July

Ho khaoloa ke e ’ngoe ea litokisetso tseo Jehova a li entseng. Ke tokisetso e lerato e thusang motho ea khaolitseng ho sebeletsa Jehova le e thusang batho ba bang. Batho ba bang ka phuthehong ba ka ’na ba re ha se qeto e nepahetseng hore ebe ho khaotsoe motho ea itseng empa hopola hore batho ba joalo hangata ha ba bue ka lintho tse mpe tseo motho eo a li entseng. Bonneteng ha re na lintlha kaofela. Ke kahoo ho leng bohlokoa hore re tšepe baholo ba komiting ea boahloli hore ba ile ba latela mangolo kahohle kamoo ba ka khonang e le hore ba ahlolele “Jehova.” (2 Likron. 19:6) Haeba u tšehetsa qeto eo baholo ba e entseng ea ho khaola motho eo u mo ratang, ha e le hantle ntho eo e tla mo thusa hore a khutlele ho Jehova. Morali’abo rona Elizabeth o re: “Ho ne ho le thata haholo ho khaotsa ho buisana le mora oa rona ea moholo le ho qeta nako le eena. Ka mor’a hore a khutlele ho Jehova o ile a lumela hore e ne e le qeto e ntle hore a khaoloe. Ha nako e ntse e-ea o ile a re o ananela lintho tse ngata tseo a ithutileng tsona.” w21.09 28-29 ¶11-12

Ak’u nahane ka mohlolohali enoa. Ho ka etsahala hore ebe o ne a batla ho fa Jehova ho eketsehileng ho feta moo. Leha ho le joalo, o ile a etsa boiteko bohle eaba o itella Jehova. Jesu o ne a tseba hore chelete eo a faneng ka eona ke ea bohlokoa ho Jehova. Joale rona re ithuta taba ena ea bohlokoa ea hore, Jehova oa thaba ha re mo sebeletsa kahohle kamoo re ka khonang ebile re etsa joalo ka lipelo tsohle tsa rona, re sa itšiele letho. (Mat. 22:37; Bakol. 3:23) Jehova oa thaba ha a bona re etsa matsapa ’ohle. Taba ena e akarelletsa nako le matla ao re a qetang re rorisa Jehova, re le boboleling le libokeng. U ka sebelisa thuto eo u ithutang eona tlalehong ea mohlolohali joang? Leka ho nahana ka batho bao ka ho khetheha ba lokelang ho tiisetsoa hore boiteko boo ba bo etsang bo thabisa Jehova. E ka ’na eaba ke morali’abo rona ea holileng eo u mo tsebang ea utloang eka ha a sa na thuso hobane feela bophelo bo se bo sa mo lumelle hore a sebetse tšimo joaloka pele. w21.04 6 ¶17, 19-20

Jehova o tseba nako e nepahetseng ea ho felisa lefatše lena le khopo. Kaha Jehova o mamelletse, bongata bo boholo bo baloang ka limilione bo khonne ho bokelloa ’me boa mo sebeletsa. Batho bana kaofela ha bona baa ananela hore ebe Jehova o ile a mamella ho fihlela ba tsoaloa, ba ithuta ho mo rata le ho inehela ho eena. Qeto ea Jehova ea ho mamella e tla bonahala hore e nepahetse ha a putsa batho ba limilione ba mamelletseng ho fihlela qetellong. Ho sa tsotellehe mathata le mahlomola ao Satane a re baketseng ’ona, Jehova e ntse e le “Molimo ea thabileng.” (1 Tim. 1:11) Le rona re ka mamella re thabile ha re ntse re emetse hore Jehova a halaletse lebitso la hae, a bontše hore ke eena feela ea ka busang batho, a felise bokhopo bohle le hore a felise mathata ’ohle ao re nang le ’ona hona joale. A re ikemisetseng ho lula re mamelletse le ho tšelisoa ke ho tseba hore ntate oa rona le eena o ntse a mamelletse. w21.07 13 ¶18-19

Batho ba bangata ba mehleng ea Jesu ha baa ka ba lumela ho eena. Ba ne ba mo nka e le mora oa mofutsana oa ’metli oa mapolanka. Hape o ne a tsoa Nazaretha motseng oo batho ba bangata ba neng ba sa o nkele hloohong hakaalo. Ka lekhetlo le leng, esita le Nathanaele eo e ileng ea e-ba morutuoa oa Jesu o ile a re: “Na ho na le ntho e molemo leha e le efe e ka tsoang Nazaretha?” Mohlomong o ne a nahanne ka boprofeta ba Mikea 5:2, bo ileng ba bolela hore Mesia o ne a tla hlahela Bethlehema e seng Nazaretha. Moprofeta Esaia o ile a bolela esale pele hore lira tsa Jesu li ne li ke ke tsa “nahanisisa ka lintlha tse qaqileng tsa moloko oa [Mesia].” (Esa. 53:8) Hoja batho bao ba ile ba ipha nako ea ho hlahloba lintlha tsohle, ba ka be ba ile ba bona hore Jesu o hlahetse Bethlehema le hore e ne e le setloholo sa Morena Davida. (Luka 2:4-7) Kahoo, sebaka seo Jesu a hlahetseng ho sona se ne se lumellana le boprofeta bo ho Mikea 5:2. Joale bothata bo ne bo le hokae? Batho ba ne ba potlakela ho etsa liqeto. Ba ne ba sa tsebe lintlha tsohle. Ka lebaka leo ba ile ba hana ho amohela Jesu. w21.05 2-3 ¶4-6

