November

Ha re sebeletsa Jehova re kholisehile hore o tla re fa lintho tsohle tseo Adama le Eva ba li lahlileng, ho akareletsa le monyetla oa ho phela ka ho sa feleng. Adama le Eva ba ile ba hloleha ho sebeletsa Jehova hobane ba ne ba sa mo rate ka lipelo tsohle tsa bona. Leha ho le joalo, Jehova o ile a ba fa monyetla oa hore ba phele nako e telele e le hore ba be le bana ’me ba ba holise ho ea ka melao eo ba ipehetseng eona. Ho e-s’o ee kae, Adama le Eva ba ile ba khola litholoana tse bosula tsa qeto eo ba e entseng. Mora oa bona oa letsibolo o ile a bolaea moen’ae ’me ka mor’a nako e khutšoanyane, lefatše le ne le tletse ka batho ba ratang ntoa le ba ikhohomosang. (Gen. 4:8; 6:​11-13) Ho ntse ho le joalo, Jehova o ne a e-na le tsela eo a neng a tla pholosa bana ba Adama ba neng ba tla rata ho mo sebeletsa. (Joh. 6:​38-40, 57) Ha u ntse u ithuta ka Jehova, u tla mo rata le ho feta ha u hlokomela hore o na le mamello hape o lerato. U ke ke oa rata ho utloisa Jehova bohloko joaloka Adama le Eva empa u tla batla ho mo sebeletsa. w19.03 2 ¶3; 4 ¶9

E le hore u nahanele batho u lokela leka ho ikenya lieteng tsa beng ka uena le Bakreste-’moho le uena. Iphe nako ea ho qoqa le bacha ka phuthehong, ea ho etela ba kulang le ba holileng, hammoho le ba oeleng ka phatla. Ba botse hore na ba ntse ba e-ea joang. Ebe u ba mamela ka hloko ha ba itlhalosa. Ba bontše hore u fela u ba utloela bohloko. Ithaopele ho ba thusa moo u ka khonang. Ha re etsa lintho tsena re bontša hore re rata bara le barali babo rona. (1 Joh. 3:​18) Ke hobane’ng ha re lokela ho tenyetseha le maemo ha re thusa batho? Hobane batho ba sebetsana le mathata ka litsela tse fapaneng. Batho ba bang ba khona ho bua ka mathata a bona, ha ba bang ba le leqe ho etsa joalo. Le hoja re batla ho ba thusa, re lokela ho qoba ho ba botsa lipotso tse ka etsang hore ba hlajoe ke lihlong. (1 Bathes. 4:​11) Esita le ba khonang ho bua, ho ka ’na ha etsahala hore re se ke ra lumellana le lintho tse itseng tseo ba li buang. Kahoo, re lokela ho lula re hopola hore ao ke maikutlo a bona. Re lokela ho potlakela ho mamela, empa re liehe ho bua.​—Mat. 7:1; Jak. 1:​19. w19.03 19 ¶18-19

Na u ee u utloe o tšetšethoa ke letsoalo ha u tlameha ho bua ka molaetsa oa Bibele? Hopola mohlala oa Nehemia ea neng a sebetsa ntlong ea morena. O ne a utloile bohloko haholo hobane o ile a utloela hore marako a Jerusalema le keiti ea eona li ne li senyehile. (Neh. 1:​1-4) U se u ka inahanela hore na o ile a otloa ke letsoalo hakae ha morena a mo botsa hore na ke hobane’ng a sa thaba. O ile a rapela kapele eaba oa mo araba. Ka mor’a moo, morena o ile a etsa lintho tse ngata e le hore a thuse sechaba sa Molimo. (Neh. 2:​1-8) Athe Jonase eena o ile a baleha ha Jehova a mo roma hore a il’o bolella batho ba Ninive molaetsa oa hae. (Jon. 1:​1-3) Empa Jehova o ile a mo thusa hore a phethe mosebetsi oo. Molaetsa oa hae o ile oa pholosa Baninive. (Jon. 3:​5-10) Mohlaleng oa Nehemia re ithuta hore re lokela ho rapela pele re ka araba. Ho oa Jonase teng re ithuta hore Jehova a ka re thusa hore re be sebete. w19.01 11 ¶12

Ha re phela ka tsela eo Bibele e reng re lokela ho phela ka eona, batho bao re ba ratang ba ka re hloboha. Ke hobaneng ha ba re hloboha? Ha Jesu a rapella taba ena o ile a re: “Ba halaletse ka ’nete; lentsoe la hao ke ’nete.” (Joh. 17:​17) Ho ‘halaletsoa’ hoo ho buuoang ka hona temaneng ena ho ka boela ha bolela ho arola. Ha re phela ka melao-motheo ea Bibele, re aroha ho bona hobane ha re sa etsa lintho ka tsela e tšoanang le ea bona. Kaha re se re phelela ho etsa thato ea Molimo batho baa re fetohela. Esita le ba malapa a rona le metsoalle ea rona ba ka ’na ba re hanyetsa ka lebaka la lintho tseo re li lumelang le hoja sepheo sa rona e se ho qabana le batho. Empa taba ena ha e re makatse hobane Jesu o ile a re: “Ka sebele, lira tsa motho e tla ba batho ba ntlo ea hae.” (Mat. 10:​36) Litaba tse monate ke hore o ile a re tiisetsa hore melemo eo re tla e fumana e tla ba mengata ho feta lintho tseo re li telang. w18.11 6 ¶11

