February

Lentsoe “Toka,” le sebelisoang ka Bibeleng le bolela ho etsa lintho ka tsela eo Molimo a e nkang e nepahetse ebile e se ka leeme. Nahana kamoo lintho tseo Jesu a li entseng li bontšang hore o na le toka kateng. Ha a sa le lefatšeng, baeta-pele ba bolumeli ba Bajuda ba ne ba hloile batho bao e seng Bajuda le Bajuda ba sa rutehang, ba bile ba sa hlomphe basali. Empa Jesu o ne a tšoara motho e mong le e mong ka toka. O ile a lumella batho bao e seng Bajuda ba neng ba e-na le tumelo ho eena hore e be balateli ba hae. (Mat. 8:​5-10, 13) O ne a sa khethe nku ka pere, empa o ne a pakela batho bohle ba ruileng le ba futsanehileng. (Mat. 11:5; Luka 19:​2, 9) O ne a sa hlekefetse basali a bile a sa ba tšoare ka thata. Ho e-na hoo, o ne a ba hlompha, a le mosa ho bona, ho akareletsa le bao batho ba neng ba ba khesa. (Luka 7:​37-39, 44-50) Re ka etsisa Jesu ka hore re tšoare batho bohle ka toka ’me re ba bolelle litaba tse molemo, ho sa tsotellehe maemo a bona sechabeng kapa bolumeli ba bona. Banna ba Bakreste ba ka etsisa Jesu ka hore ba hlomphe basali ba bona. w19.05 2 ¶1; 5 ¶15-17

Ha baholo ba tšelisa motho, ba sebelisa Bibele ’me ba bua le eena ka tsela e lerato le e mosa. Na baholo ke bona feela ba lokelang ho fana ka matšeliso ho batho ba hlekefelitsoeng ka motabo? Che. Kaofela ha rona re na le boikarabelo ba hore re “ ’ne [re] tšelisane.” (1 Bathes. 4:​18) Ka ho khetheha baralib’abo rona ba matla tumelong ba ka khona ho tšelisa baralib’abo rona ba hlokang ho khothatsoa. Ke taba e utloahalang hore ebe Jehova o itšoantša le ’mè ea tšelisang ngoana oa hae ea utloileng bohloko. (Esa. 66:​13) Bibele e na le mehlala ea bo-’mè ba ileng ba fana ka matšeliso ho batho ba a hlokang. (Jobo 42:​11) Le mehleng ena, Jehova oa thaba ha a bona baralib’abo rona ba khothatsa baralib’abo rona ba bang ba utloileng bohloko. Maemong a mang, moholo a le mong kapa ba babeli ba ka botsa morali’abo rona ea matla tumelong hore na a ka khona ho tšelisa morali’abo rona e mong ea utloileng bohloko. Ke ’nete hore re ba hlokolosi hore re se ke ra itšunya-itšunya litabeng tsa Mokreste-’moho le rona haholo haeba a sa rate ho bua ka tsona.​—1 Bathes. 4:​11. w19.05 16-17 ¶10-12

Ke hobane’ng ha baholo ba hloka hore ho be le bonyane lipaki tse peli tse pakang hore motho o entse sebe se tebileng pele ba theha komiti ea boahloli? Hobane Bibele e re ke eona tsela ea ho ahlola ka toka. Haeba motho a qosoa ka hore o entse sebe se tebileng, empa a hana hore o se entse, ho lokela ho be le lipaki tse peli tse pakang, pele baholo ba ka theha komiti ea boahloli. (Deut. 19:​15; 1 Tim. 5:​19) Ha moqusuoa a latola bosehla hore o entse sebe seo, baholo ba mamela bopaki ba batho ba ka ’nang ba tseba se etsahetseng. Haeba motho ea hlekefelitsoeng a re moqusuoa eo ke eena ’me ho e-na le motho e mong ea pakang ketsahalo eo, ha ho le joalo, baholo ba na le bopaki bo lekaneng bakeng sa ho theha komiti ea boahloli. Taba ea hore ha ho na paki ea bobeli ha e bolele hore motho eo ea qosang o bua leshano. Esita le hoja ho se na lipaki tse peli tse pakang hore motho o hlekefelitse ngoana ka motabo, baholo ba lokela ho ela hloko hore e ka ’na eaba ho na le sebe se tebibeleng se entsoeng. Baholo ba tla tsoela pele ba khothatsa le ho tšehetsa batho bao ba utloisitsoeng bohloko ’me ba tla lula ba butse mahlo ho sireletsa phutheho hore e se ea hlaheloa ke mathata.​—Lik. 20:​28. w19.05 11 ¶15-16

