December

Na Jehova o na le matla a ho tsosa bafu? O na le ’ona hobane o “Matla ’Ohle.” (Tšen. 1:8) O na le matla a ho hlola sera leha e le sefe, ho akareletsa le lefu. (1 Bakor. 15:26) Hape rea tseba hore Molimo a ka tsosa bafu hobane o hopola ntho e ’ngoe le e ’ngoe. O bitsa naleli e ’ngoe le e ’ngoe ka lebitso. (Esa. 40:26) O boetse o hopola batho ba hlokahetseng. (Jobo 14:13; Luka 20:38) O hopola ntho e ’ngoe le e ’ngoe ka batho bao a tla ba tsosa. O hopola botho ba bona, hore na ba ne ba shebahala joang, lintho tse ba etsahaletseng bophelong le lintho tseo ba neng ba li tseba. Ho hlakile hore re ka lumela hore Jehova o tla tsosa bafu nakong e tlang hobane rea tseba hore o batla ho ba tsosa ebile o na le matla a ho etsa joalo. Nahana ka lebaka le leng la ho lumela hore tšepiso ena e tla phethahala. Jehova o se a ile a tsosa batho ba bang. Mehleng ea ha ho ne ho ngoloa Bibele, o ile a fa banna ba ’maloa ba tšepahalang ho akareletsa le Jesu matla a ho tsosa bafu. w23.04 9-10 ¶7-9

Ha re sebelisa temoho le ho bua le batho ka tsela e bonolo, ba ka thabela ho re mamela le ho tsoela pele ba qoqa le rona. Ha motho a batla ho ngangisana le rona le ho bua lintho tse mpe ka lintho tseo re li lumelang, ha rea lokela ho tsoela pele re bua le eena. (Liprov. 26:4) Empa batho ba bangata ha ba joalo. Mohlomong ba bang ba ka re mamela. Re se re ithutile hore ho ba bonolo ho re tsoela molemo. Kahoo, rapela Jehova u mo kope hore a u fe matla ao u a hlokang e le hore u ka ba bonolo ha batho ba u botsa lipotso tse thata kapa ba u tšoaea liphoso. Hopola hore ho ba bonolo ho ka u thusa hore u qobe ho ngangisana le batho ha ba e-na le maikutlo a fapaneng ka taba e itseng. Hape ho araba ka tsela e bonolo ho ka etsa hore batho ba bang ba fetole maikutlo a bona ka rona le ka seo Bibele e se rutang. ‘Lula u itokiselitse ho ikarabella ho motho leha e le ofe’ ea u botsang ka lintho tseo u li lumelang ’me u etse joalo “ka bonolo le ka tlhompho.” (1 Pet. 3:15) E-ba motho ea bonolo. w23.09 19 ¶18-19

A re bueng ka lintho tse ’nè tseo re ka li etsang ho bontša hore re na le mamello. Ea pele, motho ea nang le mamello o lieha ho halefa. O leka ho lula a khobile matšoafo ebile ha a iphetetse ha batho ba mo utloisitse bohloko. Hape ha a tšoare batho hampe ha a imetsoe kelellong. (Ex. 34:6) Ea bobeli, motho ea nang le mamello ha a fele pelo. Haeba ntho e nka nako e telele ho feta kamoo a lebeletseng, o leka hore a se ke a lubeha kapa a teneha. (Mat. 18:​26, 27) Ea boraro, motho ea nang le mamello ha a etse lintho a sa nahana. Ha motho ea nang le mamello a e-na le mosebetsi oa bohlokoa oo a lokelang ho o etsa, ha a o potlakele kapa hona ho o etsa a tatile. Ho e-na le hoo, o ipha nako e lekaneng ea ho rera hore na o tla o etsa joang ebe o nka nako ea hae e le hore a o etse hantle. Ea bone, motho ea nang le mamello o loanela ho mamella mathata a sa tletlebe. O loanela ho lula a sebeletsa Jehova a thabile le hoja a e-na le mathata. (Bakol. 1:11) Bahlanka ba Jehova ba lokela ho bontša hore ba na le mamello ka litsela tsena tsohle tseo re buileng ka tsona. w23.08 20-21 ¶3-6

Lebaka le ka sehloohong leo ka lona re lokelang ho sireletsa lipelo tsa rona ke hobane Jehova o hlahloba lipelo. Taba ena e bolela hore o tseba lintho tseo batho ba bang ba sa li tsebeng ka rona ebile o tseba hantle hore na re batho ba mofuta ofe. O tla re rata haeba re lula re nahana ka likeletso tsa hae tse tla re thusa ho phela ka ho sa feleng. (Joh. 4:14) Re ke ke ra lematsoa ke mekhoa e mebe le mashano a Satane le batho ba khopo. (1 Joh. 5:​18, 19) Ha setsoalle sa rona le Jehova se ntse se hola, re tla mo rata re be re mo hlomphe le ho feta. Haeba re sa batle ho utloisa Ntate oa rona bohloko, re ke ke ra batla le ho nahana ka ho etsa sebe. Morali oa bo rona Marta ea lulang Croatia ea ileng a lekeha ho etsa boitšoaro bo bobe o re: “Ke ne ke thatafalloa ke ho nahana lintho hantle le ho hlola takatso ea ho etsa sebe seo. Empa ho hlompha Jehova ho ile ha ntšireletsa.” Ho hlompha Molimo ho ile ha mo sireletsa joang? Morali oa bo rona Marta o re o ile a nahanisisa ka hore na liphello e ne e tla ba life ha a ne a ka etsa qeto e fosahetseng. Le rona re ka mo etsisa. w23.06 20-21 ¶3-4