Moapostola Pauluse le eena o ile a bontša hore o rata Bakreste-’moho le eena ka lintho tseo a neng a li bua ka bona. O ne a leboha Jehova ka bona lithapelong tseo a neng a li etsa ha a le mong. O ne a boetse a etsa hore ba tsebe hore na ba bohlokoa hakae ha a ba ngoletse. Mohlala, ho Baroma khaolo ea 16 litemaneng tse 15 tse qalang, moapostola Pauluse o buile ka Bakreste-’moho le eena ba 27 a ba bitsa ka mabitso. Ka ho khetheha o ile a re Priska le Akuila ba ile ba ‘ipeha kotsing’ bakeng sa hae eaba o re Fibi e bile “mosireletsi oa ba bangata” ho akarelletsa le eena. O ile a babatsa Bakreste-’moho le eena bao ba ratehang. (Bar. 16:​1-15) Pauluse o ne a tseba hore Bakreste-’moho le eena ha baa phethahala empa o ile a bua haholo ka makhabane a bona. U se u ka inahanela hore na Bakreste bao ba ile ba khothala hakaakang ha lengolo leo Pauluse a neng a le ngotse le balloa phutheho. Ka lebaka leo, ho ka etsahala hore ebe setsoalle sa bona le moapostola Pauluse se ile sa e-ba matla le ho feta. Na nako le nako u lula u leboha bara le barali beno ka lintho tse molemo tseo ba li etsang le tseo ba li buang? w19.02 16 ¶8-9

Na u nahana hore re lokela ho phethahala e le hore re lule re tšepahala? U ka ’na oa lumela joalo hobane u nka hore re etsa liphoso hangata. Ha rea lokela ho tšoha kaha Jehova ha a lule a shebile liphoso tsa rona. Bibele e re: “Haeba u ne u talima liphoso, Jah, Jehova, ke mang ea neng a ka ema?” (Pes. 130:3) Jehova oa tseba hore ha rea phethahala, re etsa liphoso ’me o re tšoarela ka bolokolohi. (Pes. 86:5) Hape Jehova o tseba mefokolo ea rona, kahoo ha a lebella hore re etse lintho tseo re ke keng ra li khona. (Pes. 130:12-14) Ntho e ka sehloohong e ka re thusang ho tšepahala ke lerato. Re lokela ho rata Jehova, re be re inehele ho eena ka ho feletseng. Haeba re etsa joalo esita le ha re e-na le mathata, re tla be re bontša hore rea mo tšepahalla. (1 Likron. 28:9; Mat. 22:​37) Re tseba melao eo Jehova a e behileng, ’me re batla ho etsa ka hohle ho mo khahlisa. Kaha re rata Molimo, kamehla re nahana ka eena pele re etsa liqeto. Ka tsela ena, re bontša hore rea tšepahala. w19.02 3 ¶4-5

Nako le nako ha re hlokomela melemo ea ho etsa lintho tse nepahetseng, tumelo ea rona ea matlafala. (Jak. 1:​2, 3) Rea thaba hore ebe Jehova o ikotla sefuba ka rona, kahoo re mo thabisa le ho feta. (Liprov. 27:​11) Mathata a re fa monyetla oa ho bontša hore rea mo tšepa le hore re batla ho mo sebeletsa ka pelo eohle. (Pes. 119:​113) Hape a re thusa ho bontša hore rea mo rata le hore re batla ho etsa thato ea hae. (1 Mar. 8:​61) Na ho bolela hore re ke ke ra etsa liphoso? Che! Hobane ha rea phethahala. Ha re etsa liphoso re ka hopola mohlala oa Morena Ezekiase. O ile a etsa liphoso empa a baka eaba o tsoela pele ho sebeletsa Jehova “ka pelo e feletseng.” (Esa. 38:​3-6; 2 Likron. 29:​1, 2; 32:​25, 26) Kahoo, ha rea lokela ho lumella Satane hore a silafatse lipelo tsa rona. Re lokela ho kopa Jehova hore a re fe “pelo e mamelang” e le hore re ka lula re mo tšepahalla.​—1 Mar. 3:9; Pes. 139:​23, 24. w19.01 18-19 ¶17-18

