April

Re ka rua molemo joang mosebetsing oo ba o etsang? Re ka ba le tumelo e tšoanang le ea bona ’me ra ba etsisa. Re ka boela ra amohela tataiso eo ba re fang eona. (Baheb. 13:7, 17.) Hopola hore baholo baa re rata ebile ba batla hore re be le kamano e ntle le Jehova. Mohlala, haeba ba lemoha hore re se re sa ee libokeng kamehla kapa hore ha re sa thahasella ho sebeletsa Jehova joaloka pele, ba tla leka ho re thusa ka potlako. Ba re mamele ka hloko ba boele ba re thuse hore re thabele ho sebeletsa Jehova, ebile ba tla re fa tataiso e thehiloeng Bibeleng. Na oa hlokomela hore ha baholo ba u thusa eo ke pontšo ea hore Jehova oa u rata? Hopola hore ka linako tse ling baholo ba ka thatafalloa ke ho re eletsa. U ka etsa’ng hore baholo ba nolofalloe ke ho u eletsa? U lokela ho ikokobetsa, u lebohe ’me u etse hore ho be bonolo hore ba u atamele. Utloisisa hore ha ba u eletsa, eo ke pontšo ea hore Jehova oa u rata. U tla rua molemo ’me baholo ba tla thabela ho phetha mosebetsi oa bona. w18.03 31 ¶15-16

Bana baa fapana. Ba bang ba utloisisa Bibele, ba etsa liqeto tse nepahetseng ebe ba batla ho kolobetsoa ba sa le banyenyane. Ba bang bona ba kolobetsoa ba se ba le baholo. Kahoo, batsoali ha baa lokela ho qobella bana ho kolobetsoa. Ho e-na le hoo, ba lokela ho ba thusa hore setsoalle sa bona le Jehova se tiee le haeba ho bonahala ho ka ba nka nako e telele. Batsoali baa thaba ha bana ba bona ba mamela keletso e hlahang temaneng ea letsatsi ea kajeno. Ba lokela ho lula ba hopola hore sepheo sa bona ke ho thusa bana hore e be Bakreste. Batsoali ba lokela ho ipotsa: ‘Na ngoan’aka o na le tsebo e lekaneng hore a inehele ho Jehova ’me a kolobetsoe?’ w18.03 9 ¶6

Haeba re tšepisa motho hore re tla ba teng ha a re memme, ha rea lokela ho fetoha ho sa hlokahale. Mohlomong motho ea re memmeng o se a lokiselitse ho re amohela. Haeba re se re sa tle, boiteko ba hae e ba ba lefeela. (Mat. 5:37) Ka linako tse ling batho ba bang ba tlohela ho ea ha motho e mong hobane ba batla ho ea ha e mong ea molemonyana. Haeba re etsa joalo, na rea ba rata le ho ba hlompha? Re lokela ho ananela lintho tsohle tseo batho ba re memmeng ba re etsetsang tsona. (Luka 10:7) Re lokela ho ba tsebisa hang-hang haeba maemo a se a sa re lumelle ho ea. Ha re etsa joalo, re tla be re bontša hore rea ba rata ebile rea ba ananela. Re boetse re lokela ho hlompha setso sa batho ba bang. Litsong tse ling baeti ba fihlang ba sa lebelloa, ba amohelehile. Litsong tse ling, ho tloaelehile hore batho ba hane ha ba mengoa ka lekhetlo la pele kapa a mabeli a qalang. Ho tse ling, ho etsa joalo ke ho se ananele. Re lokela ho etsa hore motho ea re memmeng a thabele hore ebe o ile a re mema. w18.03 18 ¶20-21

Ho tseba Bibele ha ho bolele hore re se re e-na le kamano e ntle le Jehova. (1 Mar. 4:29, 30; 11:4-6) Joale ntle le ho tseba Bibele, re lokela ho etsa’ng hape? Re lokela ho lula re matlafatsa tumelo ea rona. (Bakol. 2:6, 7) Ntho e ’ngoe ea bohlokoa eo re ka e etsang ke ho ithuta buka ea “Le Ipoloke Leratong la Molimo.” Ha re ithuta buka eo, re tla utloisisa melao-motheo ea Bibele ’me re e sebelise bophelong ba rona. Haeba re se re ithutile eona, re ka boela ra bala lingoliloeng tse ling tse ka re thusang hore re matlafatse tumelo ea rona. (Bakol. 1:23) Re boetse re lokela ho nahanisisa ka lintho tseo re ithutileng tsona ’me re kope Jehova hore a re thuse ho li sebelisa. Ha re ithuta Lentsoe la Molimo re bile re nahanisisa ka lintho tseo re ithutileng tsona, re lokela ho etsa joalo ka sepheo sa hore re khahlise Jehova ’me re mamele melao ea hae. (Pes. 40:8; 119:97) Re boetse re lokela ho sebetsa ka thata ho tlohela lintho tse tla re sitisa ho matlafatsa setsoalle sa rona le Jehova.—Tite 2:11, 12. w18.02 24-25 ¶7-9