Jesu o ne a tseba hore morero oa Jehova ke ho halaletsa lebitso la hae, e leng ho shanofatsa lintho tsohle tse buuoeng ka eena tseo e seng ’nete. Ke ka lebaka leo Mong’a rona a ileng a ruta balateli ba hae hore ha ba rapela ba re: “Ntate oa rona ea maholimong, lebitso la hao le halaletsoe.” (Mat. 6:9) Jesu o ne a tseba hore ho halaletsoa ha lebitso la Molimo ke taba ea bohlokoa ka ho fetisisa e amang popo eohle. Ha ho na mang kapa mang ea kileng a halaletsa lebitso la Jehova ho feta Jesu. Empa ha Jesu a ne a tšoeroe, lira tsa hae li ile tsa mo qosa ka hore o hlompholotse lebitso la Molimo. E tlameha ebe Jesu o ne a utloa ho senya lebitso le halalelang la Ntate oa hae e le sebe se seholo ka ho fetisisa. O ne a tšoenyehile haholo ka hore ebe o ne a tl’o qosoa ka sebe sena a be a fumanoe a le molato. E ka ’na eaba leo e ne e le lona lebaka le ka sehloohong le ileng la etsa hore ebe Jesu o ile a “sareloa habohloko” lihora pele a tšoaroa.—Luka 22:​41-44. w24.02 11 ¶11

Ha re ntse re matha peisong ea bophelo, re lokela ho rata Jehova le Jesu ho feta ba malapa a rona. (Mat. 10:37) Empa sena ha se bolele hore ha rea lokela ho hlokomela ba malapa a rona hobane e le hore re amoheloe ke Molimo le Kreste, re tlameha ho phetha boikarabelo ba rona ka lapeng. (1 Tim. 5:​4, 8) Ha re etsa joalo re tla thaba. Jehova oa tseba hore lelapa le tla thaba haeba monna le mosali ba ratana ebile ba hlomphana, ha batsoali ba rata bana ba bona ebile ba ba ruta le ha bana ba mamela batsoali ba bona. (Baef. 5:33; 6:​1, 4) Sebelisa keletso eo Bibele e fanang ka eona ho sa tsotellehe boikarabelo boo u nang le bona ka lapeng. U se ke oa etsa lintho ho latela maikutlo a hao, ho latela seo litsebi li se buang kapa ho ea ka tloaelo ea sebaka seo u lulang ho sona. Bala lingoloa tsa rona tse thehiloeng Bibeleng. Lingoloa tsena li na le likeletso tse tsoang ka Bibeleng tse ka u thusang. w23.08 28 ¶6-7

Ho na le lintho tseo barali ba bo rona ba lokelang ho li tseba tse tla ba thusa bophelong. Lintho tse ling tseo ngoana oa ngoanana a ithutang tsona a sa le monyenyane li ka mo thusa bophelo bohle ba hae. Ka mohlala, ithute ho bala le ho ngola hantle. Litsong tse ling batho ha ba nke hore ho bohlokoa hore basali ba ithute ho bala le ho ngola. Leha ho le joalo, ke habohlokoa hore Bakreste bohle ba ithute ho bala le ho ngola. (1 Tim. 4:13) Tsoela pele u leka ho ithuta ho bala le ho ngola hantle le hoja ho ka ba thata. Ho etsa joalo ho tla u thusa joang? Ho ka u thusa hore u fumane mosebetsi. U tla khona ho ithuta Lentsoe la Molimo le ho ruta batho ba bang. Hape u tla ba motsoalle oa Jehova ha u ntse u bala Bibele ’me u nahanisisa ka lintho tseo u li balang.—1 Tim. 4:15. w23.12 20 ¶10-11

Kopa Jehova hore a u thuse ho hlola liteko. Kaha ha rea phethahala, re lokela ho lula re loantša teko ea ho etsa se fosahetseng. Satane o etsa matsapa ’ohle ho re thatafaletsa ntoa ena. Tsela e ’ngoe eo a lekang ho silafatsa likelello tsa rona ka eona ke ka ho sebelisa boithabiso bo sa hloekang. Boithabiso bo joalo bo ka tlatsa likelello tsa rona ka menahano e litšila e ka etsang hore Jehova a re nke re sa hloeka le e ka etsang hore re etse libe tse tebileng. (Mar. 7:​21-23; Jak. 1:​14, 15) Re hloka thuso ea Jehova haeba re batla ho hlola teko ea ho etsa lintho tse fosahetseng. Jesu o ile a kenyeletsa mantsoe a latelang thapelong ea mohlala: “U se ke oa re lumella hore re hloloe ke moleko empa u re lopolle ho ea khopo.” (Mat. 6:13) Jehova o batla ho re thusa empa re lokela ho mo kopa thuso. Ha re se re rapeletse thuso re lokela ho qoba kahohle lintho tse ka re behang tekong. w23.05 6-7 ¶15-17