Ke taba ea bohlokoa hore bana ba thusoe ho tseba hore na ba ka ithuta Bibele joang. Mohlala, ba tlameha ho tseba ho lokisetsa liboka tsohle le ho etsa lipatlisiso ka mathata ao ba kopanang le ’ona ha ba le sekolong. (Baheb. 5:​14) Ha bana ba qeta nako e itseng ba ithuta Bibele ha ba le hae, ho tla ba bonolo hore ba mamele ka hloko ha ba le libokeng, likopanong tse kholo le tse nyenyane. Ke ’nete hore nako eo motsoali a e qetang a bala le ngoana e tla itšetleha ka hore na ngoana o lilemo li kae le hore na o khona ho mamella hakae. Batho bao re ithutang Bibele le bona ba lokela ho tseba ho ithuta. Ha re qala ho ithuta Bibele le bona, re thabela ho bona ha ba thalletse likarabo bakeng sa liboka le ha re tl’o ba khannela thuto. Empa re lokela ho ba ruta hore na ba ka etsa lipatlisiso joang le hore ha ba le bang ba lokela ho nahanisisa ka lintho tseo ba li balileng. Ka tsela eo, ha ba thulana le mathata ba tla fumana thuso ha ba etsa lipatlisiso ba sebelisa lingoliloeng tsa rona. w19.05 26 ¶2; 28 ¶10-11

Satane o ikemiselitse ho fetola tsela eo re nahanang ka eona. O leka ka hohle ho hlakola lintho tseo re ithutileng tsona ka Bibeleng e le hore li se ke tsa ama tsela eo re nahanang ka eona. Le kajeno Satane o ntse a botsa potso e tšoanang le eo a ileng a e botsa Eva serapeng sa Edene, e reng: “Na ehlile Molimo o itse . . . ?” (Gen. 3:1) Hangata lefatšeng lena la Satane, re atisa ho utloa batho ba botsa lipotso tse ka etsang hore re belaelle lintho tseo re ithutileng tsona, tse kang: ‘Na ehlile Molimo ha a lumelle batho ba bong bo tšoanang hore ba nyalane? Na ehlile Molimo ha a batle ha u keteka Keresemese le letsatsi la hao la tsoalo? Na ehlile Molimo oa hao o lebeletse hore u hane ho tšeloa mali? Na ehlile Molimo ea lerato a ka batla hore u khaotse ho buisana le batho bao u ba ratang ha ba khaotsoe?’ Re lokela ho kholiseha ka lintho tseo re li lumelang. Haeba re sa fumane likarabo tsa lintho tseo re sa li utloisiseng ka Bibeleng, re ka ’na ra qetella re se re li belaella. Ha nako e ntse e-ea, lintho tseo li ka fetola tsela eo re nahanang ka eona tsa ba tsa senya tumelo ea rona. w19.06 12-13 ¶15-17

Jehova o re rata haholo. (Joh. 3:​16) Re batla ho etsisa Ntate oa rona ea lerato. Kahoo, re etsa sohle seo re ka se khonang ho leka ho ‘utloelana bohloko, re e-na le boikutlo bo mofuthu ba bara ba motho le qenehelo e bonolo,’ haholo-holo ho “ho ba amanang le rona tumelong.” (Bagal. 6:​10) Ha bara le barali babo rona ba e-na le mathata, re labalabela ho ba thusa. Re ka tšelisa motho ea hlokahaletsoeng ke molekane joang? Ntho ea pele ke ho bua le eena, esita le haeba re sa kholiseha hore na re tl’o re’ng. ’Mè Paula, eo molekane oa hae a ileng a hlokahala o re: “Kea utloisisa hore lefu le etsa hore batho ba se ke ba tseba hore na ba re’ng. Ba tšoenyeha ka hore ba ka ’na ba bua ntho e ka utloisang motho bohloko. Empa ntho e bohloko ka ho fetisisa ke haeba ba sa bue hohang.” Mohlomong motho ea siameng ha aa lebella hore re bue ntho e nang le kelello hakaalo-kaalo. ’Mè Paula o re: “Ke ne ke utloa ke khotsofetse ha motho a fihla a re feela, ‘Ke masoabi ka se u hlahetseng.’ ” w19.06 20 ¶1; 23 ¶14

Haeba mosebetsi oa rona o thibetsoe, baholo ba tla hlophisa hore re tšoare liboka ka tsela e patileng mohoasa. Ba ka ’na ba hlophisa hore re kopane ka lihlotšoana ’me ba ka ’na ba fetola linako le libaka tseo re kopanang ho tsona nako le nako. Ha re tla tabeng ea tšimo, maemo a tla fapana ho ea ka libaka. Kaha re rata Jehova ebile re thabela ho bolella batho ka ’Muso oa hae, re tla batla litsela tsa ho ea tšimong. (Luka 8:1) Ha rahistori e mong ea bitsoang Emily Baran a bua ka Lipaki Tsa Jehova nakong ea puso ea Soviet Union, o re: “Ha ’muso o bolella Lipaki hore li khaotse ho ea tšimong, li ile tsa qala ho qoqa le baahisane, basebetsi-’moho le metsoalle. Ha ba isoa teronkong ka lebaka la ho bolela ka tsela ena, ba ile ba pakela batšoaruoa-’moho le bona.” Le hoja barab’abo rona ba neng ba le moo ba ne ba thibetsoe, ha baa ka ba khaotsa ho bolela. E se eka u ka ikemisetse ho tsoela pele u bolela ka ’Muso oa Molimo! w19.07 11 ¶12-13