E le hore re be le tumelo e kang ea Noe, ho bohlokoa ho ithuta Lentsoe la Molimo, ho rata lintho tseo re ithutang tsona le ho li sebelisa e le hore re etse liqeto tse nepahetseng. (1 Pet. 1:13-15) Kahoo, ha re e-na le tumelo ’me re kopa hore Jehova a re fe bohlale, re tla khona ho hlola maqiti a Satane le a batho ba hae. (2 Bakor. 2:11) Batho ba bangata ba rata liketso tse mabifi le boitšoaro bo bobe. Ba laoloa ke litakatso tsa bona tse fosahetseng. (1 Joh. 2:15, 16) Ba iphapanyetsa ’nete ea hore bofelo bo haufi. Hopola hore Jesu o ile a bapisa nako ena le nako ea mehleng ea Noe, empa o ne a sa ameha ka boitšoaro ba batho ba mehleng eo. Ho e-na le hoo, o ne a amehile ka kotsi ea lintho tse ka re sitisang ho sebeletsa Jehova. (Mat. 24:36-39) Ipotse: ‘Na tsela eo ke phelang ka eona e bontša hore ke tseba Jehova e le kannete? Na tumelo ea ka e ntšusumelletsa ho etsa lintho tumellanong le thato ea Jehova le ho bolella ba bang ka ’Muso oa Hae?’ Likarabo tsa lipotso tsena li tla u thusa ho hlokomela hore na u “tsamaea le Molimo oa ’nete” kapa che.—Gen. 6:9. w18.02 9-10 ¶8-10

Re ke ke ra khona ho ba qoba ka ho felletseng hobane re kena sekolo le bona, re sebetsa le bona kapa re lula le bona. Empa ha rea lokela ho nahana joaloka bona kapa ra etsa lintho joaloka bona. Re ka thusoa ke’ng? Re ka matlafatsa kamano ea rona le Jehova ka hore re ithute Bibele ’me re khethe metsoalle e mo ratang. Re boetse re lokela ho thusa batho hore ba tsebe Jehova. Re lokela ho batla menyetla ea ho bua le bona ka Bibele ’me re kope Jehova hore a re thuse ho bua lintho tse nepahetseng ka nako e nepahetseng. Re tsebise batho hore re Lipaki Tsa Jehova. Ha re etsa joalo, ka lebaka la boitšoaro ba rona bo botle, batho ba rorisa lebitso la Jehova, eseng la rona. Jehova “o re rupella ho hana ho hloka bomolimo le litakatso tsa lefatše le ho phela ka ho hlaphoheloa kelellong le ho loka le boinehelo ba bomolimo har’a tsamaiso ena ea hona joale ea lintho.” (Tite 2:11-14) Haeba re etsisa Jehova ’me re etsa lintho tseo a batlang hore re li etse, batho ba bang ba tla hlokomela ebe ba re: “Re tla tsamaea le lōna, etsoe re utloile hore Molimo o na le lōna.”​—Zak. 8:23. w18.01 31 ¶17-18

Na ke phoso ho ithata? Che. Ka tlhaho rea ithata ebile re lokela ho ithata. Ke tsela eo Jehova a re bopileng ka eona. Jesu o ile a re: “U rate moahelani oa hao joalokaha u ithata.” (Mar. 12:31) Ha e le hantle, re ke ke ra rata batho ba bang haeba re sa ithate. Bibele e boetse e re: “Banna ba tšoanela ho rata basali ba bona joaloka ’mele ea bona. Ea ratang mosali oa hae oa ithata, kaha ha ho motho ea kileng a hloea nama ea hae; empa oa e fepa le ho e baballa.” (Baef. 5:28, 29) Kahoo, le rona re lokela ho ithata. Ha rea lokela ho ithata joaloka batho ba hlalosoang ho 2 Timothea 3:2 hobane eo ha se tsela eo Molimo a re bopileng ka eona. Ha re etsa joalo, re tla be re le baithati. Motho ea ithatang ho feta tekano, o inahana ho tlola. (Bar. 12:3) O ameha ka eena feela eseng batho ba bang. Ha lintho li sa tsamaee hantle, o beha batho ba bang molato. Leha ho le joalo, baithati ba lula ba sa thaba. w18.01 4:4, 5