Ha banyalani e le metsoalle ea Jehova, ba sebelisa keletso ea hae ’me seo se ka ba thusa hore ba qobe le ho rarolla mathata a ka fokotsang lerato leo ba ratanang ka lona. Batho bao e leng metsoalle ea Jehova baa mo etsisa ka hore ba be le makhabane a tšoanang le a hae a kang ho ba mosa, ho ba le mamello le ho tšoarela. (Baef. 4:32–5:1) Ha banyalani ba bontša makhabane ana, ho ba bonolo hore lerato la bona le hole. Morali oa bo rona Lena ea nang le lilemo tse fetang 25 a nyetsoe o re: “Ho bonolo ho rata motho eo e leng motsoalle oa Jehova le ho mo hlompha.” Nahana ka mohlala oa banyalani bao Bibele e buang ka bona. Ha Jehova a ne a tlameha ho khetha banyalani bao e neng e tla ba batsoali ba Mesia, O ile a khetha Josefa le Maria ho litloholo tse ngata tsa Davida. Hobane’ng? Ka bobeli e ne e le metsoalle ea Jehova. Jehova o ne a tseba hore ba ne ba tla etsa hore a tle pele lenyalong ba bona. w23.05 21 ¶3-4

Moeta-pele oa rona Jesu o phethahetse empa batho bao a ba khethileng hore ba etelle bahlanka ba hae pele mona lefatšeng ha baa phethahala. Ho ka ba thata ho ba mamela, haholo ha ba re kopa ho etsa ntho eo re sa batleng ho e etsa. Ka nako e ’ngoe moapostola Petrose le eena o ile a thatafalloa ke ho mamela. Ha lengeloi le ne le mo laela hore a je liphoofolo tse neng li sa hloeka ho ea ka Molao oa Moshe, o ile a hana ka makhetlo a mararo kaofela. (Lik. 10:​9-16) Hobane’ng? O ne a utloa taelo ena e ncha e sa utloahale. Leha ho le joalo, moapostola Pauluse ha banna ba baholo ba Jerusalema ba ile ba re Pauluse a ee tempeleng le banna ba bane, ba itlhoekise ho ea ka molao e le hore a bontše hore oa o mamela. Pauluse o ne a tseba hore Bakreste ha baa tlameha ho mamela Molao ebile o ne a sa etsa letho le phoso. Ho ntse ho le joalo, o ile “a tsamaea le banna bao ka le hlahlamang ’me a itlhoekisa le bona ho ea ka molao.” (Lik. 21:​23, 24, 26) Ho mamela ha Pauluse ho ile ha etsa hore Bakreste ba momahane.—Bar. 14:​19, 21. w23.10 10 ¶15-16

E ka ’na eaba ha u nahane hore ho tšaba motsoalle oa hao ho ka etsa hore setsoalle sa lona se tiee. Leha ho le joalo, batho ba batlang ho ba metsoalle ea Jehova ba lokela ho mo tšaba kapa ho mo hlompha. Re lokela ho sebetsa ka thata e le hore re lule re hlompha Jehova haholo ho sa tsotellehe hore na re na le nako e kae re mo sebeletsa. Ha e le hantle ho hlompha Molimo ho bolelang? Motho ea ratang Jehova o mo hlompha haholo ebile a ke ke a etsa letho le ka senyang setsoalle sa hae le eena. Jesu “o ne a hlompha Molimo.” (Baheb. 5:7) O ne a sa tšabe Jehova ka tsela e feteletseng. (Esa. 11:​2, 3) Ho e-na le hoo, o ne a mo rata haholo a bile a batla ho mo mamela. (Joh. 14:​21, 31) Le rona re batla ho tšoana le Jesu ka hore re hlomphe Jehova haholo hobane o lerato, o bohlale, o na le toka ebile o matla. Jehova oa re rata ebile tsela eo re itšoarang ka eona ha a re ruta ea mo ama. Ha re mamela Jehova, oa thaba empa ha re sa mo mamele o utloa bohloko.—Pes. 78:41; Liprov. 27:11. w23.06 14 ¶1-2; 15 ¶5

Ha Morena Uzia a se a le matla, o ile a khaotsa ho bontša hore o ananela lintho tsohle tse molemo tseo Jehova a neng a mo etselitse tsona. Re ithuta’ng? Kamehla re lokela ho hopola hore ke Jehova ea re fang lintho tsohle tse molemo tseo re li thabelang bophelong le tšebeletsong ea hae. Ho e-na le ho ithorisa ka lintho tseo re li entseng, re lokela ho lula re leboha Jehova ka lintho tsohle tseo a re thusang ho li etsa. (1 Bakor. 4:7) Kaha ha rea phethahala, re lokela ho ikokobetsa ’me re amohele khalemelo. Mor’abo rona ea lilemo li ka bang 60 o ile a re: “Ke ithutile hore ha kea lokela ho nyahama kapa ho koata ha batho ba bang ba hlokomela liphoso tsa ka. Ha ke khalemelloa liphoso tse nyenyane tseo ke li entseng, ke leka kahohle ho ntlafatsa le ho tsoela pele ke sebeletsa Jehova ka pelo eohle.” Ke ’nete hore ha re mamela Jehova ebile re lula re ikokobelitse, lintho li tla re tsamaela hantle bophelong.—Liprov. 22:4. w23.09 10 ¶10-11

