January

Jesu o ile a pepesa lithuto tsa boikaketsi tsa bolumeli mehleng ea hae. Ka mohlala, o ile a bontša hore Bafarisi ke baikaketsi kaha ba ne ba amehile haholo ka tsela eo ba hlatsoang matsoho a bona ka eona ho feta ho hlokomela batsoali ba bona. (Mat. 15:1-11) Jesu ha aa ka a lumella hore ho hanyetsoa ke baeta-pele bao ba bolumeli ho mo sitise ho bua ’nete. Jesu o ile a boela a pepesa lithuto tsa bolumeli tsa bohata. Ha aa ka a re lithuto tsohle tsa bolumeli lia amoheleha ho Molimo. Ho e-na le hoo, o ile re batho ba bangata ba ne ba tla tsamaea tseleng e sephara e isang timetsong ’me ba fokolang feela ba tla tsamaea ho e petetsaneng e isang bophelong. (Mat. 7:13, 14) O ile a hatisa taba ea hore batho ba bang ba ne ba tla bonahala eka ba sebeletsa Molimo empa ho se joalo. O ile a re: “Itebeleng ho baprofeta ba bohata ba tlang ho lona ba apere seaparo sa nku, empa ka hare e le liphiri tse harolang. Le tla ba tseba ka litholoana tsa bona.”—Mat. 7:15-20. w21.05 9 ¶7-8

Anna o ne a nyetsoe ke Elkana oa Molevi ea neng a mo rata haholo. Empa Elkana o ne a e-na le mosali e mong ea bitsoang Penina. Elkana o ne a rata Anna haholo ho feta Penina. Leha ho le joalo, ‘Penina o ne a e-na le bana empa Anna o ne a se na bana.’ Kahoo, Penina “o ne a mo tšoenya haholo ka morero oa ho etsa hore a ikutloe a ferekane.” Anna o ile a utloa bohloko haholo. O ne “a lla ’me a sa je.” Ho ntse ho le joalo, ha ho na moo Bibele e reng Anna o ile a leka ho iphetetsa. Ho e-na le hoo, o ile a bua le Jehova ho tsoa pelong a ba a tšepa hore Jehova o tla mo thusa (1 Sam. 1:2, 6, 10) Re ka ithuta’ng mohlaleng oa Anna? Haeba motho e mong a batla ho hlolisana le uena ka tsela e itseng, u hopole hore ke uena ea ka laolang boemo boo. U se ke oa itumella hore u hlolisane le motho eo. Ho e-na le hore u lefe bobe ka bobe, leka ho etsa khotso le motho eo. (Bar. 12:17-21) Esita le haeba motho eo a sa batle ho fetoha, uena u tla ba le khotso. w21.07 17 ¶13-14

Ho ba meharo ho ile ha etsa hore Judase Iskariota e be lehlaba-phio. Empa qalong e ne se motho ea mobe. (Luka 6:13, 16) Judase o ne a e-na le bokhoni hape a ka tšeptjoa etsoe e ne le eena ea neng a tšoara chelete. Empa ka mor’a nako, Judase o ile a qalella ho utsoa le hoja ka makhetlo a ile a utloa ha Jesu a lemosa batho ka ho ba meharo. (Mar. 7:22, 23; Luka 11:39) Judase o ile a bontša ka ho hlaka hore o meharo nakoana pele Jesu a bolaoa. Jesu le barutuoa ba hae ho akarelletsa le Maria le ausi oa hae Maretha, e ne e le baeti ha Simone molepera. Ha ba ntse ba e-ja, Maria o ile a ema eaba o tšela oli e turu e nkhang hamonate hloohong ea Jesu. Judase le barutuoa ba bang ba ile ba koata haholo. Mohlomong barutuoa ba bang ba ile ba nahana hore chelete eo e ka be e sebelisitsoe boboleling. Empa Judase o ne a e-na le maikutlo a fapaneng. “E ne e le lesholu” ’me o ne a batla ho utsoa chelete.—Joh. 12:2-6; Mat. 26:6-16; Luka 22:3-6. w21.06 18 ¶12-13

Na ka linako tse ling, u ee u utloe u imeloa ke mesebetsi e mengata eo u nang le eona, u utloe hore u ke ke oa khona ho e etsa kaofela? Haeba ho joalo, u tla utloisisa Pauluse hantle. O ile a tšoenyeha, e seng ka phutheho e le ’ngoe feela empa “ka liphutheho tsohle.” (2 Bakor. 11:23-28) Na ho kula ho etsa hore maemong a mangata u lule u sa thaba? Pauluse o ne a e-na le “moutloa nameng” o neng o hana ho mo tlohela oo e ka ’nang eaba e ne e le bothata ba ho kula ’me o ne a le tsietsing a batla hore o mo tlohele. (2 Bakor. 12:7-10) Na mefokolo ea hao ea u nyahamisa? Ho ne ho le joalo le ka Pauluse maemong a mang. O ile a ipitsa “monna ea soto” hobane o ne a e-na le ntoa e sa eeng moriting le mefokolo ea hae. (Bar. 7:21-24) Pauluse o ile a tsoela pele ho sebeletsa Jehova ho sa tsotellehe maemo a nyahamisang le liteko tse sa tšoaneng. O ile a nka matla a ho etsa joalo kae? Le hoja a ne a elelloa mefokolo ea hae hantle, o ne a e-na le tumelo e sa thekeseleng mabapi le thekollo. w21.04 22 ¶7-8

