona. Empa na oo ke oona mosebetsi oa boboleli oo Jesu a neng a bua ka oona? w16.05 2:1, 2

Haesale ho tloha ka 1914 mebuso ea batho e le lira tsa ’Muso oa Molimo. Haufinyane ’Muso oa Molimo o tla felisa mebuso eohle ea lipolotiki. (Pes. 2:2, 7-9) Molimo o lumeletse batho hore ba buse ba bang e le hore ho be le khotso le taolo. Sena se re nolofalletsa ho bolela litaba tse molemo tsa ’Muso oa Molimo. (Bar. 13:3, 4) Molimo o boetse o re laela hore re rapelle ba boholong, e le hore re ka mo sebeletsa ka bolokolohi. (1 Tim. 2:1, 2) Ha re tšoaroa ka leeme, re ka ’na ra kopa thuso ho ba boholong pusong. Ke sona seo Pauluse a ileng a se etsa. Le hoja Bibele e re Satane o laola mebuso ea batho, ha ho mohla e reng o laola ba ikarabellang pusong. (Luka 4:5, 6) Kahoo, ha rea lokela ho fana ka maikutlo a hore batho ba itseng ba boholong pusong ba laoloa ke Diabolose. Bibele e re ha rea lokela ho nyefola ba bang.—Tite 3:1, 2. w16.04 4:5, 6

Re lokela ho lemoha, kapa ho utloisisa seo Jehova a batlang hore re se etse, boemong boo ho se nang molao o tobileng ka Bibeleng. Re ka etsa seo joang? Re lokela ho mo rapela ’me re lumelle moea oa hae o halalelang o re tataise. Kamehla Jesu o ne a lemoha seo Jehova a batlang hore a se etse. Ka mohlala, ka makhetlo a mabeli ha bongata bo ne bo lapile, Jesu o ile a rapela eaba o bo fepa ka mohlolo. (Mat. 14:17-20; 15:34-37) Empa ha Jesu a ne a lapile lefeelleng ’me Diabolose a batla hore a fetole majoe bohobe, o ile a hana. (Mat. 4:2-4) O ne a tseba Ntate oa hae hantle, kahoo a tseba hore Jehova a ke ke a batla hore a sebelise moea o halalelang ka mabaka a boithati. O ne a kholisehile hore Ntate oa hae o tla mo sireletsa a be a mo fe lijo ha a li hloka. w16.05 3:7, 8

Likarolo tse ling tsa Bibele li ne li ngoletsoe motho ea itseng kapa sehlopha se itseng. Ka hona, pele re bala Bibele re lokela ho kopa Jehova hore a bule likelello tsa rona e le hore re utloisise seo a batlang hore re ithute sona. (Esdr. 7:10; Jak. 1:5) Ha u ntse u bala Bibele, khefutsa, ebe u ipotsa lipotso tse latelang: ‘See se nthuta eng ka Jehova? Nka sebelisa lintlha tsee neng bophelong ba ka? Nka li sebelisa joang e le hore ke thuse ba bang?’ Ha re thuisa ka lipotso tsena, re tla rua molemo ha re ntse re bala Bibele. A re ke re boneng mohlala o le mong. Bibele e hlalosa litšoaneleho tse itseng tseo baholo ba Bakreste ba lokelang ho ba le tsona. (1 Tim 3:2-7) Empa ba bangata ba rona ha re baholo, ’me re ka ’na ra nahana hore lintlha tseo li ke ke tsa re tsoela molemo. Leha ho le joalo, re ka rua molemo haholo litšoanelehong tsena. w16.05 5:7, 8

Ha Bajuda ba isoa botlamuoeng Babylona, ba ile ba fumana hore batho ba moo ba rapela melimo ea litšoantšo le bademona. Leha ho le joalo, Bajuda ba tšepahalang ba kang Daniele le metsoalle ea hae e meraro ba ile ba hana ho boptjoa ke Bababylona. (Dan. 1:6, 8, 12; 3:16-18) Daniele le metsoalle ea hae ba ile ba lumella Jehova hore a ba bope ’me ba tsoela pele ho rapela eena feela. Le hoja Daniele a phetse har’a batho ba khopo hoo e ka bang bophelo bohle ba hae, lengeloi la Molimo le ile la re ke “monna ea khahlehang haholo.” (Dan. 10:11, 19) Mehleng ea Bibele, sebopi se ne se ka ’na sa qobella letsopa le thata hore le bopehe ka tsela e itseng. Kajeno, Bakreste ba ’nete baa tseba hore Jehova ke eena ’Musi oa bokahohle ’me o na le matla a ho bopa lichaba tsohle. (Jer. 18:6) Molimo o boetse o na le matla a ho bopa e mong le e mong oa rona. Leha ho le joalo, Jehova ha a qobelle mang kapa mang hore a fetohe. Ho e-na le hoo, o batla hore re ithaopele ho boptjoa ke eena. w16.06 2:1, 2