Bakreste ba mehleng ea baapostola ba ne ba hloka ho ba le mamello. Ba ne ba hlaheloa ke mathata a tšoanang le a hlahelang batho bohle empa ka holim’a ’ona ho ne ho boetse ho e-na le a mang. Boholo ba bona ba ne ba hlorisoa ke baeta-pele ba bolumeli ba Bajuda, ba boholong pusong ea Roma ebile ba hlorisoa ke ba malapa a bona. (Mat. 10:21) Hape ka linako tse ling ba ne ba lokela ho itšireletsa khahlanong le tšusumetso e mpe ea bakoenehi le lithuto tsa bona tse neng li arola phutheho. (Lik. 20:​29, 30) Ho ntse ho le joalo, ba ile ba khona ho mamella mathata ao. (Tšen. 2:3) Ba thusitsoe ke’ng? Ba ile ba nahanisisa ka mehlala e hlahang ka Mangolong ea batho ba ileng ba mamella ba kang Jobo. (Jak. 5:​10, 11) Ba ile ba kopa Jehova hore a ba fe matla. (Lik. 4:​29-31) Hape ba ile ba lula ba hopola litholoana tse ntle tse tlisoang ke ho mamella. (Lik. 5:41) Le rona re ka khona ho mamella haeba re itloaetsa ho bala le ho nahanisisa ka mehlala ea batho ba ileng ba mamella ba hlahang ka Lentsoeng la Molimo le lingoloeng tsa rona tse thehiloeng Bibeleng. w23.07 3 ¶5-6

Jehova le Jesu ba ke ke ba re qhalla matsoho empa ba tla lula ba re thusa. Moapostola Petrose o ne a lokela ho etsa qeto ea bohlokoa ka ho fetisisa bophelong ba hae ka mor’a hore a latole hore o tseba Kreste. Na o ne a tla tsoela pele e le morutuoa oa Kreste kapa o ne a tla tlohela? Jesu o ne a ile a rapella Petrose hore Jehova a mo thuse hore a lule a e-na le tumelo. Jesu o ile a bolella Petrose hore o mo rapeletse ’me a mo kholisa hore oa mo tšepa le hore hamorao o ne a tla khona ho matlafatsa le ho khothatsa Bakreste-’moho le eena. (Luka 22:​31, 32) E tlameha ebe Petrose o ile a khothala haholo ha a hopola mantsoe ao a Jesu. Le rona ha re tlameha ho etsa liqeto tsa bohlokoa bophelong ba rona, Jehova a ka sebelisa baholo hore ba re khothatse le ho re thusa ho bona hore re ka khona ho lula re tšepahala. (Baef. 4:​8, 11) Jehova o ile a fa Petrose le baapostola ba bang lintho tseo ba neng ba li hloka. Re ka kholiseha hore le rona haeba re etsa hore ho sebeletsa Jehova e be eona ntho e tlang pele bophelong ba rona, o tla re fa lintho tseo re li hlokang. w23.09 24-25 ¶14-15

Jehova o bona lintho tse ntle tseo re li etsetsang batho ba bang le hoja li ka bonahala li le nyenyane. Oa bona ha re itella ho etsetsa batho ba bang lintho tse molemo ’me o tla re putsa. Haeba u kile oa ba moholo kapa mohlanka ea sebeletsang, Jehova o hopola mosebetsi oo u ileng oa mo etsetsa oona nakong e fetileng le lerato le ileng la u susumeletsa hore u o etse. (1 Bakor. 15:58) O boetse o ela hloko lerato leo u tsoelang pele ho le bontša. Jehova o batla hore re mo rate le ho feta re be re rate batho ba bang haholoanyane. Ho bala Lentsoe la Molimo, ho nahanisisa ka lona le ho mo rapela khafetsa ho ka re thusa hore re mo rate haholoanyane. Hape re tla rata bara le barali ba bo rona haholoanyane haeba re ba thusa. Ha lerato la rona le ntse le eketseha, re tla ba metsoalle e haufi-ufi ea Jehova le ea bara le barali ba bo rona ka ho sa feleng. w23.07 10 ¶11; 11 ¶13; 13 ¶18

Mokreste e mong le e mong o lokela ho ikhethela hore na o tla itlhokomela joang. Ha Bakreste ba khetha hore na ba tla phekoloa joang, ba lokela ho mamela melao ea Bibele e buang ka ho qoba mali le ho qoba ho buisana le balimo. (Lik. 15:20; Bagal. 5:​19, 20) Maemong a mang ba ka ikhethela hore na ba tla phekoloa ka tsela efe. Ho sa tsotellehe hore na re kholisehile hakae hore mofuta o itseng oa phekolo ke oona o nepahetseng, re lokela ho hlompha tokelo eo bara le barali ba bo rona ba nang le eona ea ho khetha hore na ba tla phekoloa ka tsela efe. Kahoo, re lokela ho hopola lintlha tsena tse ’nè: (1) Ke ’Muso oa Molimo feela o tla etsa hore batho ba se ke ba hlola ba kula. (Esa. 33:24) (2) Mokreste e mong le e mong o lokela ho ‘kholiseha ka botlalo’ ha a etsa qeto ea hore na ke phekolo efe e mo tšoanetseng. (Bar. 14:5) (3) Ha re ahlole ba bang ka liqeto tseo ba li etsang ebile ha re batle ho ba khopisa. (Bar. 14:13) (4) Bakreste ba bontša lerato ebile ba nka hore khotso ea phutheho e bohlokoa ho feta maikutlo a bona.—Bar. 14:​15, 19, 20. w23.07 24 ¶15

