December

Ntho e ikhethang ka ho fetisisa ka Jesu ke hore o utloisisa mathata ao re thulanang le ’ona bophelong. Ha Jesu a ntse a le lefatšeng mona, o ne a khona ho ‘thaba le batho ba thabileng’ le ho ‘lla le batho ba llang.’ (Bar. 12:​15) Mohlala, ha barutuoa ba hae ba 70 ba khutla ba thabile letšolong la ho paka, Jesu o ile “a nyakalla.” (Luka 10:​17-21) Ka lehlakoreng le leng, ha a bona kamoo lefu la Lazaro le utloisitseng batho bohloko kateng, Jesu o ile “a bobola moeeng ’me a khathatseha.” (Joh. 11:​33) Ke’ng e thusitseng Jesu hore a nahanele batho a be a ba utloele bohloko? Ntho e ka sehloohong e mo thusitseng ke hore o rata batho. Jesu o ne a “rata . . . bara ba batho.” (Liprov. 8:​31) Lerato le ile la mo susumetsa hore a batle ho tseba batho hantle. Moapostola Johanne o ile a re Jesu “o ne a tseba se leng ho motho.”​—Joh. 2:​25. w19.03 20 ¶1-2

Satane o ile a nka ntho e ’ngoe le e ’ngoe eo Jobo a neng a e-na le eona, a bolaea bahlanka ba hae a ba a senya botumo ba Jobo. O ile a hlasela lelapa la Jobo eaba o bolaea bana ba hae ba leshome. O ile a otla Jobo ka mathopa a bohloko bo chachametsang a neng a mo tsoile ho tloha hloohong ho ea tsoa bohatong ba leoto. Mosali oa Jobo o ne a utloisitsoe bohloko ke mahlomola ao ba leng ka har’a ’ona eaba o re monna oa hae a rohake Molimo e le hore a ka shoa. Jobo le eena o ne a bona ho le molemo ho shoa ho feta ho phela empa ha aa ka a tlohela ho tšepahala. Kahoo, Satane o ile a tla ka leqheka le leng hape. O ile a sebelisa metsoalle e meraro ea Jobo. Metsoalle eo ea hae e ile ea mo chakela matsatsi a seng makae empa ha e-ea ka ea mo khothatsa. Ho e-na le hoo, e ile ea mo roba pelo. E ile ea senya Molimo lebitso ka hore ke eena ea baketseng Jobo mathata le hore Molimo ha a tsotelle hore na Jobo oa mo tšepahalla kapa che. Ea boela ea re Jobo o khopo le hore lintho tse mo hlahetseng lia mo tšoanela!​—Jobo 1:​13-22; 2:​7-11; 15:​4, 5; 22:​3-6; 25:​4-6. w19.02 4 ¶7-8

Re itsoela molemo haeba re tšaba Jehova. Mohlala, re lokela ho tšaba Jehova ka hore re hloee ho etsa lintho tseo a li hloileng. Hoja ebe Adama le Eva ba ne ba tšaba Jehova ka tsela ena, ba ka be ba ntse ba mo sebeletsa. Empa ba ile ba khetha ho se mo mamele. Ka mor’a moo, mahlo a bona a ile a tutuboloha kaha ba ile ba bona ka ho hlaka hore ke baetsalibe. Ba ile ba fetisetsa lefutso la sebe le lefu ho bana ba bona. Kaha ba ile ba bona kapa ba utloisisa boemo ba bona hantle, ba ile ba soaba ha ba bona hore ba feela eaba ba iketsetsa liaparo. (Gen. 3:​7, 21) Le hoja re lokela ho tšaba ho etsa lintho tseo Jehova a li hloileng, ha rea lokela ho tšaba ho shoa. Jehova o entse hore ho be le tsela ea hore re tle re fumane bophelo bo sa feleng. O tla re tšoarela haeba re bakela libe tsa rona. Jehova o nolofalloa ke ho re tšoarela hobane re e-na le tumelo sehlabelong sa Mora oa hae. Tsela eo re ka bontšang ka eona hore re na le tumelo ke ka hore re inehele ho Jehova re be re kolobetsoe.​—1 Pet. 3:​21. w19.03 5-6 ¶12-13

Baiseraele ba ne ba e-na le mabaka a mangata a ho leboha Jehova. Ka mor’a hore Jehova a otle Baegepeta ka Likotlo Tse Leshome, o ile a lokolla Baiseraele bokhobeng. O ile a boela a ba sireletsa Leoatleng le Lefubelu leo a ileng a timetsa lebotho la Baegepeta ho lona. Baiseraele ba ne ba thabile hoo ba ileng ba binela Jehova pina ea tlholo. Empa na ba ile ba lula ba ananela? Nakong eo Baiseraele ba neng ba thulana le mathata ba ile ba lebala tu! ka lintho tseo Jehova a ba etselitseng tsona. Ba ile ba bontša hore ha se batho ba ananelang. (Pes. 106:7) Joang? Bibele e re: “Phutheho eohle ea bara ba Iseraele ea qala ho korotlela Moshe le Arone.” Ha e le hantle ba ne ba koretlela Jehova. (Ex. 16:​2, 8) Ntho eo ba ileng ba e etsa e ile ea utloisa Jehova bohloko. Kahoo, o ile a re moloko oohle oa Iseraele o tla shoella lefeelleng ntle le Joshua le Kalebe.​—Num. 14:​22-24; w19.02 17 ¶12-13