Bibele e boetse e bua ka mehlala e metle ea batho ba ileng ba hlohonolofatsoa hobane ba ile ba mamela keletso. A re ke re bueng ka Jobo. O ne a etsa liphoso le hoja a ne a tšaba Molimo. Ha a ne a le tlas’a khatello e matla, o ile a bua lintho tse fosahetseng. Elihu le Jehova ba ile ba mo eletsa ka ho toba. Jobo o ile a itšoara joang? O ile a re: “Ke buile, empa ke ne ke sa utloisise . . . ‘ke hula mantsoe, ke baka ke le leroleng le moloreng.’” Jobo 42:3-6, 12-17) O ile a bontša seo ka hore a mamele keletso ea Elihu le hoja Elihu a ne a le monyenyane ho eena. (Jobo 32:6, 7) Ho ikokobetsa ho tla re thusa hore le rona re sebelise keletso eo re e fuoang le haeba re nahana hore ha re e hloke kapa re e fuoa ke motho e monyenyane ho rona. Kaofela ha rona re lokela ho sebetsa ka thata hore re be le litholoana tsa moea le ho ntlafatsa mosebetsing oa boboleli. w22.02 11 ¶8; 12 ¶12

Motho e mong le e mong o na le boikarabelo ba ho etsa hore ho be le khotso ka phuthehong le hore ho se ke ha e-ba le motho ea ikutloang eka ha a na mang oe. Ntho eo re e etsang kapa eo re e buang e ka khothatsa batho ba bang haholo. U ka etsa’ng ho thusa batho bao ba lelapa la bo e seng Lipaki Tsa Jehova hore ba ikutloe e le karolo ea phutheho? Motho e mong le e mong ka phuthehong o na le boikarabelo bofe? Leka ho ba motsoalle oa batho ba fihlang ka phuthehong. Re ka qala ka ho amohela ba fihlang ka mofuthu. (Bar. 15:7) Leha ho le joalo, ha re batle ho ba lumelisa feela empa re batla ho ba metsoalle ea bona ha nako e ntse e ea. Kahoo, e-ba mosa ’me u ba bontše hore oa ba tsotella. Leka ho utloisisa hore na ba na le mathata afe ntle le hore u ba botse lipotso tse tla etsa hore ba ikutloe ba le lihlong. Ho ka ’na ha e-ba thata hore batho ba bang ba bue maikutlo a bona, kahoo u se ke oa ba qobella hore ba bue. Ho e-na le hoo, ka mosa ba botse lipotso tse ke keng tsa ba hlabisa lihlong ’me u ba mamele ka hloko. Ka mohlala, u ka ’na oa ba botsa hore na ho tlile joang hore ba ithute Bibele. w21.06 11 ¶13-14

Re ananela tlotla ea ho sebeletsa Jehova re momahane re le “mohlape o le mong” o tataisoang ke ‘molisa a le mong.’ Buka ea Ho Hlophisetsoa ho Etsa Thato ea Jehova leqepheng la 165, e re: “Kaha u rua molemo bonngoeng boo, ke boikarabelo ba hao ho etsa hore bo lule bo le teng.” Kahoo, “re leka ho talima bara le barali ba bo rona ka tsela eo Jehova a ba talimang ka eona.” Ho Jehova, kaofela ha rona re “ba banyenyane” ebile re ba bohlokoa ho eena. Na u nka Bakreste-’moho le uena ka tsela eo? Jehova o hlokomela ntho e ’ngoe le e ’ngoe eo u e etsang ho ba thusa le ho ba hlokomela. (Mat. 10:42) Re rata Bakreste-’moho le rona. Kahoo, a re ikemisetseng ho etsa qeto ea hore re se ke ra ‘beha khopiso kapa sesosa sa ho khoptjoa ka pel’a mor’abo rona.’ (Bar. 14:13) Re nka Bakreste-’moho le rona ba re phahametse hape re batla ho ba tšoarela ka bolokolohi. E se eka re ke ke ra itumella ho utloisoa bohloko ke batho ba bang. Ho e-na le hoo, a re khetheng ho ‘phehella lintho tse tlisang khotso le lintho tseo re ka hahanang ka tsona.’—Bar. 14:19. w21.06 24 ¶16-17

Haeba re ithuta Lentsoe la Molimo ’me re mamela keletso e tsoang ho lona le e tsoang ho mokhatlo oa hae, butle-butle re tla ba le makhabane a tšoanang le a Kreste. Re tla boela re tsebe Molimo haholoanyane. Jesu o ile a sebelisa mohlala ho hlalosa kamoo molaetsa oa ’Muso oo re o rutang batho o tšoanang le peo e nyane e holang butle-butle lipelong tsa batho ba lokileng. O ile a re: “Peo ea hlaha ’me ea hola e ba telele, hore na joang [molemi] ha a tsebe. Mobu o beha litholoana butle-butle, lekhasi la joang pele, e ntan’o ba hloohoana ea lehlaka qetellong lithollo tse tletseng hloohoaneng.” (Mar. 4:27, 28) Jesu o ne a hlalosa hore feela joalokaha semela se nka nako ho hola, motho ea amohelang molaetsa oa ’Muso o tla nka nako ho etsa liphetoho. Ka mohlala, ha batho bao re ithutang Bibele le bona e e-ba metsoalle ea Jehova, re qala ho bona ka liphetoho tseo ba li etsang. (Baef. 4:22-24) Re lokela ho hopola hore ke Jehova ea etsang hore peo eo e nyane e hole. w21.08 8-9 ¶4-5

