August

Ho ka etsahala hore ebe Jesu o ne a bua ka masole a Roma a ileng a mo khokhothela ka lipekere maotong le matsohong. Jesu ha aa ka a lumella hore ho tšoaroa hampe ho etse hore a se ke a tšoarela batho ba bang kapa hore a ba koatele. (1 Pet. 2:23) Joaloka Jesu, le rona re lokela ho ikemisetsa ho tšoarela batho ba bang. (Bakol. 3:13) Batho ba bang ho akarelletsa le litho tsa rona tsa malapa ba ka ’na ba re hlorisa hobane feela ba sa utloisise tumelo ea rona kapa tsela eo re phelang ka eona. Ba ka ’na ba bua mashano ka rona, ba re tlotlolla ka pel’a batho ba bang, ba senya lingoliloeng tsa rona kapa ba re tšose ka hore ba tla re hlekefetsa ’meleng. Ho e-na le hore re ba hloee, re ka kopa Jehova hore a thuse batho bao ba re hlekefetsang hore ka le leng ba tsebe ’nete. (Mat. 5:44, 45) Ka linako tse ling, re ka ’na ra thatafalloa ke ho tšoarela batho ba bang haholo haeba ba re tšoere ka tsela e mpe hoo re sa e lebaleng. Empa haeba re lula re koatile kapa re sa ba tšoarele, re tla ipakela mathata. (Pes. 37:8) Ha re etsa qeto ea ho tšoarela batho, re khetha hore re se ke ra lumella lintho tse mpe tse etsahetseng li lule li re utloisitse bohloko.—Baef. 4:31, 32. w21.04 8-9 ¶3-4

Na ho na le motho eo u mo ratang ea ileng a tlosoa ka phuthehong? E ka ’na eaba u ne u utloile bohloko haholo. Nahana hore na Jehova o ile a utloa bohloko hakae ha mangeloi a mang lelapeng la hae a ne a mo fetohela. (Juda 6) Hape u nahane hore na o ile a utloa bohloko hakae ha batho bao a neng a ba rata e leng Baiseraele ba ne ba mo fetohela ka makhetlo a mangata. (Pes. 78:41) Kholiseha hore Ntate oa rona ea lerato le eena o ntse a utloa bohloko ha motho eo u mo ratang a mo fetohela. Oa utloisisa hore na u utloile bohloko hakae. O tla u khothatsa a be a u fe tšehetso eo u e hlokang. Ha bana ba tlohela ho sebeletsa Jehova, ho tloaelehile hore batsoali ba nahane hore ho na le ntho eo ba ka beng ba e entse ho ba thusa hore ba tsoele pele ba sebeletsa Jehova. Mor’abo rona Luke o ile a re: “Ke ne ke nahana hore ke phoso ea ka. Taba ena e ne e sa nthobatse.” Morali’abo rona ea neng a le boemong bo tšoanang hangata o ne a ipotsa a re: “Ebe ke ile ka fosa hokae? Ke ne ke utloa eka ha kea ruta ngoana oa ka hantle hore a rate Jehova.” w21.09 26 ¶1-2, 4

Batho ba bang ba lumela hore bahlanka ba Molimo ba ke ke ba ruta batho Bibele hobane ha baa ea likolong tse tummeng tsa baruti. Empa ba lokela ho hlahloba lintlha tsohle. Luka e leng mongoli e mong oa Kosepele o ne a ikemiselitse ho etsa joalo. O ne a ikemiselitse ho sala “lintho tsohle morao ho tloha qalong ka ho nepahala.” O ne a batla hore babali ba hae ba ‘tsebe ka botlalo bonnete ba lintho tseo’ ba li utloileng ka Jesu. (Luka 1:1-4) Bajuda ba neng ba lula Berea ea boholo-holo ba ne ba tšoana le Luka. Ha ba ne ba qala ho utloa litaba tse monate ka Jesu, ba ile ba hlahloba Mangolo a Seheberu ho tiisa hore litaba tseo ke ’nete. (Lik. 17:11) Ka tsela e tšoanang, kajeno batho ba lokela ho hlahloba lintlha tsohle. Ba tlameha ho bapisa lintho tseo bahlanka ba Molimo ba ba rutang tsona le tseo Mangolo a li buang. Ba boetse ba lokela ho ithuta ka lintho tseo bahlanka ba Jehova ba li entseng mehleng ena. Haeba ba etsa lipatlisiso hantle, ba ke ke ba lumella lehloeo kapa litaba tsa bo-mabare-bare li ba khelose. w21.05 3 ¶7-8

Na ho na le motho e mong phuthehong ea lona eo u ka mo memang? Ho na le linako tseo Bakreste-’moho le rona ba ka thabang haholo ha re ka qeta nako le bona. Ho ka ba thata hore ba bang ba be le ba malapa a bona ao e seng Lipaki Tsa Jehova ha ba keteka matsatsi a phomolo. Ba bang ba ka ’na ba utloa bohloko haholo ka matsatsi a itseng a kang letsatsi leo motho eo ba mo ratang a hlokahetseng ka lona. Ha re ithaopela ho qeta nako le bara le barali ba bo rona ba maemong ana, re tla be re bontša hore re ba rata e le “kannete.” (Bafil. 2:20) Ho na le lintho tse ngata tse ka etsang hore Mokreste a ikutloe eka o mong. Leha ho le joalo, ha rea lokela ho lebala hore Jehova o utloisisa kamoo re ikutloang kateng. Hangata o sebelisa bara le barali ba bo rona ho re fa ntho eo re e hlokang. (Mat. 12:48-50) Kahoo, re bontša Jehova hore re ananela bara le barali ba bo rona ka ho ba thusa kahohle kamoo re ka khonang kateng. Ho sa tsotellehe hore na re ikutloa joang, ha re bang hobane Jehova o lula a e-na le rona. w21.06 13 ¶18-20