Jesu ha aa ka a batla hore Sehopotso sa lefu la hae e be mokete oa semetletsahali. Empa o ile a bolella baleteli ba hae hore selemo le selemo ha ba ikhopotsa lefu la hae, ba se ke ba sebelisa lintho tse ngata le tse rarahaneng. (Joh. 13:​15; 1 Bakor. 11:​23-25) Tsela ena eo Jesu a ileng a re balateli ba hae ba etse lintho ka eona e ne e bontša hore ke motho ea ikokobelitseng. Rea thaba hore ebe Morena oa rona Jesu o ikokobelitse. (Bafil. 2:​5-8) Re ka bontša joang hore re ikokobelitsi joaloka Jesu? Ka hore re se ke ra inahana borona feela. (Bafil. 2:​3, 4) Nahana ka lintho tse ileng tsa etsahala bosiung ba ha Jesu a tla shoa. Jesu o ne a tseba hore o tl’o shoa lefu le sehloho, leha ho le joalo, o ne a amehile ka baapostola ba hae ba neng ba tl’o ba mahlomoleng ka lebaka la lefu la hae. Kahoo o ile qeta bosiu boo a ba ruta le ho ba khothatsa. (Joh. 14:​25-31) Ka ho etsa joalo, Jesu o ne a bontša hore o nahanela batho. Jesu ke mohlala o motle oo re ka o etsisang! w19.01 21 ¶5-6

Mohlomong u sehoa ke mala ha u tlameha ho araba. Ha se uena feela. Boholo ba rona re tšetšethoa ke letsoalo ha re tlameha ho araba. Letsoalo leo ha le bontše u le lekoala empa le bontša hore u ikokobelitse kaha u nka ba bang ba u phahametse. Ebile Jehova o rata batho ba ikokobelitseng. (Pes. 138:6; Bafil. 2:3) Empa o batla hore u mo rorise u be u khothatse balumeli-’moho le uena ka hore u arabe. (1 Bathes. 5:​11) Kholiseha hore oa u rata ebile u tla u thusa hore u be sebete. A re hlahlobeng Mangolo a Bibele a ka re thusang. Kaofela ha rona re etsa liphoso ha re bua. (Jak. 3:2) Ebile Jehova le bara le barali babo rona ha baa lebella hore re phethahale. (Pes. 103:​12-14) Baa re rata kaha re lelapa. (Mar. 10:​29, 30; Joh. 13:​35) Hape baa tseba hore ka linako tse ling leleme le ka thella. w19.01 8 ¶3; 10-11 ¶10-11

Matsatsing ana ha ho bonolo ho etsa joalo empa ha se hore ha ho khonehe. Jehova o batla hore u thabe, u atlehe u be u khotsofale bophelong ba hao. A ka u thusa hore u atlehe hona joale ha u ntse u le mocha le ha u se u holile. Ka mohlala, nahana ka pale ea ha Baiseraele ba kena Naheng e Tšepisitsoeng. Ha Baiseraele ba le haufi le ho kena Naheng e Tšepisitsoeng, Jehova ha aa ka a re ba nke libetsa tsa bona kapa ba ithute ho loana. (Deut. 28:​1, 2) Ho e-na le hoo, o ile a re ba lokela ho mamela litaelo tsa hae le ho mo tšepa. (Josh. 1:​7-9) Ho ea ka batho ho ne ho ka bonahala eka Jehova o bua ntho e sa utloahaleng. Empa ho mamela ho ile ha ba tsoela molemo kaha ba ile ba hlola Bakanana ka makhetlo. (Josh. 24:​11-13) Ke ’nete hore ho mamela Jehova ho thata hobane ho hloka tumelo empa ha re ka mamela re tla atleha kamehla. Taba ena ke ’nete e ke keng ea fetoha, e ntse e le bohlokoa le lena le holimo. w18.12 25 ¶3-4

Batho ba bang mehleng ena ba tlohetse ho sebeletsa Molimo hobane ba sa utloisise leseli le lecha leo litemana tse ling tsa Bibele li seng li utloisisoa kateng. Athe ba bang bona ha ba mamele Jehova ka ho ikamahanya le bakoenehi. Qetellong ba “suthela hole” le eena ebile ba tsoa ka hare ho mokhatlo oa hae. (Baheb. 3:​12-14) E ne e ka ba ho thabisang hoja ba ile ba e-ba le tumelo ho Jehova le mora oa hae Jesu joalokaha moapostola Petrose a ile a etsa. Bakreste ba bang ba khaotsa ho sebeletsa Molimo butle-butle ba bile ba sa hlokomele, ba joaloka sekepe se hoholehang ho tloha lebopong se ea ka metsing. Bibele e re ho etsa joalo ke ho “hoholeha.” (Baheb. 2:1) Ha motho a hoholeha ha a hlokomele, o fapana le motho ea khethang ho se mamele Molimo ka boomo. Le hoja motho enoa a sa hlokomele, kamano ea hae le Jehova eona e ntse e senyeha. w18.11 9 ¶5-6