Ha Adama monna ea phethahetseng a etsa sebe, o ile a lahla monyetla oa bophelo bo sa feleng bakeng sa hae le bana ba hae. O ne a se na lebaka la ho etsa joalo. O ile a ikhethela ho etsa sebe. Empa bana ba hae ba kena kae tabeng ee? Ha baa kenya letsoho ha Adama a etsa sebe. (Bar. 5:12, 14) Na ba ne ba ka sireletsoa kahlolong ea lefu e neng e hlile e tšoanela Adama? Ho joalo. Hang ka mor’a hore Adama a etse sebe, Jehova o ile a qala ho sibolla hore na o tl’o pholosa bana ba Adama sebeng le lefung joang. (Gen. 3:15) Ka lebaka la thekollo, re ka ba le setsoalle se haufi-ufi le Jehova le hoja re sa phethahala. Thekollo e etsa hore mesebetsi ea Diabolose e nyope. (1 Joh. 3:8) Ka lebaka la thekollo, morero oa Jehova oa sethathong ka lefatše o tla phethahala. Lefatše lohle e tla ba paradeise. w21.04 14 ¶1; 19 ¶17

Batho ba bangata ba akarelletsang banna le basali ba tsoang linaheng tse ngata, ba buang lipuo tse fapaneng ba ne ba bokane hammoho. Ntho e makatsang e ile ea etsahala letsatsing leo. Sehlopha se seng sa Bajuda se ne se khona ho bua lipuo tsa batho bao ba etileng. Le hoja ntho eo e ne e makatsa, taba eo Bajuda bao ba e buileng le eo moapostola Petrose a ileng a e bua ho bona e ne e ikhetha. Batho bana ba bangata ba ile ba ithuta hore ba ka pholosoa haeba ba bontša tumelo ho Jesu Kreste. Molaetsa oo o ile oa ba ama maikutlo haholo. Batho ba ne ba amehile haholo hoo ba ileng ba re: “Re tla etsa joang?” Petrose ha a ba araba o ile a re: “E mong le e mong oa lona a ke a kolobetsoe.” (Lik. 2:37, 38) Ntho e ileng ea etsahala ka mor’a moo e ne e makatsa. Batho ba ka bang 3 000 ba ile ba kolobetsoa letsatsing leo ’me ea e-ba barutuoa ba Kreste. Ena e ne e le qaleho ea mosebetsi o moholo oa ho etsa barutuoa oo Jesu a ileng a re balateli ba hae ba o etse ’me ba ntse ba etsa mosebetsi ona le kajeno. w21.06 2 ¶1-2

E ka ’na eaba re sebetsa tšimo eo ho leng thata hore re ithute Bibele le batho. Batho ba bang ba ka ’na ba se ke ba thabela molaetsa oa rona kapa ba re hanyetsa. Ke’ng e ka re thusang hore re lule re e-na le tšepo ea hore batho ba joalo ba ka mamela molaetsa oa Bibele? Hopola hore maemo a batho a ka fetoha kapele lefatšeng lena le tletseng mathata ’me ba neng ba sa mamele molaetsa oa rona ba ka hlokomela hore ba hloka tataiso ea Molimo bophelong ba bona. (Mat. 5:3) Batho ba neng ba lula ba hana lingoliloeng tsa rona pele, hamorao ba ile ba lumela ho ithuta Bibele le rona. Re boetse rea tseba hore Jehova ke Mong’a kotulo. (Mat. 9:38) O batla hore re ’ne re leme le ho nosetsa ’me ke eena ea tla holisa. Ke ho khothatsang hakaakang ho hopola hore le hoja hona joale ho se na motho eo re ithutang Bibele le eena, Jehova ha a re putse ho ea ka hore na re tsamaisitse lingoliloeng tse kae kapa hore na re ithuta Bibele le bo-mang, o re putsa hobane re etsa boiteko ba ho thusa batho ba bang. w21.07 6 ¶14

Jehova o file batho bokhoni ba hore ba be le bana hammoho le boikarabelo ba hore ba ba rute ho mo rata le ho mo sebeletsa. Jehova o file mangeloi bokhoni ba ho etsa lintho tse ngata tse hlollang empa ha aa fa bokhoni ba ho ba le bana. Kahoo haeba u motsoali, u lokela ho ananela monyetla ona oo Jehova a u fileng oona oa hore u holise bana. Batsoali ba fuoe boikarabelo ba bohlokoa ba hore ba holise bana ba bona “ka taeo le kelello e laoloang ke Jehova.” (Baef. 6:4; Deut. 6:5-7) Mokhatlo oa Molimo o fana ka lithulusi tse ngata tse thehiloeng Bibeleng tse kang lingoliloeng, livideo, ’mino le lihlooho tse hlahang websaeteng e le hore li thuse batsoali ho holisa bana ba bona. Ho hlakile hore ntate oa rona le Mora oa hae ba rata bana haholo. (Luka 18:15-17) Jehova oa thaba ha batsoali ba itšetleha ka eena le ho etsa kahohle ho hlokomela bana ba bona. Ha batsoali ba etsa joalo, ba thusa bana ba bona hore ba be le tšepo ea hore le bona e tla ba karolo ea lelapa la Jehova ka ho sa feleng. w21.08 5 ¶9