Satane o sebelisa mekhatlo ea khoebo ho leka ho re qhekella hore re nahane hore ho ba le lintho tse ngata tseo re sa li hlokeng ke hona ho ka etsang hore re thabe bophelong. Oa ipabola tabeng ea ho sebelisa “takatso ea mahlo.” (1 Joh. 2:15-17; Gen. 3:6; Liprov. 27:20) Lefatše le re nonosa lintho tsa mefuta ena kaofela ’me tse ling tsa tsona li ntle. Na u kile ua reka ntho e itseng eo u sa e hlokeng, hobane feela e ile ea u khahla ha e bapatsoa kapa ha u e bona ka lebenkeleng? Na hamorao u ile ua elelloa hore u ne u ntse u ka phela ntle ho eona? Lintho tse joalo tseo re sa li hlokeng li rarahanya bophelo ba rona li bile lia re nyahamisa. Li ka re tšoasa ’me tsa re hlokisa nako ea ho ithuta Bibele, ho lokisetsa liboka le ho ba teng ho tsona hammoho le ho ea tšebeletsong ea tšimo. Hopola temoso ena ea moapostola Johanne, e reng: “Lefatše lea feta ’me ho joalo le ka takatso ea lona.” w16.07 1:3, 4

Liphuthehong tsa Bokreste tsa mehleng ea baapostola, ho ne ho e-na le Bajuda, Bagerike, Baroma le batho ba merabe e meng. Ba ne ba e-tsoa libakeng tse sa tšoaneng, ba e-na le meetlo le litloaelo tse fapaneng. Ka lebaka leo, ba bang ba ile ba thatafalloa ho amohela mekhoa e mecha ea ho rapela kapa ho khaotsa ea khale. Kahoo, ho ne ho hlokahala hore Pauluse a ba hopotse hore Bakreste ba na le Molimo a le mong, e leng Jehova. Na phutheho ea Bokreste ea kajeno e fapane? Moprofeta Esaia o ile a re “karolong e qetellang ea matsatsi,” batho ba lichaba tsohle ba tla bokana hammoho ho rapela Jehova. Ba tla re: “O tla re rupela ka litsela tsa hae, ’me re tla tsamaea litseleng tsa hae.” (Esa. 2:2, 3) Re thabela ho bona ha boprofeta bona bo phethahala kajeno. Bara le barali babo rona ba tsoa libakeng tse sa tšoaneng, ba bua lipuo tse sa tšoaneng, ’me ba na le meetlo e fapaneng. Empa re rapela Jehova re momahane. w16.06 3:15, 16

Nahana feela hore na Jehova o lokiselitse Bakreste ba tlotsitsoeng lintho tse babatsehang hakaakang ha ba se ba busa le Kreste leholimong. (Luka 22:28-30; Bafil. 3:20, 21; 1 Joh. 3:2.) E tla ba “Jerusalema e mocha,” e leng monyaluoa oa Kreste. (Tšen. 3:12; 17:14; 21:2, 9, 10) Ba tla sebetsa hammoho le Jesu “ho phekola lichaba,” ka hore ba thuse batho ba mamelang hore ba lokolohe sebeng le lefung le hore ba phethahale. (Tšen. 22:1, 2, 17). E ’ngoe ea litsela tse babatsehang tseo Jehova a tla bontša mosa oa hae ka tsona, ke ka hore a tsose bafu “mabitleng.” (Jobo 14:13-15; Joh. 5:28, 29) Banna le basali ba tšepahalang ba ileng ba shoa pele ho lefu la Kreste, hammoho le ba “linku tse ling” ba shoang ba tšepahala matsatsing a ho qetela, ba tla tsosoa e le hore ba tsoele pele ba sebeletsa Jehova.—Joh. 10:16. w16.07 4:13-15