Re ka fumana thabo haeba re e batla sebakeng se nepahetseng. Motho ea thabelang “ho bona ka mahlo” o ananela lintho tseo a nang le tsona joaloka maemo ao a leng ho ’ona. Ho fapana le hoo, motho ea tsamaeang ka moea o lula a ntse a batla ntho eo a sa tl’o khona ho ba le eona. Joale re ithuta’ng tabeng ee? E le hore re thabe, re lokela ho ameha ka lintho tseo re nang le tsona le tseo re khonang ho li finyella. Na hoa khoneha hore motho a thabisoe ke lintho tseo a seng a ntse a e-na le tsona? E, hoa khoneha le hoja ha nako e ntse e ea, ka tlhaho re batla ho leka lintho tse ncha. Kahoo, re ka thaba le ho feta haeba re leka lintho tse ncha tse ‘bonoang ke mahlo’ a rona. Re ka khona ho etsa ntho eo joang? Ho fumana karabo, hlahloba papiso ea Jesu ea litalenta e ho Matheu 25:14-30 ’me u bone hore na u tla ithuta’ng ho eona mabapi le ho fumana thabo le ho lula u thabela lintho tseo u seng u ntse u e-na le tsona. w21.08 21 ¶5-6

Jehova o khathalla motho e mong le e mong ea “hateletsoeng le ea moea o ikokobelitseng.” Ha se baholo feela ba ka khothatsang bara le barali ba bo rona empa kaofela re ka ba khothatsa. Re ka ba khothatsa ka hore re ba bontše hore rea ba khathalla. Jehova o batla re ba bontše hore na o ba rata hakae. (Liprov. 19:17) Re ka boela ra thusa bara le barali ba bo rona ka hore re be batho ba ikokobelitseng le ka hore re se ke ra ikhantša. Ha re batle ho bua haholo ka rona hoo re ka etsang hore batho ba bang ba be mona. Ho e-na le ho etsa joalo, re batla hore lintho tseo re li buang le tseo re li etsang, li khothatse bara le barali ba bo rona. (1 Pet. 4:10, 11) Re ka ithuta lintho tse ngata tabeng ea hore na re ka tšoara batho ba bang joang ka ho nahana kamoo Jesu a neng a tšoara balateli ba hae kateng. Le hoja e ne e le motho e moholo ka ho fetisisa ea kileng a phela, o ne a e-na le “maikutlo a bonolo ’me [a] ikokobelitse pelong.” (Mat. 11:28-30) O ne a ruta ka tsela e bonolo, a sebelisa mehlala eo ho leng bonolo hore batho ba e utloisise e neng e ama batho ba boemo bo tlase lipelo.—Luka 10:21. w21.07 23 ¶11-12

Etsa boiteko ba ho bua le ba seng ba holile. Ke ’nete hore ha ba sa bona hantle, ba tsamaea butle ebile ba buela tlaase empa ba ntse ba batla ho ba mafolo-folo ’me ba iketselitse “lebitso le molemo” ho Jehova. (Moek. 7:1) Hopola hore na ke hobane’ng ha Jehova a ba nka e le batho ba bohlokoa. Tsoela pele u ba hlompha. E-ba joaloka Elisha ea ileng a batla ho ba le Elia letsatsing la ho qetela ba le hammoho. Ka makhetlo a mararo Elisha o ile a re: “Nke ke ka u tlohela.” (2 Mar. 2:2, 4, 6) Bontša hore u rata bara le barali ba bo rona ba holileng ka hore ka mosa u ba botse lipotso. (Liprov. 1:5; 20:5; 1 Tim. 5:1, 2) Ba botse lipotso tse kang tsena: “Ha u ne u le mocha, ke’ng e u kholisitseng hore lintho tseo u ithutileng tsona ke ’nete?” “Lintho tse ileng tsa etsahala bophelong ba hao li u thusitse joang hore u be motsoalle ea haufi-ufi oa Jehova?” “Ke’ng e u thusitseng hore u lule u thabile ha u ntse u sebeletsa Jehova?” (1 Tim. 6:6-8) Ba mamele ha ba ntse ba u bolella ka bophelo ba bona. w21.09 5 ¶14; 7 ¶15