Re mamela Jehova ka ho ithuta Bibele ’me re bua le eena ka ho rapela. Ha rea lokela ho rapela hore feela re phethe molao, kapa hona ho nka thapelo e le ntho e tla re ekeletsa mahlohonolo e le hore re atlehe nthong e itseng. Re bua le Jehova ha re rapela, ebile o ikemiselitse ho re mamela. (Bafil. 4:6.) Bibele e re ha re hlaheloa ke mathata re lokela ho ‘lahlela meroalo ea rona ho Jehova.’ (Pes. 55:22) Ho na le bara le baralib’abo rona ba bangata ba thusitsoeng ke keletso ena. Le uena e ka u thusa. Ha rea lokela ho rapela Jehova ha re hloka thuso ea hae feela. Leha ho le joalo, ka linako tse ling re ka nahana haholo ka mathata a rona hoo re ka lebalang lintho tse ngata tse ntle tseo Jehova a re etselitseng tsona. Kahoo, letsatsi le letsatsi, leka ho nahana ka lintho tse ka bang tharo tseo Jehova a u etselitseng tsona, ebe u leboha Jehova ka tsona. w17.12 25-26 ¶10-11

Batho ba likete ba ithuta Bibele ebe ka mor’a moo ba inehela ho Jehova ’me baa kolobetsoa. Boholo ba bona ke bana ba holisitsoeng ke batsoali bao e leng Lipaki Tsa Jehova ’me le bona ba ikhethela ho sebeletsa Jehova. (Pes. 1:1-3) Haeba u Paki ea Jehova e nang le bana, mohlomong le uena u labalabela ho bona ka letsatsi le leng ngoana oa hao a kolobetsoa. (Bapisa le 3 Johanne 4.) Kaha le uena u Mokreste, u batla hore ngoana oa hao a tsebe lingoliloeng tse halalelang, e leng Mangolo a Seheberu le Mangolo a Segerike a Bakreste. Esita le bana ba banyenyane ba ka khona ho ithuta ka batho le liketsahalo tse hlahang ka Bibeleng. Mokhatlo oa Jehova o entse libuka, libukana le livideo tse ngata tseo batsoali ba ka li sebelisang ho ruta bana ba bona. Ngoana oa hao o lokela ho tseba Bibele e le hore a be le kamano e matla le Jehova. w17.12 18 ¶1; 19 ¶4

Haeba u ’mè, u lokela ho etsa’ng ha u bona eka mohats’a hao eo e seng Paki o u tšoara hampe? Na u lokela ho pheha khang le eena hobane a u tšoara hampe? Le haeba u ka atleha ho etsa hore a itšoare ka tsela eo u e batlang, na ho etsa joalo ho tla etsa hore e be Paki? Che. Empa haeba u mo hlompha, u tla be u rorisa Jehova. U ka etsa hore ho be le khotso ka lapeng, ’me mohlomong a ka qetella e se e le Paki ea Jehova. Kahoo, bobeli ba lona le tla fumana moputso. (1 Pet. 3:1, 2) Haeba u ntate, u lokela ho etsa’ng ha u bona eka mohats’a hao eo e seng Paki ha a u hlomphe? Na u lokela ho mo halefela, u mo bolelle hore a u hlomphe hobane u hlooho ea hae? Che. Molimo o lebeletse hore u etsise Jesu ’me u rate molekane oa hao. Jesu o rata Bakreste ka phuthehong ’me ha a ba felle pelo. (Luka 9:46-48) Kahoo, haeba u ka etsisa mohlala oa Jesu, u ka etsa hore molekane oa hao a qetelle e se e le Paki ea Jehova. w17.11 28-29 ¶13-14