Batho ba bang ba nahana hore ho ba le tumelo ho akarelletsa ho lumela nthong eo u se nang bopaki ba eona. Empa Bibele ha e hlalose tumelo joalo. Ela hloko hore ho ba le tumelo linthong tse sa bonoeng tse kang ho lumela ho Jehova, Jesu le ’Muso oa hae o leholimong ho itšetlehile ka hore re be le bopaki bo re kholisang hore li teng. (Baheb. 11:3) Rasaense e mong oa Paki o re: “Tumelo ea rona ha e iphapanyetse lintho tseo saense e li buang.” Re ka ipotsa: ‘Haeba ho na le bopaki bo kholisang ba hore ’Mopi o teng, ke hobane’ng ha batho ba bangata ba sa lumele hore Molimo ke eena ea entseng hore bophelo bo be teng?’ Ke hobane batho ba bang ha baa ka ba itlhahlobela bopaki ka bobona. Mor’abo rona Robert eo e leng Paki ea Jehova hona joale o re: “Kaha ho ne ho se mohla ho buuoang ka popo sekolong, ke ne ke nahana hore ha se ’nete hore lintho li bopiloe. Ebile ka mor’a hore ke be lilemong tsa bo20 moo ke ileng ka utloa ka ho hlaka le ka tsela e kholisang hore Bibele e re Molimo o bopile lintho tsohle.” w21.08 15 ¶4-5

Re ka ithuta hore Jehova o molemo ka ho bala Bibele le ho utloa batho ba bang ba bua kamoo a ba hlohonolofalitseng kateng. Leha ho le joalo, e le hore re utloisise kamoo Jehova a leng molemo kateng, re lokela ho ‘latsoa’ molemo oa hae ka borona. Mohlala, a re re re batla ho sebeletsa Jehova ka nako e tletseng empa rea hlokomela hore re lokela ho fokotsa lintho tse itseng bophelong. Re tseba tšepiso ea Jesu e reng haeba re beha ’Muso pele, Jehova o tla re ekelletsa lintho tseo re li hlokang empa ha re e-s’o bone tšepiso eo e phethahala bophelong ba rona. (Mat. 6:33) Leha ho le joalo, kaha re tšepa tšepiso eo ea Jesu re sebelisa chelete hantle, re fokotsa nako eo re sebetsang ka eona ’me re qeta nako e ngata mosebetsing oa boboleli. Ha re etsa joalo, re tla bona hore Jehova o re hlokomela e le kannete ’me re tla ‘latsoa’ molemo oa hae. w21.08 26 ¶2

Ho joang mehleng ee? Hoa tšoana. Baruti ba bangata baa thaba ha batho ba nkoang ba le bohlokoa, ba ruileng le bao ho thoeng ba bohlale e e-ba litho tsa likereke tsa bona. Ba ba amohela likerekeng tsa bona le hoja boitšoaro ba bona le tsela eo ba phelang ka eona e sa lumellane le melao ea Molimo. Baruti bao ba nkela bahlanka ba Jehova ba chesehang fatše hobane feela ba se bohlokoa ho ea ka lefatše lena. Joalokaha Pauluse a bontšitse, Molimo o khethile ba “shebeloang tlaase.” (1 Bakor. 1:26-29) Leha ho le joalo, Jehova o nka bahlanka bohle ba hae ba tšepahalang e le ba bohlokoa. Re ka etsa’ng hore re se ke ra khelosoa ke tsela eo lefatše le nahanang ka eona? (Mat. 11:25, 26) U se ke oa lumella tsela eo le nkang batho ba Molimo ka eona hore e u susumetse. Tseba hore Jehova o sebelisa batho ba ikokobelitseng feela hore ba etse thato ea hae. (Pes. 138:6) Hape u nahanisise ka lintho tse ngata tseo a li finyeletse’ng a sebelisa batho bana bao lefatše le ba nkang ba sa ruteha ebile ba se bohlale. w21.05 8 ¶1; 9 ¶5-6

Moapostola Pauluse o ne a ananela hore ebe barab’abo ba ile ba mo thusa. O ne a ikokobelitse ’me a lumella bara le baralib’abo hore ba mo thuse. (Bafil. 2:19-22) Lona ba holileng le ka bontša hore le ananela bacha ba ka phuthehong ka litsela tse ngata. Haeba ba batla ho le lata ka koloi, ho ea lishopong kapa ho le thusa ka lintho tse ling tseo le li hlokang, amohelang thuso ea bona. Nka thuso ea bona e le tsela eo Jehova a bontšang hore oa u rata. Batho ba u thusang e ka ba metsoalle ea hao e meholo. U ka lula u thusa metsoalle ea hao ea bacha hore e be le kamano e ntle le Jehova ’me oa e bolella kamoo u thabelang ho e bona e sebetsa ka thata ka phuthehong. Ikemisetse ho qeta nako le bona le ho ba qoqela ka bophelo ba hao. Ha u etsa joalo u tla iponahatsa u le ‘ea lebohang’ Jehova ka bacha bao a ba huletseng ka phuthehong.—Bakol. 3:15; Joh. 6:44; 1 Bathes. 5:18. w21.09 11-12 ¶12-13

