December

Batho ba mehleng ea Bibele ba ne ba atisa ho amohela baeti ka hore ba ba ngoathele. Ha ba etsa joalo ba ne ba bontša hore ba batla ho bopa setsoalle le bona ’me ba be le khotso. (Gen. 18:1-8; Baahl. 13:15; Luka 24:28-30) Ke bo-mang bao haholo-holo re lokelang ho ba mema? E lokela ho ba Bakreste-’moho le rona. Ha maemo a mpefala, re hloka ho tšehetsana. Kahoo, re lokela ho bopa setsoalle le bona ’me re be le khotso le bona. Ha balebeli ba potoloho le liithuti ba le likolong Tsa Puso ea Molimo hammoho le baithaopi ba sebetsang kahong, le bona ba hloka bolulo. Batho bao matlo a bona a sentsoeng ke likoluoa tsa tlhaho ba hloka moo ba ka lulang teng ho fihlela matlo a bona a hahuoa bocha. Ha rea lokela ho nahana hore batho ba nang le matlo a maholo ke bona feela ba tla thusa. Mohlomong ba se ba ile ba thusa ka makhetlo. Le uena u ka fana ka bolulo esita le haeba ntlo ea hao e le nyenyane. w18.03 15 ¶6; 16 ¶9

Ke’ng e tla re thusa hore re boele re ‘eme’? Re ke ke ra etsa joalo ka matla a rona, re hloka thuso ea Jehova. (Bafil. 4:13) Ho itšoara kapa ho ikhalemela ke karolo ea tholoana ea moea. Ho rapela, ho ithuta Bibele le ho nahanisisa ka lintho tseo re ithutileng tsona, ho ka re thusa hore re ikhalemele. Empa re lokela ho etsa’ng haeba re thatafalloa kapa re sa natefeloe ke ho ithuta Bibele? Ha rea lokela ho nyahama. Re lokela ho lumella Jehova hore a re thuse ho ‘hlaolela tabatabelo’ ea Lentsoe la Hae. (1 Pet. 2:2) Re ka kopa Jehova a re thuse hore re khone ho ipha nako ea ho ithuta Bibele. Re lokela ho etsa lintho tumellanong le lithapelo tsa rona ’me re qale ka ho ithuta Bibele ka metsotso e seng mekae. Hanyane ka hanyane ho tla ba bonolo hore re thabele ho ithuta. Re tla thabela ho ba le nako ea ho khutsa le ho nahanisisa ka lintho tseo re li balileng.​—1 Tim. 4:15. w18.03 29 ¶5-6

Pele motho ea ithutang Bibele a ka kolobetsoa, o lokela ho matlafatsa tumelo ea hae ka ho ithuta ka Molimo, merero ea Hae le hore na O tla pholosa batho joang. (1 Tim. 2:3-6) A ke ke a inehela ho Jehova empa a etsa lintho tse tla mo sitisa ho kena ’Musong oa Hae. (1 Bakor. 6:9, 10) Haeba tumelo ea hae e le matla, o tla qoba ho etsa eng kapa eng eo Jehova a sa e rateng. O tla etsa lintho tumellanong le melao ea Jehova. (Lik. 3:19) Empa ha aa lokela ho fella moo. O boetse o lokela ho ba teng kamehla libokeng le tšimong ’me a rute batho ka Jehova. (Lik. 1:8) Ke feela ka mor’a moo a ka inehelang ho Jehova ka ho etsa thapelo boinotšing ebe oa kolobetsoa e le ho bontša phatlalatsa hore o inehetse ho eena. w18.03 6 ¶12

Mohlala o mong ke oa Maria. Jehova o ile a khetha Maria ho ba ’mè oa Jesu hobane o ne a nahana lintho ka tsela eo Jehova a li nahanang ka eona. Re thusoa ke ha re bala mantsoe a hae nakong eo a neng a chaketse beng ka eena e leng Zakaria le Elizabetha. (Luka 1:46-55) Mantsoe a Maria a bontša hore o ne a rata Lentsoe la Molimo a bile a tseba Mangolo a Seheberu. (Gen. 30:13; 1 Sam. 2:1-10; Mal. 3:12) Le ka mor’a hore Maria le Josefa ba nyalane, ha baa ka ba kopanela liphate ho fihlela Jesu a hlahile. Ba ne ba nka ho phetha thato ea Jehova ho le bohlokoa ho feta ho khotsofatsa litakatso tsa bona. (Mat. 1:25) Hamorao, Maria o ile a bona lintho tse etsahalang bophelong ba Jesu ’me a mamela ka hloko lintho tseo a neng a li bua. Ho hlakile hore o ne a thahasella ho bona morero oa Molimo oa ho tla ha Mesia o phethahala. E se eka re ka etsisa Maria ka hore re etse thato ea Molimo ka linako tsohle. w18.02 21 ¶11