Re rua molemo ha re arabela ka libokeng. (Esa. 48:​17) Ka tsela efe? Taba ea pele, re tlameha ho lokisetsa hantle e le hore re arabele. Haeba re etsa joalo re tla tseba Lentsoe la Molimo hantle. Ha re le tseba re tla khona ho etsa thato ea hae. Ea bobeli, liboka li tla re natefela. Ea boraro ke hore pele u araba oa nahanisisa, kahoo u ke ke oa lebala karabo eo habonolo. Hape re thabisa Jehova ha re bua ka tumelo ea rona. Re lokela ho kholiseha hore Jehova oa mamela ha re araba ebile o ananela likarabo tsa rona haholo. (Mal. 3:​16) O bontša kananelo eo ka hore a re hlohonolofatse. (Mal. 3:​10). Kahoo, re na le mabaka a utloahalang a hore re arabe ha re le libokeng. w19.01 8 ¶3; 9-10 ¶7-9

Jehova o bohlale haholo ha a sebetsana le bahlanka ba hae. Ho e-na le ho re fa letoto la melao, ka mamello o re thusa hore re mamele molao oa lerato. O batla hore re mamele melao-motheo ea hae re be re hloee lintho tse fosahetseng. Litaba tseo Jesu a li buileng ho Matheu 5-7 ke mohlala oa taba ena kaha li re thusa ho qoba lintho tse ka etsang hore re etse liphoso. (Mat. 5:​27, 28) Kaha ke eena ea tla busa ’Musong oa Molimo, o tla re thusa hore re nahane joaloka eena. (Baheb. 1:9) O tla boela a etse hore re phethahale. Nahana feela u se u phela u se na sebe, u se u e-na le “tokoloho” eo Jehova a e tšepisitseng. (Bar. 8:​21) Bolokolohi ba rona bo tla tataisoa ke ho rata Molimo le batho ba bang. Le rona re tla lokoloha ka botlalo haeba re rata Molimo le batho.​—1 Joh. 4:​7, 8. w18.12 23 ¶19-20

Monna oa Moiseraele o ne a ka hlala mosali oa hae haeba a “fumane ntho e sa hlompheheng ho eena.” Ha ho moo Molao o bolelang hore na ntho eo “e sa hlompheheng” ke eng. E tlameha e be e ne e le ntho e hlabisang lihlong kapa e tebileng, e seng phosonyana e sa reng letho. (Deut. 23:​14) Ka masoabi, mehleng ea Jesu batho ba bangata ba ne ba hlala “ka lebaka leha e le lefe.” (Mat. 19:3) Ho hang ha re batle ho tšoana le bona. Moprofeta Malakia o ile a hlalosa maikutlo a Molimo ka tlhalo. Mehleng eo, e ne e le ntho e tloaelehileng hore banna ba lohe mano a ho hlala ‘basali ba bocha ba bona,’ mohlomong e le hore ba nyale basali ba bacha ba bahetene. Malakia o ile a hlalosa maikutlo a Molimo ha a re: “O hloile tlhalo.” (Mal. 2:​14-16) Sena se nyallana hantle le mantsoe ao Molimo a ileng a a bua ho Adama ha a re: “[Monna] a khomarele mosali oa hae ’me e tla [be] nama e le ’ngoe.” (Gen. 2:​24) Jesu o ne a bona litaba hantle joaloka Ntate oa hae ’me a re: “Seo Molimo a se kopantseng hammoho ho se ke ha e-ba le motho ea se arolang.”​—Mat. 19:6. w18.12 11 ¶7-8

Ho na le bara le barali babo rona bao maemo a bona a ba lumellang hore ba fallele moo ho hlokehang bahoeletsi. Ba ikutloa joaloka moprofeta Esaia. Ha Jehova a re: “Ke tla roma mang, ’me ke mang ea tla ea bakeng sa rona?” Esaia o ile a mo araba a re: “Ke ’na enoa! Roma ’na.” (Esa. 6:8) Le rona re lokela ho ikemisetsa ho etsisa Esaia ka hore re thuse mokhatlo oa Jehova. U ka kenya letsoho joang? Ha Jesu a bua ka mosebetsi oa ho bolela ka ‘Muso le ho etsa batho barutuoa o ile a re: “Ka hona, le kope Mong’a kotulo hore a romele basebetsi kotulong ea hae.” (Mat. 9: 38) Mohlomong u ka ba pula-maliboho e le hore u sebetse moo ho hlokehang bahoeletsi. Kapa u ka thusa motho e mong ho etsa joalo. Bara le barali babo rona ba bangata ba re tsela ea ho bontša hore re rata Jehova le moahelani ke hore re sebetse re le bo-pula-maliboho moo ho hlokehang bahoeletsi. Na ho na le litsela tse ling tseo ka tsona re ka eketsang nako eo re e qetang re sebeletsa Jehova? Re tla thaba haeba re etsa joalo. w18.08 27 ¶14-15