Jehova o rata bara le barali ba bo rona. Empa ka linako tse ling ho ke ke ha e-ba bonolo hore re bone hore baa re rata kapa hore rona re ba bontše hore rea ba rata. Ntle ho moo, re tsoa merabeng e sa tšoaneng ebile re holisitsoe ka litsela tse sa tšoaneng. Hape kaofela ha rona re etsa liphoso tse ka halefisang batho ba bang le ho ba koatisa. Ho ntse ho le joalo, kaofela ha rona re ka leka ka matla ho etsa hore ho be le lerato ka lelapeng la Jehova. Ka tsela efe? Ka ho etsisa Ntate oa rona ka hore re rate bara le barali ba bo rona. (Baef. 5:1, 2; 1 Joh. 4:19) Motho ea nang le qenehelo o batla litsela tsa ho thusa le ho khothatsa batho ba bang. Tsela eo Jesu a ileng a tšoara batho ka eona e ne e bontša hore na Jehova o ikutloa joang ka bona. (Joh. 5:19) Ka nako e ’ngoe ha a bona bongata o ile a “bo hauhela, hobane bo ne bo sohlokehile ’me bo qhalakane joaloka linku tse se nang molisa.” (Mat. 9:36) Jesu o ne a qenehela batho a bile a ba thusa. O ne a folisa batho ba kulang a bile a khatholla le bohle ba “sehlang le ba imetsoeng.”—Mat. 11:28-30; 14:14. w21.09 22 ¶10-11

Jehova o rata ho re bontša mohau. Moapostola Pauluse o ile a re Molimo ke ea “ruileng mohau.” Temaneng ena, Pauluse o ne a hlalosa hore Molimo o mohau hobane o file bahlanka ba hae ba sa phethahalang bao a ba tlotsitseng tšepo ea ho phela leholimong. (Baef. 2:4-7) Empa Jehova ha a mohau ho bahlanka ba hae ba tlotsitsoeng feela. Mopesaleme Davida o ile a re: “Jehova o molemo ho bohle, mehauhelo ea hae e holim’a mesebetsi eohle ea hae.” (Pes. 145:9) Kaha Jehova o rata batho, o ba bontša mohau nako e ’ngoe le e ’ngoe ha a bona ho hlokahala hore a etse joalo. Jesu ke eena ea tsebang hantle kamoo Jehova a ratang ho re bontša mohau kateng ho feta mang kapa mang. Jehova le Jesu ba ne ba le leholimong hammoho ka nako e telele pele Jesu a tla lefatšeng. (Liprov. 8:30, 31) Ka makhetlo a mangata, Jesu o ile a bona kamoo Ntate oa hae a bontšitseng mohau ho baetsalibe kateng. (Pes. 78:37-42) Ha Jesu a ne a ruta, hangata o ne a rata ho bua ka botho bona ba Ntate oa hae bo ratehang. w21.10 8-9 ¶4-5

Jehova o ile a arabela thapelo eo ka boeena ka ho bua a le leholimong a tšepisa hore o tla halaletsa lebitso la hae. Jesu o ile a tlotlisa lebitso la Ntate oa hae tšebeletsong eohle ea hae. (Joh. 17:26) Kahoo, hoa utloahala hore ebe Bakreste ba ’nete le bona ba ka ba motlotlo hore ba sebelise lebitso la Molimo le ho le tsebisa batho ba bang. Nakoana ka mor’a hore phutheho ea Bokreste e thehoe, Jehova o ile a “lebisa tlhokomelo ea hae lichabeng hore a nke ho tsona batho bakeng sa lebitso la hae.” (Lik. 15:14) Bakreste bao ba mehleng ea pele ba ne ba le motlotlo ho sebelisa lebitso la Molimo le ho le tsebisa batho ba bang. Ba ne ba sebelisa lebitso la Molimo mosebetsing oa boboleli le ha ba ne ba ngola libuka tsa Bibele. Ba ile ba paka hore ke bona feela ba tsebisang batho lebitso la Molimo. (Lik. 2:14, 21) Ka ho tšoanang mehleng ena, Lipaki Tsa Jehova ke batho bakeng sa lebitso la Molimo. w21.10 20-21 ¶8-10

Mosa o lerato oa Molimo o teng ka ho sa feleng. Taba ena e hlaha ka makhetlo a 26 lengolong la Pesaleme ea 136. Temana e qalang e re: “Lebohang Jehova, etsoe o molemo: Etsoe mosa oa hae o lerato o teng ho isa nakong e sa lekanyetsoang.” (Pes. 136:1) Temaneng ea 2 ho ea ho 26, ho na le mantsoe ana a reng, “etsoe mosa oa hae o lerato o teng ho isa nakong e sa lekanyetsoang.” Ha re ntse re bala lengolo lena la Pesaleme, re thaba haholo ha re bona litsela tseo Jehova a ntseng a tsoela pele a bontša mosa o lerato ka tsona. Mantsoe ana a hlahang hangata lengolong lena a reng “etsoe mosa oa hae o lerato o teng ho isa nakong e sa lekanyetsoang,” a re tiisetsa hore tsela eo Molimo a ratang bahlanka ba hae ka eona ha e fetohe. Ke ho khothatsang ho tseba hore Jehova ha a potlakele ho khaotsa ho rata bahlanka ba hae. Jehova ha a rata mohlanka oa hae ha a mo tlohele, haholo joang ha a le mathateng. Ho tseba hore Jehova o lula a le ka lehlakoreng la rona ho etsa hore re thabe ebile ho re fa matla ao re a hlokang ho mamella mathata ao re nang le ’ona le ho tsoela pele re mo sebeletsa.—Pes. 31:7. w21.11 4 ¶9-10