Re ka etsisa Jobo joang? Ho sa tsotellehe hore na maemo a rona ke afe, Jehova o lokela ho tla pele bophelong ba rona. Re lokela ho mo tšepa le ho mo mamela ho tloha pelong. Ha e le hantle, mabaka a rona a ho etsa joalo a mangata ho feta ao Jobo a neng a e-na le ’ona. Nahana ka taba ena: Re tseba lintho tse ngata ka Satane le maqheka a hae. (2 Bakor. 2:11) Lengolong la Jobo, rea ithuta hore na ke hobane’ng ha Molimo a lumella mahlomola. Boprofeta ba Daniele bo re ruta hore ’Muso oa Molimo ke oa sebele ’me Morena oa oona ke Jesu Kreste. (Dan. 7:13, 14) Hape rea tseba hore ’Muso oo o tla busa lefatšeng lohle o be o felise lintho tsohle tse bohloko. Lintho tse ileng tsa hlahela Jobo li re ruta hore re lokela ho nahanela Bakreste-’moho le rona. Ka linako tse ling, ba ka tšoana le Jobo eaba ba bua ba sa nahana. (Moek. 7:7) Leha ho le joalo, re lokela ho ba nahanela le ho leka ho utloisisa maemo a bona, ho e-na le ho ba ahlola. Ha re etsa joalo, re tla be re etsisa Jehova, Ntate oa rona ea lerato ea bileng a leng mohau.​—Pes. 103:8. w18.02 6 ¶16; 7 ¶19-20

Batho ba bang ba ikhohomosa hobane ba le batle, ba tsebahala, ba tseba ’mino, ba le matla kapa ba nkeloa holimo. Davida o ne a le motle, a tsebahala, a tseba ’mino, a le matla a bile a nkeloa holimo. Empa o ile a lula a ikokobelitse bophelo bohle ba hae. Mohlala, ka mor’a hore Davida a bolaee Goliathe, Morena Saule o ile a mo lumella hore a nyale morali oa hae. Leha ho le joalo, Davida o ile a re: “’Na ke mang . . . hoo nka bang mokhoenyana oa morena?” (1 Sam. 18:18) Mehleng ena, bahlanka ba Jehova ba leka ho etsisa Davida ka hore ba ikokobetse. Rea hlolloa ke ho tseba hore Jehova o ikokobelitse le hoja e le Molimo ea phahameng ka ho fetisisa. Re leka ka hohle ho mamela keletso ena: “Le ikapese lerato le mofuthu la qenehelo, mosa, ho ikokobetsa kelellong, bonolo, le tiisetso.” (Bakol. 3:12) Re boetse rea tseba hore lerato “ha le ithorise, ha le ikhohomose.” (1 Bakor. 13:4) Ha batho ba bona hore re ikokobelitse, le bona ba ka batla ho ithuta Bibele. w18.01 28 ¶6-7

Re ka koptjoa ho fana ka menehelo bakeng sa lintho tse itseng. (Lik. 4:34, 35; 1 Bakor. 16:2) Mohlala, e ka ’na eaba phutheho ea lona e lokela ho haha Holo ea ’Muso. Re ka boela ra thusa le ka litšenyehelo tsa kopano. Kapa ra thusa Bakreste-’moho le rona ba oetsoeng ke likoluoa. Menehelo ea rona e ka boela ea thusa baromuoa, bo-pula-maliboho ba khethehileng, bapotolohi le bohle ba sebetsang ntlo-kholo le liofising tsa makala lefatšeng ka bophara. Kaofela ha rona ho na le hoo re ka fanang ka hona ho tšehetsa mosebetsi o etsoang ke mokhatlo oa Jehova matsatsing ana a ho qetela. Boholo ba rona re fana ka menehelo boinotšing. Ha re tšela chelete ka lebokoseng la monehelo Holong ea ’Muso kapa re patala ka Inthanete websaeteng ea rona ea jw.org ha re bolelle ba bang hore na re ntšitse chelete e kae. Empa ho thoe’ng haeba re nahana hore chelete eo re e ntšang e nyenyane? Hopola hore boholo ba menehelo eo mokhatlo o e fumanang e tsoa ho batho ba bangata ba ntšitseng monehelo o monyenyane. w18.01 19 ¶10-11

Mokreste o lokela ho kolobetsoa e le hore a pholohe ’me a phele ka ho sa feleng. (Mat. 28:19, 20) Ha u kolobetsoa, u ne u tšepisa Jehova hore u tla mo rata ’me ho mo sebeletsa e be ntho e tlang pele bophelong ba hao. Ha ho mohla u ka ikoahlaelang ho tataisoa ke Jehova. Batho ba sa tataisoeng ke Jehova ba tataisoa ke Satane. Satane ha a u rate ho hang. Ebile a ka thaba haholo ha u ka mo etsisa ka ho hana ho tataisoa ke Jehova eaba u hloleha ho fumana bophelo bo sa feleng. Nahana ka litsela tse ngata tseo Jehova a u hlohonolofalitseng ka tsona hobane u kolobelitsoe. Kaha joale u tšepisitse Jehova hore u tla mo sebeletsa bophelo bohle, u ka bua ka phatla e phahameng oa re: “Jehova o ka lehlakoreng la ka; nke ke ka tšoha. Motho oa lefatše a ka nketsa’ng?” (Pes. 118:6) Ho tataisoa ke Jehova le ho tseba hore oa u rata ke tlotla e kholo haholo. w17.12 23-24 ¶1-3