Na u ka thabela ho rupeloa haholoanyane e le hore u sebeletse Jehova ka hohle kamoo u ka khonang? Haeba ho joalo, mohlomong u ka thabela ho ea Sekolong sa Baevangeli ba ’Muso. Sekolong seo bara le barali babo rona ba tšebeletsong ea nako e tletseng ba rupelloa ho thusa hohle moo mokhatlo o ba hlokang teng. Batho bohle ba tlatsang liforomo tsa ho ea sekolong seo, ba lokela ho ikemisetsa ho ea hohle moo ba isoang teng. Na u ikemiselitse ho sebeletsa Jehova ka tsela eo? (1 Bakor. 9:​23) Kaha re bahlanka ba Jehova re susumelletseha ho fana, ho rata batho le ho ba mosa ho bona. Re lokela ho bontša hore rea ba tsotella letsatsi le letsatsi. Ha re etsa joalo, re tla thaba ebile re tla ba le khotso. (Bagal. 5:​22, 23) Ho sa tsotellehe maemo a hao, u ka thaba ha u etsisa Jehova ka hore u fane le ka hore u sebetse ’moho le eena.​—Liprov. 3:​9, 10. w18.08 27 ¶16-18

Batho ba bang ba ka ’na ba botsa, ‘Na ho na le lebaka le utloahalang leo ka lona Mokreste a ka hlalang a ba a nyala kapa a nyaloa hape?’ Ha Jesu a hlalosa maikutlo a hae ka tlhalo o ile a re: “Mang kapa mang ea hlalang mosali oa hae ’me a nyala e mong oa feba, ’me oa mo siteloa, ’me haeba mosali, ka mor’a ho hlala monna oa hae, a nyaloa ke e mong, oa feba.” (Mar. 10:​11, 12; Luka 16:​18) Ha ho pelaelo hore Jesu o ne a hlompha lenyalo ebile o batla hore le rona re le hlomphe. Haeba monna a hlala mosali oa hae ea tšepahalang (kapa mosali a hlala monna oa hae ea tšepahalang) ka bolotsana ’me a nyala e mong oa feba. Sena ke ’nete hobane tlhalo ha e khaole lenyalo mahlong a Molimo. Ho ea ka eena, banyalani bao e ntse e le “nama e le ’ngoe.” Ntle ho moo, Jesu o ile a re monna ea hlalang mosali oa hae ea se nang molato o mo kenya tekong ea ho feba. Ka tsela efe? Ho latela kamoo bophelo bo neng bo le ka teng mehleng eo, mosali ea hlaluoeng o ne a ka lekeha hore a nyaloe e le hore ho be le motho ea mo fatelang metsuntsunyane. Lenyalo le joalo e ne e tla be e le la bofebe. w18.12 11 ¶8-9

Puisano eo Habakuke a bileng le eona le Jehova e ile ea mo khoba matšoafo, ke kahoo a ileng a ileng a ikemisetsa hore o tla mamella ho fihlela Jehova a nkile khato. Boikutlo boo ba hae e ne e se ba nakoana feela hobane ka makhetlo o ile a re: “Ke lokela ho letela ka khutso letsatsi la mahlomola.” (Hab. 3:​16) Re ithuta’ng mohlaleng oa Habakuke? Ntlha ea pele, ha rea lokela ho khaotsa ho rapela Jehova le ha re hlaheloa ke mathata. Ea bobeli, re lokela ho mamela Jehova ha a re tataisa ka Lentsoe la hae le ka mokhatlo oa hae. Ea boraro, re lokela ho mamella ka botšepehi ha re ntse re letetse hore Jehova a felise mathata a rona ka nako ea hae e loketseng. Haeba re lula re rapela Jehova re bile re mo mamela ha re ntse re letile ka botšepehi re tla lula re khobile matšoafo joaloka Habakuke e leng ntho e tla re thusa hore re mamelle. Ha re e-na le tšepo re tla mamella ’me re tla lula re thabile le har’a mathata. Tšepo e etsa re lumele hore Jehova o tla lokisa lintho ka nako e nepahetseng.​—Bar. 12:​12. w18.11 15-16 ¶11-12