Jesu o ne a lula a thabile ’me o ile a tsoela pele a ruta batho le ha ba bang ba ne ba sa mamele molaetsa oa hae. Ebe ke hobane’ng? Lebaka ke hobane o ne a tseba hore batho ba bangata ba hloka ho tseba ’nete ’me o ne a batla ho fa batho ba bangata kamoo ho ka khonehang monyetla oa hore ba mamele molaetsa oa ’Muso oa Molimo. Hape o ne a tseba hore batho ba neng ba sa mo mamele qalong, ba ka ’na ba qetella ba mo mametse. Nahana ka ntho e ileng ea etsahala lelapeng la bo Jesu. Nakong eo Jesu a neng a etsa tšebeletso ea hae e nkileng lilemo tse tharo le halofo, bana ba bo ha baa ka ba e-ba barutuoa ba hae. (Joh. 7:5) Leha ho le joalo, e ile ea ba Bakreste ka mor’a hore a tsosoe. (Lik. 1:14) Ha re tsebe hore na ke mang ea tla qetella e le mohlanka oa Jehova. Batho ba bang ba nka nako e telele hore ba amohele molaetsa oa rona. Esita le ba bang ba sa batleng ho re mamela, ba bona boitšoaro ba rona bo botle le kamoo re thabileng kateng ’me ba ka ’na ba qetella ba “tlotlisa Molimo.” w21.05 18 ¶17-18

Ha Jesu a ne a le lefatšeng, o ile a fa balateli ba hae mosebetsi o neng o e-na le likarolo tse peli. O ile a ba bolella hore ba bolele molaetsa oa ’Muso oa Molimo ’me a ba bontša hore na ba lokela ho etsa mosebetsi oo joang. (Luka 8:1) Ka mohlala, Jesu o ile a bolella barutuoa ba hae hore na ba lokela ho etsa’ng ha batho ba mamela molaetsa oa ’Muso le ha ba sa o mamele. (Luka 9:2-5) Hape o ile a bolela hore na balateli ba hae ba ne ba tla etsa mosebetsi ona ho isa boholeng bofe ha a ne a re ba ne ba tla fana ka “bopaki ho lichaba tsohle.” (Mat. 24:14; Lik. 1:8) Ho ekeletsa moo, o ile a bolella balateli ba hae hore ba rute batho ho boloka lintho tsohle tseo a ba laetseng tsona. Jesu o ile a bontša hore mosebetsi ona oa bohlokoa o ne o tla tsoela pele le mehleng ena “ho fihlela qetellong ea tsamaiso ea lintho.” (Mat. 28:18-20) Jesu o ile a bontša Johanne ka ho hlaka ponong hore o batla hore barutuoa bohle ba hae ba thuse batho ba bang ho ithuta ka Jehova.—Tšen. 22:17. w21.07 2-3 ¶3-4

Batho ba bangata mehleng ena, ba rata ho hlolisana ba sa tsotelle hore na batho ba bang ba tla ameha joang ke liketso tsa bona. Rakhoebo a ka leka ho etsa lintho tse ka utloisang batho ba bang bohloko hobane feela a batla ho atleha ho ba feta. Sebapali se ka lematsa se hlolisanang le sona ka boomo hobane feela se batla hore se hlole papali. Moithuti ea batlang ho ea univesithi e tummeng haholo a ka qopitsa nakong ea litlhahlobo. Bakreste baa tseba hore lintho tseo li fosahetse hobane ke karolo ea “mesebetsi ea nama.” (Bagal. 5:19-21) Empa na ho ka etsahala hore ba bang ba bahlanka ba Jehova ba hlohlelletse ho hlolisana ka phuthehong ba sa elelloe? Potso ena kea bohlokoa hobane ha batho ba hlolisana ho ke ke ha e-ba le bonngoe ka phuthehong. Ke hantle hore re hlahlobe mehlala ea banna le basali ba ka Bibeleng ba tšepahalang ba sa kang ba itumella ho ba le moea oa tlholisano. w21.07 14 ¶1-2