Likosepele li re thusa ho utloisisa tsela eo Jehova a ikutloang ka eona ka ho ba le chelete. Ha a khetha lelapa le tla holisa mora oa hae, o ile a khetha le se nang chelete. (Lev. 12:8; Luka 2:​24) Ka mor’a hore Jesu a hlahe Maria o ile a mo “beha ka sejelong, kahobane ba ne ba se na sebaka ka kamoreng ea ho phomola.” (Luka 2:7) Jehova a ka be a ile a etsa hore ho be le libaka tse ngata tseo mora oa hae a ka behoang ho tsona ha a qeta ho hlaha hoja a ne a batla. Empa ha aa ka etsa joalo hobane ntho ea bohlokoa e ne e le hore a holisoe ke batho ba ratang Molimo. Pale ena e re ruta hore na Jehova o ikutloa joang ka ho rata chelete. Batsoali ba bang ba khothalletsa bana ba bona ho rata chelete ho feta ho rata Jehova. Empa Jehova eena o re ntho ea bohlokoa ka ho fetisisa ke hore re be le kamano e ntle le eena. Na u nahana joaloka Jehova tabeng ee? Liketso tsa hao ke tsona tse tla bontša. w18.11 24 ¶7-8

Kaha Jehova ke Molimo ea thabileng, o batla hore le rona re thabe ebile o re thusa ka litsela tse ngata hore re thabe. (Deut. 12:7; Moek. 3:​12, 13) Leha ho le joalo, mehleng ena ho ka ba thata hore re thabe. Hobane’ng? Ho na le lintho tse ka re sitisang ho thaba, tse kang ha motho eo u mo ratang a hlokahala kapa a khaoloa, ha lenyalo le qhalana kapa ha mosebetsi o fela. Ntho e ’ngoe e ka re sitisang ho thaba ke ha ho se na khotso ka lapeng hobane litho tsa lelapa li lula li qoaketsana. Hape re ka utloa bohloko ha re sonngoa ke basebetsi-’moho le rona kapa bana bao re kenang sekolo le bona le ha re kenngoa teronkong hobane re sebeletsa Molimo. Re ka boela ra sitoa ho thaba hobane re kula hampe, re tšoeroe ke lefu le sa phekoleheng kapa re tepeletse maikutlong. Empa hopola hore Jesu ke “ea thabileng le eo e leng eena feela ’Musi ea Matla a Maholo.” O ne a rata ho tšelisa batho le ho etsa hore ba thabe. (1 Tim. 6:​15; Mat. 11:​28-30) Lengolong la Matheu khaolo ea 5, Jesu o ile a bua ka lintho tse ’maloa tse ka re thusang hore re thabe le ha re hlaheloa ke mathata. w18.09 17-18 ¶1-3

Ho ka ba thata hore re tele setso le meetlo ea rona e le hore re khahlise Molimo. (Liprov. 23:​23) Maemong a mang le ha motho a ka lumela hore ntho eo a ithutang eona ke ’nete, ho ba thata hore a e tlohelle ka lebaka la ho tšaba batho bao ba amanang le bona, basebetsi ’moho, ba malapa kapa metsoalle ea bona. Boemo bona bo ka ba thata le ho feta ha motho a hlokahaletsoe. Empa mehlala ea batho ba bang e ka re thusa hore re be sebete ha re le maemong ana. Bakreste ba Baefese ba sa tsoa sokoloha ba neng ba lula Efese ba ne ba tla thusoa ke’ng hore ba tlohelle boselamose ’me ba reke ’nete? Bibele e re: “Ka sebele, ba bokella libuka tsa bona ’me ba li chesa ka pel’a bohle. Ba kopanya theko ea tsona ’me ba fumana li ka rekoa ka likotoana tsa silevera tse likete tse mashome a mahlano.” (Lik. 19:​19, 20) Bakreste bana ba tšepahalang ba ile tela boselamose ’me ba reka ’nete, kahoo Jehova o ile a ba hlohonolofatsa haholo. w18.11 7 ¶15-16

Ka mor’a hore Baiseraele ba tšele noka ea Jordane, Joshua o ile a kopana le monna eo a neng a sa mo tsebe a tšoere sabole ka letsoho. O ile a makala ha monna eo a itlhalosa hore ke “khosana ea lebotho la Jehova” ’me o ne a tl’o ba sireletsa. (Josh. 5:​13-15) Lengeloi le ile la fa Joshua litaelo tse hlakileng tsa hore na a etse’ng e le hore a tle a hape motse oa Jeriko. Qalong tse ling tsa litaelo tseo a ileng a li fuoa li ne li bonahala eka ha li na thuso. Ka mohlala, Jehova o ile a mo laela hore a bolotse banna bohle, e leng ntho e neng e tla etsa hore ba sitoe ho itšireletsa ka matsatsi a seng makae. (Gen. 34:​24, 25; Josh. 5:2) Banna bao ba ne ba ipotsa hore na ba ne ba tla khona ho sireletsa ba malapa a bona khahlanong le ba lireng. Ho sa le joalo, ba ile ba utloa litaba tseo ba neng ba sa li lebella tsa hore Jeriko ‘e ne e koetsoe ka thata ka lebaka la bona.’ (Josh. 6:1) Ha ho pelaelo hore ba ile ba tšepa Jehova le ho feta ’me tumelo ea bona ea matlafala ha ba bona kamoo a ba thusang kateng. w18.10 23 ¶5-7