Na u nka setsoalle sa hao le Jehova e le sa bohlokoa? Re kholisehile hore u se nka e le sa bohlokoa. Ho tloha khale, esale batho ba bangata ba ikutloa ka tsela ena. (Pes. 104:​33, 34) Batho ba bangata ba tetse lintho tse ngata e le hore ba sebeletse Jehova. Ke eona ntho eo Baiseraele ba khale ba neng ba tsebahala e le Banazari kapa ba khethehileng ba ileng ba e etsa Baiseraele bao e neng e le Banazari e ne e le batho ba ileng ba tela lintho tse ngata e le hore ba ka sebeletsa Jehova ka tsela e khethehileng. Molao oa Moshe o ne o lumella banna le basali hore ba etse boitlamo bo khethehileng ho Jehova ka hore ba khethe ho phela e le Banazari ka nako e itseng. (Num. 6:​1, 2) Ha Moiseraele a ne a itlama hore e tla ba Monazari, o ne a tlameha ho latela litaelo tse neng li fanoa tseo Baiseraele ba bang ba neng ba sa li latele. Kahoo, ke hobane’ng ha Moiseraele a ne a ka khetha ho ba Monazari? Ke hobane a ne a rata Jehova haholo a bile a ananela litlhohonolofatso tseo a mo fang tsona.—Deut. 6:5; 16:17. w24.02 14 ¶1-2

Ka Bibeleng, lentsoe la Seheberu le fetoletsoeng e le “tšepahala” kapa “lerato le tšepahalang,” le bolela tsela eo Molimo a ratang batho ba hae ka eona. Le boetse le hlalosa tsela eo batho ba Molimo ba ratanang ka eona. (2 Sam. 9:​6, 7) Lerato lena le ba matla le ho feta ha nako e ntse e e-ea. A re boneng hore na Daniele o ile a bontša joang hore oa tšepahala. Daniele o ile a tlameha ho bontša hore o tšepa Jehova ka makhetlo a mangata bophelong ba hae. Banna ba neng ba sebeletsa Dariuse ba ne ba hloile Daniele ba bile ba sa hlomphe Molimo oa hae. Kahoo, ba ile ba rera ho bolaea Daniele. Ba ile ba etsa hore morena a saene molao o neng o tla bontša hore na Daniele o tšepahalla Molimo kapa morena. Ntho eo Daniele a neng a lokela ho e etsa ho bontša hore o tšepahalla morena ke hore a khaotse ho rapela Jehova ka matsatsi a 30. Empa Daniele o ile a khetha ho tšepahalla Jehova.—Dan. 6:​12-15, 20-22. w23.08 5 ¶10-12

Jehova o batla hore re tsoele pele re bontša bara le barali ba bo rona hore rea ba rata. Haeba Mokreste-’moho a sa re tšoare hantle, re ka tšepa hore o ne a sa etse seo ka moea o mobe le hore o leka kahohle ho etsa seo Jehova a reng se nepahetse. (Liprov. 12:18) Molimo o rata bahlanka ba hae ba tšepahalang ho sa tsotellehe liphoso tseo ba li etsang. O tsoela pele e le motsoalle oa rona ’me ha a lule a re halefetse. (Pes. 103:9) Ke habohlokoa hore re etsise Ntate oa rona ka hore re tšoarele ba bang. (Baef. 4:32–5:1) U hopole hape hore ha bofelo ba lefatše bo ntse bo atamela, re hloka ho lula re momahane le bara le barali ba bo rona. Re ka lebella hore mahloriso a mpefale. Re ka ’na ra iphumana re le teronkong ka lebaka la tumelo ea rona. Haeba seo se ka etsahala, re tla hloka bara le barali ba bo rona ho feta leha e le neng pele.—Liprov. 17:17. w24.03 15-16 ¶6-7

Mangolo a na le mehlala ea bacha ba ileng ba atamela ho Jehova’me a ba amohela eaba lintho li ba tsamaela hantle bophelong. Davida ke e mong oa bona. Ha a sa le mocha, o ile a khetha ho ba motsoalle oa Molimo ’me hamorao ea e-ba morena ea tšepahalang. (1 Mar. 3:6; 9:​4, 5; 14:8) Ho ithuta ka Davida ho ka re susumeletsa ho sebeletsa Jehova ka botšepehi. Hape u ka ithuta haholoanyane ka Mareka kapa Timothea. Ba ile ba sebeletsa Jehova ka botšepehi ho tloha ha ba sa le banyenyane. Ba ile ba thabisa Molimo ka ho etsa qeto ea ho mo sebeletsa. Tsela eo u phelang ka eona hona joale e tla ama tsela eo bophelo ba hao bo tla ba ka eona nakong e tlang. Ho tšepa Jehova ho e-na le ho itšepa ho tla u thusa hore u etse liqeto tse bohlale. U tla phela bophelo bo monate le bo molemo. Hopola hore Jehova o ananela seo u mo etsetsang sona. Na ho na le tsela e molemo ho feta ho sebelisa bophelo ba rona ho sebeletsa Ntate oa rona ea leholimong, Jehova? w23.09 13 ¶18-19