Ka linako tse ling re ka utloisoa bohloko ke liketso kapa mantsoe a Bakreste-’moho le rona kapa rona ra ba utloisa bohloko. Taba ena e ka ba bothata bo tebileng. Ha e le hantle, Jehova o batla hore re bontše hore rea mo tšepahalla ka hore re ithute ho sebetsa ’moho le bahlanka ba hae hobane oa ba rata le hoja ba sa phethahala. Pale ea Josefa e re bontša hore Jehova o re lumella hore re hlaheloe ke maemo ao ho ’ona ho ka bang thata ho lula re tšepahala. Ha Josefa e sa le mocha, baholoane ba hae ba ile ba mo rekisa hore e il’o ba lekhoba Egepeta. (Gen. 37:28) Kaha Jehova o ne a ntse a shebeletse, o ile a utloa bohloko hore ebe motsoalle oa hae ea tšepahalang o tšoeroe ka tsela eo. Leha ho le joalo, ha aa ka a kena lipakeng. Esita leha Josefa a ne a qosoa ka ho beta mosali oa Potifaro, Jehova ha aa ka a kenella. Empa na Jehova o ne a lahlile Josefa? Che. Bibele e re: “Jehova . . . a atlehisa seo [Josefa] a se etsang.”​—Gen. 39:21-23. w18.01 9-10 ¶12-14

Lithuto tsa motheo tseo u li lumelang ke life? Mohlomong u ne u ka hlalosa hore Jehova ke eena ’Mopi ebile o re file bophelo. U ne u ka boela oa hlalosa hore u lumela ho Jesu Kreste le hore o re shoetse. Hape u ne u ka bolela hore haufinyane batho ba mamelang Molimo ba tla phela paradeiseng lefatšeng ka ho sa feleng. Empa na tsoho ke e ’ngoe ea lithuto tseo u li ratang ka ho fetisisa? Re na le mabaka a utloahalang a ho lumela hore tsoho ke thuto ea bohlokoa le haeba re e-na le tšepo ea ho pholoha matšoenyeho a maholo ’me re phele ka ho sa feleng lefatšeng. Tsoho ke mokokotlo oa tumelo ea rona. Hoja Kreste ha aa tsosoa, e ne e ke ke ea e-ba Morena oa rona ’me ho ne ho tla be ho se na thuso ho ruta batho ka puso ea hae. (1 Bakor. 15:12-19) Empa rea tseba hore Jesu o ile a tsosoa ebile re lumela hore bafu ba ka tsosoa esita leha batho ba re soma.​—Mar. 12:18; Lik. 4:2, 3; 17:32; 23:6-8. w17.12 8 ¶1-2

Bafarisi ba ne ba sheba feela hore na mofosi o entse’ng, ho e-na le hore ba shebe hore na ke motho ea joang. Ha ba bona Jesu a ntse a e-ja le ba lelapa la Matheu, ba ile ba re ho baapostola: “Ke hobane’ng ha mosuoe oa lōna a ja le babokelli ba lekhetho le baetsalibe?” Ha Jesu a ba araba o ile a re: “Batho ba phelang hantle ha ba hloke ngaka, empa ba kulang baa e hloka. Joale, e-eang, ’me le ithute hore na sena se bolela eng, ‘Ke batla mohau, eseng sehlabelo.’ Etsoe ke tlil’o bitsa baetsalibe, eseng batho ba lokileng.” (Mat. 9:9-13) Na Jesu o ne a buella liketso tse mpe? Che. Ha e le hantle, e ’ngoe ea lintho tsa bohlokoa tseo a neng a li ruta batho ke hore baetsalibe ba lokela ho baka. (Mat. 4:17) Leha ho le joalo, o ne a hlokomela hore ba bang ba “babokelli ba lekhetho le baetsalibe,” ba ne ba batla ho fetoha. Ba ne ba tlile lapeng la Matheu hobane ba batla ho ba balateli ba Jesu, eseng feela ho tla ja. (Mar. 2:15) Ka masoabi, Bafarisi ba ne ba sa tšoare batho joaloka Jesu. w17.11 13 ¶2; 16 ¶15