Ho ‘lula re falimehile’ ho bolela ho fetang feela ho ba le maikutlo a matle. Matsatsi a seng makae pele ho ketsahalo eo ea serapeng sa Gethesemane, Jesu o ile a bolella barutuoa bao hore ba etse thapeli ho Jehova. (Luka 21:36) E le hore re lule re lebetse moeeng, re lokela ho falimeha mabapi le lithapelo. (1 Pet. 4:7) Kaha Jesu o boletse hore bofelo bo tla tla “ka hora eo [re] sa e nahaneng,” ena ha se nako ea ho otsela moeeng, kapa ea ho lelekisa lintho tsa lefeela tseo Satane le lefatše la hae a re nonosang tsona le tseo re li khallang. (Mat. 24:44) Bibele e re bolella lintho tseo Molimo le Kreste ba tšepisang ho re etsetsa tsona haufinyane le hore na ke joang re ka lulang re lebetse. Re lokela ho matlafatsa kamano ea rona le Jehova, ’me re etelletse pele mesebetsi e amanang le ’Muso. Re lokela ho elelloa nako le liketsahalo e le hore re lule re itokiselitse se larileng ka pele. (Tšen. 22:20) Bophelo ba rona bo kotsing! w16.07 2:15-17

E le hore lenyalo le tiee, banyalani ba lokela ho ikemisetsa ho jarelana mefokolo. Ba ikemisetse ‘ho mamellana le ho tšoarelana ka bolokolohi.’ Ke ’nete hore ka bobeli ba tla etsa liphoso. Empa ha seo se etsahala, se ba fa monyetla oa hore ba ithute liphosong tseo ba li entseng ’me ba tšoarelane le ho bontšana lerato, “etsoe ke tlamo e phethahetseng ea bonngoe.” (Bakol. 3:14) Ho feta moo, “lerato lea tiisetsa ’me le mosa. . . . Ha le boloke tlaleho ea bobe.” (1 Bakor. 13:4, 5) Liqabang li lokela ho rarolloa ka potlako. Kahoo, banyalani ba Bakreste ba lokela ho rarolla qabang pele letsatsi le likela. (Baef. 4:26, 27) Ho hlokahala boikokobetso le sebete hore motho a kope tšoarelo ho tsoa pelong, empa ho etsa joalo ho rarolla bothata ebile ho etsa hore banyalani ba momahane. w16.08 2:6

Mosebetsi o ka sehloohong oa Jesu e ne e le ho phatlalatsa litaba tse molemo. Leha ho le joalo, o ile a ipha nako ea ho koetlisa ba bang hore e be balisa le mesuoe. (Mat. 10:5-7) Le hoja Filipi e ne e le moevangeli ea maphathaphathe, ha ho pelaelo hore o ile a thusa barali ba hae ba bane hore ba atlehe mosebetsing oa boboleli. (Lik. 21:8, 9) Ke hobane’ng ha ho koetlisa ba bang e le habohlokoa kajeno? Palo ea batho ba amohelang litaba tse molemo lefatšeng ka bophara e ntse e eketseha. Ba e-s’o kolobetsoe ba lokela ho utloisisa hore ke habohlokoa hore ba ithute Bibele. Ba boetse ba lokela ho rutoa ho bolela litaba tse molemo le ho ruta ba bang. Barab’abo rona ba lokela ho khothalletsoa ho sebetsa ka thata e le hore ba tšoanelehe ho ba bahlanka ba sebeletsang le baholo. Bakreste ba holileng tsebong ba ka fana ka “taeo e molemo,” e le ho thusa ba sa tsoa kolobetsoa hore ba hatele pele moeeng. w16.08 4:1, 2

Rea momahana ha re sebetsa mahetla a bapile le bara le barali babo rona. Ho boetse ho tiisa maqhama a rona a setsoalle ’me ho re kholisa le ho feta hore re tla hlohonolofatsoa ka ho enneng ’Musong oa Molimo. Ha re ntse re matlafatsa ba bang, re ba thusa hore ba loantše maemo a ba nyahamisang ’me ba lebelle bokamoso bo khanyang. (Esa 35:4) Ho feta moo, ha re khothatsa ba bang seo se re thusa hore re tsepamise kelello linthong tsa moea ’me re nahane ka seo Molimo a re tšepisitseng sona. Ha e le hantle, le rona hoa re matlafatsa. Ho bona kamoo Jehova a ’nileng a tšehetsa bahlanka ba hae ba tšepahalang le ho ba sireletsa kateng nakong e fetileng, ho lokela ho re matlafatsa tumelo le ho etsa hore re mo tšepe le ho feta. Kahoo, ha u tobana le mathata u se ke ua lumella ‘matsoho a hao ho tepella’! (Sof 3:16) Ho e-na le hoo, kopa Jehova hore a u thuse, ’me u lumelle letsoho la hae le matla hore le u tataisitse litlhohonolofatsong tsa ’Muso.—Pes. 73:23, 24. w16.09 1:16-18