Re ka etsa’ng hore re ikokobetse joaloka Pauluse? Ha rea lokela ho lebella kapa ho lumela ho rorisoa ka tsela e fetelletseng ka lintho tseo Jehova a re fileng matla a ho li etsa. Hape, e mong le e mong o lokela ho ipotsa: ‘Ke na le maikutlo afe ka batho bao ke ba bolellang litaba tse molemo? Na ho na le batho ba morabe o itseng bao ke eeng ke utloe ke sa ba rate?’ Lefatšeng lohle Lipaki Tsa Jehova li tsamaea hohle li ntse li batla batho ba ka thabelang ho ithuta Bibele. Ho na le merabe e meng eo batho ba e khellang fatše. Ka linako tse ling Lipaki Tsa Jehova li ka lokela ho ithuta lipuo tsa batho ba merabe eo e le hore li ba bolelle litaba tse molemo. Leha ho le joalo, ha ho mohla li lokelang ho inka li le betere ho feta batho bao. Li lokela ho utloisisa e mong le e mong oa bona e le hore li khone ho ba ruta molaetsa oa Molimo ka tsela e tla ama lipelo tsa bona. w18.09 5 ¶9, 11

Baroma ba ile ba bolaea Judase. Ho fapana le Judase le marabele a mang, Bajuda ba bang ba ne ba lebeletse ho tla ha Mesia, eo ba neng ba nahana hore o tl’o ba lokolla pusong e hatellang ea Roma le ho ba etsa sechaba se matla. (Luka 2:​38; 3:​15) Batho ba bangata ba ne ba lumela hore Mesia o ne a tla hloma ’muso naheng ea Iseraele. Ka lebaka leo, Bajuda ba neng ba lula libakeng tse ling, ba ne ba e-na le tšepo ea hore ba tla khutlela naheng ea habo bona. Johanne mokolobetsi o ile a botsa Jesu a re: “Na u Ea Tlang, kapa re lokela ho lebella ea fapaneng?” (Mat. 11:​2, 3) E ka ’na eaba Johanne o ne a batla ho tseba hore na ebe ho na le motho e mong ea neng a tla lokolla Bajuda bao. Barutuoa ba babeli ba neng ba le tseleng e eang Emmause ba ile ba kopana le Jesu ea tsositsoeng bafung. Ba ne ba e-na le tšepo ea hore Mesia o ne a tla lokolla Bajuda. (Luka 24:​21) Ka mor’a nakoana baapostola ba ile ba botsa Jesu: “Morena, na u khutlisetsa ’muso ho Iseraele nakong ee?”​—Lik. 1:6. w18.06 4 ¶3-4

Re lokela ho ba hlokolosi ha ho buuoa hampe ka batho ba Jehova. Ha rea lokela ho lebala hore Satane o qosa bahlanka ba Jehova ba tšepahalang. (Tšen. 12:​10) Kahoo, ha Jesu a bua ka bahanyetsi ba rona o ile a re ka “leshano ba bua ntho ea mofuta o mong le o mong e khopo” ka rona. (Mat. 5:​11) Haeba re ikemiselitse ho mamela temoso eo, re ke ke ra tšoha ha ho buuoa hampe ka batho ba Jehova. Na u rata ho romellana melaetsa le metsoalle ea hao kapa le batho bao u sebetsang le bona? Haeba ho joalo, mohlomong ha u utloa ntho e itseng litabeng kapa u utloa batho ba bua ka eona, u batla ho ba motho oa pele ea bolellang ba bang ka eona. Leha ho le joalo, pele u romela molaetsa ipotse lipotso tse kang, ‘na taba ee eo ke batlang ho e romella ba bang ke ’nete? Na ke tseba lintlha tse feletseng ka eona?’ Haeba u sa kholiseha hantle, u ka qetella u jetse mashano har’a Bakreste-’moho le uena u sa hlokomele. Kahoo, ho ka ba molemo hore u se ke oa romella molaetsa oo. w18.08 3 ¶3; 4 ¶6-7