Jehova o ikutloa joang ha re khopisa batho ba bang? Jesu o itse: “Mang kapa mang ea khopisang e mong oa ba banyenyane bana ba lumelang, ho ne ho tla ba molemo haeba leloala le kang le sothoang ke esele le ne le ka tlamelloa molaleng oa hae ’me a lahleloa ka leoatleng.” (Mar. 9:​42) Temana ena e bontša hore re lokela ho qoba ka hohle-hohle ho khopisa ba bang. Re lokela ho kholiseha hore Jehova le eena o ikutloa ka tsela e tšoanang kaha Jesu o nahana joaloka eena. (Joh. 14:9) Na re nahana joaloka Jehova le Jesu? Tsela eo re phelang ka eona e tla bontša. Mohlala, a re re tsela eo u aparang ka eona e khopisa batho ba bang ka phuthehong. Haeba re rata batho ba bang re tla qoba ho ba khopisa ka tsela eo re aparang ka eona. w18.11 25 ¶9-10

Ke hobane’ng ha kaofela ha rona re lokela ho tšepahala? U lokela ho tšepahala hobane Satane o entse qoso khahlanong le bobusi ba Jehova le hore re re ke ke ra lula re tšepahala. Lengeloi leo la lerabele le ile la senya Jehova lebitso ka hore ke ’Mopi ea khopo, ea inahanang boeena feela le ea sa tšepahaleng. Ka bomali-mabe, Adama le Eva ba ile ba lumela mashano ao a Satane, eaba ba hlanohela Jehova. (Gen. 3:​1-6) Ha ba le Edene, ba ne ba e-na le menyetla e mengata ea ho matlafatsa lerato la bona ho Jehova. Empa Satane o ile a ba leka ka nako eo lerato la bona le neng le sa tiea. Hamorao potso ena e ile ea botsoa hape: Na batho ba ka lula ba tšepahala ho Jehova Molimo hobane feela ba mo rata? Ka mantsoe a mang, na batho ba ka khona ho lula ba tšepahala? Potso ena e ile ea botsoa mehleng ea Jobo. (Jobo 1:​8-11) Jobo o ne a sa phethahala a bile a etsa liphoso joaloka rona. Empa Jehova o ne a rata tsela eo Jobo a neng a tšepahala ho eena ka eona. w19.02 3-4 ¶6-7

Papisong ena, Jesu o ile a bua ka mohoebi ea tsamaeang ea ileng a batla perela eaba oa e fumana e le ha a bontša bohlokoa ba ho fumana ’nete. Perela eo e ne e le ea bohlokoa haholo hoo ‘ka potlako a ileng a rekisa’ lintho tsohle tseo a neng a e-na le tsona e le hore a ka e reka. (Mat. 13:​45, 46) Ka tsela e tšoanang, ’nete eo re e tsebang ka ’Muso oa Molimo le Lentsoe la hae le lintho tseo re ithutileng tsona ho lona ke tsa bohlokoa haholo hoo re ileng ra tlameha ho tela lintho tsohle tsa rona e le hore re tsebe Molimo haholoanyane. Hafeela re utloisisa bohlokoa ba ’nete ena re ke ke ra e “rekisa.” (Liprov. 23:​23) Ka bomalimabe bahlanka ba bang ba Molimo ba ile ba iphapanyetsa ’nete ba ba ba qetella ka ho e rekisa. E se eka re ka qoba ho ba boemong bo tšoanang. E le ho bontša hore re ananela Lentsoe la Molimo ebile re le nka le le bohlokoa, re lokela ho mamela keletso ea lona e reng re ‘tsoele pele ho tsamaea ’neteng.’ (3 Joh. 2-4) Ho tsamaea ’neteng ho akarelletsa ho phela ka melao-motheo ea Bibele le ho phelela ho etsa thato ea Jehova. w18.11 9 ¶3

E ’ngoe ea litaelo tseo Baiseraele ba neng ba li fuoe e ne e le hore ba se ke ba hlasela Jeriko empa ba e pota-pote hanngoe ka matsatsi a tšeletseng ebe ka letsatsi la bosupa ba e pota ka makhetlo a supileng. Mohlomong ba ne ba bona eka taelo ena ha e na thuso ebile e ba senyetsa nako le matla. Empa Jehova o ne a tseba hantle hore na o etsa’ng. Qeto ena eo Jehova a ileng a etsa e ile ea sireletsa Baiseraele khahlanong le masole a matla a Jeriko ea ba ea matlafatsa tumelo ea bona.(Josh. 6:​2-5) Re ithuta’ng tlalehong ee? Ka linako tse ling ho ka ba thata hore re utloisise mabaka ao mokhatlo o etsang liphetoho ka ’ona. Mohlala, mohlomong qalong ha rea ka ra utloisisa hore na ke hobane’ng ha mokhatlo o ile oa etsa qeto ea hore re sebelise JW Library App ha re le tšimong, ha re ithuta moo re le bang le ha re le libokeng. Empa hona joale batho ba khonang ho li sebelisa ba bona bohlokoa ba tsona e le kannete. Ha re bona litla-morao tse thabisang ka lebaka la liqeto tseo mokhatlo o li entseng, tumelo ea rona ea matlafala ebile re ba le bonngoe ho sa tsotellehe lipelaelo tseo e ka ’nang eaba re ne re e-na le tsona pele. w18.10 23 ¶8-9