Kaofela ha rona rea lumela hore re hlohonolofalitsoe hore ebe re ka har’a phutheho. Ho ithuta Bibele ha re le libokeng le ho thusa Bakreste-’moho le rona ho re thusa ho lula re letetse moputso ka tjantjello. Empa ka linako tse ling ho ka hlaha liqabang pakeng tsa rona le Bakreste-’moho le rona tse ka etsang hore re utloisane bohloko. Haeba re sa rarolle liqabang tseo, ho ka ba bonolo feela hore re jare Bakreste-’moho le rona ka pelo. (1 Pet. 3:8, 9) Re ka etsa’ng e le hore re se ke ra jara Bakreste-’moho le rona ka pelo eaba re hloleha ho fumana moputso? Pauluse o ile a eletsa Bakolose, a re: “Joaloka bakhethoa ba Molimo, ba halalelang le ba ratoang, le ikapese lerato le mofuthu la qenehelo, mosa, ho ikokobetsa kelellong, bonolo, le tiisetso. Tsoelang pele le mamellana le ho tšoarelana ka bolokolohi haeba leha e le mang a e-na le sesosa sa pelaelo khahlanong le e mong. Esita le joalokaha Jehova a ile a le tšoarela ka bolokolohi, le etse joalo le lōna.”​—Bakol. 3:12, 13. w17.11 27 ¶7-8

Ka mor’a hore Moiseraele a bolaee motho ka phoso, o ne a lokela ho balehela motseng oa setšabelo ’me a “bue mantsoe a hae moo banna ba baholo ba motse oo ba ntseng ba utloa.” Baholo ba ne ba lokela ho mo amohela. Ka mor’a nako o ne a khutlisetsoa motseng oo a bolaetseng motho ho oona e le hore baholo ba hae ba mo ahlole. (Num. 35:24, 25) Ha baholo ba mo fumana a se molato, Moiseraele eo o ne a khutlisetsoa motseng oa setšabelo. Ke hobane’ng ha ’molai a ne a lokela ho bua le baholo? E le hore ba thuse ’molai eo hore Jehova a mo hauhele le hore ba boloke phutheho e hloekile. Setsebi se seng sa Bibele se ile sa re haeba ’molai a ne a ke ke a bua le baholo o ne a lokela ho bolaoa kaha o tla be a khethile ho se mamele Molimo. Haeba a sa balehele ho e meng ea metse ea setšabelo, mong ka mofu o ne a lokela ho mo bolaea. w17.11 9 ¶6-7

Jehova o ntse a sebelisa mangeloi ho sireletsa batho ba hae le ho ba matlafatsa. (Mal. 3:6; Baheb. 1:7) Ha batho ba Jehova ba tsoa bokhobeng ba Babylona e Moholo ka 1919, haesale lira tsa bona li ntse li leka ho thibela borapeli ba ’nete hore bo hole, empa li hlolehile. (Tšen. 18:4) Kaha mangeloi a sirelelitse mokhatlo oa Jehova, ha rea lokela ho tšoha hore re tla boela re be makhoba a bolumeli ba bohata. (Pes. 34:7) Ho e-na le hoo, re kholisehile hore re tla lula re thabile ’me re phathahane ka ho sebeletsa Jehova. Lebotho la mangeloi le ka lehlakoreng la rona. Nakong ea matšoenyeho a maholo, mangeloi a tla re sireletsa ’me a timetse mang kapa mang ea hanyetsang bobusi ba Jehova.​—2 Bathes. 1:7, 8. w17.10 28 ¶10-11

Haeba mong ka rona a khaoloa kapa a ikarola phuthehong, re utloa bohloko bo otlang pelo. Re ka sebetsana le bohloko boo joang? Ntho ea bohlokoa ke ho boloka kamano ea hao le Jehova e tsitsitse. Ha u utloile bohloko bo joalo, u lokela ho matlafatsa tumelo ea hao. Bala Bibele letsatsi le letsatsi, e-ea libokeng kamehla u be u li lokisetse, tsoela pele u ea tšimong ’me u rapele Jehova hore a u fe matla a ho mamella. (Juda 21) U ka etsa’ng haeba le ka mor’a ho etsa tsena kaofela, bohloko bo ntse bo le teng? U se ke oa tela. Ho etsa lintho tse tla u thusa ho boloka kamano ea hao le Jehova ho ka u thusa. Nahana ka mohlala oa mongoli oa Pesaleme ea 73. Ho ile ha e-ba le nako eo ka eona a ileng a thatafalloa ho laola maikutlo a hae. Empa ho rapela Jehova ho ile ha mo thusa hore a bone lintho ka tsela e nepahetseng hape. (Pes. 73:16, 17) U ka etsa se tšoanang le uena. w17.10 16 ¶17-18