Mosa o lerato o re susumetsa hore re thuse ba nyahameng. Bara le barali ba bo rona ba bangata ba mosa le bona ba lula ba ikemiselitse ho ba le Bakreste-’moho le bona ba utloileng bohloko kapa ba nyahameng. Ba rata Bakreste-’moho le bona ’me ba batla ho etsa ntho leha e le efe ho ba thusa. (Liprov. 12:25; 24:10) Taba ena e tšoana le ntho eo moapostola Pauluse a ileng a re khothaletsa eona ha a ne a re: “Le bue ka mokhoa o tšelisang le meea e tepeletseng maikutlo, le tšehetse ba fokolang, le be le tiisetso ho bohle.” (1 Bathes. 5:14) Hangata tsela e atlehang eo u ka thusang mora kapa morali oa bo rona ea nyahameng ka eona ke ka hore u mo mamele le ho mo kholisa hore oa mo rata. Jehova o ananela lintho tsohle tseo u li etsang ho thusa linku tsa hae tse ratehang. Liproverbia 19:17 e re: “Ea bontšang mohau ho ea tlaase o alima Jehova, ’me O tla mo buseletsa tšoaro ea hae.” w21.11 10 ¶11-12

Re ka etsa’ng hona joale ho itokisetsa nako e tlang? Re lokela ho khotsofalla lintho tseo re nang le tsona le ho thabisoa ke hobane re na le kamano e ntle le Jehova. Ha re ntse re ithuta ka Molimo oa rona haholoanyane, re tla kholiseha le ho feta hore o tla khona ho re sireletsa ha Gogo oa Magogo a re hlasela. Mantsoe a temana ea rona ea letsatsi kajeno a bontša hore Davida o ne a tseba hore a ka tšepa hore Jehova o tla mo tšehetsa. Davida o ne a lula a itšetlehile ka Jehova ’me ha ho le ka mohla a ileng a mo phoqa. Ha Davida esale moshanyana o ile a tlameha ho loantša seqhenqha sa Mofilista e leng Goliathe ’me o ile a re ho eena: “Letsatsing lena Jehova o tla nehelana ka uena letsohong la ka.” (1 Sam. 17:46) Hamorao ha Davida a ne a sebeletsa Morena Saule, Saule o ile a leka ho mo bolaea ka makhetlo a mangata empa “Jehova o ne a e-na le” Davida. (1 Sam. 18:12) Kaha Jehova o ne a ile a thusa Davida nakong e fetileng, Davida o ne a tseba hore o tla mo thusa ka mathata ao a nang le ’ona. w22.01 6 ¶14-15

Linthong tsohle tseo Jehova a li etsang, ka mamello o nka nako eohle eo a e hlokang hore a etse mosebetsi oa hae. O etsa joalo ho rorisa lebitso la hae le ho thusa batho ba bang. Ka mohlala, nahana kamoo Jehova a ileng a lokisa lefatše butle-butle bakeng sa batho. Ha Bibele e hlalosa kamoo Jehova a ileng a bopa lefatše kateng e re o ile a beha “litekanyo tsa lona,” “litšehetso tsa lona tse sekoti” le “lejoe la lona la sekhutlo.” (Gen. 1:10, 12) U nahana hore mangeloi a ile a ikutloa joang ha a bona lintho tseo Jehova a ntseng a li bopa? E tlameha ebe a ne a thabile haholo. Ke kahoo a ileng a qala ho “hlaba litlatse.” Re ithuta’ng? Ho ile ha nka lilemo tse ngata hore Jehova a etse lefatše, linaleli le lintho tsohle tse phelang empa e itse ha a sheba mosebetsi oa hae oohle, o ile a re o ne o le “molemo haholo.”—Gen. 1:31. w21.08 9 ¶6-7

Papisong ea Jesu ea litalenta, monna e mong o ne a tl’o nka leeto. Pele a tsamaea, o ile a bitsa makhoba a hae ’me a fa le leng le le leng litalenta e le hore le etse khoebo ka tsona. A nahanne ka bokhoni ba makhoba a hae, monna eo o ile a fa lekhoba la pele litalenta tse hlano, la bobeli tse peli eaba o fa la boraro e le ’ngoe. Makhoba a mabeli a ile a sebetsa ka thata ho etsetsa mong’a oona chelete e ngata. Leha ho le joalo, lekhoba la boraro ha lea ka la etsa letho ’me mong’a lona a le leleka. Lekhoba la pele le la bobeli, a ile a nka mosebetsi oa ’ona ka ho teba eaba a sebeletsa mong’a ’ona ka thata. Ka lebaka leo, a ile la etsetsa mong’a ’ona litalenta tse ling hape tse peli. Mong’a ‘ona o ile a a putsa hobane a ile a sebetsa ka thata. O ile a thaba a ba a a fa mosebetsi o mong o eketsehileng. w21.08 21 ¶7; 22 ¶9-10

Jehova o bontšitse hore o na le mamello haholo feela matsatsing ana a ho qetela. Ha a batle hore motho le ha e le ofe a timetsoe. (2 Pet. 3:9) O file batho bohle monyetla oa hore ba bake. Empa mamello ea hae ho na le moo e fellang teng. Batho ba hanang monyetla ona ba tla iphumana ba le boemong bo tšoanang hantle le ba Faro mehleng ea Moshe. Jehova o ile a re ho Faro: “Etsoe ka nako ena nka be ke otlile uena le batho ba hao ka lefu la seoa ’me u ka be u felisitsoe lefatšeng. Empa, ha e le hantle, ke u bolokile u phela ka lebaka lena, ka morero oa hore ke u bontše matla a ka le hore lebitso la ka le boleloe lefatšeng lohle.” (Ex. 9:15, 16) Qetellong lichaba tsohle li tla tseba hore Jehova ke eena feela Molimo oa ’nete. (Ezek. 38:23) Ho sisinyeha ho hlahang temaneng ea kajeno ho bolela timetso ea ka ho sa feleng ho batho ba tšoanang le Faro ba hanang ho lumela hore Jehova ke eena ea nang le tokelo ea ho busa. w21.09 18-19 ¶17-18