Ha bahlanka ba Molimo ba khetha moaparo, ba lokela ho hopola se boletsoeng temaneng ea kajeno. Ke ’nete hore maemo a leholimo le ho fetoha ha linako tsa selemo ho ama tsela eo re aparang ka eona. Le maemo a batho ha a tšoane. Empa melao ea Jehova ha e feto-fetohe joaloka boemo ba leholimo. (Mal. 3:6) Ha ho chesa, ho ka ’na ha e-ba thata hore re apare ka tsela e hlomphehang le e bontšang ho hlaphoheloa kelellong. Kahoo, bara le barali babo rona baa ananela ha re sa apare liaparo tse re penyang kapa tse habuhabu. (Jobo 31:1) Leha re ile mabopong kapa libakeng tsa ho sesa, re lokela ho apara ka tsela e hlomphehang. (Liprov. 11:2, 20) Esita le haeba batho ba bangata ba lefatše ba apara ka tsela e sieang ’mele ka ntle, rona kaha re sebeletsa Jehova re lokela ho apara ka tsela e tlotlisang Molimo oa rona ea halalelang. w16.09 3:11, 12

Jesu o ne a sa tsoafe ho botsa balateli ba hae hore na ba lumela’ng. Mo etsise. Nakong eo bana ba phutholohileng, ho ka ba molemo hore u ba kope hore ba ntše maikutlo a bona. Haeba ngoana a sa utloisise hantle taba e itseng, u se ke ua mo halefela kapa hona ho mo fella pelo. Behelana mabaka le eena ka mamello. U lokela ho nka lipotso tsa ngoana e le pontšo ea hore oa tsotella ’me o batla ho ba le kutloisiso. Esita le Jesu o ile a botsa lipotso tse tebileng a le lilemo li 12. (Luka 2:46) Tseba bana ba hao hantle, u tsebe hore na ba nahana’ng, ba ikutloa joang le hore na ba tšoenyehile ka eng. U se ke ua nahana hore kaha ba ea libokeng le uena le tšimong, seo se bolela hore ba se ba e-na le tumelo. Buisana le bona ka lintho tsa moea letsatsi le leng le le leng. Rapela hammoho le bona u be u ba rapelle. Ela hloko boemo leha e le bofe bo ka lekang tumelo ea bona, ’me u ba thuse ho sebetsana le bona. w16.09 5:3-5

Lipaki Tsa Jehova tse likete kajeno li ikakhetse ka setotsoana mosebetsing oa ho phatlalatsa litaba tse molemo ‘sechabeng se seng le se seng le molokong o mong le o mong le lelemeng le leng le le leng le bathong ba bang le ba bang.’ (Tšen. 14:6) Na u e mong oa ba ntseng ba ithuta puo e ’ngoe? Na mohlomong u moromuoa kapa u sebeletsa moo ho nang le tlhokahalo naheng e ’ngoe, kapa u se u kopanela le phutheho ea puo e ’ngoe naheng ea heno? Kaofela re lokela ho ela hloko kamano ea rona le Molimo le ea ba malapa a rona. Leha ho le joalo, ka linako tse ling re ka ’na ra thatafalloa ho ba le nako ea ho ithuta hobane re phathahane. Empa batho ba sebeletsang naheng e ’ngoe ba tobana le bothata bo bong hape. Ho phaella tabeng ea ho ithuta puo e ’ngoe, ba boetse ba lokela ho etsa bonnete ba hore ba matlafatsa kamano ea bona le Molimo ka ho ithuta Lentsoe la Molimo kamehla.—1 Bakor. 2:10. w16.10 2:1-3

Lipaki Tsa Jehova li tsoela pele ho thaba ka lebaka la tšepo eo li nang le eona le hoja li hlorisoa. Ka mohlala, bara le barali babo rona ba bangata ba literonkong Eritrea, Singapore le Korea Boroa, hobane ba mamela taelo ea Jesu ea hore ba se ke ba nka sabole. Ba bangata ba bahlanka ba Jehova ha ba hlorisoe ka sehloho. Empa ba tobana le liteko tse sa tšoaneng. Ba bang baa sotleha ka lebaka la bofutsana, lintoa tsa lehae kapa likoluoa tsa tlhaho. Ba bang joaloka Moshe le bapatriareka ba ile ba tlameha ho tela bophelo bo mabothobotho kapa botumo. Ba leka ka matla hore ba se ke ba hoheloa ke bophelo ba mponeng le ba boithati. Ba thusoa ke eng? Ke ho rata Jehova le ho lumela ka tieo hore o tla phethahatsa tšepiso ea hae ea ho felisa ho hloka toka le ho putsa bahlanka ba hae ba tšepahalang ka bophelo bo sa feleng lefatšeng le lecha la ho loka.—Pes. 37:5, 7, 9, 29. w16.10 3:15, 16