Satane o ile a etsa eka o rata Eva ha a ne a bua le eena serapeng sa Edene. Empa hamorao liketso tsa hae tsa bontša hore ke moikaketsi. (Gen. 3:4, 5) Morena Davida o ne a e-na le motsoalle ea bitsoang Akitofele. Empa Akitofele o ile a eka Davida e le hore a ka ithuisa molemo. Liketso tsa hae li ne li bontša hore ha se motsoalle oa sebele. (2 Sam. 15:31) Bakoenehi le batho ba bakang karohano ka phuthehong, ba sebelisa “puo e qhekellang le puo e rorisang” ba etsa eka ba tsotella batho empa ho se joalo. (Bar. 16:17, 18) Lerato le nang le boikaketsi le fosahetse hobane le ka sebelisoa ho qhekella batho ba bang. Re ka thetsa batho empa re ke ke ra thetsa Jehova. Jesu o ile a re ba etsang lintho joaloka baikaketsi ba tla fuoa “kotlo e matla ka ho fetisisa.” (Mat. 24:51) Kahoo re lokela ho ipotsa: ‘Na ke lula ke bontša lerato la ’nete le se nang boikaketsi?’ w17.10 8 ¶6-8

Ha re bala Bibele ha re le tšimong, re lumella hore Jehova a bue le mong’a ntlo. Temana e lokiselitsoeng hantle e ka fana ka tšusumetso ho feta eng kapa eng eo re ka e buang. (1 Bathes. 2:13) Ha u le tšimong, na u nka monyetla o mong le o mong ho bala ho tsoa ka Bibeleng? Ho balla batho litemana tse ka Bibeleng feela ha hoa lekana. Hobane’ng? Hobane ba bangata ha ba utloisise Bibele hakaalo. Mehleng ea Pauluse ho ne ho le joalo ’me le kajeno ho ntse ho tšoana. Kahoo ha rea lokela ho nahana hore batho ba tla utloisisa temana ea Bibele ka hore re ba balle eona feela. Re ka ba thusa ka hore mohlomong re phete karolo e itseng ea temana eo e be re ba hlalosetsa eona. Ho etsa joalo ho ka etsa hore Lentsoe la Molimo le hape thahasello ea bamameli ba rona.​—Luka 24:32. w17.09 25 ¶7-8

Ha re qenehela baahelani ba rona le Bakreste-’moho le rona re tla be re bontša hore re batla ho etsisa Jesu. (Joh. 13:34, 35) Lentsoe ho qenehela kapa ho utloela bohloko le ka bolela “ho utloa bohloko hammoho.” Motho ea utloelang ba bang bohloko oa ba thusa ha ba e-na le mathata. Kahoo, u lokela ho batla menyetla ea ho ba thusa. Ha batho ba hlahetsoe ke likoluoa, re ba utloela bohloko. Lipaki Tsa Jehova li tsebahala ka ho thusa batho ba hlahetsoeng ke likoluoa. (1 Pet. 2:17) Ka 2011 ho ile ha e-ba le tšisinyeho ea lefatše le tsunami moo morali’abo rona e mong oa Japane a lulang. O re o ile a khothala haholo a ba a tšeliseha ha Lipaki tse tsoang Japane le libakeng tse ling li ithaopela ho ba thusa ka mor’a hore ba hlaheloe ke koluoa eo. O re: “Ke ile ka hlokomela kamoo Jehova a re ratang kateng le hore bahlanka ba hae baa tsotellana ebile Lipaki lefatšeng lohle lia re rapella.” w17.09 11 ¶12-13

Ke hobane’ng ha re lokela ho loanela ho ba le boitšoaro haholoanyane? Ak’u nahane ka mabaka a mabeli a ka re thusang. Lebaka la pele ke hore, batho ba khonang ho laola maikutlo a bona ba ba le mathata a tebileng a seng mangata. Maikutlo a bona a tsitsitse, ba na le likamano tse ntle le ba bang, ’me ha ba lule ba koatile hape ha ba be le khatello ea maikutlo joaloka batho ba hlolehang ho laola maikutlo a bona. Lebaka la bobeli ke hore, ho ba le bokhoni ba ho hlola khatello le ho laola menahano le liketso tse fosahetseng ho ka re thusa ho fumana kamohelo mahlong a Molimo. Mohlala ke oa Adama le Eva ba ileng ba hloleha ho ba le boitšoaro ’me ba lahleheloa ke kamano ea bona le Jehova. (Gen. 3:6) Re ka boela ra nahana ka mehlala ea ba bangata ho tloha ka nako eo ba ileng ba khola litholoana tse bosula ka lebaka la ho hloleha ho itšoara. Ha se kamehla batho ba sa phethahalang ba ka khonang ho itšoara. Jehova oa tseba hore ha rea phethahala, kahoo o batla ho re thusa ho hlola bofokoli ba ho hloleha ho itšoara.​—1 Mar. 8:46-50. w17.09 3-4 ¶3-4