Na u ikutloa u se na mang-oe hobane motho eo u mo ratang a ile a khaoloa. Joale ho thoe’ng haeba ka phuthehong ho e-na le batho ba etsang hore u ikutloe u nyahame le ho feta? Re ke ke ra lebella hore e tla ba motho e mong le e mong ea buang lintho tse khothatsang. (Jak. 3:2) Kaofela ha rona ha rea phethahala, kahoo u se ke oa makala haeba u bona motho a sa tsebe hore na a re’ng kapa a bua ntho e u utloisang bohloko a sa hlokomele. Hopola keletso ea moapostola Pauluse e re’ng: “Tsoelang pele le mamellana le ho tšoarelana ka bolokolohi haeba leha e le mang a e-na le sesosa sa pelaelo.” (Bakol. 3:13) Tsoela pele u tšehetsa litho tsa lelapa. Ba hloka u ba rate u be u ba khothatse ho feta le ha e le neng pele. (Baheb. 10:24, 25) Ka linako tse ling, litho tsa lelapa lia hlokomela hore ka phuthehong ho na le batho ba seng ba sa ba buise joalokaha eka ke bona ba khaotsoeng. Ha re batle hore ba ikutloe ka tsela eo. Re lokela ho babatsa le ho khothatsa bana bao batsoali ba bona ba ileng ba khaotsa ho sebeletsa Jehova. w21.09 29 ¶13-14; 30 ¶16

Ha motho ea holileng a bua le mocha, ka bobeli baa khothatsana. (Bar. 1:12) Mocha o tla kholiseha hore Jehova o tsotella batho ba hae ’me motho ea seng a holile eena o tla ikutloa a ratoa. O tla thabela ho bolella mocha kamoo Jehova a ileng a mo hlohonolofatsa kateng. Hangata ha motho a hola, botle ba hae boa fela empa batho ba tšepahalang ho Jehova ba ba batle le ho feta ha lilemo li ntse li e-ea. (1 Bathes. 1:2, 3) Ke hobane’ng ha ho le joalo? Hobane ka lilemo tse ngata ba ile ba lumella moea oa Molimo hore o ba koetlise le ho ba thusa hore ba be le makhabane a matle. Ha re ntse re tseba bara le barali ba bo rona ba holileng, re ba hlompha ebile re ithuta ho bona, re tla ba nka e le batho ba bohlokoa. Phutheho e ba matla le ho feta e seng feela hobane ba bacha ba ananela ba holileng empa hobane ba holileng le bona ba ananela bacha w21.09 7 ¶15-18

Re lokela ho leka ka hohle hore re se ke ra ba batho ba se nang kutloelo-bohloko empa re be ba “ruileng mohau” joaloka Molimo oa rona. (Baef. 2:4) Mohau ha se boikutlo feela boo motho a bang le bona. Ha e le hantle motho ea mohau o thusa batho ba bang. Kahoo, kaofela ha rona re lokela ho batla litsela tsa ho thusa batho ba bang ebang ke malapeng a bo rona, ka phuthehong kapa moo re lulang teng. Kannete re ka fumana menyetla e mengata ea ho bontša mohau. Na ho na le motho ea hlokang ho khothatsoa? Na re ka thusa ba bang mohlomong ka ho ba fa lijo kapa ho ba thusa ka tsela e ’ngoe? Mohlomong Mokreste ea khutliselitsoeng ka phuthehong o hloka motsoalle ea ka mo khothatsang. Na re ka bua le batho ba bang ka molaetsa o monate o ba tšelisang? (Jobo 29:12, 13; Bar. 10:14, 15; Jak. 1:27) Haeba re hlokomela hore na batho ba hloka eng, re tla bona hore ho na le menyetla e mengata ea hore re bontše mohau. Ha re bontša batho ba bang mohau re thabisa Ntate oa rona haholo hobane ke ea “ruileng mohau.” w21.10 13 ¶20-22

Pesalemeng ea 23, Davida o qalile ho ngola lengolo lena la pesaleme ka mantsoe a reng: “Jehova ke Molisa oa ka. Nke ke ka hloka letho.” Lengolong lena lohle, Davida o bua ka lintho tsa bohlokoa haholo tse kang lintho tse molemo tseo Jehova a mo fileng tsona hobane a nka Jehova e le Molisa oa hae. Jehova o ne a tsamaisa Davida “litseleng tsa ho loka” hape o ne a mo tšehetsa linakong tse monate le tse mpe. Davida o ne a tseba hore le hoja a ne a le “makhulong a tletseng joang” o ne a ntse a tla ba le mathata. Ka linako tse ling o ne a e-ba le lira tse ngata ’me o ne a nyahama joalokaha eka o tsamaea “phuleng ea moriti o lefifi.” Empa kaha Jehova e ne e le Molisa oa hae, Davida o ne a sa “tšabe letho le lebe.” Ke ka tsela efe Davida a neng a sa ‘haelloe ke letho’? Lebaka ke hobane o ne a e-na le lintho tsohle tseo a li hlokang tse neng li ka mo thusa hore a lule a e-na le kamano e ntle le Jehova. O ne a sa hloke ho ba le lintho tse ngata e le hore a thabe. Davida o ne a khotsofalletse lintho tseo Jehova a neng a mo fa tsona. Lintho tsa bohlokoa ho eena e ne e le tsela eo Molimo a neng a mo hlohonolofatsa le ho mo sireletsa ka eona. Mantsoe a Davida a re thusa ho bona hore ha rea lokela ho nka lintho tseo re nang le tsona e le tsa bohlokoa haholo bophelong ba rona. w22.01 3-4 ¶5-7