Re lokela ho etsa’ng e le hore re thuse batho bao e seng balumeli hore ba rate Molimo le hore ebe balateli ba Kreste? Re tlameha ho hlokomela hore tsela eo motho a arabelang ka eona ha re bua le eena ka Bibele e ka ’na ea itšetleha ka hore na o holetse hokae. Mohlala, batho ba tsoang linaheng tsa Europe ba ka ’na ba se ke ba araba ka tsela e tšoanang le ea batho ba tsoang linaheng tsa Asia ha re bua le bona ka molaetsa oa Bibele. Hobane’ng? Linaheng tsa Europe, batho ba bangata ba tseba Bibele ebile baa tseba hore Molimo o bopile lintho tsohle. Empa linaheng tsa Asia teng, batho ba bangata ha ba tsebe hakaalo ka Bibele kapa ha ba e tsebe ho hang hape ho ka etsahala hore ha ba lumele hore ho na le ’Mopi. Kahoo, e-ba le mamello. Selemo le selemo, ho ba le batho bao pele e neng e se balumeli bao e-bang Lipaki Tsa Jehova. Ba bangata ba bona ba ne ba phela ka melao e nepahetseng ea boitšoaro empa ba ile ba tenoa ke boikaketsi boo ba bo bonang likerekeng. Athe ba bang ba ne ba itšoere hampe ’me ba e-na le mekhoa e mebe eo ba neng ba lokela ho e tlohela. Jehova o tla re thusa hore re fumane batho ba nang le “tšekamelo e nepahetseng bakeng sa bophelo bo sa feleng.”​—Lik. 13:​48; 1 Tim. 2:​3, 4. w19.07 20-21 ¶3-4

Ebang re na le tšepo ea ho ea phela leholimong kapa ea ho tla phela paradeiseng lefatšeng mona, re lokela ho mamella ho fihlela re fumane moputso oo. Ho sa tsotellehe hore na ke’ng eo re lokelang ho e mamella, ha rea lokela ho lula re nahana ka lintho tsa nakong e fetileng, empa re lokela hore re se ke ra lumella letho ho re thibela ho sebeletsa Jehova. (Bafil. 3:​16) Mohlomong re se re eme nako e telele re letetse ho bona ha litšepiso tsa Jehova li phethahala, kapa re se re holile ’me ha re sa na matla joaloka pele. E ka ’na eaba re ile ra lokela ho mamella liteko le mahloriso ka lilemo tse ngata. Ho sa tsotellehe hore na boemo ba hao ke bofe, u se ke oa “tšoenyeha ka letho.” Empa u rapele Jehova ’me u mo bolelle lintho tsohle tse u tšoenyang, kaha o tla u fa khotso e fetang ntho efe kapa efe eo u ka e nahanang. (Bafil. 4:​6, 7) Feela joalokaha semathi se ikitlaetsa peisong, e se eka le rona re ka matha ka mamello peisong ena ea bophelo ho fihlela re fihla kholeng. Joaloka semathi se tiisang le ho feta ha se le haufi le mola oa tlholo, e se eka le rona re ka etsa sohle seo re ka se khonang hore re mamelle ho fihlela qetellong kaha re se re le haufi. w19.08 7 ¶16-17

Re ka ’na ra iphumana re sa tsebe hantle hore na re khothatsa batho ba siameng joang. Leha re sa tsebe hore na re re’ng ho bona, ha ba re bona re lla ba tla utloisisa hore na re ikutloa joang ka boemo boo ba leng ho bona. Ha motsoalle oa Jesu e leng Lazaro a hlokahetse, likhaitseli tsa hae Maria le Maretha le batho ba bang ba ile ba mo llela. Ha Jesu a fihla ho bona ka mor’a matsatsi a mane, o ile “a ntša meokho” le hoja a ne a tseba hore o tl’o tsosa Lazaro. (Joh. 11:​17, 33-35) Taba ea hore Jesu o ile a lla pele a tsosa Lazaro e bontša ka ho hlaka hore na Jehova o ne a ikutloa joang ka lefu leo. E boetse e bontša hore Jesu o ne a rata lelapa leo ’me taba eo e ile ea tšelisa Maria le Maretha haholo. Ka tsela e tšoanang, ha bara le barali babo rona ba bona hore rea ba rata ebile rea ba tsotella ba tla elelloa hore ha ba bang empa ba na le metsoalle e ba tšehetsang. Ka linako tse ling, re ka ea feela hore re il’o mo mamela ka hloko ha a ntša maikutlo a hae. Mo lumelle hore a ntše bohloko bohle bo ka pelong ’me u se ke oa khopeha ha a ka bua “puo e hlaha.” (Jobo 6:​2, 3) E ka ’na eaba o imetsoe le ho feta ka lebaka la khatello e tsoang ho beng ka eena bao e seng Lipaki. Kahoo, rapela le eena. Kopa ea “Ea Utloang thapelo” hore a mo fe matla le hore a mo thuse hore a nahane ka tsela e nepahetseng.​—Pes. 65:2. w19.04 18-19 ¶18-19