Naheng ea Afrika Boroa ho na le nako eo ba boholong ba neng ba sa lumelle bara le barali babo rona ba batšo le ba basoeu ho kopana. Leha ho le joalo, ka la 18 December, 2011 bara le barali babo rona ba fetang 78 000 ba merabe e mengata ba ne ba kopane ketsahalong ea bohlokoa e neng e tšoaretsoe setediamong se seholo ka ho fetisisa toropong ea Johannesburg e Afrika Boroa. E mong oa baokameli ba setediamo o ile a bua tjena: “Ha ke e-s’o bone batho ba itšoereng hantle hakana! Le apere hantle. Hape, le hloekisitse lebala hantle haholo. Empa ntho e kholo eo ke e boneng ke hore le kopane le le merabe e mengata.” Lintho tsena tseo batho ba li buileng lia bontša hore Lipaki Tsa Jehova lefatšeng lohle lia ikhetha. (1 Pet. 5:9) Empa ke’ng e etsang hore re fapane le batho ba bang? Re thusoa ke Bibele le moea o halalelang hore re sebetse ka thata ho ‘hlobola botho ba khale’ ’me re “ikapese botho bo bocha.”​—Bakol. 3:9, 10. w17.08 17-18 ¶2-3

Bibele e re moea o halalelang o re thusa ho mamella. Ho ka ba thata hore batho ba mamelle maemo a boima haese ka thuso ea Molimo. Ha re mamella re boetse re bontša hore re rata batho ba bang. Haeba re tloaetse ho fella batho ba bang pelo, maqhama a rona le bona aa senyeha empa haeba re ba mamella, kamano ea rona le bona ea matlafala. (1 Bakor. 13:4; Bagal. 5:22) Ho mamella ho akarelletsa makhabane a mang. Mohlala, ho mamella ho tsamaea le ho tiisetsa, e leng ntho e ka re thusang hore re se ke ra nyahama ha re hlaheloa ke mathata. (Bakol. 1:11; Jak. 1:3, 4) Ho boetse ho akarelletsa ho se iphetetse ha re utloisoa bohloko ’me re lula re le matla ho sa tsotellehe lintho tse re hlahelang. Hape, Bibele e re re lokela ho ikemisetsa ho mamella. Ke eona ntho eo re ithutang eona ho Jakobo 5:7, 8. w17.08 4 ¶4

Bacha, e ka ’na eaba lea tseba hore pele motho a qala leeto, o lokela ho tseba hore na o tla ea kae. Bophelo bo tšoana le ho nka leeto. Nako e nepahetseng ea ho rera hore na u batla ho ea kae ka bophelo ke ha u sa le mocha. Empa ho ka ba thata ho rera lintho. Leha ho le joalo, u se ke oa tšoha. Hlokomela hore na Jehova o re’ng mantsoeng a hlahang temaneng ea kajeno ea letsatsi. Jehova o batla hore u etse qeto e nepahetseng bakeng sa bokamoso ba hao. (Moek. 12:1; Mat. 6:20) Rea tseba hore o batla hore u thabe hobane o re bopetse ho bona lintho tse ntle, ho li utloa le ho ja lijo tse monate. Hape, oa re eletsa ebile oa re ruta hore na re etse’ng hore re lule re thabile. Ha Jehova a bua le batho ba sa mo mameleng, o re: “La khetha ntho eo ke sa khahloeng ke eona. . . . Bonang! Bahlanka ba ka ba tla thaba, empa lōna le tla hlajoa ke lihlong. Bonang! Bahlanka ba ka ba tla hoeletsa ka thabo ka lebaka la boemo bo botle ba pelo.” (Esa. 65:12-14) Jehova oa thaba ha u etsa liqeto tse nepahetseng.​—Liprov. 27:11. w17.07 22 ¶1-2

Kaha Jehova o tseba hantle moo naleli ka ’ngoe e leng hona teng, o u tseba hantle. Oa tseba hore na u hokae, hore na u ikutloa joang le hore na u hloka eng ka nako e itseng. Ha se feela hore Jehova oa u tsotella, empa o boetse o u utloela bohloko ebile o na le matla a ho u thusa ha u na le mathata. (Pes. 147:5) U ka ’na oa ikutloa u imetsoe hoo u utloang eka u ke ke oa khona ho sebetsana le mathata a hao. Molimo “oa hopola hore re lerōle,” kahoo oa tseba hore na re hloleha ho etsa’ng. (Pes. 103:14) Kaha ha rea phethahala, re lula re etsa liphoso tse tšoanang, tse kang ho bua re sa nahana, ho ba le mekhoa e itseng e bakoang ke ho se phethahale kapa ho honohela batho ba bang. Le hoja Jehova a sa etse liphoso, o re utloisisa ho feta kamoo re nahanang kateng. (Esa. 40:28) Mohlomong u kile oa bona ha Jehova a u thusa ka mathata ao u kileng oa ba le ’ona.​—Esa. 41:10, 13. w17.07 18-19 ¶6-8