Moapostola Pauluse o ne a tseba hore Bakreste-’moho le eena ba ne ba sa phethahala. Ka mohlala, batho ba bang phuthehong e Jerusalema ba ne ba mo tšaba hobane ba ne ba sa lumele hore e se e le Mokreste. (Lik. 9:26) Hamorao, ba bang ba ile ba bua lintho tse mpe ka eena e le hore ba mo senye lebitso. (2 Bakor. 10:10) Pauluse o ile a bona moholo e mong a etsa qeto e fosahetseng e neng e ka ’na ea khopisa batho ba bang. (Bagal. 2:​11, 12) Mareka ea neng a le haufi-ufi le Pauluse, o ile a mo soetsa. (Lik. 15:​37, 38) Pauluse o ne a ka ’na a etsa qeto ea ho qoba ho kopana le batho bana ba neng ba mo utloisitse bohloko. Leha ho joalo, o ile a tsoela pele a nka bara le barali babo e le ba bohlokoa ’me a tsoela pele a sebeletsa Jehova ka botšepehi. Pauluse o ile a thusoa ke eng? Pauluse o ne a rata Bakreste-’moho le eena. O ne a sheba makhabane a batho ba bang eseng mefokolo ea bona hobane o ne a ba rata. Lerato le ile la mo thusa hore a etse se ngotsoeng temaneng ea kajeno. w24.03 15 ¶4-5

Bibele e na le litlaleho tse ngata tse bontšang hore ho ba bonolo ho bohlokoa. Nahana ka mohlala oa Isaka. Ha a ne a lula Gerare, naheng ea Bafilista, baahisani ba hae ba neng ba mo monela ba ile ba nka mobu, ba kata liliba tseo bahlanka ba ntate oa hae ba neng ba li chekile. Ho e-na le hore Isaka a loanele liliba tseo, o ile a tloha sebakeng seo le lelapa la hae ’me a cheka liliba tse ling. (Gen. 26:​12-18) Empa Bafilista ba ile ba re metsi a lilibeng tseo le ’ona ke a bona. Le lekhetlong lena Isaka ha aa ka a ba loantša. (Gen. 26:​19-25) Ke’ng e ileng ea mo thusa hore a lule a le bonolo ha batho ba bang ba ne ba mo halefisa? O ile a thusoa ke ho sheba tsela eo batsoali ba hae ba neng ba etsa lintho ka eona ’me a ithuta ho ba le khotso joaloka ntate oa hae Abrahama le ho ba bonolo le ho ba mosa joaloka ’mè oa hae Sara.—1 Pet. 3:​4-6; Gen. 21:​22-34. w23.09 15 ¶4

Jehova o ile a romela Mora oa hae oa letsibolo lefatšeng e le hore a rute batho ka ’Muso oa hae ’me a fane ka bophelo ba hae ho re lopolla sebeng le lefung. Ka mor’a moo, Jesu o ile a tsosetsoa leholimong hore a e’o busa e le Morena oa ’Muso oa Molimo. Molaetsa o ka sehloohong o ka Bibeleng ke hore lebitso la Jehova le tla halaletsoa le hore morero oa Jehova ka lefatše o tla phethahala a sebelisa ’Muso oa hae tlas’a puso ea Kreste. Morero oa Jehova o ke ke oa fetoha. O ile a tšepisa hore o tla o phethahatsa. (Esa. 46:​10, nal.; Baheb. 6:​17, 18) Ha nako e ntse e ea, lefatše e tla ba paradeise ’me batho ba phethahetseng e leng litloholo tsa Adama le Eva ba tla “thabela bophelo ka ho sa feleng.” (Pes. 22:26) Ho ekelletsa moo, Jehova o na le ntho e kholo eo a batlang ho e etsa e leng ho etsa hore bahlanka ba hae ba leholimong le ba lefatšeng ba mo sebeletse ba momahane. Ka nako eo, bahlanka bohle ba Molimo ba tšepahalang ba tla ikokobeletsa eena e le ’Musi. (Baef. 1:​8-11) Rea hlolloa ha re bona tsela eo Jehova a phethahatsang morero oa hae ka eona. w23.10 20 ¶7-8