Ebang re sebetsa tšimong kapa re Bethele, kaofela re ka qetella re se re rata sebaka le batho ba moo re sebeletsang teng. Kahoo, re utloa bohloko haholo ha re lokela ho tloha kabelong ea rona. Re lula re hopola bara le barali babo rona bao re neng re sebetsa le bona, ’me re tšoenyeha ka bona, haholo-holo haeba re lokela ho tsamaea hobane ho e-na le batho ba re hanyetsang. (Mat. 10:​23; 2 Bakor. 11:​28, 29) Ho feta moo, re ka ’na ra utloa ho le thata ho fallela sebakeng se secha le ho ikamahanya le maemo a macha, esita le haeba re khutlela sebakeng seo re holetseng ho sona. Batho ba bang ha likabelo tsa bona li fetoha ba ka ’na ba ba le mathata a lichelete. Ba ka ’na ba ikutloa ba selebaletsoe ba bile ba nyahame. Ebe ba ka thusoa ke’ng? Lula u rata Jehova. (Jak. 4:8) Re ka etsa seo joang? Ka ho mo tšepa kaha ke eena “Ea Utloang thapelo.” (Pes. 65:2) Jehova ke eena ea ka “etsang ka ho fetisisang ho feta lintho tsohle tseo re li kopang kapa re li nahanang.” (Baef. 3:​20) Ha a re fe lintho tseo re li kopileng ha re rapela feela. A ka ’na a rarolla mathata a rona ka tsela eo re neng re sa e nahana ho hang. w19.08 21 ¶5-6

Batho ba bang ba lumela hore ho tl’o ba le ntoa kapa koluoa ea tlhaho e tla felisa lefatše ka ho feletseng. Empa Bibele eona e bua ka ntoa ea Armagedone hore e tl’o ba le liphello tse ntle ’me e tla thabisa batho ba bang. (Tšen. 1:3) Ntoa ea Armagedone ha e tl’o felisa batho empa e tl’o ba pholosa. Ka tsela efe? Ka hore e felise mebuso ea batho. Ntoa eo, e tla boela e pholose batho ba lokileng ebe e felisa ba khopo. Hape e tla pholosa batho ka hore e sireletse lefatše leo re phelang ho lona e le hore le se ke la senngoa. (Tšen. 11:​18) Lentsoe “Har–Magedone” le hlaha hanngoe feela ka Mangolong ’me le tsoa lentsoeng la Seheberu le bolelang Thaba ea Megido. (Tšen. 16:​16) Megido e ne e le o mong oa metse ea Iseraele ea boholo-holo. (Josh. 17:​11) Armagedone ha se sebaka se teng mona lefatšeng. Empa ke ha “marena a lefatše lohle leo ho ahiloeng ho lona” a ikopanya ho ba khahlanong le Jehova.​—Tšen. 16:​14. w19.09 8 ¶1-3

Mosali eo o ne a le tsietsing a hloka thuso. O ne a se a tsoa lingakeng tse ngata a lumela hore o tla phekoloa. O ne a qetile lilemo tse 12 a kula empa a e-s’o fumane pheko. Ho latela Molao oo Jehova a neng a o file Moshe, o ne a sa a hloeka. (Lev. 15:​25) O ile a utloela ka hore Jesu o folisa batho, eaba o ea ho eena. Eitse ha a mo fumana a ama seaparo sa Jesu sa ka ntle ’me a fola hang-hang. Jesu ha a ka mo folisa feela empa o ile a boela a etsa hore a ikutloe a ratoa a bile a hlompheha. Ka mohlala, ha a ntse a bua le eena o ile a bontša hore oa mo rata ka ho mo bitsa “morali.” E tlameha ebe mosali eo o ile a imoloha a ba a matlafala. (Luka 8:​44-48) Ela hloko hore mosali eo o ile a etsa boiteko ba hore a ee ho Jesu. Le rona kajeno re lokela ho etsa boiteko ba ho tla ho Jesu. Mehleng ena, Jesu ha a phekole ka mohlolo batho ba tlang ho eena. Empa o ntse a ba mema a re: “Tloong ho ’na, . . . ’me ke tla le khatholla.”​—Mat. 11:​28. w19.09 20 ¶2-3

Moprofeta Zakaria le eena o ile a profeta ka ntho e tšoanang. O ile a re: “Ho tla etsahala matsatsing ao hore banna ba leshome ba tsoang lipuong tsohle tsa lichaba ba tla tšoara, e, ba tla tšoara moleka oa seaparo sa monna oa Mojuda, ba re: ‘Re tla tsamaea le lona, etsoe re utloile hore Molimo o na le lona.’ (Zak. 8:​23) Lipaki Tsa Jehova lia hlokomela hore e le hore batho ba lipuo tsohle ba bokelloe, ba lokela ho bolelloa litaba tse molemo ka lipuo tsa bona. Hona joale mosebetsi oa phetolelo o moholo hoo ho seng ho fetoleloa ka lipuo tse makholo. Ke ntho e hlollang hore ebe Jehova o ntse a bokella bongata bo boholo ho tsoa lichabeng tsohle. Kaha ho na le Bibele le lingoliloeng tse thehiloeng ho eona ka lipuo tse ngata, bongata bo boholo bo sebeletsa Jehova bo momahane le hoja bo tsoa lichabeng tsohle. Bahlanka bana ba Jehova ba tsebahala ka ho chesehela ho ruta batho Bibele le ho ba le lerato. Taba ena e matlafatsa tumelo e le kannete.​—Mat. 24:​14; Joh. 13:​35. w19.09 30-31 ¶16-17