Ha u leka kahohle ho mamela taelo ea ho etsa mosebetsi oa boboleli le ho etsa barutuoa, u bontša hore u rata Molimo. (1 Joh. 5:3) Nahana ka taba ena: Ho rata Jehova ho se ho u susumelitse ho etsa mosebetsi oa boboleli ka ntlo le ntlo. Na ho ne ho le bonolo ho mamela taelo eo? Mohlomong ha ho joalo. Na u ne u tšohile lekhetlo la pele ha u ne u etsa mosebetsi oa boboleli? Ha ho pelaelo hore u ne u tšohile. Empa u ne u tseba hore mosebetsi ona ke oo Jesu a batlang hore o u etse ’me u mametse taelo ea hae. Mohlomong ka mor’a nako e itseng, u ile oa fumana ho se ho le bonolo ho etsa mosebetsi oo. Empa u ikutloa joang ka ho ithuta Bibele le motho? Na u ikutloa u tšohile ha u nahana ka taba eo? Mohlomong. Kopa Jehova a u thuse hore u se ke oa tšaba le hore a u fe sebete sa ho ithuta Bibele le motho ’me o tla u thusa hore u batle ho etsa batho barutuoa. w21.07 3 ¶7

Makhoba a mehleng ea khale a ne a e-na le matšoao a neng a bontša hore na a sebeletsa bo-mang. Ka tsela e tšoanang, batho bohle mehleng ena ba tla lebelloa hore ba be le letšoao la tšoantšetso matsohong kapa liphatleng tsa bona. Liketso tsa bona le lintho tseo ba li nahanang li tla bontša hore ke litho tsa mekha ea lipolotiki le hore baa li tšehetsa. Na re tla amohela letšoao lee la tšoantšetso ’me re tšehetse mebuso ea lipolotiki? Batho ba hanang ho ba le letšoao lena ba tla ba le mathata le ho ba kotsing. Lengolo la Tšenolo le re: “Ho se ke ha e-ba le ea ka khonang ho reka kapa ho rekisa ha e se motho ea nang le letšoao.” (Tšen. 13:17) Empa bahlanka ba Molimo baa tseba hore o tla etsa’ng ho batho ba nang le letšoao bao ho buuoeng ka bona ho Tšenolo 14:9, 10. Ho e-na le hore bona ba be le letšoao leo, ha e le hantle ho tla ba joalokaha eka ba ngotse matsohong a bona poleloana e reng “Ke oa Jehova.” (Esa. 44:5) Ena ke nako ea hore re etse bonnete ba hore re tšepahalla Jehova ka matla. Haeba re etsa joalo, Jehova o tla thabela hore re ba hae. w21.09 18 ¶15-16

E le hore re atlehe tšebeletsong ea rona, re hloka hore batho ba bang ba re thuse. Moapostola Pauluse o ile a ruta Timothea mekhoa e sa tšoaneng ea ho bolela le ho ruta ’me o ile a khothalletsa Timothea hore le eena a rute ba bang ka tsela e tšoanang. (1 Bakor. 4:17) Joaloka Timothea, le rona re ka ithuta ho bara le barali ba bo rona ba nang le boiphihlelo ka phuthehong. Hape, re lokela ho kopa hore Jehova a re thuse. Kopa hore Jehova a u thuse kamehla ha u etsa mosebetsi oa boboleli. Ha ho na ntho eo re ka khonang ho e finyella ntle le thuso ea moea oa hae o halalelang. (Pes. 127:1; Luka 11:13) U lokela ho toba taba ha u rapela hore Jehova a u thuse. Ka mohlala, u ka mo kopa hore a u thuse hore u fumane motho ea batlang ho ithuta ka eena le ea ikemiselitseng ho mo mamela. Re boetse re lokela ho ipehela nako ea ho ithuta. Lentsoe la Molimo le re: ‘Le ipakele e le lona thato ea Molimo e molemo le e amohelehang le e phethahetseng.’ (Bar. 12:2) Ha re ithuta ka Molimo, re mo tseba haholoanyane ’me ntho eo e tla re thusa hore re bue le batho ba bang re kholisehile ka lintho tseo re li buang. w21.05 18 ¶14-16

U tla etsa’ng haeba motho eo u ithutang Bibele le eena a sa etse liphetoho ’me le tlameha ho khaotsa ho ithuta le hoja u ile oa sebetsa ka thata ho mo ruta le ho mo rapella? Kapa ho thoe’ng haeba ha u e-s’o thuse motho hore a kolobetsoe? Na u lokela ho ikutloa u le molato mohlomong u nahane hore Jehova ha a hlohonolofatse tšebeletso ea hao? Bona kamoo Jehova a talimang mosebetsi oo re o etsang kateng. Jehova o sheba boiteko le mamello ea rona. Jehova oa thaba ha re etsa mosebetsi oa rona ka mafolofolo hobane re mo rata, ho sa tsotellehe hore na batho ba bang ba arabela joang. Pauluse o ile a re: “Molimo ha se ea sa lokang hoo a ka lebalang mosebetsi oa lona le lerato leo le ileng la le bontša bakeng sa lebitso la hae, ka hore le sebelelitse bahalaleli ’me le tsoela pele ho sebeletsa.” (Baheb. 6:10) Jehova o hopola mesebetsi ea rona le lerato leo re ileng ra le bontša le haeba boiteko ba rona bo sa behe litholoana. Kahoo, mantsoe a temaneng ea kajeno ao Pauluse a ileng a a bua a ka u khothatsa. w21.10 25 ¶4-6