Lintho tseo batho ba neng ba li lebeletse ka Mesia, joaloka tseo barutuoa ba Jesu ba neng ba li lebelletse li ile tsa etsa hore batho ba batle ho etsa Jesu morena oa bona. Mohlomong ba ne ba lumela hore Jesu e ne e tla ba moeta-pele ea ikhethang. Kaha o ne a tseba ho ruta, a khona ho phekola ba kulang le ho fepa batho ba lapileng. Ka mor’a hore Jesu a fepe banna ba ka bang 5 000, o ile a hlokomela hore na ba ne ba ikutloa joang. “Ka hona Jesu, ka ho tseba hore ba haufi le ho mo tšoara hore ba mo etse morena, a boela a tloha a ea thabeng a le mong feela.” (Joh. 6:​10-15) Ho ka etsahala hore letsatsing le hlahlamang ha ba ntse ba le Leoatleng la Galilea batho ba ile ba nyahama. Kahoo Jesu o ile a ba hlalosetsa hore na ha e le hantle mosebetsi oa hae ke ofe. O ne a tletse ho tla ba ruta ka ’Muso oa Molimo eseng ho ba ruisa. O ile a re: “Le se ke la sebeletsa lijo tse senyehang, empa le sebeletse lijo tse lulang ho isa bophelong bo sa feleng.”​—Joh. 6:​25-27. w18.06 4 ¶4-5

Jesu o ne a nahanela batho ba nyahameng ba kang lehlaka le tletleraneng ba bile ba ka khoele ea lebone e lerootho ea folakse. Kahoo, o ile a ba mosa ’me a ba le mamello ha a ba thusa. (Mar. 10:​14) Le hoja rona re ke ke ra tšoana le Jesu ha re ruta, re lokela ho nahanela batho bao re kopanang le bona tšimong. Ho ba nahanela ho akarelletsa tsela eo re buang le bona ka eona, le nako eo re e qetang re bua le bona. Matsatsing ana batho ba ‘sohlokehile ’me ba qhalakane’ ka lebaka la bo-rakhoebo ba sehlooho, bo-ralipolotiki le baeta-pele ba bolumeli. (Mat. 9:​36) Ke kahoo batho ba bangata ba seng ba se na tšepo. Ka lebaka leo, ho bohlokoa ho khetha mantsoe ha re bua le bona re be re bue ka mosa. Ke ’nete hore batho ba bangata ba mamela molaetsa oa rona hobane ba batla ho ithuta Bibele empa ba khahloa ke hore rea ba nahanela le boitšoaro ba rona. w18.09 31-32 ¶13-14

Re lokela ho etsa’ng ho bontša hore re ela hloko tlhoko ea rona ea moea, kapa hore re batla ho ba le kamano e ntle le Molimo? Re lokela ho bala Bibele, ho mamela melao ea Molimo le ho etsa hore ho sebeletsa Molimo e be ntho e tlang pele bophelong ba rona. Ha re ka etsa joalo, re tla thaba haholoanyane. Tumelo eo re nang le eona ea hore litšepiso tsa Molimo li tla phethahala, e tla ba matla. (Tite 2:​13) Ntho ea bohlokoa haholo e tla re thusa ho lula re thabile ke ho ba metsoalle ea Jehova. Moapostola Pauluse o ile a re: “Kamehla thabang Moreneng. Ke tla boela ke re, Le thabe!” (Bafil. 4:4) E le hore re thabe ka tsela ena, re lokela ho ba bohlale. (Liprov. 3:​13, 18) Leha ho le joalo, e le hore re lule re thabile, re lokela ho phela tumellanong le lintho tseo re ithutang tsona Bibeleng. Jesu o ile a bontša hore ho bohlokoa ho etsa joalo. O ile a re: “Haeba le tseba lintho tsena, lea thaba haeba le li etsa.” (Joh. 13:​17;Jas. 1:​25) Ke eona ntho e ka sehloohong e tla re thusa ho lula re le metsoalle ea Jehova le ho lula re thabile. w18.09 18 ¶4-6

Epafrase o ne a tseba Bakreste-’moho le eena hantle a bile a ba rata haholo. Le hoja a ne a tšoeroe le Pauluse, ha aa ka a inahana boeena feela eaba o lebala Bakreste-’moho le eena. (Filem. 23) O ile a ba rapella a ba a ba bitsa ka mabitso lithapelong tsa hae. Le rona ha re ka etsisa Epafrase, lithapelo tseo re li etsang molemong oa Bakreste-’moho le rona li ka ba thusa haholo. (2 Bakor. 1:​11; Jak. 5:​16.) Le uena u ka nahana ka Bakreste-’moho le uena bao u ka ba rapellang u bile u ba bitsa ka mabitso. U ka rapella Bakreste-’moho le uena phuthehong ea heno ba imetsoeng ke mathata le bao ho nang le liqeto tsa bohlokoa tseo ba lokelang ho li etsa. U ka ba oa rapella le ba bang ba lekang ka matla ho qoba ho etsa lintho tse fosahetseng. Hape u ka rapella Bakreste-’moho le uena ba hlokahalletsoeng, bao linaheng tsa habo bona ho ileng ha e-ba le likoluoa tsa tlhaho kapa lintoa, le ba nang le mathata a lichelete. Hoa bonahala hore ho na le bara le barali babo rona ba bangata ba hlokang hore re ba rapelle. w18.09 5-6 ¶12-13