Jehova o ile a matlafatsa moprofeta Jeremia ea tšepahalang, kaha o ne a tšohile a bile a nyahame. (Jer. 1:6-10) U ka inahanela hore na moprofeta Daniele ea tsofetseng o ile a khothala hakaakang ha Molimo a romela lengeloi ho tla mo khothatsa. Lengeloi leo le ile la bitsa Daniele monna “ea khahlehang haholo.” (Dan. 10:8, 11, 18, 19) Na le uena u ka khothatsa bahoeletsi, bo-pula-maliboho hammoho le bara le barali babo rona ba holileng ba haelloang ke matla? Molimo ha aa ka a nka hore kaha o qetile lilemo tse ngata a sebetsa le Mora oa hae, seo se bolela hore ha ho hlokahale hore a mo babatse le ho mo khothatsa ha a le lefatšeng. Ho fapana le hoo, Jesu o ile a utloa Ntate oa hae ka makhetlo a mabeli a bua a le leholimong a re: “Enoa ke Mora oa ka, ea ratoang, eo ke mo amohetseng.” (Mat. 3:17; 17:5) Molimo o ile a babatsa Jesu ’me a mo tiisetsa hore o etsa hantle. Jehova o ile a boela a romela lengeloi ho matlafatsa Jesu ha a le mahlomoleng bosiung ba pele a bolaoa.—Luka 22:43. w16.11 1:7, 8

Ha ho bonolo hore re laole maikutlo a rona haeba batho ba re nyefola kapa ba re tšoara ka leeme. Re utloa bohloko ha re khesoa ka lebaka la morabe oa rona, ’mala, kapa sebopeho sa rona. Re utloa bohloko le ho feta haeba re khesoa ke molumeli-’moho le rona. Kahoo, re lokela ho latela keletso ea Bibele ea hore re laole khalefo ’me re se ke ra potlakela ho khopeha. (Liprov. 16:32) Ha ho pelaelo hore kaofela ha rona re lokela ho sebeletsa tabeng ea ho se khopehe lefeela esita le ho ba ba tšoarelang. Jehova le Jesu ba nka taba ea ho tšoarela ba bang ka ho teba. (Mat. 6:14, 15) Na u lokela ho ithuta ho ba ea tšoarelang kapa hona ho laola maikutlo a hao? Batho ba hlolehang ho laola maikutlo ba atisa ho hlonama. ’Me seo se ka ’na sa etsa hore ba bang ba se rate ho ba haufi le bona. Motho ea hlonameng a ka sulafalletsa ba bang ka phuthehong.—Lev. 19:17, 18. w16.11 3:4-6

Mor’abo rona Charles Taze Russell le bo-mphato ba hae ba ile ba qala ho ithuta Bibele ka tsela e hlophisitsoeng ho elella lilemong tsa bo-1900. Qalong, sepheo sa Mor’abo rona Russell e ne e le ho hlahloba hore na ke bolumeli bofe bo rutang ’nete. O ile a bapisa ka hloko seo Bibele e se rutang le lithuto tsa malumeli a mangata, esita le ao e seng a Bokreste. Ha nako e ntse e ea, o ile a hlokomela hore ha ho le bo bong ba malumeli ao a latelang se ka Lentsoeng la Molimo. O ile a buisana le baruti ba ’maloa a nahana hore ba tla amohela linnete tseo eena le bo-mphato ba hae ba li sibolotseng ka Bibeleng ’me a tšepa hore ba tla li ruta litho tsa bona tsa kereke. Empa baruti ha baa ka ba mo nkela hloohong. Kahoo, Liithuti Tsa Bibele li ile tsa tlameha ho amohela ’nete ena: Li ke ke tsa ikamahanya le ba ikemiselitseng ho khomarela bolumeli ba bohata. w16.11 4:14