Jesu o batla re be le thabo e tlisoang ke ho fana. Batho ba bangata ba thabela ho fuoa. Ke ’nete hore ha se batho bohle ba ananelang ha re fana. Empa ha batho ba bang ba hlokomela boiteko boo re bo etsang, re tla ba susumelletsa hore le bona ba fane. Kahoo u ’ne u tsoele pele ho fana ho sa tsotellehe hore na batho baa ananela kapa che. U ke ke ua tseba hore na ke neng ho fana ho tla tsoela motho e mong molemo. Batho ba tloaetseng ho fana ha ba fane feela hobane ba lebeletse hore le bona ba tle ba fuoe. Jesu o ile a re: “Ha u lokisetsa mokete, u meme mafutsana, ba hlotsang, ba holofetseng, ba foufetseng; ’me u tla thaba, hobane ha ba na letho leo ba ka u buseletsang ka lona.” (Luka 14:​13, 14) Bibele e re ea “mosa o tla hlohonolofatsoa.” E boetse e re: “Ho thaba mang kapa mang ea nahanelang motho ea tlaase.” (Liprov. 22:9; Pes. 41:1) Re tla thaba haeba re ikemiselitse ho thusa batho ba bang. w18.08 21-22 ¶15-16

Mehleng ena, ho thata ho fumana lintlha kaofela kaha boholo ba tsona ke leshano, ha tse ling li tsoaka ’nete le leshano. Lebaka le leng ke hore ha rea phethahala. Re ka thusoa ke eng? Re lokela ho tseba melao-motheo ea Bibele re be re e sebelise. Molao-motheo o mong o re ke booatla ho araba taba pele re utloa lintlha kaofela. (Liprov. 18:​13) O mong oona o re se ke ra amohela taba feela ntle ho mabaka a utloahalang. (Liprov. 14:​15) Ho sa tsotellehe hore na re na le nako e telele hakae re le Bakreste, ha rea lokela ho etsa lintho ho ea kamoo re li utloisisang kateng. Melao-motheo e ka re thusa haeba re batla ho tseba lintlha kaofela ho tsoa mehloling e tšepahalang e le hore re etse liqeto tse nepahetseng. w18.08 7 ¶19

Ha re kolobetsoa, re bontša phatlalatsa hore re file Jehova bophelo ba rona ’me re rata ho etsa thato ea hae le ho ikokobelletsa eena. Jesu o ile a etsa ntho e tšoanang ha a ne a kolobetsoa kaha o ile a re ho Jehova: “Ke thabetse ho etsa thato ea hao, Molimo oa ka.” (Pes. 40:​7, 8) Jehova o ile a etsa’ng ka mor’a hore Jesu a kolobetsoe? Bibele e re: “Ka mor’a hore Jesu a kolobetsoe kapele-pele a nyoloha a tsoa ka metsing; ’me, bonang! maholimo a buleha, ’me a bona moea oa Molimo o theoha joaloka leeba o tla holim’a hae. Bonang! Hape, ha e-ba le lentsoe le tsoang maholimong le reng: ‘Enoa ke Mora oa ka, ea ratoang, eo ke mo amohetseng.’ ” (Mat. 3:​16, 17) Le hoja Jesu e ne e le mora oa Molimo, Jehova o ile a thaba haholo ha a mo bona a etsa thato ea Hae ka ho feletseng. Ka ho tšoanang, Jehova o thaba haholo ha re inehela ho eena ’me o tla re hlohonolofatsa.​—Pes. 149:4. w18.07 23 ¶4-5

Ha Moshe a sebelisa seemeli “re,” e ka ’na eaba o ne a bua ka eena le Arone. Mantsoe ao a hae a ne a hlompholla Jehova hobane ke Eena ea mo fileng matla a ho etsa mohlolo oo. Taba ena e totobala haholo ha re bala Pesaleme ea 106:​32, 33 e reng: “Ba baka khalefo metsing a Meriba, hoo lintho li ileng tsa tsamaela Moshe hampe ka lebaka la bona. Etsoe ba ile ba utloisa moea oa hae bohloko a qala ho bua ka lepotlapotla ka molomo oa hae.” (Num. 27:​14) Ho sa tsotellehe hore na lebaka e ne e le lefe, liketso tsa Moshe li ile tsa etsa hore batho ba se ke ba rorisa Jehova. Ha Jehova a bua le Moshe le Arone, o ile a re: “Le fetohetse taelo ea ka.” (Num. 20:​24) Ba ne ba entse sebe se tebileng. Pejana, Jehova o ile a thibela Baiseraele bohle ho kena naheng ea Kanana ka lebaka la borabele ba bona. (Num. 14:​26-30, 34) Ke ho utloahalang hore ebe Jehova o ile a fa Moshe kotlo ka lebaka la borabele ba hae. Ha aa ka a kena Naheng e Tšepisitsoeng. w18.07 14 ¶9, 12; 15 ¶13