Tsela eo Jesu a neng a tšoara barutuoa ba hae ka eona, e ne e bontša hore ke motho ea mosa hape o lerato. O ne a tseba hore ba na le bokhoni bo fapaneng le hore maemo a bona ha a tšoane. Kahoo, ba ne ba ke ke ba khona ho etsa lintho tse tšoanang kapa ho etsa mosebetsi o lekanang tšebeletsong. Leha ho le joalo, o ne a ananela boiteko bohle bo neng bo etsoa ke e mong le e mong oa bona. Re bona taba ena papisong eo a ileng a e etsa ea litalenta. Papisong ena, mong’a makhoba o fa lekhoba le leng le le leng mosebetsi “ho ea ka bokhoni ba lona.” Ho makhoba a mabeli a sebelitseng ka thata, le leng le ile la tla le ho hongata ho feta le leng. Mong’a makhoba o ile a babatsa makhoba ao a mabeli ka mantsoe a tšoanang a re: “U entse hantle, lekhoba le molemo le le tšepahalang!” (Mat. 25:14-23) Jesu o mosa ’me o lula a sebetsana le rona ka lerato. Oa tseba hore re na le bokhoni bo fapaneng le hore maemo a rona ha a tšoane ’me oa thaba ha re etsa boiteko bohle boo re ka bo khonang. Le rona re lokela ho tšoara batho ba bang joaloka Jesu. w21.07 23 ¶12-14

Davida o ne a sa lule a bontša batho mohau. Ka mohlala, ha Nabale monna ea se nang kutloelo-bohloko a hlompholla Davida le ho hana ho mo fa lijo hammoho le banna bao a neng a e-na le bona, Davida o ile a koata haholo ’me a etsa qeto ea ho mo bolaea hammoho le banna bohle ba ntlo ea hae. Empa Abigaile e leng mosali oa Nabale ea neng a le mosa ebile a e-na le mamello o ile a etsa qeto kapele eaba o fa Davida lijo ’me Davida haa ka a bolaea Nabale. (1 Sam. 25:9-22, 32-35) Hlokomela hore ha Davida a ne a koatile haholo o ile a etsa qeto ea hore Nabale le banna bohle ba ntlo ea hae ba lokela ho bolaoa. Hamorao, Davida o ile a re monna ea ruileng ea mohlaleng oa Nathane o lokela ho bolaoa. Lekhetlong lena la bobeli, re ka ’na ra ipotsa hore na monna ea nang le kutloelo-bohloko joaloka Davida ke joang a ka ahlolang ka tsela e sehloho hakaale. A re boneng hore na Davida o ne a ikutloa joang ka nako eo. Davida o ne a e-na le letsoalo le molato. Ha e le hantle, haeba motho a ahlola batho ba bang ka sehloho, ntho eo e bontša hantle hore kamano ea hae le Jehova e senyehile. w21.10 12 ¶17-18; 13 ¶20

Mantsoeng a temaneng ea kajeno, rea ithuta hore re ka khona ho etsisa Jehova eo e leng mohlala o ka sehloohong oa ho halalela. Re lokela ho halalela boitšoarong ba rona. Seo se ka bonahala eka ha se na khoneha kaha ha rea phethahala. Moapostola Petrose o ile a etsa liphoso empa mohlala oa hae oa re bontša hore re ka halalela. Batho ba bangata ha ba nahana ka motho ea halalelang ba nahana ka motho ea sa thabang, ea aparang liaparo tsa bolumeli le ea sa bososeleng. Empa seo ha se ’nete. Jehova oa halalela ebile Bibele e re ke “Molimo ea thabileng.” (1 Tim. 1:11) Batho ba mo sebeletsang ba bitsoa ba thabileng. (Pes. 144:15) Jesu o ne a nyatsa batho ba neng ba apara ka tsela e ikhethang ebile ba etsa lintho tse ntle e le hore feela ba bonahale ba lokile ka pel’a batho ba bang. (Mat. 6:1; Mar. 12:38) Bakreste ba ’nete ba ithutile Bibeleng hore na ho halalela ho bolela’ng. Rea tseba hore Molimo oa rona ea halalelang le ea lerato a ke ke a re re etse ntho eo re ke keng ra khona ho e etsa. w21.12 2 ¶1, 3

Linthong tsohle tseo Molimo a re fileng tsona, re ka re e ’ngoe ea bohlokoa ke ho mo rapela. Re bontša hore re rata Jehova ka hore re “boloke litaelo tsa hae.” (1 Joh. 5:3) Ha Jesu a ne a re bolella hore ntate oa hae o batla re etse’ng, o ile a re laela hore re etse batho barutuoa ’me re ba kolobetse. (Mat. 28:19) O ile a boela a re laela hore re ratane. (Joh. 13:35) Jehova o tla etsa hore batho ba mo mamelang e be karolo ea lelapa la hae. (Pes. 15:1, 2) Rata batho ba bang. Ho makhabane ao Jehova a nang le ’ona, lerato ke la bohlokoa ka ho fetisisa. (1 Joh. 4:8) Jehova o bontšitse hore oa re rata le pele re ka mo tseba. (1 Joh. 4:9, 10) Ha re rata batho ba bang, re tla be re mo etsisa. (Baef. 5:1) Tsela e ’ngoe ea ho bontša hore re rata batho ke ka hore re ba thuse hore ba ithute ka Jehova ha ho ntse ho e-na le nako ea hore ba etse joalo. (Mat. 9:36-38) Ha re etsa joalo, re ba fa monyetla oa hore le bona ba be le tšepo ea ho ba karolo ea lelapa la Molimo. w21.08 5-6 ¶13-14