Batho ba ne ba sa batle ho mamela lipaki tsa Jehova tsa nako e fetileng. Ka mohlala, Noe e bile “’moleli oa ho loka” ka lilemo tse ngata. (2 Pet. 2:5) Ha ho pelaelo o ne a tšepile hore batho ba bang ba tla mo mamela empa Jehova ha aa ka a re ntho eo e tla etsahala. Ho e-na le hoo, ha Noe a ntse a haha areka Molimo o ile a re ho eena: “U tla kena ka arekeng, uena hammoho le bara ba hao le mosali oa hao le basali ba bara ba hao.” (Gen. 6:18) Hape a nahanne ka hore na areka e ne e tla ba kae, e ka ’na eaba Noe o ile a hlokomela hore ha se batho ba bangata ba neng ba tla mo mamela. (Gen. 6:15) Ha e le hantle, ha ho motho le ea le mong lefatšeng leo le khopo ea ileng a mamela molaetsa oa Noe. (Gen. 7:7) Na Jehova o ile a nka Noe a hlolehile ho etsa mosebetsi oa boboleli? Le letho. Ho Molimo mosebetsi oa Noe e ne e le o atlehileng kaha o ile a phetha ka botšepehi ntho eo Jehova a ileng a mo kopa hore a e etse.—Gen. 6:22. w21.10 26 ¶10-11

Nahana feela hore na Ruthe o ile a ikutloa joang ha a utloa Naomi a cho joalo. Ruthe o entse sohle seo a ka se khonang ho thusa Naomi. O ile a lla le eena, a mo khothatsa a ba a tsamaea le eena ka matsatsi a mangata. Ho sa tsotellehe lintho tsena tsohle, Naomi o ile a re: “Jehova o entse hore ke khutle ke sa nka letho.” Mantsoe ao Naomi a a buileng ha Ruthe a ntse a eme pel’a hae a ne a utloahala eka ha a hlokomele thuso ea Ruthe. E ka ’na eaba ntho ena e ile ea utloisa Ruthe bohloko haholo. Ho ntse ho le joalo o ile a lula a e-na le Naomi. (Ruthe 1:3-18) Morali oa bo rona ea nyahameng a ka ’na a bua ntho e ka re utloisang bohloko ho sa tsotellehe hore na re leka ho mo thusa hakae empa re leka hore re se ke ra mo koatela. Ho e-na le hoo, re lula re e-na le eena ’me re kopa Jehova hore a re thuse hore re fumane tsela ea ho mo khothatsa. (Prov. 17:17) Qalong, morali oabo rona ea hlokang thuso a ka ’na a se ke a e amohela. Leha ho le joalo, mosa o lerato o tla re susumelletsa ho leka kahohle hore re se ke ra mo khathalla matla.—Gal. 6:2. w21.11 11 ¶17-19

Ka Bibeleng, mantsoe “ho halalela” le “khalalelo” a bolela ho hloeka boitšoarong le bolumeling. Mantsoe ana a ka boela a bolela motho ea sebeletsang Molimo. Ka mantsoe a mang, re tla be re halalela haeba re hloekile boitšoarong, re sebeletsa Jehova ka tsela e loketseng le haeba re le metsoalle ea hae. Hoa hlolla ho tseba hore le hoja re sa phethahala ’me Jehova eena a phethahetse ebile a halalela, o ntse a batla hore re be metsoalle ea hae e haufi. Jehova o hloekile ka litsela tsohle. Re ithuta sena ho tsoa ho lirafime, e leng mangeloi a haufi le terone ea hae. A mang a ’ona a ile a re: “Oa halalela, oa halalela, oa halalela Jehova oa mabotho.” (Esa. 6:3) Kaha mangeloi ana a halalela, a khona ho ba le setsoalle se haufi le Molimo eo le eena a halalelang. w21.12 3 ¶4-5

Hangata bacha ba tšoenyeha ka hore na ba tla phela bophelo ba bona ka tsela e molemo joang. Matichere le ba lelapa bao eseng Lipaki, ba ka ba khothalletsa ho ea univesithi e le hore ba ka fumana mesebetsi e patalang hantle. Thuto ea univesithi e ka ba jella nako e ngata. Ka lehlakoreng le leng, metsoalle le batsoali bao e leng Lipaki ba ka khothalletsa bacha ho qeta bophelo ba bona ba sebeletsa Jehova. Ke’ng e ka thusang mocha ea ratang Jehova hore a etse qeto e nepahetseng? A ka thusoa ke ho bala Baefese 5:15-17 le ho nahanisisa ka eona. Ka mor’a ho bala litemana tsena, mocha a ka ’na a ipotsa: ‘“Thato ea Jehova” ke efe? O tla thabisoa ke qeto efe? Ke qeto efe e tla nthusa hore ke sebelise nako ea ka hantle?’ Hopola hore “matsatsi a khopo” ’me haufinyane lefatše lena le laoloang ke Satane le tla fela. w22.01 27 ¶5