Na ka linako tse ling u ee u ikutloe u tšoenyehile ha u nahana ka lintho tse tla etsahala haufinyane, tse kang ho felisoa ha bolumeli ba bohata, tlhaselo ea Gogo oa Magogo le ntoa ea Armagedone? Na u kile oa ipotsa oa re, ‘Na ebe ke tla khona ho lula ke tšepahala ha lintho tsee tse tšosang li etsahala?’ Haeba u kile oa nahana ka lipotso tsena, taba eo Jesu a ileng a bua ka eona e hlahang temaneng ea kajeno e tla u thusa. Jesu o ile a re ho barutuoa ba hae: “Le se ke la lumella lipelo tsa lona hore li khathatsehe. Bontšang tumelo.” Tumelo e matla e tla re thusa hore re be sebete ho sa tsotellehe hore na ke’ng e etsahalang nakong e tlang. Ho nahana ka hore na re etsa’ng hona joale ha tumelo ea rona e lekoa, ho tla re thusa ho tseba hore na ke joang re ka matlafatsang tumelo ea rona e le hore re khone ho mamella nakong e tlang. Re tla khona ho bona hore na ke hokae moo re lokelang ho matlafatsa tumelo ea rona. Lekhetlo le leng le le leng ha re mamella teko, tumelo ea rona e ba matla le ho feta ’me seo se tla re thusa ho mamella liteko nakong e tlang. w21.11 20 ¶1-2

Moapostola Pauluse o ile a khothalletsa Timothea ho akarelletsa le Bakreste bohle hore ba phethe bosebeletsi ba bona ka botlalo. (2 Tim. 4:5) Empa ka linako tse ling, ho ba thata ho mamela keletso ena. Ka mohlala, nahana ka bara le barali ba bo rona ba lulang linaheng tseo mosebetsi oa rona o thibetsoeng. Bahlanka ba Jehova ba ba le mathata a mangata a ka ba nyahamisang. Ka mohlala, ba bangata ba bona ba tlameha hore ba sebetse ka thata e le hore ba hlokomele malapa a bona ka lintho tseo a li hlokang. Le hoja ba ka rata ho sebetsa ka thata tšimong, baa khathala mafelo a beke. Ba bang bona ba sa khone ho sebeletsa Jehova kahohle kamoo ba ka khonang hobane ba kula haholo, ba tsofetse kapa ba sa khone ho tloha malapeng a bona. Ha ba bang ba lula ba utloa eka ha se batho ba bohlokoa ho Jehova. Ho sa tsotellehe hore na re boemong bofe, Jehova a ka re fa matla a hore re lule re mamella mathata ao re nang le ’ona le ho mo sebeletsa kahohle kamoo re ka khonang kateng. w21.05 20 ¶1-3

Ka linako tse ling batho ba bang ba ka re hatella hore re etse lintho tse ka re thibelang ho sebeletsa Jehova ka tsela eo a batlang hore re mo sebeletse ka eona. Ha seo se etsahala, re lokela ho etsa qeto ea bohlokoa. Nahana ka molao-motheo ona o hlahang ho Levitike 19:19 o reng: “Le se ke la apara liaparo tsa litšoele tsa mefuta e ’meli, tse loheletsoeng hammoho.” Molao oo o ne o thusa ho khetholla Baiseraele ho lichaba tse neng li ba pota-potile. Mehleng ena, ha se phoso hore Mokreste a apare seaparo se entsoeng ka mefuta e fapaneng ea masela. Empa ha re batle ho tšoana le batho bao tumelo ea bona kapa mekhoa ea bona e sa lumellaneng le seo Bibele e se rutang. Ke ’nete hore re rata ba malapa a rona le baahelani ba rona. Leha ho le joalo, ha re etsa liqeto tsa bohlokoa bophelong re batla hore re se ke ra tšoana le batho ba sa sebeletseng Jehova. Ke ha bohlokoa hore re ikitlaelletse ho halalela.—2 Bakor. 6:14-16; 1 Pet. 4:3, 4. w21.12 5 ¶14; 6 ¶16

Tsela eisang bophelong ea fumaneha. Jesu o ile a re: “Haeba le lula lentsoeng la ka, ka sebele le barutuoa ba ka, le tla tseba ’nete, ’me ’nete e tla le lokolla.” (Joh. 8:31, 32) Ke hantle hore ha oa latela bongata empa u ile oa batla ’nete. U ile oa qala ka ho ithuta Lentsoe la Molimo ka hloko ho utloa hore na Molimo o lebeletse’ng ho rona oa ba oa mamela lithuto tsa Jesu. U ile oa ithuta hore Jehova o lebeletse hore re se ke ra mamela lithuto tsa bolumeli ba bohata le ho khaotsa ho keteka matsatsi a phomolo a thehiloeng bolumeling ba bohata. U boetse u ithutile hore ho etsa lintho tseo Jehova a li lebeletseng le ho khaotsa ho etsa lintho tse sa lumellaneng le thato ea hae ho ka ’na ha se be bonolo. (Mat. 10:34-36) E ka ’na eaba ho ne ho se bonolo hore u etse liphetoho tsena. Leha ho le joalo, u ile oa leka ho fetoha hobane u rata Ntate oa hao. Kannete e tlameha ebe o motlotlo ka uena.—Liprov. 27:11. w21.12 22 ¶3; 23 ¶5