Ka matšoenyeho a maholo, batho ba tla tšoha ha ba bona lintho tse tla etsahala. Ba tla bona hore lintho tseo ba neng ba li tšepile tse kang lipolotiki, khoebo le lintho tse ling li qala ho felloa ke matla. Ba tla utloa “bohloko bo boholo” ba be ba tšoenyehe ka hore ba ka ’na ba bolaoa nakong eo e sisimosang habohloko. (Sof. 1:​14, 15) Ka nako eo, lintho li ka ’na tsa e-ba thata le ho bahlanka ba Jehova. Kaha re lula re se karolo ea lefatše, re ka ’na ra thulana le mathata a boima. Ho ka ’na ha etsahala hore re hloke lintho tse itseng. “Lekhoba le tšepahalang” le re thusitse hore re tle re lule re tšepahala nakong ea matšoenyeho a maholo. (Mat. 24:​45) Le sebelisitse mekhoa e mengata empa re tla bua ka mohlala o le mong, e leng oa likopano tsa setereke tsa 2016-2018. Lipuo tsa likopano tseo, li ne li re khothalletsa ho ba le makhabane a tla re thusa ha letsatsi la Jehova le ntse le atamela. w19.10 14 ¶2; 16 ¶10; 17 ¶12

Ka mor’a hore re koenye lijo, ha re sa na taolo ea hore na li tla etsa’ng ’meleng ea rona. Lijo tse nang le phepo li ka etsa hore re phele hantle ’meleng empa lijo tse se nang phepo li ka re kulisa. Liphello li ka ’na tsa se ke tsa bonahala hang-hang empa li tla bonahala ha nako e ntse e ea. Ka tsela e tšoanang, ha re khetha boithabiso, re ka khetha hore na re kenya’ng ka likelellong tsa rona. Empa ka mor’a moo, boithabiso boo re bo khethileng bo tla ama tsela eo re nahanang ka eona le eo re ikutloang ka eona. Boithabiso bo nepahetseng bo ka re khatholla empa bo fosahetseng bo ka re ntša kotsi. (Jak. 1:​14, 15) Re ke ke ra bona litla-morao tsa boithabiso bo fosahetseng hang-hang empa ha nako e ntse e ea re tla li bona. Ke ka lebaka leo Bibele e re lemosang: “Etsoe leha e le sefe seo motho a se jalang, o tla boela a se kotule; hobane ea jalang ka sepheo sa ho jalla nama ea hae o tla kotula ho bola nameng ea hae.” (Bagal. 6:​7, 8) Ke ha bohlokoa hore re hane boithabiso ba mofuta leha e le ofe bo khothalletsang lintho tseo Jehova a li hloileng!​—Pes. 97:​10. w19.10 30 ¶12-14

Jehova o ile a bontša hore o rata batho ka hore a fane ka Mora oa hae hore a tl’o shoa molemong oa rona. (Joh. 3:​16) Re ka etsisa tsela eo Jehova a re ratang ka eona joang? Ka hore re nke bara le barali babo rona bohle e le ba bohlokoa le ka hore re amohele “nku e lahlehileng” ha e khutlela ho Jehova. (Pes. 119:​176; Luka 15:​7, 10) Re paka hore re rata bara le barali babo rona ha re tela nako le matla a rona ho ba thusa, haholo-holo ha ba e-na le mathata. (1 Joh. 3:​17) Jesu o ile a laela balateli ba hae hore ba lokela ho ratana. (Joh. 13:​34, 35) Molao oa Jesu o mocha hobane o laela balateli ba hae hore ba ratane ka tsela e fapaneng le ea Molaong oa Baiseraele, kaha o re: Re lokela ho rata bara le barali babo rona joalokaha Jesu a re rata. Taba eo e bolela lerato le se nang boithati. Re ba rate ho feta tsela eo re ithatang ka eona. Re lokela ho ba rata hoo re ka telang bophelo ba rona molemong oa bona, joalokaha Jesu a ile a etsa. w19.05 4 ¶11-13