Na re lokela ho tsitlella ho noa joala le haeba ho etsa joalo ho ka khopisa Bakreste-’moho le rona? Che! Batho ba bang e ne e le makhoba a joala, empa hona joale kaha ba se ba ithutile Bibele ha ba sa le joalo. Ha rea lokela ho etsa hore ba ikutloe ba batla ho khutlela mekhoeng ea bona ea pele. (1 Bakor. 6:​9, 10) Kahoo, haeba re memme Mokreste-’moho le rona lapeng la rona ’me a sa batle ho noa joala, ha rea lokela ho mo qobella. Ha Timothea a le lilemo li ka bang 20, o ile a lumela ho bolotsoa le hoja ho etsa joalo ho ne ho le bohloko. O ne a tseba hore Bajuda bao a neng a lokela ho ba bolella litaba tse molemo ba ne ba nka lebollo le le bohlokoa. Timothea o ne a tšoana le Pauluse ka hore le eena o ne a sa batle ho khopisa mang kapa mang. (Lik. 16:3; 1 Bakor. 9:​19-23) Na joaloka Timothea, u ikemiselitse ho itella batho ba bang? w18.06 18-19 ¶12-13

Jehova ke eena ea hulang batho ba lipelo li ntle hore e be bahlanka ba hae. (Joh. 6:​44) Ha u qala ho kopana le motho ea sa sebeletseng Jehova ha ho na letho leo u le tsebang ka eena ntle le hore na o shebahala joang. Empa ha u kopana le motho eo u sa mo tsebeng ea sebeletsang Jehova, ho na le lintho tse ngata tseo u seng u ntse u li tseba ka eena, le eena ho na le tseo a li tsebang ka uena. Le ha ekaba u tsoa naheng e ’ngoe, ke oa morabe o mong kapa setso se seng. Mohlala, oa tseba hore na o ikutloa joang ka ho etsa thato ea Jehova. Hape oa tseba hore na o lumela’ng, o ikutloa joang ka litaba tsa boitšoaro, ka bokamoso, le ka lintho tse ling tse ngata. Lintho tsena ke tsa bohlokoa hobane li etsa hore u tšepe motho eo. Ke tsona tse ka u thusang hore u mo etse motsoalle oa hao. w18.12 21 ¶9-10

Jesu o ile a thusa sehlopha se busang hore se etse qeto e hlakileng ea hore Bakreste bao e seng Bajuda ho ne ho sa hlokahale hore ba bolle. (Lik. 15:​19, 20) Empa lilemo ka mor’a hore ho etsoe qeto eo, Bajuda ba bangata ba ne ba ntse ba tsoela pele ho bolotsa bana ba bona. Re ka ’na ra ipotsa hore na ke hobane’ng ha Jesu a ile a lumella taba ena hore e lule e sa rarolloa ka nako e telele le hoja lefu la hae le ne le se le nketse molao oa Moshe sebaka. (Bakol. 2:​13, 14) Kaha mahlo ha a bonele hong, batho ba bang ba nka nako ho utloisisa liphetoho tse entsoeng. Ho ile ha nka nako hore Bakreste ba Bajuda ba utloisise taba ea lebollo hantle. (Joh. 16:​12) Ba bang ba bona ba ile ba thatafalloa ho utloisisa taba ea hore lebollo ha esale letšoao le bontšang hore motho o na le kamano e ntle le Jehova. (Gen. 17:​9-12) Athe ba bang bona ba ne ba tšaba hore Bajuda ba tla ba hlorisa. (Bagal. 6:​12) Leha ho le joalo, ha nako e ntse e e-ea Kreste o ile a ba tataisa a sebelisa moapostola Pauluse.​—Bar. 2:​28, 29; Bagal. 3:​23-25. w18.10 24-25 ¶10-12

Kaifase o ile a romela masole hore a tšoare Jesu bosiu. Jesu o ile a ela hloko leqheka lena la hae eaba o laela baapostola hore ba nke lisabole nakong ea lijo tsa ho qetela ba e-na le eena. Lisabole tse peli li ne li lekane hore a tle a ba rute thuto ea bohlokoa. (Luka 22:​36-38) Hamorao bosiung boo, Petrose o ile a hlatha e mong ka sabole hobane o ne a amehile ka ho hloka toka hoo Jesu a neng a tobane le hona ka nako eo. (Joh. 18:​10) Empa Jesu o ile a re ho Petrose: “Khutlisetsa sabole ea hao sebakeng sa eona, kaha bohle ba nkang sabole ba tla timela ka sabole.” (Mat. 26:​52, 53) Thuto eo ea bohlokoa e ne e lumellana le thapelo eo Jesu a ileng a e etsa bosiung boo ea hore ha baa lokela hore e be karolo ea lefatše. (Joh. 17:​16) Ho loanela toka e ne e le mosebetsi oa Molimo eseng oa bona. Ka hona, le rona re lula re e-na le khotso le bonngoe. Ha Jehova a ntse a shebile lefatše lena le arohaneng, e tlameha ebe oa thaba ha a bona bonngoe bo teng har’a batho ba hae. Sof. 3:​17. w18.06 7 ¶13-14, 16