Mor’abo rona e mong oa naheng ea Sri Lanka o fane ka ntlo ea hae le setša hore ho tšoareloe liboka le likopano ho tsona le hore ho lule bo-pula-maliboho. Ka ho etsa joalo, o itella bara le barali babo rona ba se nang chelete. Linaheng tseo mosebetsi oa rona o thibetsoeng, barab’abo rona ba fana ka matlo a bona hore ho tšoareloe liboka e le hore bo-pula-maliboho le bahoeletsi ba bang ba se ke ba tlameha ho patalla holo eo ba ka tšoarelang liboka ho eona. Morali’abo rona e mong ea atisang ho fana ka monehelo ho tšehetsa mosebetsi oa boboleli o re: “Ho fana ka tsela ena ho nthusitse ka litsela tse ngata. Ke se ke khona ho tšoarela batho ba bang ka bolokolohi, ho ba mamella ’me le ho mamela ha ke eletsoa.” w17.07 9 ¶9-10

Le haeba Jobo a ne a utloisisa hore na ke hobane’ng ha a hlahetsoe ke mathata, e ka ’na eaba ka linako tse ling o ne a ipotsa hore na ke hobane’ng ha ho hlokahala hore a utloe bohloko hakaalo. Ho sa tsotellehe hore na o ne a nahana’ng, e tlameha ebe o ne a hopola seo Jehova a mo boleletseng sona. Ha a etsa joalo o ne a tla bona lintho ka tsela e nepahetseng a be a tšelisehe. (Pes. 94:19) Buka ea Jobo e ka re tšelisa ea ba ea re thusa ho bona lintho ka tsela e nepahetseng. Jehova o ile a ngola buka ea Jobo “ho re laea, e le hore ka mamello ea rōna le ka matšeliso a tsoang Mangolong re ka ba le tšepo.” (Bar. 15:4) Kahoo re ithuta’ng? Ntho e ka sehloohong eo re ithutang eona ke hore re se ke ra tšoenyeha haholo ka se etsahalang bophelong ba rona hoo re ka lebalang hore taba ea bohlokoa ke hore lebitso la Jehova le halaletsoe. Hape, re tla be re bontša hore re nka bobusi ba Jehova e le ba bohlokoa ha re lula re tšepahala leha re hlaheloa ke mathata, joalokaha Jobo a ile a etsa. w17.06 24 ¶9; 25 ¶13-14

Jesu le eena o ne a phomola ka linako tse ling. Ka letsatsi le leng ka mor’a hore Jesu le barutuoa ba hae ba tsoe letšolo ba bolela litaba tse molemo, o ile a bua mantsoe a hlahang temaneng ea letsatsi ea kajeno. Ke ’nete hore ho bohlokoa hore re ithabise. Leha ho le joalo, ho ka ba kotsi ho qeta nako e ngata haholo re ithabisa. Mehleng ea Bakreste ba khale, batho ba bangata ba ne ba re: “A re jeng ’me re noeng, etsoe hosasane re tla shoa.” (1 Bakor. 15:32) Le mehleng ena batho ba bangata ba joalo. Ke’ng e ka re thusang ho bona hore na re qeta nako e kae re ithabisa? Re ka ngola lihora tseo re li qetang ka beke re ithuta Bibele re le bang kapa borapeling ba lelapa, re le tšimong le libokeng, ebe re li bapisa le lihora tseo re li qetang ka beke re bapala lipapali tse itseng, re shebella thelevishene kapa re etsa lintho tse ling. Na re lokela ho fokotsa nako eo re e qetang re ithabisa?​—Baef. 5:15, 16. w17.05 24-25 ¶11-13

Papisong eo Jesu a ileng a bua ka eona, mohoebi o ile a fumana perela ea boleng bo phahameng. O ile a rekisa lintho tsohle tseo a neng a e-na le tsona hore a e reke. Na oa hlokomela hore na perela eo e ne e le ea bohlokoa hakae ho eena? Molaetsa oa ’Muso oa Molimo o tšoana le perela eo ea boleng bo phahameng. Ha re o rata joalokaha mohoebi a ne a rata perela eo, re tla tela lintho tsohle e le hore re lule re le bafo ba ’Muso oa Molimo. (Mar. 10:28-30) Ka mohlala, Zakiase o ne a ithuisa ka ho fumana chelete ea batho ba bang ka bomenemene. (Luka 19:1-9) Empa ka mor’a hore a utloe ha Jesu a ntse a bolella batho ka ’Muso oa Molimo, o ile a hlokomela hore molaetsa oo ke oa bohlokoa haholo. Hamorao hona letsatsing leo, o ile a re ho Jesu: “Bona! Morena, halofo ea lintho tsa ka, ke e fa mafutsana, ’me eng kapa eng eo ke ileng ka e nka ho mang kapa mang ka ho hanyapetsa ka qoso ea bohata ke e busetsa hane.” O ile a tela maruo ’ohle ao a neng a a fumane ka bomenemene a ba a khaotsa ho ba meharo. w17.06 10 ¶3-5