Moshe ke mohlala o motle oa motho ea ileng a mamela ha a ne a khalemeloa ka mor’a hore a etse phoso e tebileng. Ho na le nako eo a ileng a halefa ’me a hloleha ho tlotlisa Jehova. Seo se ile sa etsa hore a lahleheloe ke monyetla oa ho kena Naheng e Tšepisitsoeng. (Num. 20:1-13) Ha Moshe a bolella Jehova hore na o ikutloa joang ka qeto eo a e entseng, Jehova o ile a re ho eena: “U se ke oa hlola u bua le ’na hape ka taba ena.” (Deut. 3:23-27) Moshe ha aa ka a halefa, ho e-na le hoo o ile a amohela qeto ea Jehova ’me Jehova o ile a tsoela pele a mo sebelisa hore a tataise Baiseraele. (Deut. 4:1) Moshe o ile a mamela keletso ’me ke mehlala o motle oo re ka o etsisang. Moshe o ile a bontša hore o mametse keletso ea Jehova ka hore a lule a tšepahala esita le ka mor’a hore a lahleheloe ke monyetla oo a neng a ka o thabela. Re rua molemo ha re etsisa mehlala ea batho ba nang le tumelo joaloka Moshe. (Liprov. 4:11-13) Bara le barali babo rona ba bangata ba etsa sona seo. w22.02 11 ¶9-10

Mariheng a selemo sa 32, motsoalle oa Jesu ea haufi ea bitsoang Lazaro o ile a kula a ba a shoa. (Joh. 11:3, 14) Lazaro o ne a e-na le likhaitseli tse peli e leng Maria le Maretha ’me Jesu o ne a rata lelapa lena haholo. Ha Maretha a utloa hore Jesu o ntse a tla, kapele o ile a tsoa ho ea kopana le eena. Nahana hore na o ne a utloile bohloko hakaakang ha a ne a re: “Morena, hoja u ne u le teng mona khaitseli ea ka e ka be e sa shoa.” (Joh. 11:21, 32, 33) Jesu o ile a llisoa ke ho bona kamoo lefu la Lazaro le neng le utloisitse Maria le Maretha bohloko kateng. Haeba u kile oa hlokahalloa ke motho eo u mo ratang, Jehova oa utloisisa hore na u ikutloa joang. Jesu ke “setšoantšo se nepahetseng hantle” sa Ntate oa hae. (Baheb. 1:3) Ha Jesu a ne a lla, o ile a bontša hore na Jehova o ikutloa joang ha re hlokahalloa ke motho eo re mo ratang. (Joh. 14:9) Haeba u hlokahaletsoe ke motho eo u mo ratang, u ka kholiseha hore Jehova oa hlokomela hore u utloile bohloko ebile le eena o utloa bohloko. O batla ho thoba pelo ea hao e utloileng bohloko.—Pes. 34:18; 147:3. w22.01 15 ¶5-7

Haeba u ipha nako ea ho bua le Jehova, ho mo mamela le ho nahana ka eena, u tla fumana molemo o moholo. Ntlha ea pele, u tla etsa liqeto tse bohlale. Bibele e re tiisetsa hore “ea tsamaeang le batho ba bohlale o tla hlalefa.” (Liprov. 13:20) Ntlha ea bobeli, u tla ba tichere e hloahloa. Ha re ithuta Bibele le motho, ntho e ka sehloohong eo re e batlang ke ho mo thusa hore e be motsoalle oa Jehova. Ha re rapela Jehova le ho ithuta ka eena hangata, re tla mo rata le ho feta. Ha re mo rata haholo, re tla khona ho thusa batho bao re ithutang le bona hore ba mo rate. Nahana ka mohlala oa Jesu. O ile a bua ka Ntate oa hae ka tsela e amang maikutlo ’me ho etsa joalo ho ile ha thusa barutuoa ba hae hore ba rate Jehova. (Joh. 17:25, 26) Ntlha ea boraro, tumelo ea hao e tla matlafala. Nahana hore na ho etsahala’ng haeba u kopa Molimo hore a u tataise, a u tšelise kapa a u tšehetse. Kamehla ha Jehova a arabela lithapelo tseo, tumelo ea hao ea matlafala.—1 Joh. 5:15. w22.01 30 ¶15-17