Jakobo e ile ea e-ba molateli oa Jesu ea tšepahalang neng? Ka mor’a hore Jesu a tsosoe bafung, o ile “a bonahala ho Jakobo, ea ntan’o ba ho baapostola bohle.” (1 Bakor. 15:7) Ka mor’a hore ba kopane, Jakobo e ile ea e-ba morutuoa oa hae. O ne a le teng ha baapostola ba emetse moea o halalelang kamoreng e ka holimo Jerusalema. (Lik. 1:13, 14) Hamorao Jakobo o ile a thabela ho sebeletsa e le e mong oa sehlopha se busang mehleng ea baapostola. (Lik. 15:6, 13-22; Bagal. 2:9) Hape pele ho selemo sa 62 mehleng ea baapostola, o ile a susumetsoa hore a ngolle Bakreste ba tlotsitsoeng lengolo. Lengolo leo le re tsoela molemo le kajeno, ebang re na le tšepo ea ho phela leholimong kapa lefatšeng. (Jak. 1:1) Rahistori oa mehleng ea baapostola Josephus, o ile a re Moprista ea Phahameng oa Mojuda e leng Ananiase mora oa Anase ke eena ea ileng a laela hore Jakobo a bolaoe. Jakobo o ile a lula a tšepahalla Jehova ho fihlela a qeta tšebeletso ea hae mona lefatšeng ha a ne a hlokahala. w22.01 8 ¶3; 9 ¶5

Thuto e ’ngoe eo re ithutang eona temaneng ea letsatsi ea kajeno ke hore, ha rea lokela ho lebella hore Jehova a re sireletse mathateng a ka ’nang a re hlahela a lekang tumelo ea rona. Feela joalokaha Jesu a ile a lekoa ho fihlela lefung, le rona re lokela ho ikemisetsa ho tšepahala ho fihlela re e-shoa ha ho hlokeha. (Mat. 16:24, 25) Leha ho le joalo, re kholisehile hore Jehova a ke ke a lumela hore re lekoe ka lintho tseo a tsebang hore re ke ke ra khona ho li mamella. (1 Bakor. 10:13) Thuto e ’ngoe eo re ithutang eona ke hore joaloka Jesu le rona re ka ’na ra hlorisoa re se na molato. (1 Pet. 2:19, 20) Batho ba re hlorisa hobane re bolella batho molaetsa oa Bibele ebile hape re se karolo ea lefatše, e seng hobane ho e-na le ntho e fosahetseng eo re e entseng. (Joh. 17:14; 1 Pet. 4:15, 16) Jesu o ne a utloisisa hore na ke hobane’ng ha Jehova a ile a lumella hore a hlorisoe. Leha ho le joalo, ho na le Bakreste ba sa tšoaneng le eena bao ka linako tse ling ba ipotsang hore na ke hobane’ng ha Jehova a lumelletse hore ba hlaheloe ke mathata. (Hab. 1:3) Molimo oa rona ea mohau le ea nang le mamello oa utloisisa hore batho ba joalo ha se hore ha ba na tumelo empa e le hore feela ba hloka hore a ba tšelise.—2 Bakor. 1:3, 4. w21.04 11 ¶9-10

Jehovah o tla amohela borapeli ba rona haeba re leka kahohle ho etsa thato ea hae, ho mo rata le ho mo hlompha. Rea tseba hore o tšoaneloa ke borapeli ebile re batla ho mo sebeletsa ka tsela e nepahetseng. Tsela e ’ngoe ea ho etsa sena ke ka ho bua le Jehova ka thapelo. Bibele e bapisa lithapelo tsa rona le libano tse lokisitsoeng hantle tse neng li nyeheloa tabernakeleng tseo hamorao li ileng tsa nyeheloa tempeleng. Libano tse monko o monate oo Jehova a neng a o amohela. Ka tsela e tšoanang, lithapelo tsa rona tse tsoang pelong lia “mo khahlisa” esita le haeba li le khutšoane. (Liprov. 15:8; Deut. 33:10) Jehova o thabela ho utloa ha re mo leboha le ha re mo bolella hore rea mo rata. O batla hore re mo bolelle lintho tse re tšoenyang le lintho tseo re li labalabelang. Pele re rapela Jehova, re lokela ho nahana ka ho teba ka seo re tl’o se bua. Ha re etsa joalo, lithapelo tsa rona e tla ba tse khahlisang Ntate oa rona ea leholimong. w22.03 20 ¶2; 21 ¶7