E le hore moea o halalelang o re thuse, re lokela ho o rapella ka ho qophella. (Luka 11:​13) Papiso ea Jesu e ho Luka 11:​5-9 e re thusa ho bona hore na ke hobane’ng ha Jehova a tla re fa moea o halalelang. Monna ea hlahang papisong eo, o ne a batla ho hlokomela moeti oa hae. O ne a batla ho ngoathela moeti eo empa o ne a se na lijo. Jesu o re moahisane o ile a fa monna eo bohobe hobane a ne a mo qophelletse. Jesu o ne a hatisa ntlha efe moo? Haeba motho ea sa phethahalang o ile a utloa a tlameha ho thusa moahisane ka mor’a hore a mo phehelle, re ka kholiseha hore ntate oa rona ea lerato Jehova o tla re thusa ka ho re fa moea o halalelang ha re o kopa ka tieo. Kahoo, re ka kholiseha hore Jehova o tla arabela lithapelo tsa rona ha re kopa moea o halalelang. (Pes. 10:​17; 66:​19) Re kholisehile hore re ka lula re mamella ho sa tsotellehe hore na Satane o re hlasela hangata hakae. w19.11 13 ¶17-19

Jesu o ne a tseba hore ka linako tse ling, eena le barutuoa ba hae ba ne ba hloka ho phomola. Leha ho le joalo, batho ba bangata ba mehleng ea Jesu le ba mehleng ena ba ka tšoantšoa le monna oa morui eo Jesu a ileng a etsa papiso ka eena. Monna eo o ile a ipolella hore o tla ‘khatholoha, a je, a noe, a ithabise.’ (Luka 12:​19; 2 Tim. 3:4) O ne a nahana hore lintho tsa bohlokoa ka ho fetisisa bophelong ke ho phomola le ho ithabisa. Ho fapana le monna eo, Jesu le baapostola ba hae bona ba ne ba sa nke ho ithabisa e le eona ntho ea bohlokoa ka ho fetisisa bophelong ba bona. Mehleng ena, re leka ho etsisa Jesu ka hore ha re sa ea mesebetsing re phomole hape re bolelle ba bang litaba tse molemo le ho ea libokeng. Ke habohlokoa hore re etse barutuoa le hore re ee libokeng, kahoo re etsa sohle seo re ka se khonang hore re lule re etsa lintho tsena tse halalelang. (Baheb. 10:​24, 25) Esita le haeba re etile, re lokela ho lula re e-ea libokeng ho sa tsotellehe hore na re hokae le ho batla menyetla ea ho bolella batho bao re kopanang le bona molaetsa oa Bibele.​—2 Tim. 4:2. w19.12 7 ¶16-17

Jehova o re file bolokolohi ba hore re ikhethele hore na re tla phela joang. O re ruta hore na re ka etsa liqeto tse nepahetseng joang hape o boetse o re thusa hore re atlehe ha re entse liqeto tse mo thabisang. (Pes. 119:​173) Ha re sebelisa lintho tseo re ithutileng tsona ka Bibeleng, re tla etsa liqeto tse nepahetseng. (Baheb. 5:​14) Ka linako tse ling, re etsa liqeto tse nepahetseng empa bothata ebe ho li phetha. Nahana ka mehlala ena. Mor’abo rona e mocha o etsa qeto ea ho bala Bibele kaofela. O qala a ntse a tšoere hantle libekenyana tse seng kae empa ka mor’a nako o khathalloa ke pere. Morali’abo rona o etsa qeto ea ho ba pula-maliboho ea kamehla empa o lula a chechisa nako eo a neng a batla ho qala ka eona. Baholo ba etsa qeto ea ho etsa maeto a bolisa empa likhoeli lia feta ho se nko ho tsoa lemina. Ke ’nete hore maemo ana a fapane empa ho na le ntho eo a tšoanang ka eona. Batho bao re buileng ka bona ba entse liqeto empa ha baa ka ba li phetha. w19.11 26 ¶1-2

Jesu o ile a bapisa mehla eo re phelang ho eona le “matsatsi a Noe,” ’me ho hlakile hore re phela ‘linakong tse mahlonoko tseo ho leng thata ho sebetsana le tsona.’ (Mat. 24:​37; 2 Tim. 3:1) Ka lebaka leo, banyalani ba bang ba entse qeto ea ho se be le bana hona joale e le hore ba ka qeta nako e ngata ba sebeletsa Jehova haholoanyane. Ke hantle hore banyalani ba “bale litšenyehelo” pele ba etsa qeto ea hore ba tla ba le bana le hore na ba tla ba le bana ba bakae. (Luka 14:​28, 29.) Batho ba holisitseng bana baa tseba hore ho holisa bana ho hloka chelete e ngata. Ho boetse ho hloka nako le matla. Kahoo, ke habohlokoa ho nahana ka lipotso tse kang tsena: ‘Na re hloka ho sebetsa re le babeli e le hore re fumane lintho tseo re li hlokang? Na rea lumellana ka hore na ke lintho life tseo lelapa la rona le hlileng le li hlokang? Haeba re tlameha ho sebetsa re le babeli, ke mang ea tla sala le bana ba rona? Ke bo-mang bao re batlang hore ba susumetse tsela ea bana ba rona ea ho nahana le ea ho etsa lintho?’ Ha batho ba batlang ho ba le bana ba buisana ka lipotso tse kang tsena, ba tla be ba mamela keletso e hlahang temaneng ea letsatsi ea kajeno. w19.12 23-24 ¶6-7