Pauluse o ne a sa re re lokela ho fana ka lintho tseo re nang le tsona feela, empa o ne a boetse a bua ka ho khothatsa, ho eletsa, le ho thusa batho ba bang. (Lik. 20:​31-35) Mantsoe a Pauluse le liketso tsa hae li re ruta kamoo re lokelang ho tela nako, matla a rona, ho tsotella batho ba bang le ho ba rata. Litsebi tse ngata li hlokometse hore ho fana ho etsa hore batho ba thabe. Buka e ’ngoe e re: “Batho ba bang ba re ba thaba haholo ka mor’a ho ba mosa ho batho ba bang.” Lipatlisiso li re ho fana ho bohlokoa kaha ho etsa hore re thabele bophelo. Ka ho tšoanang, litsebi li thoholetsa batho ba ithaopelang ho thusa sechaba kaha ho etsa joalo ho ba thusa hore ba phele hantle ba bile ba thabile. Batho ba amohelang hore Bibele ke Lentsoe la ntate ea lerato, ha ba makatsoe ke taba ena.​—2 Tim. 3:​16, 17. w18.08 22 ¶17-18

Moprofeta Esaia o ile a re Jesu Kreste “a ke ke a ahlola ka se bonahalang mahlong a hae, kapa a khalemela feela ho ea ka ntho e utloiloeng ke litsebe tsa hae.” Empa “o tla ahlola ba tlaase ka ho loka.” (Esa. 11:​3, 4) Mantsoe ana a re khothatsa haholo hobane re phela har’a batho ba nang le khethollo. Kahoo, re labalabela ho ba le morena eo moprofeta Esaia a buileng ka eena hore o tla ahlola lichaba ka toka. Kaha ha rea phethahala, re ke ke ra khona ho ahlola batho joaloka Jesu. Leha ho le joalo, letsatsi le letsatsi re lula re ahlola batho ba bang, re ba kala ka mahlo feela. Empa Jesu o ile a re re khaotse ho ahlola ka “ponahalo ea ka ntle,” empa a re re ahlole “ka kahlolo e lokileng.” Hoa hlaka hore Jesu o ne a batla hore re tšoane le eena ka hore re se ke ra ahlola batho ka maemo a bona. w18.08 8 ¶1-2

Ha se hore re utloa lentsoe la hae ka ho toba le tsoa leholimong ha a bua le rona. Empa o sebelisa Bibele ho bua le rona. Hape Jehova o sebelisa moea oa hae o halalelang ho thusa “motsamaisi ea tšepahalang” ho re fa lijo ka nako e tšoanetseng. (Luka 12:​42) Mokhatlo oa Jehova o re fa lingoliloeng, livideo le likhatiso tse rekotiloeng tse re thusang ho matlafatsa tumelo ea rona. Bibele e re thusa hore re kholisehe hore Jehova o tla felisa lintho tsohle tse bohloko tseo Satane a re baketseng tsona. A re ikemisetseng ho lula re mamela Jehova. Ha re etsa joalo, re tla khona ho mamella mathata ’ohle ao re tobanang le ’ona hona joale le ao re tla tobana le ’ona nakong e tlang. Bibele e re: “Ho hlokahala hore le be le mamello, e le hore, ka mor’a hore le etse thato ea Molimo, le ka amohela phethahatso ea tšepiso.”​—Baheb. 10:​36. w19.03 13 ¶17-18

Kaha Moshe e bile moeta-pele oa Iseraele ka nako e telele mohlomong Joshua o ne a ipotsa hore na e be sechaba seo se ne se tla mo mamela. (Deut. 34:​8, 10-12) Ha buka e ’ngoe e hlalosang Bibele e bua ka Joshua 1:​1, 2 e re: “Mehleng ea pele esita le hona joale ha ho e-ba le moeta-pele e mocha sechaba sea tšoha ’me sea ipotsa hore na e be se tla sireletseha.” Joshua o ne a e-na le mabaka a utloahalang a ho tšoha, empa matsatsi a seng makae hamorao o ile a etsa qeto e bontšang hore o ne a tšepa Jehova. (Josh. 1:​9-11) Bibele e bontša hore Jehova o ile a tataisa Joshua le Baiseraele a sebelisa lengeloi. Kahoo, re na le mabaka a utloahalang a ho lumela hore lengeloi leo e ne e le Lentsoe e leng Mora oa Molimo oa letsibolo.(Ex. 23:​20-23; Joh. 1:1) Jehova o ile a thusa Baiseraele hore ba mamele Joshua feela joalokaha ba ne ba mamela Moshe. w18.10 22-23 ¶1-4