Jehova o re khothalletsa hore re khaotse ho nahana le ho etsa lintho tse fosahetseng hobane o re rata haholo ebile o batla hore re thabele bophelo. (Esa. 48:17, 18) Oa tseba hore batho ba sa tloheleng ho etsa lintho tse mpe ba ikutloisa bohloko hammoho le batho ba bang ’me seo le eena se mo utloisa bohloko. Metsoalle e meng ea rona le ba bang ba lelapa ba ka ’na ba re soma hobane re leka ho fetola tsela eo re phelang ka eona. (1 Pet. 4:3, 4) Ba ka ’na ba re re na le tokelo ea ho etsa ntho e ’ngoe le e ’ngoe eo re e batlang ’me ha rea lokela ho lumella batho ba bang hore ba re bolelle hore na re etse’ng. Leha ho le joalo, ha se kamehla batho ba hanang ho mamela melao ea Jehova ba iketsetsang liqeto hobane ba lumella batho ba busoang ke Satane hore ba susumetse tsela eo ba etsang lintho ka eona. (Bar. 12:1, 2) Kaofela ha rona re lokela ho khetha hore na re tla lula re apere botho ba khale bo laoloang ke sebe le lefatše lena la Satane kapa re tla lumella Jehova hore a fetole bophelo ba rona hona joale hore re be batho ba molemo.—Esa. 64:8. w22.03 3 ¶6-7

Ho nahanisisa ka Lentsoe la Molimo ho tla re thusa hore re se ke ra nyahama ha re e-na le mathata. Nahana kamoo Bibele e ileng ea thusa morali oa bo rona oa mohlolohali ea neng a utloile bohloko kateng. Moholo e mong o ile a mo khothalletsa hore a bale lengolo la Jobo e le hore a fumane lintlha tse ka mo thusang. Ha a ntse a le bala, o ile a tatela ho ahlola Jobo ka tsela e fosahetseng eo a neng a nahana ka eona. Ha a ntse a nahana ka taba ena o ile a re: “Jobo, u se ke oa nahana ka mathata a hao feela.” Empa o ile a hlokomela hore le eena o ne a ntse a ikutloa joaloka Jobo. Ntho eo e ile ea mo thusa hore a fetole tsela eo a neng a nahana ka eona le ho mo matlafatsa hore a mamelle bohloko ba ho hlokahalloa ke molekane oa hae. Tsela e ’ngoe eo Jehova a matlafatsang Bakreste ka eona ke ka ho sebelisa Bakreste-’moho le bona. Pauluse o ile a ngola hore o hloloheloa ho ba le Bakreste-’moho le eena e le hore ba ka “khothatsana.”—Bar. 1:11, 12. w21.05 22 ¶10-11; 24 ¶12

Baiseraele ba ile ba fuoa taelo e reng: “Hararo ka selemo, e mong le e mong e motona ho uena o lokela ho hlaha ka pel’a Jehova Molimo oa hao sebakeng seo a tla se khetha.” (Deut. 16:16) Ba ne ba tla siea matlo le masimo ho se na motho ea li sirelelitseng. Jehova o ile a ba tšepisa a re: “Ha ho ea tla lakatsa naha ea hao ha u nyoloha ho ea bona sefahleho sa Jehova Molimo oa hao.” (Ex. 34:24) Kaha Baiseraele ba ne ba tšepa Jehova ka ho feletseng, ba ne ba ea meketeng eo ea selemo le selemo. Ha ba le moo, ba ne ba fumana melemo e mengata. Ka mohlala, ba ne ba ithuta haholo ka Molao oa Molimo, ba nahana kamoo Jehova a leng molemo kateng ho bona ba bile ba thabela ho ba har’a barapeli ba bang ba Jehova. Re fumana melemo e tšoanang ha re etsa sohle seo re ka se khonang hore re be teng libokeng. Nahana feela hore na Jehova o thaba hakaakang ha re fana ka likarabo tse khutšoane tse lokiselitsoeng hantle. w22.03 22 ¶9

Jehova o ne a koetlisa Jesu hore e tle e be Moprista ea Phahameng oa ka moso. Jesu o ile a utloa hore na ke ntho e boima hakaakang hore motho a mamele Molimo ha a le ka har’a liteko tse boima haholo. O ne a imetsoe hoo a ileng a rapela ka “mohoo o moholo le ka meokho” ho kopa thuso. Ka lebaka la hore Jesu o ile a tšoenyeha haholo, o utloisisa litlhoko tsa rona hantle hape “o khona ho phallela ba ntseng ba lekoa.” Rea thaba hore ebe Jehova o re khethetse Moprista ea Phahameng ea mohau ea khonang ho “utloela mefokolo ea rona bohloko.” (Baheb. 2:17; 4:14-16; 5:7-10) Jehova o ile a lumella hore Jesu a utloe bohloko e le hore ho ka arajoa potso ena ea bohlokoa: Na batho ba ka lula ba tšepahala le ha ba lekoa ka litsela tsohle? Satane o hanana le taba eo. O re batho ba sebeletsa Molimo ka mabaka a boithati. le hore ha ba rate Jehova. (Job 1:9-11; 2:4, 5) Jesu o ile a khona ho lula a tšepahala eaba o paka hore Satane o leshano. w21.04 16-17 ¶7-8