Ka Armagedone, ha se rona ba tla etsa qeto ea hore na ke bo-mang bao Jehova a tla ba bontša mohau le bao a ke keng a ba bontša oona. (Mat. 25:34, 41, 46) Na re tla tšepa likahlolo tsa Jehova kapa re tla khaotsa ho mo sebeletsa hobane re sa lumellane le liqeto tseo a li entseng? Ho hlakile hore re lokela ho matlafatsa tsela eo re tšepang Jehova ka eona hona joale e le hore re tle re mo tšepe ka ho feletseng nakong e tlang. Nahana hore na re tla ikutloa joang lefatšeng le lecha. Bolumeli ba bohata bo tla be bo se bo le sieo, ho tla be ho se na bo-rakhoebo ba meharo kapa mebuso e ileng ea hatella batho le ho ba sotla ka lilemo tse ngata. Re ke ke ra hlola re kula, re tsofala le ho hlokahalloa ke batho bao re ba ratang. Satane le bademona ba hae ba tla tlangoa ka lilemo tse sekete. Lintho tsohle tse mpe tse etsahetseng ka lebaka la bofetoheli ba bona li ke ke tsa hlola li e-ba teng. (Tšen. 20:2, 3) Re tla thaba haholo hore ebe re ile ra tšepa tsela eo Jehova a ileng a etsa lintho ka eona. w22.02 6-7 ¶16-17

Jesu o ile a ikemisetsa ho etsa khotso le batho le ho ba khothalletsa hore ba lokise litaba le ba bang. O ile a ba ruta hore ba lokela ho etsa khotso le Bakreste-’moho haeba ba batla hore Jehova a amohele tšebeletso ea bona. (Mat. 5:23, 24) Hape o ile a thusa baapostola ba hae ka makhetlo hore ba khaotse ho ngangisana ka hore na ke mang e moholo har’a bona. (Luka 9:46-48; 22:24-27) Ho ba motho ea etsang khotso ha ho bolele feela ho qoba ho qabana le ba bang. Re lokela ho etsa khotso le ho khothalletsa bara le barali babo rona hore ba lokise litaba le ba bang. (Bafil. 4:2, 3; Jak. 3:17, 18) Re ka ipotsa: ‘Ke’ng eo ke ikemiselitseng ho e tela e le hore ke etse khotso le batho ba bang? Haeba mora kapa morali oabo rona a nkutloisitse bohloko, na ke lula ke mo koatetse? Na ke emela motho e mong hore a tle ho ’na hore re tl’o etsa khotso kapa na ke etsa boiteko ba hore ke ee ho eena le hoja ke nahana hore ke eena ea phoso?’ w22.03 10 ¶10-11

Bibele e ile ea bolela esale pele hore batho ba Molimo ba ne ba tla “itlhahisa ka ho rata” ho mo sebeletsa, ba tataisoa ke Jesu. (Pes. 110:3) Boprofeta boo boa phethahala mehleng ena. Selemo le selemo bahlanka ba Jehova ba qeta lihora tse limilione mosebetsing oa boboleli. Ba ithaopela ho etsa mosebetsi ona ebile e le ka litšenyehelo tsa bona. Ba boetse ba thusa Bakreste-’moho le bona ka lintho tseo ba li hlokang, baa ba khothatsa le ho ba matlafatsa tumelo. Baholo le bahlanka ba sebeletsang ba qeta lihora tse ngata ba lokisetsa lipuo le ho etsa maeto a bolisa. Batho ba Jehova ba susumetsoa ke eng ho etsa mesebetsi ee eohle? Ba susumetsoa ke ho rata Jehova le batho. (Mat. 22:37-39) Jesu o re behetse mohlala o motle oa ho beha litlhoko tsa batho ba bang pele ho tsa hae. Re leka kahohle ho mo etsisa. (Bar. 15:1-3) Ho na le melemo eo re tla e fumana ha re mo etsisa. w22.02 20 ¶1-2

Batho ba bangata Iseraele ba ne ba sebetsa lipolasing ’me ba ne ba pataloa qetellong ea letsatsi le leng le le leng. Haeba motho ea hiriloeng a ne a sa pataloe, o ne a tla hloka chelete ea hore a rekele lelapa la hae lijo letsatsing leo. Jehova o ile a re: “O khathatsong ’me o phahamiselitse moea oa hae moputsong oa hae.” (Deut. 24:14, 15; Mat. 20:8) Mehleng ena batho ba bangata ba sebetsang ba pataloa hanngoe kapa habeli ka khoeli eseng letsatsi le leng le le leng. Leha ho le joalo, molao-motheo o ho Levitike 19:13 o ntse o sebetsa le mehleng ena. Bahiri ba bang ba qhekella batho bao ba ba sebeletsang ka hore ba ba patale chelete e nyane ho feta eo ba lokelang ho ba fa eona. Baa tseba hore batho ba ba sebeletsang ha ba na boikhethelo empa ba lokela ho sebetsa le hoja ba pataloa lisente. Ha bahiri ba etsa joalo, ka tsela e itseng ba tla be ba lutse ka moputso oa mosebetsi ea hiriloeng. Mokreste ea hirang batho ba bang o lokela ho etsa bonnete ba hore o mamela keletso ena. w21.12 10 ¶9-10