Jehova o ela hloko batho ba ithaopelang ho mo sebeletsa, ebile o ngola mabitso a bona ‘bukeng ea hae ea khopotso.’ Ho na le lintho tseo re lokelang ho li etsa e le hore mabitso a rona a lule a le ka bukeng ea Jehova ea khopotso. Malakia o ile a re re lokela ho tšaba Jehova le ho nahanisisa ka lebitso la hae. Haeba re rapela mang kapa mang kapa ntho leha e le efe ntle le Jehova, mabitso a rona a tla hlakoloa ka har’a buka ea bophelo. (Ex. 32:​33; Pes. 69:​28) Kahoo, ho inehela ho Jehova, ha ho akarelletse feela ho mo tšepisa hore re tla etsa thato ea hae ’me re kolobetsoe. Tsena ke lintho tseo re li etsang hanngoe, empa ho sebeletsa Jehova ke ntho eo re lokelang ho e etsa bophelo bohle ba rona. Ho ema ka lehlakoreng la Jehova ho akarelletsa ho mo mamela le ho etsa lintho tseo a li ratang ka linako tsohle.​—1 Pet. 4:​1, 2. w18.07 23-24 ¶7-9

Taba ena ha e iketsahalle feela. Re lokela ho sebetsa ka thata hore re hole tsebong, e leng hore re lokela ho eketsa tsebo ea rona le kutloisiso ea rona ea Mangolo. Kahoo, re lokela ho bala Bibele letsatsi le letsatsi. (Pes. 1:​1-3) Na u ikemiselitse ho bala Bibele letsatsi le letsatsi? Ha u etsa joalo, u tla utloisisa melao le melao-motheo ea Jehova haholoanyane. Molao oa bohlokoa ka ho fetisisa ho Bakreste ke oa lerato. Jesu o ile a re ho balateli ba hae: “Bohle ba tla tseba ka sena hore le barutuoa ba ka, haeba le e-na le lerato har’a lōna.” (Joh. 13:​35) Ka Bibeleng lerato le bitsoa “molao oa borena.” (Jak. 2:8) Pauluse o ile a re: “Lerato ke phethahatso ea molao.” (Bar. 13:​10) Ha re makale ha re utloa hore lerato le bohlokoa hakana kaha Bibele e re “Molimo ke lerato.”​—1 Joh. 4:8. w18.06 19 ¶14-15

Moshe o ile a halefa le hoja Baiseraele ba ne ba sa fosetsa eena, ba ne ba foselitse Jehova. Ka lebaka la ho sitoa ho itšoara, o ile a bua a sa nahana ka litla-morao. Moshe o ile a lumella liketso tsa batho ba bang hore li mo sitise ho halaletsa lebitso la Jehova. Ha ba le Meriba ea pele, o ile a etsa lintho hantle. (Ex. 7:6) Kaha Moshe o sebetsane le Baiseraele ba likhathatso ka lilemo tse ngata, e ka ’na eaba o ne a khathetse a bile a tenehile. Na Moshe o ne a nahanne feela ka hore na o ikutloa joang, ho e-na le hore a tlotlise Jehova? Haeba moprofeta ea tšepahalang joalo o ne a ka hloleha ho tšepa Jehova, le rona re ka etsahalloa ke ntho e tšoanang. Joaloka Moshe, le rona re haufi le ho kena lefatšeng le lecha leo Jehova a re tšepisitseng lona. (2 Pet. 3:​13) Ha re batle ho lahleheloa ke monyetla oo. E le hore re tle re khone ho kena lefatšeng le lecha, re lokela ho lula re tšepa Jehova le ho etsa thato ea hae ka linako tsohle.​—1 Joh. 2:​17. w18.07 15 ¶14-16

Satane ha a re qobelle ho etsa lintho tseo re sa li batleng. (Jak. 1:​14) Batho ba bangata ba phethahatsa morero oa Satane ka lebaka la ho se tsotelle. Empa ka mor’a hore ba ithute Bibele, ba iketsetsa qeto ea hore na ba tla sebeletsa mang. (Lik. 3:​17; 17:​30) Haeba re ikemiselitse ho sebeletsa Molimo, ha ho letho leo Satane a ka le etsang ho re sitisa ho tšepahala. (Jobo 2:3; 27:5) Ho na le lintho tseo Satane le bademona ba ke keng ba khona ho li etsa. Mohlala, ha ho moo Bibele e reng ba ka bona lintho tse ka likelellong tsa rona kapa tse ka lipelong. Ke Jehova le Jesu feela ba nang le bokhoni boo. (1 Sam. 16:7; Mar. 2:8) Haeba re leka ka matla hore re bue lintho tse lumellanang le thato ea Molimo re bile re li phetha, re ka kholiseha hore Jehova a ke ke a lumella Diabolose hore a re utloise bohloko ba ka ho sa feleng. (Ps. 34:7) Re lokela ho tseba sera sa rona Diabolose, empa ho hang ha rea lokela ho mo tšaba. Ha Jehova a re tšehelitse, re ka hlola Satane le hoja re sa phethahala. Haeba re mo hanyetsa, o tla re baleha.​—Jak. 4:7; 1 Pet. 5:9. w18.05 26 ¶15-17