Kaha re ananela mosa oa Molimo o sa tšoanelang, ha re na ho qoba feela bofebe, botahoa le libe tse ling tse kang tseo Bakorinthe ba neng ba li etsa. (1 Bakor. 6:9-11) Re lokela ho qoba le boitšoaro bo bobe ba ho kopanela liphate hammoho le boithabiso bo litšila. Haeba re hlahisa litho tsa rona e le makhoba a ho loka, re tla susumelletseha hore re se ke ra tahoa kapa hona ho noa haholo. Re ka ’na ra lokela ho loantša mekhoa eo e fosahetseng ka matla; leha ho le joalo re ka hlola ntoeng eo. Re lokela ho ikemisetsa ho qoba libe tse tebileng esita le ho etsa liphoso tse poteletseng. Re ke ke ra khona ho etsa seo ka ho feletseng. Leha ho le joalo, re lokela ho ikemisetsa ho li qoba, feela joalokaha Pauluse a entse. O ile a re ho barab’abo: “Le se ke la tlohela sebe hore se tsoele pele se busa e le morena ’meleng ea lōna e shoang e le hore le ka mamela litakatso tsa eona.”—Bar. 6:12; 7:18-20. w16.12 1:16, 19-21

Jesu o ile a re tšepisa hore Ntate oa rona ea leholimong o fana ka moea oa hae o halalelang ho ba o kopang. (Luka 11:10-13) Litholoana tsa moea kapa makhabane ana a hlahisoang ke moea o halalelang a bontša hore na Molimo o joang. (Bakol. 3:10) Ha u ntse u sebetsa ka thata ho ba le litholoana tsena tsa moea, kamano ea hao le batho ba bang e tla ntlafala. Kahoo, u tla hlokomela hore lintho tse ngata tse neng li etsa hore u tšoenyehe ha li sa u khathatsa. Ho hlokahala hore u ikokobetse tlas’a “letsoho le matla la Molimo” ’me u ‘lahlele matšoenyeho ’ohle a hao ho eena.’ (1 Pet. 5:6, 7) Ha u ntse u sebetsa ka thata ho ba le boikokobetso, Molimo o tla u rata le ho feta a be a u tšehetse. (Mik. 6:8) Haeba u na le boikutlo bo nepahetseng ka lintho tseo u khonang ho li etsa, u tla qoba ho tšoenyeha haholo ka lintho tse ling kaha u tla be u tšepile Molimo ka ho feletseng. w16.12 3:7, 12

Kaha e ne e le “’moleli oa ho loka,” ka botšepehi Noe o ile a phatlalatsa molaetsa oa temoso oo a neng a o filoe. Ha ho pelaelo hore seo se ile sa thusa Noe hore a lule a e-na le tumelo e matla. Ha aa ka a sebelisa matla a hae feela ho etsa mosebetsi oa boboleli empa o ile a boela a a sebelisa ho phetha kabelo eo Molimo a neng a mo file eona ea ho haha areka. (Baheb. 11:7) Joaloka Noe, re ikitlaelletsa ho ba le ‘ho hongata hoo re ka ho etsang mosebetsing oa Morena.’ (1 Bakor. 15:58) Mosebetsi oo o ka akarelletsa ho haha le ho hlokomela libaka tsa borapeli, ho ithaopela ho thusa likopanong, ho sebeletsa Bethele kapa ofising ea phetolelo. Ka holim’a tsohle, re lula re phathahane ka mosebetsi oa boboleli hobane o matlafatsa tšepo ea rona ka bokamoso. Ho etsa mosebetsi ona ho re thusa hore re se ke ra tela peisong ea bophelo.—1 Bakor. 9:24. w17.01 1:8, 9

Moeli o mong oo re o behetsoeng, ke hore re hlomphe tokelo eo ba bang ba nang le eona ea ho iketsetsa liqeto. Hobane’ng? Kaha kaofela re na le bolokolohi ba ho ikhethela, re ke ke ra lebella hore Bakreste ba babeli ba etse qeto e tšoanang. Se na se ka etsahala esita le litabeng tse amang boitšoaro ba rona le borapeli. Ha re hopola hore Mokreste “e mong le e mong o tla jara mojaro oa hae,” re tla hlompha tokelo eo ba bang ba nang le eona ea ho iketsetsa liqeto leha ba etsa liqeto linthong tseo eseng tsa bohlokoa. (1 Bakor. 10:32, 33) Jehova o re file bolokolohi ba ho ikhethela, e leng se etsang hore re lokolohe e le kannete. (2 Bakor. 3:17) Re ananela mpho ena, hobane e re lumella ho etsa liqeto tse bontšang hore na re rata Jehova hakae. E se eka re ka tsoela pele ho e ananela ka hore re e sebelise ka tsela e tlotlisang Molimo le ka ho hlompha tokelo eo ba bang ba nang le eona ea ho iketsetsa liqeto. w17.01 2:15, 17, 18