Nakoana ka mor’a hore Bajuda ba neng ba tsoa Babilona ba fihle Jerusalema, ba ile ba angoa ke mathata a moruo, maemo a lipolotiki a sa tsitsang hape ba hanyetsoa ke lira tsa bona. Ka lebaka leo, ba bang ba ile ba thatafalloa ke ho etsa hore mosebetsi oa ho tsosolosa tempele ea Jehova e be oona oa bohlokoa ka ho fetisisa bophelong ba bona. Ka hona, Jehova o ile a roma moprofeta Hagai le moprofeta Zakaria hore ba tsose Bajuda molota e le hore ba sebetse ’me sechaba se ile sa fela sa tsoha molota. (Hag. 1:1; Zak. 1:1) Leha ho le joalo, lilemo tse ka bang 50 hamorao, Bajuda ba ile ba oa moea hape. Esdrase, mokopitsi ea hloahloa oa Molao o ile a tloha Babilona a ea Jerusalema e le hore a khothaletse batho ba Molimo hore ba etse hore borapeli ba ’nete e be ntho ea bohlokoa ka ho fetisisa bophelong ba bona. (Esdr. 7:​1, 6) Boprofeta ba Hagai le Zakaria bo ile ba thusa batho ba Molimo mehleng ea khale hore ba lule ba tšepile Jehova ha ba hanyetsoa. Le rona bo ka re thusa hore re lule re tšepile hore Jehova o tla re thusa leha re e-na le mathata.—Liprov. 22:19. w23.11 14-15 ¶2-3

Re ka bontša joang hore rea ba rata? Ntho e ’ngoe eo re ka e etsang ke ho ba tšelisa. Re tla khona hore ‘re ’ne re tšelisane’ haeba re utloelana bohloko.(1 Bathes. 4:18) Re ka etsa’ng e le hore re lule re ratana haholo? Re lokela ho etsa sohle se matleng a rona ho tšoarela bana ba bo rona ha ba entse liphoso. Ke hobane’ng ha ho le bohlokoa le ho feta hona joale hore re ratane? Ha Petrose a fana ka karabo, o re: “Qetello ea lintho tsohle e atametse. Kahoo, . . . le ratane haholo.” (1 Pet. 4:​7, 8) Re ka lebella hore ho etsahale eng ha bofelo ba lefatše lee bo ntse bo atamela? Jesu o ile a re ka barutuoa ba hae: “Lichaba tsohle li tla le hloea ka lebaka la lebitso la ka.” (Mat. 24:9) Re lokela ho lula re momahane e le hore re khone ho mamella lehloeo leo. Haeba re etsa joalo, leha Satane a ka leka ho re arohanya, a ke ke a o besa oa tuka hobane lerato le etsa hore batho ba utloane. Bafil. 2:​1, 2. w23.11 13 ¶18-19

’Nete e ka Lentsoeng la Molimo e na le matla a maholo. Ha re ruta batho ka Jehova le hore na ke Molimo ea joang, re bona lintho tse hlollang. Batho bao pele ba neng ba foufalitsoe ke mashano a Satane, ba qala ho bona makhabane a Ntate oa rona. Baa hlolloa ha ba bona matla a hae a maholo. (Esa. 40:26) Baa mo tšepa ha ba ithuta hore toka ea hae e phethahetse. (Deut. 32:4) Ba ithuta lintho tse ngata bohlaleng ba hae bo ke keng ba lekanngoa. (Esa. 55:9; Bar. 11:33) Hape ba ikutloa ba tšelisehile ha ba ithuta hore eena ka boeena ke lerato. (1 Joh. 4:8) Ha ba ntse ba atamela haufi le Jehova, tšepo ea bona ea hore ba tla phela ka ho sa feleng e le bana ba hae, e tiea le ho feta. Kannete ke tlotla e kholo ho thusa batho hore ba atamele haufi le Ntate oa bona. Ho etsa joalo ho etsa hore Jehova a re nke re le “basebetsi-’moho” le eena.—1 Bakor. 3:5. w24.02 12 ¶15

Haeba u ithuta Bibele kapa u holisoa ke batsoali bao e leng Lipaki Tsa Jehova, na u ntse u nahana ka ho kolobetsoa? Ke ntho e ntle haeba u batla ho kolobetsoa. Leha ho le joalo, u lokela ho inehela ho Jehova pele u ka kolobetsoa. U ka inehela ho Jehova joang? Ka ho mo rapela ’me u mo tšepise hore u tla sebeletsa eena feela le ho etsa hore thato ea hae e be eona ntho e tlang pele bophelong ba hao. Ha u etsa joalo, u tšepisa Jehova hore u tla lula u mo rata “ka pelo ea hao eohle, ka moea oa hao oohle, ka kelello ea hao eohle le ka matla a hao ’ohle.” (Mar. 12:30) Ho inehela ke ntho eo u e etsang moo u leng mong, e pakeng tsa hao le Jehova. Empa ho kolobetsoa ke ntho eo u e etsang phatlalatsa moo batho ba bang ba bonang hore u inehetse ho Jehova. Ho inehela ke boitlamo boo u bo etsang ho Jehova ’me o lebeletse hore u bo phethe. Kahoo, u lokela ho ikemisetsa ho phetha boitlamo boo.—Moek. 5:4. w24.03 2 ¶2; 3 ¶5