A re re u rera ho nka leeto ka bese ho ea moo u lokelang ho phetha lebaka la bohlokoa. Ha u fihla ka setopong, u fumana libese tse ngata. Empa u lokela ho palama bese e tla u isa moo u eang. Oa tseba hore haeba u ka palama bese esele, u tla lahleha. Mehleng ena, bacha ba batla ba le boemong bo tšoanang kaha thota e sa namme ka pel’a bona. Ka linako tse ling baa ferekana hobane ho na le menyetla e mengata ea hore na ba ka etsa’ng bophelong. Empa haeba bacha ba tseba hore na ba batla ho etsa’ng bophelong, ho tla ba bonolo hore ba etse qeto. Bacha, na le tla itjoetsa hore bophelong ba lona le tla ikemisetsa ho sebeletsa Jehova? Ho sebeletsa Jehova ho akarelletsa ho mo kopa hore a re tataise qetong e ’ngoe le e ’ngoe eo re e etsang. Mohlala, re lokela ho mo kopa hore a re tataise ha re etsa qeto ea hore na re tla ea sekolong kapa che, hore na re tla etsa mosebetsi ofe le hore na re tla nyala kapa re tla nyaloa. Ho boetse ho akareletsa ho etsa lintho tse tla re thusa ho lula re rata Jehova. Haeba bacha ba etsa joalo, Jehova o tla ba hlohonolofatsa. w18.04 25 ¶1-3

Jafeta o ile a phethahatsa tšepiso ea hae eaba o isa morali oa hae tabernakeleng e Shilo hore a il’o sebeletsa Jehova bophelo bohle ba hae.(Baahl. 11:​30-35) Moroetsana enoa o ile a lumela ho ea sebeletsa Jehova tabernakeleng bophelo bohle ba hae le hoja ho ka etsahala hore ebe ho ne ho se bonolo ho ea. (Baahl. 11:​36, 37) Ho etsa joalo ho ne ho bolela hore o ne a ke ke a nyaloa kapa a ba le bana. Kahoo, ntat’ae o ne a ke ke a hlola a e-ba le mojalefa. Ha se feela a neng a hloka ho khothatsoa. Bibele e re: “Ea e-ba molao oa tsamaiso Iseraele: Selemo le selemo barali ba Iseraele ba ne ba ea ho babatsa morali oa Jafeta Mogileade, matsatsi a mane ka selemo.” (Baahl. 11:​39, 40) Bakreste bao e leng masoha ba sebelisang nako e ngata eo ba nang le eona ba shebane le “lintho tsa Morena” le bona ba lokela ho babatsoa le ho khothatsoa.​—1 Bakor. 7:​32-35. w18.04 17 ¶10-11

Mangeloi a mangata a ile a rabela ’moho le Satane. Pele ho moroallo, Satane o ile a susumetsa a mang hore a kopanele liphate le barali ba batho. Ha Bibele e bua ka taba ena e tšoantša Satane le drakone e ileng ea hulanya karolo ea boraro ea linaleli tsa leholimo ’me tsa liheloa lefatšeng le eona. (Gen. 6:​1-4; Tšen. 12:​3, 4) Ha mangeloi ao a lahla lelapa la Molimo a ile a ba tlas’a taolo ea Satane. Leha ho le joalo, marabele ana ha se sehlopha sa batho ba morusu feela. Satane o iketselitse ’muso o tšoanang le oa Molimo ’me o ipehile hore e be morena oa oona. ’Musong oa hae o sa bonahaleng, Satane o hlophisitse bademona ka lihlopha ’me o ba file matla a hore ba buse lefatše. (Baef. 6:​12) Satane o sebelisa mokhatlo oa hae ho laola mebuso eohle ea lefatše. w18.05 23 ¶5-6

Kaha Jehova o re rata joaloka bana ba hae, oa re khalemela. Davida o ne a sa koate ha Jehova a mo khalemela. O ne a leka ho tseba hore na Jehova o nahana joang ebe o nahana joaloka eena a be a etse thato ea hae. Haeba u ka ba le maikutlo a tšoanang le a Davida, o tla rata Jehova le ho feta ebe u susumelletseha ho mo khahlisa. Jehova e tla ba motsoalle oa hao oa hlooho ea khomo. Morali’abo rona e mong ea bitsoang Christin o re: “Ha ke etsa lipatlisiso ebe ke nahanisisa ka lintho tseo ke li fumaneng, ke ee ke utloe eka Jehova o ne a li ngolla ’na.” Ha u e-na le kamano e ntle le Jehova, o tla u thusa haholo kaha u tla bona lintho ka tsela eo a li bonang ka eona. O etsa joalo hobane a batla hore u tsebe lintho tse tlang pele bophelong, u be bohlale ha u etsa liqeto hape u be le tšepo.​—Esa. 26:3. w18.12 26 ¶9-10