Ha re leke ho khahla ba bang ka ho ithorisa kapa ho etsa lintho tse tla re bitsetsa mahlo a batho ho sa hlokahale, empa kamehla re bonahatsa “moea o thotseng le o bonolo.” (1 Pet. 3:3, 4; Jer. 9:23, 24) Liketso tsa rona li tla senola se ka lipelong tsa rona. Ka mohlala, lintho tseo re li etsang li ka ’na tsa bontša hore re inkela holimo ka lebaka la litokelo tseo re nang le tsona kapa tsa metsoalle ea rona, esita le ka lebaka la tsebo eo re nang le eona. Kapa mohlomong re ka ’na ra etsa eka re finyelletse ho itseng ka bo rona, esita leha re thusitsoe ke ba bang. Jesu o re behetse mohlala o motle haholo. O ne a qotsa Lentsoe la Molimo khafetsa ha a ruta. O ile a etsa sena e le hore a se ke a iphumanela thoriso, empa hore batho ba tsebe hore Jehova e ne e le eena mohloli oa lithuto tseo, ka lebaka leo ba rorise Molimo. w17.01 4:12

Ho ne ho se thata ho Adama le Eva ho utloisisa molao ona le ho o mamela. Ho feta moo, ba ne ba e-na le lijo tse ngata tseo ba neng ba ka li ja. Satane Diabolose o ile a sebelisa noha ho thetsa Eva hore a se ke a mamela Ntate oa hae Jehova. (Gen. 3:1-5; Tšen. 12:9) Satane o ile fetola mantsoe a Molimo a fana ka maikutlo a hore ba ne ba sa lokela ho ja litholoana tsa “sefate se seng le se seng se serapeng.” Ho joalokaha eka o ne a re: ‘Na u bolela hore ha le khone ho etsa seo le se batlang?’ Ka mor’a moo, o ile a bua leshano le letala, a re: “Ka sebele le ke ke la shoa.” O ile a leka ho kholisa Eva hore o ne a sa hloke ho mamela Molimo, ha a re: “Molimo oa tseba hore letsatsing leo ka lona le jang tsa sona mahlo a lōna a tla tutuboloha.” Satane o ile a re Jehova ha a batle ha ba e-ja tholoana ea sefate seo hobane a tseba hore ba tla hlalefa. Ho feta moo, Satane o ile a etsa tšepiso ena ea bohata: “Le tla ba joaloka Molimo, le tsebe botle le bobe.” w17.02 1:8, 9

Esaia o ile a bolela esale pele hore Enoa e ne e tla ba “moeta-pele le molaoli.” (Esa. 55:4) Daniele o ile a ngola ka ho tla ha “Mesia Moeta-pele.” (Dan. 9:25) Qetellong Jesu o ile a itsebahatsa e le “Moeta-pele” oa batho ba Molimo. (Mat. 23:10) Barutuoa ba Jesu ba ile ba mo latela ’me ba ne ba kholisehile hore ke ea khethiloeng ke Jehova. (Joh. 6:68, 69) Ba kholisitsoe ke’ng? Ha Jesu a kolobetsoa, Johanne Mokolobetsi o ile a bona “maholimo a ntse a aroha, ’me moea o theohela holim’a hae joaloka leeba.” (Mar. 1:10-12) Ha Jesu a le lefatšeng, moea o halalelang o ile oa etsa hore a rute le ho etsa mehlolo. (Lik. 10:38) Ho ekeletsa moo, moea o halalelang o ile oa etsa hore Jesu a bontše lerato, thabo le tumelo e matla. (Joh. 15:9; Baheb. 12:2) Ha ho na moeta-pele e mong ea ileng a bontša hore o na le moea o halalelang joaloka Jesu. Jesu o ne khethiloe ke Jehova. w17.02 3:15, 16