Batho bao e seng barapeli ba Jehova ba iphapanyetsa melao ea hae ’me ha re sa hlokomele ba ka thefula tumelo ea rona. Kajeno, re pota-potiloe ke batho bao e seng barapeli ba Jehova. E ka ba batho ba hlahang thelevisheneng kapa Inthaneteng, bao re sebetsang le bona kapa bao re kenang sekolo le bona. Linaheng tse ngata batho ha ba lumele ho Molimo hobane ba re ha ba na bolumeli. Ha e le hantle, ha se hore ba ithutile hore Molimo ha a eo, empa ba batla ho ba le bolokolohi ba ho etsa lintho tsohle tseo ba li batlang. (Pes. 10:4) Batho ba bang ba inka ba le bohlale ha ba re: ‘Nka phela hamonate leha ke sa lumele ho Molimo.’ Na ke taba e utloahalang ho lumela hore Molimo ha a eo? Batho ba bang ba ithuta saense e le ho utloisisa hore na ehlile Molimo o bopile lintho. Leha ho le joalo, ba ferekana le ho feta. Empa karabo e bonolo. Kaha ha ho na ntlo e ka bang teng haeba ho se na motho ea e hahang, lintho tse phelang tseo re li bonang, li bopiloe ke Molimo. w17.11 20-21 ¶2-4

Nahana ka bohlokoa ba ho ba teng Sehopotsong. Hopola hore ho ba teng libokeng ke karolo ea borapeli ba rona. Jehova le Jesu baa hlokomela ha re etsa boiteko ba ho ba teng sebokeng sena sa bohlokoa ka ho fetisisa. Re lokela ho ba bontša hore re tla etsa sohle se matleng a rona ho ba teng Sehopotsong ntle le haeba re kula kapa maemo a sa re lumelle ho ba teng. Haeba re etsa boiteko ba ho ba teng libokeng, Jehova o tla ngola mabitso a rona ka har’a “buka ea khopotso,” e leng ‘buka ea bophelo’ e nang le mabitso a batho ba tla fumana bophelo bo sa feleng. (Tšen. 20:15) Matsatsi pele ho Sehopotso, re lokela ho ipha nako ea ho rapela le ho hlahloba kamano ea rona le Jehova.​—2 Bakor. 13:5. w18.01 13 ¶4-5

’Molai o ne a sireletsehile ha a le motseng oa setšabelo. Ha Jehova a bua ka metse eo o ile a re: “E tla ba setšabelo . . . bakeng sa lōna.” (Josh. 20:2, 3) Jehova o ne a sa lumelle hore ’molai a qosoe hape. Mopheteletsi oa mali le eena o ne a sa lumelloa ho bolaea ’molai ha a se a le motseng oo. Kahoo, o ne a sa lokela ho tšoha letho kaha Jehova o ne a mo sirelelitse. Motse oo e ne e se teronko hobane ’molai o ne a ka sebetsa ka bolokolohi, a thuse batho ba bang ’me a sebeletse Jehova a thabile. O ne a e-na le monyetla oa ho phela ka khotso. Bakreste ba bang ba lula ba ikutloa ba le molato leha ba bakile. Ba bang ba bile ba nahana hore Jehova a ke ke a ba tšoarela le ho ba leballa. Haeba le uena u ikutloa ka tsela eo, u lokela ho kholiseha hore Jehova o re tšoarela ka ho felletseng. w17.11 9 ¶6; 11 ¶13-14

Tsela e ’ngoe eo ka eona re ka etsang hore phutheho e lule e momahane ke ka ho nahanisisa ka bohlokoa ba veine le bohobe tse sebelisoang Sehopotsong. Re lokela ho nahanisisa ka tsona pele ho Sehopotso esita le bosiung boo se tšoaroang ka bona. (1 Bakor. 11:23-25) Bohobe bo sa lomosoang bo emela ’mele oa Jesu o se nang sebe. Veine e emela mali a hae. Re lokela ho hopola hore ha Jesu a fana ka bophelo ba hae e le sehlabelo, e ne e le pontšo ea hore Jehova le Jesu baa re rata. Jehova o re file Mora oa hae ’me Jesu le eena o fane ka bophelo ba hae molemong oa rona. Ha re nahana kamoo ba re ratang kateng, le rona re tla ba rata. Kahoo, kaha kaofela re rata Jehova, lerato leo le tla etsa hore re lule re momahane. w18.01 14 ¶11

Jehova o re rata haholo ebile o nka re le bohlokoa. O ile a tela bophelo ba Mora oa hae e le hore re pholohe. (Joh. 3:16) Hoja Jehova o ile a hloleha ho phethahatsa litšepiso tsa hae, Satane a ka be a ile a itšoarella ka taba eo ebe o re Jehova ke ’musi ea khopo ebile ke raleshano ea hanelang batho ka lintho tse molemo. E ne e tla boela e tšehetse taba ea bahanyetsi ba Molimo ba reng: “Ho kae ho ba teng hoo ho tšepisitsoeng ha hae? Ka sebele, ho tloha letsatsing la ha baholo-holo ba rōna ba robala lefung, lintho tsohle li tsoela pele hantle feela joaloka ho tloha tšimolohong ea pōpo.” (2 Pet. 3:3, 4) Kahoo, ha Jehova a tlosa qoso bobusing ba hae, o tla netefatsa hore o pholosa batho ba mo mamelang. (Esa. 55:10, 11) Hape, o busa batho hobane a ba rata. Kahoo, re kholisehile hore o tla lula a rata bahlanka ba hae, a ba ananela a bile a nka ba le bohlokoa.—Ex. 34:6. w17.06 23 ¶7