Kaha Jesu o rata Jehova haholo, o ile a itella eena hammoho le rona. (Joh. 14:31) Tsela eo Jesu a neng a phela ka eona ha a ne a le lefatšeng e ile ea bontša hore o rata batho haholo. Kamehla o ne a bontša batho lerato ebile a ba qenehela le hoja ba bang ba ne ba mo hanyetsa. Ntho e ka sehloohong e neng e bontša hore Jesu o rata batho ke ka ho ba ruta ka ’Muso oa Molimo. (Luka 4:43, 44) Jesu o ile a boela a bontša hore o rata Molimo le batho ka hore a ikemisetse ho utloisoa bohloko le ho bolaoa ke baetsalibe. Ka ho etsa joalo, o re thusitse hore re be le monyetla oa ho phela ka ho sa feleng. Re ile ra inehela ho Jehova le ho kolobetsoa hobane re mo rata. Kahoo joaloka Jesu, re lokela ho bontša hore re rata Jehova ka tsela eo re tšoarang batho ka eona. Moapostola Johanne o ile a re: “Ea sa rateng mor’abo, eo a mo boneng, a ke ke a rata Molimo, eo a e-s’o mo bone.”—1 Joh. 4:20. w22.03 10 ¶8-9

Le hoja re thabela ho qeta nako le Jehova, ha se kamehla ho leng bonolo. Re phathahane ka lintho tse ngata bophelong ’me ho ka ba thata ho fumana nako ea ho sebeletsa Jehova. Mesebetsi, mabaka a lelapa le lintho tse ling li ka nka nako ea rona e ngata hoo re ka utloang eka ha re na nako ea ho rapela, ho ithuta le ho nahanisisa. Ho na le ntho e ’ngoe hape e ka re jellang nako. Haeba re se hlokolosi, ho ka ba le lintho tse sa fosahalang tseo re ka phathahanang ka tsona hoo re ka hlokang nako ea ho atamela ho Jehova. Ka mohlala, ke hantle ho ba le nako ea ho ikhatholla le ho ithabisa. Le haeba tsela eo re ithabisang ka eona e le e amohelehang empa haeba re qeta nako e ngata haholo re ithabisa, re ka hloleha ho fumana nako ea ho sebeletsa Jehova. Re lokela ho hopola hore ho ithabisa ha se eona ntho ea bohlokoa ka ho fetisisa.—Liprov. 25:27; 1 Tim. 4:8. w22.01 26 ¶2-3

Ha Jehova a ne a laela Baiseraele hore ba rate batho ba bang, o ne a sa bolele hore ba ne ba lokela ho rata batho ba morabe oa bona feela. O ile a boela a ba bolella hore ba lokela ho rata bajaki ba har’a bona. Molaetsa oo o hlakileng re o fumana ho Levitike 19:33, 34. Jehova o ne a batla hore Baiseraele ba tšoare mojaki joaloka “letsoalloa,” le hore ba “mo rate” joalokaha ba ithata. Ka mohlala, Baiseraele ba ne ba lokela ho lumella bajaki le batho ba futsanehileng hore ba khoahlapise tšimong ea bona. (Lev. 19:9, 10) Molao-motheo oa hore re rate bajaki o ntse o sebetsa le ho Bakreste mehleng ena. (Luka 10:30-37) Ka tsela efe? Ho na le batho ba bangata ba tsoang linaheng tse ling ’me ho ka etsahala hore ba bang ba lula haufi le uena. Kahoo, ke habohlokoa hore re hlomphe batho bana ba tsoang linaheng tse ling. w21.12 12 ¶16

Ha re tsoela pele ho mamela tataiso ea Jehova, re tla kholiseha le ho feta hore o tla re pholosa nakong e tlang. Re hloka ho ba le tumelo le ho ikemisetsa ho tšepa hore Jehova o tla re thusa ha re kopa matsatsi mosebetsing a hore re khone ho ea likopanong tse kholo le tse nyane, kapa ha re kopa hore lihora tsa rona li fokotsoe mosebetsing hore re khone ho ea libokeng tsohle le ho qeta nako e eketsehileng re le tšebeletsong ea tšimo. A re re motho eo re mo sebeletsang o hana seo re se kopang ’me re felloa ke mosebetsi. Na rea tšepa hore Jehova a ke ke a re lahla kapa hona ho re tlohela le hore o tla lula a re fa lintho tseo re li hlokang? (Baheb. 13:5) Batho ba bangata ba tšebeletsong ea nako e tletseng ba ka re bolella kamoo Jehova a ileng a ba thusa kateng nakong eo ba neng ba mo hloka haholo. Kannete Jehova oa tšepahala. Ha Jehova a le ka lehlakoreng la rona, ha re na lebaka la ho tšoha hore na ho tla etsahala’ng nakong e tlang. Molimo oa rona a ke ke a re tlohela hafeela re beha ’Muso oa hae pele bophelong ba rona. w22.01 7 ¶16-17