Manyalo kaofela a na le mathata. Bibele e bolela ka ho toba hore batho ba nyalaneng ba tla ba le “mathata a mangata.” (1 Bakor. 7:28) Hobane’ng? Hobane lenyalo le kopanya batho ba babeli ba sa phethahalang, ba nang le botho bo sa tšoaneng le ba ratang lintho tse sa tšoaneng. Ho ka etsahala hore ebe banyalani ba tsoa litsong tse fapaneng kapa ba holisitsoe ka litsela tse sa tšoaneng. Ha nako e ntse e ea, banyalani ba ka ’na ba bonahatsa mekhoa e neng e sa bonahale pele ba nyalana. Mekhoa eo e ka baka mathata. Ba ka ’na ba behana molato ka bothata bo hlahang lenyalong, ho e-na le hore e mong le e mong a hlokomele hore ho na le seo a se entseng hore ebe bothata bona bo teng le hore ba lokela ho sebetsa ’moho ho bo rarolla. Ba ka ’na ba utloa ho le molemo hore ba arohane kapa ba hlalane. Empa na ho arohana kapa ho hlalana ho tla rarolla mathata a bona? Che. Jehova o batla hore banyalani ba lule ’moho leha molekane e mong a etsa hore ho be thata lenyalong. w24.03 16 ¶8; 17 ¶11

Ka mor’a hore u inehele ho Jehova le ho kolobetsoa, u ile oa tseba Jehova le ho mo rata le ho feta. Ka lebaka leo, tšepo ea hao ea ho phela ka ho sa feleng paradeiseng e ile ea e-ba matla le ho feta. (Baheb. 5:13–6:1) E ka ’na eaba seo Baroma 5:​2-4 e se buang se ile sa u etsahalla. U ile oa ba le mathata a fapaneng empa oa a mamella kaofela ’me oa bona hore Jehova oa u amohela. Kaha oa tseba hore Jehova oa u rata hape oa u amohela, u se u e-na le mabaka a eketsehileng a ho lebella hore o tla phethahatsa litšepiso tsa hae. Tšepo ea hao e matlafetse ho feta pele. Ke ea sebele ho uena ’me u kholisehile ka eona. E u ama ka botebo. E susumetsa likarolo tsohle tsa bophelo ba hao ’me e ama tsela eo u tšoarang ba lelapa la hao ka eona, eo u etsang liqeto ka eona le eo u sebelisang nako ea hao ka eona. Moapostola Pauluse o ile a bua taba e ’ngoe ea bohlokoa ka tšepo eo u bang le eona ka mor’a hore u tsebe hore Molimo oa u amohela. Oa u kholisa hore lintho tseo u nang le tšepo ea tsona li tla phethahala.—Bar. 15:13. w23.12 12-13 ¶16-19

Ha re e-na le bothata bo boima, re ka ikutloa kapa ra nahana le ho itšoara ka tsela e sa tloaelehang. Feela joalokaha sekepe se ka tsukutloa kapa sa sisinngoa ke maqhubu a leoatle nakong ea sefefo, le rona re ka tsukutloa ke maikutlo a matla a fapaneng. Jehova o re thusa joang ha re imetsoe ke maikutlo a tjee? O tšepisa hore o tla re thusa hore re lule re tsitsitse leha re e-na le mathata. Ha leoatle le befile ka lebaka la sefefo se matla, sekepe se ka tsukutleha eaba se beha bophelo ba batho kotsing. Likepe tse ngata li na le lintho ka mahlakoreng karolong e ka tlase ea sekepe tse li thusang hore li tsitse boemong bo joalo. Lintho tsena tse tsitsisang sekepe li se thusa hore se se ke sa tsukutleha haholo. Ha se sa tsukutlehe haholo, batho ba se palameng ba ka khona ho mamella boemo bona ebile ba tla bolokeha. Leha ho le joalo, lintho tsena tse thusang sekepe hore se tsitse li sebetsa hantle haholo ha sekepe se ntse se tsamaea. Ka tsela e tšoanang, Jehova o tla re thusa hore re lule re tsitsitse haeba re tsoela pele ho mo sebeletsa ka botšepehi le linakong tse thata. w24.01 22 ¶7-8

Ha u utloa u tšohile, ipotse: ‘Ke’ng eo Jehova a seng a e entse?’ Nahana ka lintho tseo a li entseng. Ka mohlala, ha u ‘sheba’ tsela eo Jehova a hlokomelang linonyana le lipalesa tseo a li bopileng ka eona, le hoja li sa boptjoa ka setšoantšo sa hae ebile li sa khone ho mo rapela, u ka ba le kholiseho ea hore le uena o tla u hlokomela. (Mat. 6:​25-32) Nahana hape ka hore na Jehova o se a etselitse barapeli ba hae eng. U ka bala ka motho ea hlahang ka Bibeleng ea ileng a bontša tumelo e matla kapa oa bala ka tlaleho ea mohlanka oa Jehova oa mehleng ena. Hape nahana ka hore na Jehova o se a entse’ng ho bontša hore oa u hlokomela. O ile a u thusa joang hore u ithute ka eena? (Joh. 6:44) O ile a araba lithapelo tsa hao joang? (1 Joh. 5:14) Ke melemo efe eo u e fumanang letsatsi le letsatsi ka lebaka la sehlabelo sa Mora oa hae eo a mo ratang?—Baef. 1:7; Baheb. 4:​14-16. w24.01 4 ¶6; 7 ¶17