Ka Pentekonta ea selemo sa 33, baapostola ba ile ba qala ho etella pele phutheho ea Bokreste. Ketsahalong eo, “Petrose a ema le ba leshome le motso o mong” ’me a bua le letšoele le leholo le akarelletsang Bajuda le basokolohi ka Lentsoe la Molimo. (Lik. 2:14, 15) Ba bangata ba bona e ile ea e-ba balumeli. Ka mor’a moo, Bakreste bana ba neng ba sa tsoa sokoloha ba ile “ba tsoela pele ho inehela thutong ea baapostola.” (Lik. 2:42) Baapostola ba ne ba hlokomela chelete ea phutheho. (Lik. 4:34, 35) Ba ne ba thusa batho ba Molimo hore ba be le kamano e ntle le eena ’me ba ile ba re: “Rōna re tla inehela thapelong le bosebeletsing ba lentsoe.” (Lik. 6:4) Ba ile ba re Bakreste ba nang le boiphihlelo ba il’o bolela litaba tse molemo libakeng tse ling. (Lik. 8:14, 15) Ha nako e ntse e ea, baholo ba bang ba tlotsitsoeng ba ile ba thusa baapostola ho etella phutheho pele. Kaha e ne e le sehlopha se busang, ba ne ba fana ka tataiso liphuthehong tsohle.—Lik. 15:2. w17.02 4:4

Batho ba bangata ba sa phethahalang ba khelosoa ke lefatše la Satane. Ke kahoo ba tloaetseng ho rapela banna le basali ba itseng ho e-na le hore ba bafe tlhompho e ba loketseng feela. Ba hlompha baeta-pele ba bolumeli le ba lipolotiki, likhalala tsa lipapali le tsa boithabiso le batho ba bang ba hlaheletseng ka mahetla ’me ba ba nkela holimo ka tsela e feteletseng. Ke kahoo bana le batho ba baholo ba latelang mohlala oa bona, ka ho etsisa mekhoa, moaparo le boitšoaro ba bona. Bakreste ba ’nete ha ba hlomphe batho ka tsela e joalo e fosahetseng. Re nka Kreste e le eena motho a kileng a phela eo re ka latelang mohlala oa hae. (1 Pet. 2:21) Jehova a ke ke a thaba haeba re fa batho tlhompho e feteletseng. Re lokela ho hopola ’nete ena ea Bibele e reng: “Etsoe bohle ba entse sebe ’me ba haelloa ke khanya ea Molimo.” (Bar. 3:23) Kahoo ha ho na motho ea lokelang ho hlomphuoa joalokaha eka ke Molimo. w17.03 1:6-8

E mong le e mong oa rona a ka khona ho itlhahloba hore na o inehetse ho Molimo ka pelo eohle kapa che. Ipotse, ‘Am Na ke ikemiselitse ho thabisa Jehova, ho emela borapeli ba ’nete le ho se silafatse phutheho ea Molimo?’ Mohlala, u ka etsang ha motho ea haufi le uena a lokela ho khaoloa? Na u tla tlohela ho buisana le eena? Kapa u tla etsa’ng? Kahoo, joaloka Asa u ka bontša hore pelo ea hao e feletse ho Molimo ka ho mo tšepa ha u le tlas’a maemo a thata. U ka ’na oa tšoaroa hampe sekolong ka lebaka la hore u e mong oa Lipaki Tsa Jehova. Kapa mohlomong basebetsi-’moho le uena ba ka ’na ba u nka u le sephoqo ka ho nka matsatsi mosebetsing, hobane u batla ho ea kopanong leha u sa sebetse ka linako tseo e seng tsa mosebetsi molemong oa chelete. Maemong a joalo, etsisa Asa ka hore u kope thuso ho Molimo. (2 Likron. 14:11) Emela se nepahetseng. Kholiseha hore Molimo o tla u matlafatsa joalokaha a ile a matlafatsa Asa. w17.03 3:6-8

Lentsoe la Molimo le re eletsa hore re se ke ra potlakela ho etsa liqeto. Ha re ipha nako ea ho sheba lintho ka hloko pele re etsa liqeto, re tla etsa liqeto ka bohlale. (1 Bathes. 5:21) Bo-ntate e leng lihlooho tsa malapa, ba lokela ho ipha nako ea ho etsa lipatlisiso ka har’a lingoliloeng tse thehiloeng Bibeleng le ho utloa maikutlo a ba bang ka lapeng ha ba etsa liqeto. Hopola hore Molimo o ile a re Abrahama a mamele mosali oa hae. (Gen. 21:9-12) Baholo le bona ba lokela ho ipha nako ea ho etsa lipatlisiso. Haeba ba ikokobelitse ba ke ke ba tšoha hore Bakreste-’moho le bona ba ke ke ba ba hlompha haeba ho hlaha taba e ncha e etsang hore ba fetole qeto eo ba e entseng. Ba lokela ho fetola liqeto tsa bona ha ho hlokahala. Le rona re lokela ho etsa joalo. Se na se tla etsa hore ka phuthehong ho be le khotso.—Lik. 6:1-4. w17.03 2:16