Ke maemong afe re ka thatafalloang ke ho tšepa baholo? A re re motho ea khaotsoeng ke motsoalle ea haufi. Re ka ’na ra tšoenyeha ka hore baholo ha baa sheba lintlha ka mahlakoreng ’ohle, kapa ra ipotsa hore na ba entse qeto eo Jehova a neng a tla e etsa. Ke’ng e ka re thusang ho ba le maikutlo a nepahetseng ka qeto ea baholo? Re lokela ho hopola hore ho khaola ke tokisetso ea Jehova ’me ho tsoela phutheho molemo hape ho ka tsoela le mofosi molemo. Haeba mofosi ea sa bakeng a lula e le karolo ea phutheho, a ka susumetsa ba bang ka phuthehong ho etsa liphoso tse tebileng. (Bagal. 5:9) Ho feta moo, a ka ’na a se ke a hlokomela botebo ba sebe seo a se entseng hape a ka ’na a se ke a bona ho hlokahala hore a fetole tsela eo a nahanang ka eona le lintho tseo a li etsang e le hore Jehova a mo amohele. (Moek. 8:11) Re ka kholiseha hore baholo ba nka boikarabello ba bona ka ho teba ha ba etsa qeto ea hore na motho o lokela ho khaoloa kapa che. w22.02 5-6 ¶13-14

Ho hlokahala hore motho a be le mamello le mosa haholo-holo haeba qalong motho ea fuoang keletso ea Mangolo a sa e amohele. Moholo ha aa lokela ho teneha haeba mora kapa morali oabo rona a sa amohele keletso ea hae kapa a sa e sebelise ka eona nako eo. Nakong eo moholo a rapelang a le mong, o lokela ho kopa Jehova hore a thuse motho ea fuoang keletso hore a e amohele a be a e sebelise. Ho ka ’na ha nka nako hore motho ea fuoang keletso a nahane ka eona. Haeba moholo a bontša mamello le mosa, ho tla ba bonolo hore motho ea fuoang keletso a e amohele. Kahoo, ho hlokahala hore ka linako tsohle keletso e thehoe Lentsoeng la Molimo. Hopola hore re batla hore keletso eo re fanang ka eona e be e thusang motho le e ‘thabisang pelo.’—Liprov. 27:9. w22.02 18 ¶17; 19 ¶19

Ha re kopa Jehova hore a re fe matla a ho mamella bothata bo itseng kapa ho tlohela ho etsa ntho e itseng eo a sa e rateng, re ka ’na ra bona eka o nka nako ho araba lithapelo tsa rona. Ke hobane’ng ha Jehova a sa arabe lithapelo tsa rona hang-hang? Oa bona hore re na le tumelo ho eena ha re mo rapela ho tsoa botebong ba lipelo tsa rona. (Baheb. 11:6) Jehova o boetse oa thaba ha a bona re ikemiselitse ho etsa lintho tse lumellanang le lithapelo tsa rona le ha re etsa thato ea hae. (1 Joh. 3:22) Kahoo, ha re kopa Jehova hore a re thuse hore re tlohele ho etsa ntho eo a sa e rateng, ho ka ’na ha hlokahala hore re be le mamello ’me re leke kahohle ho etsa liphetoho. Jesu o ile a re thusa ho utloisisa hore lithapelo tse ling tsa rona li ke ke tsa arajoa hang-hang. O ile a re: “Le ’ne kope, ’me le tla fuoa; le ’ne le batle, ’me le tla fumana; le ’ne le kokote, ’me le tla buleloa. Etsoe e mong le e mong ea kopang oa amohela, e mong le e mong ea batlang oa fumana, ’me e mong le e mong ea kokotang o tla buleloa.”—Mat. 7:7, 8. w21.08 8 ¶1; 10 ¶9-10

E le hore u be le tumelo e matla ho ’Mopi, u lokela ho tsoela pele u ithuta Lentsoe la Molimo. (Josh. 1:8) U ele hloko boprofeta ba lona le ho lumellana ha lona. Ha u etsa joalo, u tla matlafatsa tumelo ea hao tabeng ea hore ’Mopi oa rona ea lerato le ea bohlale, ke eena ea re bopileng le hore o bululetse Bibele bakeng sa rona. (2 Tim. 3:14; 2 Pet. 1:21) Ha u ntse u ithuta Lentsoe la Molimo, ela hloko hore na keletso ea lona e ka u thusa joang. Ka mohlala, khale koana Bibele e ile ea lemosa hore lerato la chelete le kotsi le hore le “baka bohloko bo boholo.” (1 Tim. 6:9, 10; Liprov. 28:20; Mat. 6:24) Kahoo, ho mamela keletso ea Bibele ha e bua ka lerato la chelete ho ka re thusa. Na ho na le likeletso tse ling tsa Bibele tseo u ka nahanang ka tsona tse u thusitseng? Ha re ananela keletso ea Bibele, re tla e rata le ho feta haholo hobane e fanoe ke ’Mopi oa rona ea bohlale le ea lerato. (Jak. 1:5) Ka lebaka leo bophelo ba rona e tla ba bo thabisang haholo.—Esa. 48:17, 18. w21.08 17-18 ¶12-13