Bophelo ba moapostola Pauluse bo ile ba e-ba kotsing ka makhetlo a mangata. (2 Bakor. 11:​23-28) O ile a tlameha le ho mamella “moutloa nameng” ’me mohlomong e ne e le bothata ba bokuli bo itseng. (2 Bakor. 12:7) Hape o ile a utloa bohloko ha Demase eo e neng e le mosebetsi-’moho le eena a mo tlohela hobane ‘Demase a ile a rata tsamaiso ena ea lintho.’ (2 Tim. 4:​10) Ke ’nete hore Pauluse e ne e le motlotsuoa ea sebete, ea neng a rata ho thusa batho ba bang kahohle-hohle, empa le eena ka linako tse ling o ne a nyahama. (Bar. 9:​1, 2) Pauluse o ile a fumana matšeliso le tšehetso tseo a neng a li hloka. Joang? Jehova o ile a sebelisa moea o halalelang ho mo matlafatsa. (2 Bakor. 4:7; Bafil. 4:​13) O ile a boela a sebelisa Bakreste-’moho le Pauluse ho mo tšelisa. Pauluse o ile a re basebetsi-’moho le eena ba bang ke “thuso e matlafatsang ho eena.” (Bakol. 4:​11) Ba bang bao a ileng a ba bitsa ka mabitso ke Aristakase, Tykikase le Mareka. Ba ile ba matlafatsa Pauluse ’me ba mo thusa hore a mamelle. w20.01 8 ¶2-3

Jesu o ile a re ho thata ho hlalosetsa motho ea sa tlotsoang hore na ho joang ho ‘tsoaloa hape’ kapa ho ‘tsoaloa ka moea.’ (Joh. 3:​3-8) Tsela eo Mokreste a nahanang ka eona e fetoha joang a ha e se e le motlotsuoa? Pele Jehova a tlotsa Bakreste bao, ba ne ba nka tšepo ea ho phela lefatšeng ka ho sa feleng e le letlotlo ho bona. Ba ne ba lebeletse ka tjantjello nako eo ka eona Jehova a tla etsa lefatše paradeise, a be a felise bokhopo bohle bo teng lefatšeng. E ka ’na eaba ba ne ba nahana ka nako eo ba tla amohela baratuoa ba bona ba ba siileng ka lefu. Empa ka mor’a hore ba tlotsoe, ba ile ba qala ho nahana ka tsela e fapaneng. Hobane’ng? Ha baa ka ba utloa ba se ba sa khotsofalle ho tla phela lefatšeng. Ha baa ka ba fetola maikutlo hobane ba ne ba e-na le khatello ea maikutlo kapa ba e-na le mathata a mangata. Hape ha e-ea ka ea re ha ba tloha feela ba utloa eka ho tla ba bolutu ho phela lefatšeng ka ho sa feleng. Ho e-na le hoo, Jehova o ile a sebelisa moea o halalelang ho fetola tsela eo ba ikutloang ka eona le tšepo eo ba nang le eona. w20.01 22 ¶9-11

Molaong oa Moshe, baahloli ba ne ba ahlola litaba tse amanang le borapeli bo hloekileng ba Jehova, hammoho le tsa litlolo tsa molao. Empa tlas’a “molao oa Kreste,” baholo ba ahlola litaba tse amanang le borapeli bo hloekileng ba Jehova feela. (Bagal. 6:2) Baa utloisisa hore Molimo o file ba boholong pusong boikarabelo ba ho ahlola litaba tse amanang le litlolo tsa molao. Le hore ba boholong ke bona ba nang le boikarabelo ba ho fana ka likotlo le ho isa batho chankaneng. (Bar. 13:​2-4) Boikarabelo ba baholo ke bofe ha motho ea itseng ka phuthehong a entse sebe se tebileng? Ba lokela ho sebelisa Mangolo hore ba hlahlobe botebo ba sebe seo ’me ba etse qeto. Ba lokela ho lula ba hopola hore lerato ke lona motheo oa molao oa Kreste. Lerato le lokela ho susumetsa baholo hore ba ipotse lipotso tse latelang, Ho lokela ho etsoe’ng ka batho bao e leng mahlatsipa a sebe se itseng se tebileng? Mabapi le motho ea entseng sebe seo, lerato le lokela ho susumetsa baholo hore ba ipotse, Na ehlile o bakile? Na re ka khona ho mo thusa hore a matlafatse kamano ea hae le Molimo? w19.05 7 ¶23-24