Ho ka etsahala hore ka mor’a hore Jesu a fete mathateng ao ’ohle, o ne a shoele ke lenyora. O ne a hlile a hloka ho noa metsi. Taba ea hore Jesu o ile nka ho ntša maikutlo a hae e se letšoao la hore oa fokola, e re le rona ha rea lokela ho ikutloa joalo. E ka ’na eaba ha re rate ho bolella batho ba bang litlhoko tsa rona. Empa haeba re hloka thuso ha re ea lokela ho ba lesisitheho ho kopa batho ba bang thuso. Mohlala, haeba re se re tsofetse haholo kapa re kula, ho ka ’na ha etsahala hore re hloke ho kopa motsoalle e mong oa rona hore a re felehetse ha re il’o reka lintho tseo re li hlokang kapa ha rea ngakeng. Haeba re nyahame teng re ka ’na ra hloka ho kopa moholo kapa Mokreste e mong ea nang le boiphihlelo hore a re mamele kapa a arolelane “lentsoe le molemo” le rona ho re khothatsa. (Liprov. 12:25) A re hopoleng hore bara le barali ba bo rona baa re rata ebile ba batla hore re thusa ha re e-na le “mahlomola.” (Liprov. 17:17) Empa re hopole hore ha ba tsebe hore na re ikutloa joang kapa re nahana’ng. Ba ke ke ba tseba ha re hloka thuso haeba re sa nke bohato ba hore re ba bolelle. w21.04 11-12 ¶11-12

Ha ho bonolo hore ba bang ba rona re amohele ha maemo a rona a fetoha. Ba bang ba neng ba le tšebeletsong e khethehileng ea nako e tletseng ka nako e telele, ba ile ba kopuoa hore ba tlohele mesebetsi eo ba neng ba e etsa ’me ba fuoa e meng. Ba bang ba ile ba lokela ho tlohela mosebetsi oo ba neng ba o rata hobane ba se ba holile. Ha se mohlolo hore re utloe bohloko ha sena se etsahala. Ho ka ba bonolo hore re tloaele maemo a macha haeba re bona lintho ka tsela eo Jehova a li bonang ka eona. Jehova o etsa lintho tse hlollang mehleng ena ’me re na le monyetla o moholo oa hore re be basebetsi-’moho le eena. (1 Bakor. 3:9) Jehova o tla lula a re rata. Haeba phetoho e entsoeng mokhatlong oa Molimo e u ama ka ho toba, u se ke oa ingamangama ka hore na ke hobane’ng ha ho entsoe phetoho eo. Ho e-na le hore u batle hore bophelo ba hao bo tšoane le ba “matsatsi a pele,” u lokela ho kopa Jehova hore a u thuse hore u bone lintho tse ntle tse etsahalang bophelong ba hao hona joale. (Moek. 7:10) Ho bohlokoa hore re se ke ra nyahama ha maemo a rona a fetoha. Ha re sa nyahame re tla lula re thabile ebile re tšepahala le ha maemo a rona a ka fetoha. w22.03 17 ¶11-12

Jehova o bontša bo-mang mosa o lerato? Bibele e bontša hore re ka rata lintho tse ngata joaloka “temo,” “veine le oli,” “taeo,” “tsebo” le “bohlale” ha re bua ka tse ’maloa tsa tsona. (2 Likron. 26:10; Liprov. 12:1; 21:17; 29:3) Leha ho le joalo, mosa o lerato o bontšoa ho batho feela eseng ho lintho tse ling. Empa Jehova ha a bontše lerato lena ho motho e mong le e mong. O le bontša ho batho ba nang le kamano e khethehileng le eena. Molimo oa rona oa tšepahala ho metsoalle ea hae. O na le morero o motle ka eona ’me a ke ke a tlohela ho e rata. Jehova o bontšitse batho bohle lerato. Jesu o ile a bolella Nikodemase a re: “Molimo o ratile lefatše [e leng batho] haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena a se ke a timetsoa empa a be le bophelo bo sa feleng.”—Joh. 3:1, 16; Mat. 5:44, 45. w21.11 2 ¶3; 3 ¶6-7

Bophelo bo boima haholo hona joale ’me re ka ’na ra tobana le mathata a boima le ho feta nakong e tlang. (Mat. 24:21) Re labalabela nako eo ka eona mathata a tla be a le sieo, re se re lebetse ka ’ona ’me ho se mohla a tla ipheta. (Esa. 65:16, 17) Kahoo, re lokela ho tsoela pele re mamella. Hobane’ng? Hobane Jesu o itse: “Le tla rua meea ea lona ka ho mamella ha lona.” (Luka 21:19) Ho nahanisisa ka mehlala ea batho ba mamelletseng mathata a tšoanang le a rona, ho tla re thusa hore le rona re mamelle. Ke mang ea re behetseng mohlala o motle ka ho fetisisa oa ho mamella? Ke Jehova Molimo. Na karabo ee ea u makatsa? E ka ’na ea u makatsa ho fihlela u nahana ka eona ka botebo. Kaha lefatše lena le busoa ke Diabolose, le na le mathata a mangata. Jehova o na le matla a hore a felise mathata ao hang-hang empa o emetse nako eo ka eona a tla etsa joalo. (Bar. 9:22) Ka hona, Molimo oa rona o ntse a mamelletse ho fihlela nako eo e fihla. w21.07 8 ¶2-4