Haeba u ntse u hola, kholiseha hore Jehova o hopola mosebetsi oo u ileng oa u etsa nakong e fetileng. Ka mafolofolo u ile oa tšehetsa mosebetsi oa ho ruta batho Bibele. U ile oa mamella mathata esita le a neng a u utloisa bohloko haholo. U ile oa mamela le ho sireletsa melao ea Jehova e lokileng, oa phetha mesebetsi ea bohlokoa ka mokhatlong oa Jehova ’me oa koetlisa le ba bang. U ile oa etsa kahohle kamoo u ka khonang ho tsamaea le mokhatlo oa Jehova ha o ntse o etsa liphetoho. U ile oa tšehetsa le ho khothatsa ba tšebeletsong ea nako e tletseng. Jehova Molimo o u rata haholo hobane oa tšepahala. O tšepisa hore “a ke ke a tlohela ba tšepahalang ba hae.” (Pes. 37:28) Jehova o fana ka tšepiso ena e reng: “Ho isa bohlooho-putsoeng ba motho ke tla ’ne ke mamelle.” (Esa. 46:4) Kahoo u se ke oa nahana hore kaha u se u holile, ha u sa le motho oa bohlokoa mokhatlong oa Jehova. U motho oa bohlokoa haholo. w21.09 3 ¶4

Jehova o bontša mohau hobane o bohlale ka ho fetisisa. Ke kahoo Bibele e reng “bohlale bo tsoang holimo” bo “tletse mohau le litholoana tse molemo.” (Jak. 3:17) Joaloka motsoali ea lerato, Jehova oa tseba hore ha a bontša bahlanka ba hae mohau ntho eo e tla ba tsoela molemo. (Esa. 49:15) Kaha Jehova o ba bontša mohau, ba na le tšepo ka bokamoso ho sa tsotellehe ho se phethahale ha bona. Jehova o bohlale haholo, kahoo o lula a re bontša mohau ha ho e-na le lebaka la hore a etse joalo. Ho ntse ho le joalo, Jehova oa tseba hore na ke neng moo ho sa hlokahaleng hore a bontše mohau. A re re mohlanka oa Molimo o khetha ho etsa libe tse tebileng ka boomo. Re lokela ho etsa’ng? Molimo o ile a susumetsa Pauluse hore a re re “khaotse ho itsoakanya” le motho eo. (1 Bakor. 5:11) Batho ba etsang libe ba sa bake baa khaoloa ka phuthehong. Ntho ena ea hlokahala e le hore ho sireletsoe bara le barali ba bo rona ba tšepahalang le ho bontša hore melao ea Jehova ea halalela. w21.10 9-10 ¶7-8 

Ho tšehetsa mosebetsi oa boboleli ka menehelo. Baiseraele ba ne ba sa lokela ho hlaha ka pel’a Jehova ba sa nka letho. (Deut. 16:16) Ba ne ba lokela ho fana ka limpho ho latela kamoo ba neng ba khona kateng. Ka ho etsa joalo, ba ne ba bontša hore ba ananela lintho tsohle tseo Jehova a ba etselitseng tsona. Re ka bontša joang hore re rata Jehova ebile re ananela lintho tsohle tseo a re etsetsang tsona? Tsela e ’ngoe eo re ka etsang joalo ka eona, ke ka ho fana ka monehelo oa phutheho le oa lefatše lohle ho latela kamoo maemo a rona a re lumellang kateng. Moapostola Pauluse o ile a re: “Haeba ho itokisa ho le teng pele, ho amoheleha ka ho khethehileng ho ea ka seo motho a nang le sona, eseng ho ea ka seo motho a se nang sona.” (2 Bakor. 8:4, 12) Jehova o thabela monehelo oo re o ntšang le haeba o se mongata.—Mar. 12:42-44. w22.03 24 ¶13

Baholo ba ke ke ba tlosa liteko tsohle tseo batho ba Molimo ba kopanang le tsona. Ho ntse ho le joalo, Jehova o batla hore baholo ba etse sohle seo ba ka se khonang ho khothatsa le ho sireletsa linku tsa hae. Joale, baholo ba nang le lintho tse ngata tseo ba lokelang ho li etsa, ba ka khothatsa Bakreste-’moho le bona joang? Latela mohlala oa moapostola Pauluse. Pauluse o ne a lula a batla menyetla ea ho babatsa le ho khothatsa Bakreste-’moho le eena. Ke habohlokoa hore baholo ba etsise mohlala oa Pauluse ka hore ba rate Bakreste-’moho le bona le ho ba tsotella. (1  Bathes. 2:7) Pauluse o ile a kholisa Bakreste-’moho le eena hore oa ba rata ebile le Jehova oa ba rata. (2 Bakor. 2:4; Baef. 2:4, 5) Pauluse o ne a nka litho tsa phutheho e le metsoalle ea hae ’me o ne a qeta nako a e-na le bona. O ile a bontša hore oa ba tšepa ka ho ba bolella lintho tse mo tšoenyang le mefokolo ea hae. (2 Bakor. 7:5; 1 Tim. 1:15) Leha ho le joalo, Pauluse ha aa ka a tšoenyeha haholo ka mathata a hae. Empa o ne a batla ho thusa Bakreste-’moho le eena. w22.03 28 ¶9-10