Jesu o ile a lumela hore Ntate oa hae ke eena mohloli oa bophelo ba hae le hore ke eena ea mo fang matla ha a ne a bua mantsoe a ka holimo. O ne a tšepa Ntate oa hae hona hooo ’me Jehova o ne a mo fa lintho tsohle tseo a li hlokang hore a phele. Ntho ea bohlokoa ka ho fetisisa ke hore Jehova o ile a thusa Jesu hore a lule a tšepahala. (Mat. 4:4) Jehova o re fa lintho tsohle tseo re li hlokang e le hore re be le kamano e ntle le eena. Ka Bibeleng, o re boleletse hore na ke mang, mabaka ao a entseng lintho ka ’ona, hobane’ng ha a re bopile le hore na ho tla etsahala’ng nakong e tlang. O ile a sebelisa batsoali ba rona kapa batho ba bang ho re thusa ho mo tseba. ’Me o tsoela pele ho re thusa hore re be metsoalle ea hae ka hore a sebelise baholo ba mosa le Bakreste-’moho le rona ba matla tumelong. Ho ekelletsa moo, Jehova o boetse o sebelisa liboka ho re koetlisa e leng moo re ithutang le Bakreste-’moho. Ka litsela tsena le tse ling, Jehova oa re bontša hore oa re tsotella joaloka Ntate.​—Pes. 32:8. w20.02 3 ¶8; 5 ¶13

Re ke ke ra ba le khotso le batho ba bang haeba re itumella ho ba mona. Re lokela ho ntša mona ka ho felletseng lipelong tsa rona re be re qobe ho etsa hore batho ba bang ba be mona. Ke eng ka ho khetheha eo re ka e etsang ho thusa batho hore ba se ke ba e-ba mona, hona re ka etsa’ng hore ho be le khotso? Tsela eo re itšoarang ka eona le eo re etsang lintho ka eona e ka susumetsa batho ba bang haholo. Lefatše lena le batla hore re etse “pontšo ea mponeng” ka lintho tseo re nang le tsona. (1 Joh. 2:​16) Empa boikutlo boo bo ka etsa hore re be mona. Re ka qoba ho etsa hore batho ba bang ba se ke ba e-ba mona ka hore re se ke ra bua hangata ka lintho tseo re nang le tsona kapa tseo re batlang ho li reka. Tsela e ’ngoe eo ka eona re ka qobang ho etsa hore batho ba se ke ba e-ba mona ka eona ke ka hore ha re e-na le boikarabelo ka phuthehong re ikokobetse. Haeba re lula re bua ka boikarabelo boo re nang le bona ka phuthehong, re tla etsa hore batho ba bang ba be mona. Ka lehlakoreng le leng, haeba re bontša batho ba bang hore re ba tsotella e le kannete hape re ba babatsa ha ba entse lintho tse ntle, re ba thusa hore ba khotsofale le hore ba phehelle khotso le bonngoe ka phuthehong. w20.02 18 ¶15-16

U ka ithuta ka Jehova linthong tseo a li bopileng. (Tšen. 4:​11) Nahana ka limela le liphoofolo tseo Jehova a li entseng ’me u bone hore na li bontša joang hore o bohlale. Ithute ka tsela e hlollang eo ’mele oa hao o entsoeng ka eona. (Pes. 139:​14) Hape, ha u nahana ka hore na Jehova o bopile letsatsi le e-na le matla a maholo hakae, u nahana hore linaleli tse ling tse libilione tsona li na le matla a makae? (Esa. 40:​26) Ha u nahana ka lintho tseo Jehova a li bopileng, u tla mo hlompha le ho feta. Ho tseba hore Jehova o na le matla hape o bohlale ke tse ling tsa lintho tse ka u thusang hore u be motsoalle oa hae. Empa ntho e ka u thusang hore u mo rate le ho feta ke hore u tsebe haholoanyane ka eena. U lokela ho kholiseha hore Jehova o u rata haholo. U hopole hore “haeba u mo batla, o tla etsa hore u mo fumane.” (1 Likron. 28:9) Jehova ‘o u hutse.’ (Jer. 31:3) Ha u lula u ananela lintho tsohle tseo Jehova a u etselitseng tsona, u tla mo rata le ho feta. w20.03 4 ¶6-7

Moapostola Pauluse ke mohlala o motle oo re ka o etsisang kaha o ile a etsa hore mosebetsi oa boboleli o tle pele bophelong ba hae. Ha a ne a le phuthehong ea Korinthe ka lekhetlo la bobeli, o ne a se na chelete e lekaneng bakeng sa lintho tseo a li hlokang eaba o etsa mosebetsi oa ho etsa litente. O ne a etsa mosebetsi oona hore a hlokomele litlhoko tsa hae e le hore a bolelle Bakorinthe molaetsa oa Bibele “ntle ho tefo.” (2 Bakor. 11:7) Le hoja Pauluse a ne a tlameha ho itšoarela ka matsoho, o ne a etelletsa mosebetsi oa boboleli pele a bile a ruta le ka Sabatha. Hamorao ha maemo a Pauluse a se a lokile, o ile a khona hore a phethe mosebetsi oa hae oa boboleli. O ile a “tšoareha ka matla haholo ka lentsoe, a pakela Bajuda ho tiisa hore Jesu ke Kreste.” (Lik. 18:​3-5; 2 Bakor. 11:9) Hamorao ha a koaletsoe teronkong Roma ka lilemo tse peli, o ile a pakela baeti ba hae a ba a ngolla liphutheho tse ling mangolo. (Lik. 28:​16, 30, 31) Pauluse o ile a etsa ka hohle hore ho se ke ha e-ba le ntho e mo sitisang mosebetsing oa hae oa boboleli. w19.04 4 ¶9