Ho ekelletsa marabeng ao Satane a a sebelisang, o leka ho re tšosa hore re se ke ra tšepahalla Jehova. Mohlala, a ka sebelisa mebuso ho thibela mosebetsi oa rona oa boboleli. A ka etsa hore batho bao re sebetsang le bona kapa bao re kenang sekolo le bona ba re some ka lebaka la hore re sebelisa melao ea Bibele ea boitšoaro bophelong ba rona. (1 Pet. 4:4) A ka boela a etsa hore litho tsa lelapa li tšoenyehe ka rona ’me li re nyahamise hore re khaotse ho ea libokeng. (Mat. 10:​36) Re ka mamella joang? Re lokela ho lebella hore Satane o tla re hlasela ka tsela ena hobane oa re loantša. (Tšen. 2:​10) Ha lintho tsena li re hlahela, re lokela ho hopola hore Satane o itse re tla sebeletsa Jehova hafeela lintho li re tsamaela hantle. O re haeba ho nyolosetsa, re tla lahla Molimo. (Jobo 1:​9-11; 2:​4, 5) Qetellong, re lokela ho itšetleha ka Jehova hore a re fe matla a ho hlola mathata ana. Hopola hore le ka mohla a ke ke a re furalla.​—Baheb. 13:5. w18.05 26 ¶14

Le haeba re bona eka mosebetsi oo re o etsang oa ho bolela ka ’Muso ha o thuse batho, ha rea lokela ho khella fatše mosebetsi oa ho jala peo. Ho feta moo, batho ba bangata ha ba re mamele leha ho le joalo, baa re bona ha re etsa mosebetsi ona. Ba bona moaparo oa rona o hlomphehang, boitšoaro ba rona bo botle le ho bososela ha rona. Ha nako e ntse e-ea, boitšoaro ba rona bo botle bo ka ba thusa ho fetola maikutlo a fosahetseng ao ba neng ba e-na le ’ona ka rona. Ntate-moholo Sergio le nkhono Olinda bao e leng bo-pula-maliboho ba re: “Ka lebaka la ho kula, re ile ra nka nako re sa ee toropong moo re neng re ema teng ka litoroli. Ha re khutlela, batho ba tloaetseng ho feta moo ba ile ba re botsa ba re: ‘Le ntse le ipatile kae? Re ne re le hopotse.’ ” Haeba re sa ‘lumelle matsoho a rona hore a phomole’ ho jaleng peo ea ’Muso, re tla be re itela bakeng sa ho fana ka “bopaki ho lichaba tsohle.” (Mat. 24:​14) Ka holim’a tsohle, re thaba haholo hobane rea tseba hore Jehova oa re amohela, hobane o rata bohle ba “ba behang litholoana ka mamello.”​—Luka 8:​15 w18.05 16 ¶16-18

Haesale Molimo a khothatsa bahlanka ba hae. Ka mor’a hore Adama le Eva ba etse sebe, o ile a bua mantsoe a neng a tla khothatsa bana bohle ba Adama. Mantsoe ao a hlaha Lengolong la Genese 3:​15. Re na le tšepo ea hore Satane o tla felisoa hammoho le mesebetsi eohle ea hae. (Tšen. 12:9; 1 Joh. 3:8) Mehleng ea Noe, ke eena feela le lelapa la hae ba neng ba sebeletsa Jehova. E ka ’na eaba o ile a nyahama ha a bona batho kaofela ba le khopo ba bile ba hloka boitšoaro. (Gen. 6:​4, 5, 9, 11; Juda 6) Empa Jehova o ile a bolella Noe hore o tl’o felisa batho bohle ba neng ba sa mo mamele. A ba a bolella Noe hore na o lokela ho etsa’ng e le hore a pholohe le lelapa la hae. (Gen. 6:​13-18) Jehova o ile a fela a khothatsa Noe. w18.04 15 ¶1-2

A re se keng ra nahana hore re ke ke ra khona ho khothatsana hobane feela re le lihlong kapa re sa tsebe hore na re ka re’ng. Ha ho hlokahale hore re etse letho le mohlolo empa re ka khothatsana le ka ho lumelisana ka mosa. Ho ka etsahala hore u bone motho a hlomohile ha u mo lumelisa. Nakong eo, e ka ba hantle ho mo kopa hore a u bolelle hore na ke eng e mo tšoenyang. U ka khothatsa motho eo ka hore u mo mamele ka hloko ha a u bolella mathata a hae. (Jak. 1:​19) Re ka kholiseha hore hoa khoneha ho khothatsa Bakreste-’moho le rona. Morena Solomone o itse: “Lentsoe le buuoang ka nako ea lona e nepahetseng le molemo hakaakang! Ho khanya ha mahlo ho thabisa pelo; tlaleho e ntle e nontša masapo.” (Liprov. 15:​23, 30) Moapostola Pauluse le eena o ile a bontša hore ho bina lipina tsa ’Muso ho ka re khothatsa. (Bakol. 3:​16; Lik. 16:​25) Hona joale kaha “letsatsi [la Jehova] le ntse le atamela,” ho bohlokoa hore re leke ka matla ho lula re khothatsana.​—Baheb. 10:​25. w18.04 23-24 ¶16, 18-19