Ho tloha nakong eo Jehova a neng a etsa tšepiso e hlahang ho Genese 3:15, ho eena ho ne ho tšoana leha eka morero oo oa hae o se o phethahetse. Lilemo tse 4 000 hamorao Jehova o ile a fana ka Mora oa hae ea tsoetsoeng a ’notši. (Joh. 3:16) Ruri re ananela lerato leo Jehova a re bontšitseng lona. Kaha Jehova o re bopile ka setšoantšo sa hae, re khona ho rata batho ba bang. Abele o ile a bontša hore o rata Jehova ka hore a mo fe se molemo ka ho fetisisa seo a nang le sona. (Gen. 4:3, 4) Noe o ile a bontša hore o rata batho ka hore a ’ne a ba lemose le hoja ba ne ba sa mo mamele. (2 Pet. 2:5) Abrahama eena o ile a bontša hore o rata Molimo ho feta ntho leha e le efe ka hore ebe o ne a ikemiselitse ho etsa sehlabelo ka mor’a hae Isaka. (Jak. 2:21) Re lokela ho etsisa banna bao ba tšepahalang ka hore re rate Jehova ’me re rate batho leha ho se bonolo ho etsa joalo. w17.10 7-8 ¶3-4

Mesebetsi ea Moprista oa rona ea Phahameng, Jesu Kreste e etsa hore re kholisehe hore libe tsa rona li tla tšoareloa le hore “re ka fumana mohau le ho fumana mosa o sa tšoanelang bakeng sa thuso ka nako e nepahetseng.” (Baheb. 4:16) Kahoo, re lokela ho ba le tumelo sehlabelong sa Jesu e le hore Jehova e be setšabelo sa rona. Empa u be le tumelo ea hore le uena o u shoetse. (Bagal. 2:20, 21) E-ba le tumelo ea hore ka lebaka la sehlabelo sa Jesu, Jehova o tla tšoarela libe tsa hao. U lokela ho ba le tumelo ea hore sehlabelo sa Jesu se u bulela monyetla oa ho phela ka ho sa feleng. Ke mpho eo Jehova a u fileng eona. Hape, ha Jehova a re tšoaretse ha rea lokela ho lula re tšohile hore o ntse a batla mabaka a ho hopola libe tsa rona kapa hore o tla re ahlola ka lebaka la tsona. (Pes. 103:8-12) Kahoo, re ka kholiseha hore Jehova o tla re tšoarela. w17.11 11-12 ¶14-17

Bosiung ba pele ba Lijo Tsa Shoalane Tsa Morena, Jesu o ile a rapella hore balateli ba hae ba momahane joalokaha eena le Ntate oa hae ba momahane. Kaha Jehova o ile a fela a araba thapelo eo ea Mora oa hae, batho ba limilione baa lumela hore Jesu o ne a ronngoe ke Eena. Sehopotso ke sona se bontšang hore Lipaki Tsa Jehova li momahane. Libakeng tse ling, le hoja batho e le ba bolumeli bo le bong, ha ba kopane ’moho ka lebaka la khethollo ea morabe. Empa Jehova le Jesu ba rata ha batho ba merabe e fapaneng ba momahana. Ha re makale ha re bona bahlanka ba Jehova ba momahane. Jehova o ile a bua ka taba ena esale pele.​—Ezek. 37:15-17; Zak. 8:23. w18.01 14 ¶7-9

Baeta-pele ba Bajuda e leng “lihahi,” ba ne ba sa lumele hore Jesu ke eena Mesia. Bajuda ba bangata ba ne ba mo hloile hoo ba neng ba batla hore a bolaoe. (Luka 23:18-23) Ba ile ba kenya letsoho hore Jesu a bolaoe. Jesu e ne e tla ba “hlooho ea sekhutlo” joang empa Bajuda ba ile ba mo bolaea? Ka hore a tsosoe bafung. Moapostola Petrose o ile a bua ka “Jesu Kreste Monazaretha, eo le ileng la mo khokhothela thupeng empa eo Molimo a ileng a mo tsosa bafung.” (Lik. 3:15; 4:5-11; 1 Pet. 2:5-7). Kahoo, e ile ea e-ba eena feela eo lebitso la hae “ho fanoeng ka lona har’a batho leo ka sebele re tla pholoha ka lona.”—Lik. 4:12; Baef. 1:20. w17.12 9-10 ¶6-9