Bara kapa barali babo rona bao batsoali ba ba kopileng ho thusa bana ba bona ba lokela ho khothalletsa bana bao hore ba hlomphe batsoali ba bona ka hore ba bue batsoali hantle ’me ba se ke ba ipha boikarabelo ba ho ba holisa. Ho feta moo, ha ba na le bana bao, ha baa lokela ho itšoara ka tsela e ka belaetsang batho ba bang, esita le batho bao e seng Lipaki. (1 Pet. 2:12) Le hoja batsoali ba ka kopa thuso ho bara le barali babo rona, ba ntse ba lokela ho phetha boikarabelo boo ba bo fuoeng ba ho ruta bana ba bona Bibele. Ba lokela ho hlahloba seo bara le barali babo rona ba ithutang sona le bana ba bona ’me ba tsoele pele ba ruta bana ba bona. Batsoali, kopang Jehova hore a le thuse ’me le sebetse ka thata ho thusa bana ba lona. (2 Likron. 15:7) Ho thusa bana ba lona ho rata Jehova e lokela ho ba ntho ea bohlokoa ho feta lintho tseo le li batlang. Etsang sohle se matleng a lona ho thusa bana ba lona ho rata Lentsoe la Molimo ho tsoa pelong. Le ka mohla le se ke la khaotsa ho thusa bana ba lona ho ba bahlanka ba Jehova. w17.05 12 ¶19-20

Nahana ka mohlala ona. Monna o qosoa ka hore o entse tlolo ea molao eo kahlolo ea eona e leng boima. Ka lebaka la bopaki ba bohata bo fanoeng khahlanong le eena, o ahloleloa lefu ’me metsoalle le ba lelapa ba sala ba tšohile ba bile ba saretsoe. Batho ba ratang toka ba utloa bohloko bo otlang pelo ha ba bona monna eo le bara ba hae ba se nang molato ba bolaoa. Tlaleho ena ke ea sebele. Mohlanka e mong oa Jehova ea bitsoang Nabothe, ea phetseng nakong ea puso ea Morena Akabe, o ile a hlaheloa ke bomalimabe bona. (1 Mar. 21:11-13; 2 Mar. 9:26) Ha Morena Akabe a kopa hore Nabothe a mo rekisetse serapa sa morara kapa hore a mo fe serapa se seng, Nabothe o ile a hana. Hobane’ng? Nabothe o ne a hana hobane Jehova o ne a file Baiseraele molao o neng o thibela motho ho rekisa lefa la moloko oa habo. (Lev. 25:23; Num. 36:7) Ho hlakile hore Nabothe o ne a sheba lintho ka tsela eo Jehova a li shebang ka eona. w17.04 23 ¶1; 24 ¶4

Ho tla sala batho ba joang lefatšeng? Jehova o fana ka tšepiso ena e khothatsang: “Ba bonolo ba tla rua lefatše, ka sebele ba tla fumana thabo e phethehileng khotsong e ngata. Ba lokileng ba tla rua lefatše, ba tla lula ho lona ka ho sa feleng.” (Pes. 37:11, 29) “Ba bonolo” le “ba lokileng” ke bo-mang? Batho ba bonolo ke bao ka boikokobetso ba amohelang thuto le tataiso ea Jehova. Ba lokileng ke ba thabelang ho etsa lintho tse lokileng mahlong a Jehova Molimo. Le hoja hona joale batho ba khopo ba le bangata ho feta ba lokileng, lefatšeng le lecha, ba bonolo le ba lokileng e tla ba bona feela ba phelang lefatšeng ka nako eo. Kaofela ha bona ba tla etsa hore lefatše e be paradeise. w17.04 10-11 ¶5-6

“Lerato la Molimo” le re susumelletsa hore re bontše batho ba bang hore rea ba rata, haholo-holo maemong a thata. (1 Joh. 3:17, 18) Ha ho ne ho e-na le tlala ea sekoboto ho Bakreste ba lulang Judea, phutheho e ile ea ba thusa ka liphallelo. (Lik. 11:28, 29) Moapostola Pauluse le Petrose ba ile ba khothalletsa Bakreste hore ba amohele baeti. (Bar. 12:13; 1 Pet. 4:9) Kahoo ke habohlokoa hore re amohele bara le barali babo rona bao bophelo ba bona bo leng kotsing, kapa ba hlorisoang ka lebaka la seo ba se lumelang. Haufinyane tjena, Lipaki Tsa Jehova tse ngata li ile tsa tlameha ho baleha karolong e ka bochabela ho Ukraine ka lebaka la mahloriso. Ba bang ba ile ba bolaoa ka sehloho. Empa ba bang ba ile ba thusoa ke bara babo rona ba lulang libakeng tse ling moo Ukraine le Russia. Ha ba le linaheng tseo ba balehetseng ho tsona, ba ne ba sa kenele lipolotiki hobane ha se “karolo ea lefatše.” Ho e-na le hoo, ba ne ba lula “ba bolela litaba tse molemo tsa lentsoe.”—Joh. 15:19; Lik. 8:4. w17.05 4 ¶6-7