Pele motho ea ithutang Bibele a kolobetsoa, o lokela ho etsa lintho tseo Bibele e li rutang. Ha a etsa lintho tseo a ithutang tsona, o ba joaloka “monna ea masene” eo Jesu a ileng a bua ka eena papisong ea hae, ea ileng a chekela tlaase ’me a haha ntlo ea hae holim’a lefika. (Mat. 7:24, 25; Luka 6:47, 48) Mo thuse hore a etse liphetoho. (Mar 10:17-22) Jesu o ne a tseba hore ho ne ho tla ba thata ho motho ea ruileng ho rekisa lintho tsohle tseo a nang le tsona. (Mar. 10:23) Leha ho le joalo, Jesu o ile a bolella monna e mong hore a etse phetoho eo e kholo bophelong ba hae. Hobane’ng? Hobane Jesu o ne a mo rata. Ka linako tse ling, re ka ’na ra se khothalletse motho eo re ithutang Bibele le eena hore a etse lintho tseo a ithutang tsona hobane re nahana hore ha e-s’o be nako e nepahetseng hore a etse liphetoho tseo a hlokang ho li etsa. (Bakol. 3:9, 10) Haeba u sa liehe ho bua le motho eo u ithutang Bibele le eena ka liphetoho tseo a lokelang ho li etsa, ntho eo e tla etsa hore a etse liphetoho tseo a hlokang ho li etsa kapelenyana. Haeba u etsa joalo, u tla be u bontša hore oa mo tsotella.—Pes. 141:5; Liprov. 27:17. w21.06 3 ¶3, 5

Ka ho khetheha Petrose o bua ka mohlala oo Jesu a re behetseng oona oa ho mamella matšoenyeho empa ho na le litsela tse ling tse ngata tseo re ka etsisang Jesu ka tsona. (1 Pet. 2:18-25) Ho bua ’nete, ntho e ’ngoe le e ’ngoe eo Jesu a ileng a e bua le ho e etsa bophelong bohle ba hae, ke mohlala oo re ka o etsisang. Na re ka khona ho latela mohlala oa Jesu le hoja re sa phethahala? E, re ka khona. A re hopoleng hore Petrose o re re “latele mehato ea [Jesu] haufi-ufi” e seng ka ho phethahetseng. Ka mantsoe a mang, haeba re etsa boiteko bohle le hoja re sa phethahala, re tla be re mamela keletso eo moapostola Johanne a ileng a fana ka eona ea ho re: ‘Re ’ne re tsamaee feela joalokaha Jesu a ile a tsamaea.’ (1 Joh. 2:6) Ho latela mehato ea Jesu ho re thusa hore re be le le setsoalle se haufi le Jehova. Ke hobane’ng ha re cho joalo? Ke hobane Jesu o re behetse mohlala o babatsehang tabeng ea ho phela ka tsela e khahlisang Jehova. (Joh. 8:29) Kahoo, ha re latela mehato ea Jesu re tla thabisa Jehova. Ntho eo re kholisehileng ka eona ke hore ntate oa rona o tla atamela haufi le rona haeba feela re leka ka thata hore re be metsoalle ea hae.—Jak. 4:8. w21.04 2-3 ¶4-6

Jehova o bona makhabane a rona, oa bona hore re ka khona ho etsa’ng hape o re hulela ho eena. Haeba re lula re mo tšepahalla, o tla lula a e-na le rona ka ho sa feleng. (Joh. 6:44) Haeba re kholisehile hore Jehova oa re rata le ho re tšehetsa, re tla susumeletseha hore re mo sebeletse ka lipelo tsohle tsa rona ho sa tsotellehe mathata. Empa haeba re belaella taba ea hore Jehova oa re rata, ‘matla a rona a tla fokola.’ (Liprov. 24:10) Hape, haeba re nyahame ebile re felloa ke tumelo ea hore Jehova oa re rata, re tla iphumana re le mahlatsipa a litlhaselo tsa Satane. (Baef. 6:16) Bakreste ba bang ba tšepahalang mehleng ena ba nyahamisitsoe ke ho ba le lipelaelo. Re lokela ho etsa’ng haeba lipelaelo tse joalo li qala ho ba teng ka likelellong tsa rona? Re lokela ho li leleka hang-hang! Kopa Jehova hore a u fe ‘khotso ea hae e fetang monahano oohle e tla lebela pelo ea hao le matla a hao a kelello ka Kreste Jesu’ e le hore e u thuse u tlose lipelaelo tse u ‘hlokisang botsitso.’ (Pes. 139:23; Bafil. 4:6, 7) U lule u hopola hore ha u mong. w21.04 20 ¶1; 21 ¶4-6

Ho tlile joang hore u be e mong oa Lipaki Tsa Jehova? Mohlomong u ile oa utloa molaetsa oa Bibele ho batsoali ba hao, mosebetsi-’moho, moithuti-’moho kapa ha e mong oa Lipaki Tsa Jehova a ne a u etetse lapeng. (Mar. 13:10) Ka mor’a moo, motho eo o ile a etsa boiteko ’me a qeta nako e ngata a ithuta Bibele le uena. Ha u ntse u ithuta, u ile oa hlokomela hore Jehova oa u rata eaba le uena u qala ho mo rata. Jehova o ile a u hulela ka phuthehong ’me kaha u morutuoa oa Jesu Kreste, u se u e-na le tšepo ea ho phela ka ho sa feleng. (Joh. 6:44) Re kholisehile hore u ananela hore ebe Jehova o ile a susumelletsa motho e mong hore a ithute Bibele le uena le hore o u amohetse u le e mong oa bahlanka ba hae. Kaha re se re tseba Bibele, re na le monyetla o babatsehang oa ho thusa batho ba bang hore ba tsamaee le rona tseleng ena e isang bophelong bo sa feleng. Ho ka ’na ha e-ba bonolo hore re bolele molaetsa oa Bibele ka ntlo le ntlo empa ra thatafalloa ke ho ithuta Bibele le batho. w21.07 2 ¶1-2