Ha Jesu a bua ka matšoenyeho a maholo, o ile a re: “Le tla bona Mor’a motho a tla ka maru a leholimo ka matla le khanya e khōlō. O tla romela mangeloi a hae ka molumo o moholo oa terompeta, ’me a tla bokella bakhethoa ba hae.” (Mat. 24:29-31) Jesu o tla “bokella bakhethoa ba hae” ha a nka batlotsuoa bohle ba setseng lefatšeng a ba isa leholimong. O tla etsa joalo ka mor’a hore matšoenyeho a maholo a qale empa e tla ba pele ho ntoa ea Armagedone. Ntoeng eo, Jesu le ba 144 000 ba tla loantša marena a lefatše ’me ba a hlole. (Tšen. 17:12-14) Sehopotso seo re tla ba teng ho sona pele Jesu a tla ho tla bokella batlotsuoa, e tla ba sa ho qetela. w18.01 16 ¶15

Kaha o leholimong, Jesu o phela “ka ho sa feleng le kamehla.” (Tšen. 1:5, 18; Bar. 6:9; Bakol. 1:18; 1 Pet. 3:18) Jesu o ile a bolella baapostola ba hae ba tšepahalang hore ba tla busa le eena leholimong. (Luka 22:28-30) Pauluse o ile a re “Kreste o tsositsoe bafung, litholoana tsa pele ho ba robetseng lefung.” Ka lebaka leo, o ile a re ho tla ba le ba bang ba tla tsosetsoa leholimong, a re: “E mong le e mong boemong ba hae: Kreste ke litholoana tsa pele, ka mor’a moo bao e leng ba Kreste nakong ea ho ba teng ha hae.” (1 Bakor. 15:20, 23) Lipaki Tsa Jehova li ile tsa hlokomela hore ho latela Bibele, nako ea ho ba teng ha Jesu e qalile ka 1914 le hore bofelo bo haufi. w17.12 10 ¶11; 11 ¶14-16

Jehova Ntate oa rona ea re ratang le eena o ile a hlokahalloa ke batho bao a ba ratang, ba akhang Abrahama, Isaka, Jakobo, Moshe le Morena Davida. (Num. 12:6-8; Mat. 22:31, 32; Lik. 13:22) Lentsoe la hae le re o labalabela ho ba tsosa kaofela. (Jobo 14:14, 15) Ba tla lula ba thabile ba bile ba phetse hantle. Hopola hore Mora oa Jehova “eo a neng a mo rata ka ho khethehileng” o ile a shoa lefu le bohloko. (Liprov. 8:22, 30) Bohloko boo Jehova a ileng a bo utloa ha bo hlalosehe. (Joh. 5:20; 10:17) Kaha re kholisehile hore Jehova o tla re tšelisa, re mo rapela hore a re thuse. Kahoo ha rea lokela ho tsilatsila ho mo kopa hore a re tšelise. Re khothatsoa ke ho tseba hore Jehova o utloisisa kamoo re utloileng bohloko kateng ’me oa re tšelisa.—2 Bakor. 1:3, 4. w17.07 13 ¶3-5

Mehleng ena batho ba limilione ba tšehetsa mokhatlo oa Jehova ka ‘lintho tsa bona tsa bohlokoa’ tse kang nako, matla a bona hammoho le lintho tsohle tse hlokehang. (Liprov. 3:9) Jehova a ke ke a lebala lerato leo re le bontšitseng ho eena le mosebetsi oo re mo etselitseng oona. Barapeli bohle ba ’nete ba phelang matsatsing ana a ho qetela ba na le bopaki bo bonahalang ba litlhohonolofatso tsa Jehova le hore Jesu oa ba tataisa. Re karolo ea mokhatlo o tsitsitseng, o sireletsehileng le oa ka ho sa feleng. Lula u le ka har’a batho ba Jehova ’me u ‘mamele lentsoe la Jehova Molimo oa hao.’ (Zak. 6:15) U tla lula u sireletsehile tlas’a Morena le Moprista ea phahameng. Etsa sohle se khonehang ho tšehetsa borapeli bo hloekileng. Ka ho etsa joalo, Jehova Molimo oa mabotho o tla u sireletsa hona joale le nakong e tlang. w17.10 30 ¶18-19

Haufinyane, lefatše lena le busoang ke Satane le tl’o timetsoa hammoho le sohle se ho lona e leng, lipolotiki, bolumeli le khoebo. Moprofeta Ezekiele le Sofonia ba ile ba profeta hore khauta le silevera tseo esale li e-na le boleng bo phahameng ho tloha khale, ha li sa tla ba le thuso. (Ezek. 7:19; Sof. 1:18) Re ka ikutloa joang ha re hlokomela motsotsong oa ho qetela oa bophelo ba rona hore re tetse maruo a ’nete hore feela re be le “maruo a sa lokang” a lefatše lee? Ho ka tšoana le ha re sehlile ka thata bophelo bohle ba rona hore re be le chelete e ngata, athe chelete eo kaofela ke mokoebe. (Liprov. 18:11) Qetellong “maruo a sa lokang” a tla fela. Kahoo, a re a sebeliseng hona joale ho ‘iketsetsa metsoalle’ leholimong, ke hore ka tsela e tla re thusa ho ba metsoalle ea Jehova. Eng kapa eng eo re e etsang hore ’Muso oa Jehova o tle pele bophelong ba rona e re tlisetsa litlhohonolofatso tse ngata. w17.07 11 ¶16

Bakreste ba bang ba ka leka ho pata sebe se tebileng seo ba se entseng hobane se ba soabisa kapa ba tšaba ho soabisa ba haufi le bona. (Liprov. 28:13) Empa ho pata sebe se tebileng ho kotsi, eseng feela ho motho ea se entseng empa le ho ba bang. Hobane’ng? Hobane Jehova a ke ke a hlohonolofatsa phutheho ka moea oa hae o halalelang ’me phutheho e ke ke ea e-ba le khotso. (Baef. 4:30) Lerato le se nang boikaketsi le ka susumetsa Mokreste ho bolella baholo sebe se tebileng seo a se entseng ’me a fumane thuso. (Jak. 5:14, 15) Lerato le bohlokoa ho feta makhabane a mang kaofela. (1 Bakor. 13:13) Le re khetholla re le balateli ba ’nete ba Jesu le baetsisi ba Jehova e leng eena mohloli oa lerato. Pauluse o ile a re: “Haeba ke . . . se na lerato, ha ke letho.” (1 Bakor. 13:2) A re tsoeleng pele ho rata batho bohle eseng feela “ka lentsoe” empa “ka ketso le ’nete.”—1 Joh. 3:18. w17.10 11 ¶17-18

Josefa o ile a ba sebete ha mosali oa Potifaro a batla hore a robale le eena. E ka ’na eaba o ne a tseba hore ha a ka hana ho robala le eena, bophelo ba hae bo tla ba kotsing. Empa ho e-na le hore a inehele, o ile a ba sebete eaba hang-hang oa baleha. (Gen. 39:10, 12) Rahaba le eena o ile a ba sebete. Ha Baiseraele ba neng ba tl’o hloela naha ba le Jeriko ntlong ea hae, o ile a ba sebete eaba o thusa banna bao ba babeli hore ba tsoe Jeriko ba ntse ba sireletsehile. (Josh. 2:4, 5, 9, 12-16) Ha Basaduse ba ne ba leka ho thibela baapostola ba Jesu hore ba se ke ba ruta ka eena, ba ile ba ’na ba tsoela pele ho ruta batho ka Jesu kaha ba ile ba bona sebete seo Jesu a neng a e-na le sona. (Lik. 5:17, 18, 27-29) Josefa, Rahaba, Jesu hammoho le baapostola ba hae, ba ne ba ikemiselitse ho etsa lintho tse nepahetseng. Le hoja ba ne ba le sebete, e ne e se hobane ba tšepile matla a bona, empa ba ne ba tšepile Jehova. Ka linako tse ling le rona re tobana le maemo a hlokang hore re be sebete. Kahoo, re lokela ho tšepa Jehova, eseng matla a rona.​—2 Tim. 1:7. w17.09 29 ¶6-9

Ke Jehova feela ea ka re thusang hore re tlohelle mekhoa e mebe. Hangata batho ba neng ba e-na le eona ba ile ba tlameha ho sebetsa ka thata hore ba e tlohele. Ba ile ba thusoa ke moea o halalelang le ho bala Lentsoe la Molimo. (Luka 11:13; Baheb. 4:12) Ka tsela e tšoanang, Bibele e ka re thusa haeba re e bala letsatsi le letsatsi, re nahanisisa ka lintho tseo re ithutileng tsona ’me re rapella ho ba le bohlale le matla a ho sebelisa likeletso tsa Bibele bophelong ba rona. (Josh. 1:8; Pes. 119:97; 1 Bathes. 5:17) Lentsoe la Molimo le moea o halalelang li ka re thusa ha re ea libokeng le nakong eo re li lokisetsang. (Baheb. 10:24, 25) Hape re lokela ho sebelisa lintho tse kang limakasine, Khaso ea JW, JW Library le websaete ea rona ea jw.org. (Luka 12:42) E le hore re lule re amoheleha ho Jehova, ha se feela hore re lokela ho tlohella mekhoa e mebe empa hape re lokela ho ba le mekhoa e metle.—Bakol. 3:10. w17.08 21 ¶16-17

Morena Davida o ile a tšoaroa ka leeme ka makhetlo. Le hoja a ne a tlotselitsoe ho ba morena Iseraele, o ile a tlameha ho ema lilemo tse ka bang 15 pele a ka qala ho busa. (2 Sam. 2:3, 4) Ka nako eo, Morena Saule o ne a mo lelekisa a batla ho mo bolaea. Kahoo, Davida e ile ea e-ba mophaphathehi. Ka linako tse ling o ne a lula mahaheng. Esita le ka mor’a hore Saule a bolaoe ntoeng, Davida o ile a lokela ho ema lilemo tse supileng hape pele e ka ba morena oa Iseraele. (2 Sam. 5:4, 5) Ke hobane’ng ha Davida a ne a ikemiselitse ho leta a sa fele pelo? O ne a tseba hore Jehova oa mo rata ’me a ke ke a mo lahla. O ile a letela hore Jehova a mo lopolle ’me a nahana ka linako tseo Jehova a ileng a mo thusa. (Pes. 13:6) O ne a tseba hore ha a itšenyetse nako ka ho letela Jehova. w17.08 6 ¶14-15

Ha nako e ntse e e-ea, lipuo lia fetoha ebile mantsoe le lipolelo li ka qetella li bolela lintho tse fapaneng. Puo eo batho ba e buang mehleng ena e fapane le ea mehleng ea ha Bibele e ne e ngoloa. Kaha batho ba bangata ha ba tsebe Seheberu le Segerike, ba hloka ho bala Bibele e fetoletsoeng. Batho ba bang ba nahana hore ha ba ithuta Seheberu le Segerike sa mehleng ea khale, ba tla utloisisa Bibele haholoanyane. Empa ho etsa joalo ho ka se ba thuse hakaalo. Re leboha Jehova hore ebe Bibele e fetoletsoe ka lipuo tse ka bang 3 000. Rea hlokomela hore Jehova o batla hore Bibele e thuse batho ba “sechaba se seng le se seng le moloko o mong le o mong.” (Tšen. 14:6) Kahoo, re utloa re batla ho ba le kamano e ntle le Molimo kaha oa re rata ebile ha a leeme. w17.09 19 ¶4

Haeba u na le litho tsa lelapa tse khaotsoeng, u lokela ho itšoara ’me u qobe ho kopana le bona. Ho itšoara maemong a joalo, ho bontša hore re batla ho etsa lintho tumellanong le thato ea Jehova, ’me re tla be re etsisa mohlala oa hae. Mohlala oa bohlokoa oo Bibele e fanang ka oona ke oa Morena Davida. Le hoja a ne a e-na le matla, ha aa ka a a sebelisa ha Saule le Shimei ba ne ba mo halefisitse. (1 Sam. 26:9-11; 2 Sam. 16:5-10) Empa ha se hore kamehla Davida o ne a khona ho itšoara, joalokaha re tseba ka sebe sa hae le Bathe-sheba le tsela eo a ileng a halefela Nabale ea meharo kateng. (1 Sam. 25:10-13; 2 Sam. 11:2-4) Leha ho le joalo re ka ithuta thuto ea bohlokoa mohlaleng oa Davida. Ea pele ke hore bahlanka ba Molimo ba etellang pele ba lokela ho itšoara e le hore ba se ke ba sebelisa matla a bona hampe. Ea bobeli ke hore ha rea lokela ho itšepa ho tlola hobane re nahana hore re ka hlola liteko.—1 Bakor. 10:12. w17.09 5-6 ¶12-13