Ho Nyarela ka Litabeng
Bakoenehi ke Bo-mang?
Koranteng ea Afrika Boroa ea Naweek-Volksblad ea la 15 Pulungoana, 1986, Moprofesa Johan Heyns, moeta-pele oa moea oa Kereke ea Dutch Reformed ea Afrika Boroa, o ngotse hore, “Ka Bibeleng re bala hore Molimo ke Boraro-bo-bong.” Moprofesa o ile a tsoela pele ho hlalosa hore ba sa lumeleng hore Molimo hase batho ba bararo ho a le mong, “Kereke ea Bokreste e re batho bao ba ruta thuto ea bohata, ’me ka lebaka leo kereke e boetse e ba nyatsa ka hore ke bakoenehi.”
Empa lentsoe Boraro-bo-bong le fumanoa hokae ka Bibeleng? Moprofesa Heyns ha a ka a hlalosa. Hoo ha ho makatse hobane, joalokaha The New Encyclopædia Britannica e hlalosa, “lentsoe Boraro-bo-bong kapa thuto ena ha e fumanoe ka Testamenteng e Ncha, leha e le hore Jesu le barutuoa ba hae ba ne ba ikemiselitse ho etsa hore tumelo ea Shema [boipolelo ba tumelo ea Bojode] e itoantše Testamenteng ea Khale: ‘Utloa, Iseraele! Molimo oa rōna Ke Jehova, Jehova a ’notši’ (Deut. 6:4).” Haeba thuto ea Boraro-bo-bong e sa rutoa ke Jesu le baapostola ba hae kapa e sa boleloa ka ho toba ke Bibele, ho tlile joang hore e tume hakaale? Le hoja Britannica e bolela hore “Testamente e Ncha” ke eona e qalileng thuto ena, ea lumela hore “thuto ena e ile ea hōla butle-butle ka makholo a lilemo le ka likhopolo tse ngata tse hanyetsanang” le hore qetellong ea lekholo la bone la lilemo “thuto ena ea Boraro-bo-bong e ile ea fetohela boemong bona boo e bo bolokileng ho tloha nakong eo.”
Haeba ba hanang ho lumela hore Molimo ke motho a le mong ho ba bararo ke bakoenehi, ho thoe’ng ka Jesu Kreste? O ile a pheta mantsoe a ka holimo a Deuteronoma 6:4: “Morena, Molimo oa rōna, ke Morena a ’notši.” (Mareka 12:29) Hape Jesu o itse: “Ntate o moholo ho ’na.” (Johanne 14:28) Ka hona bakoenehi ke bo-mang? Ba khomarelang se rutiloeng ke Jesu kapa ba khomarelang thuto ea bolumeli e hōlisitsoeng makholong a lilemo kamor’a lefu la hae?—Bapisa 1 Ba-Korinthe 4:6 le 2 Johanne 9.
Motse oa “Qhobosheane”
“Kajeno Sydney ke motse o lika-likelitsoeng,” ao e bile mantsoe a qalang a mohlophisi ho The Sun-Herald, koranta ea Sydney, Australia. “Matlo a libaka tsa teng tsa bolulo ke liqhobosheane tse pota-potisitsoeng litšepe, tse notletsoeng ka mokhoa o thata-thata le tse lebeloang ka thepa ea motlakase. Literene tsa teng tsa bosiu li senngoa ka boomo, maboteng li ngoloa mahlapa le litšoantšo tse rohakanang ’me li hloka batho ka mokhoa o tšosang. Ka shoalane literata tsa teng li ntse li e-ba kotsi haholoanyane.”
Le hoja mantsoe ana a ka hlaosa ka mokhoa o nyahamisang metse e mengata e meholo lefatšeng lohle, ke mokhosi o hlahisang kameho e khōlō bakeng sa batho ba Australia. Empa leha ho le joalo, liithuti tsa Bibele ha li makatsoe ke ho bona tlōlo ea molao e ata. Hobane’ng? Hobane li hopola mantsoe a boprofeta a Jesu a buang ka mehla ea rōna. Jesu o itse “lerato la ba bangata le tla tapa ka baka la ngatafalo ea bokhopo [tlōlo ea molao].” (Mattheu 24:12) ’Me le hoja mohlophisi oa The Sun-Herald a lla ka baka la tšabo e neng e aparetse motse o ’nileng oa bitsoa o lehlohonolo haholo oa Naha e Lehlohonolo, “lehlohonolo” le ke ke la felisa bokhopo. Ke Jehova feela, ka ’muso oa hae oa leholimo, ea tla bo felisa. Pesaleme ea 5:4 e re tiisetsa hore Jehova ‘hase Molimo o ratang bobe. Ea khopo ha a amohelehe ho eena.’
Ho Itoantša ho Bolaeang
Bibele e laela Bakreste ho ‘tela mali.’ (Liketso 15:29) Lipaki tsa Jehova li lumela hore taelo ena ea Mangolo e sebetsa tabeng ea ho ja mali le litšelo tsa mali. AIDS, lefu le bolaeang le hlaselang tšebetso ea ’mele ea ho itšireletsa mafung, le ka fumanoa ka litšelo tsa mali. Ka tsela e bohloko empa e itoantšang, lesea le ileng la belehoa le e-na le boloetse bo sa tloaelehang bo bolaeang ba ’mele o sitoang ho itšireletsa mafung le ile la buuoa hore le kenngoe mokolla ha le le likhoeli tse tšeletseng. Mosebetsi ona o ne o akaretsa litšelo tsa mali. Ho kenngoa hoo ha mokolla ho ne ho bonahala eka ho atlehile ho fihlela ha lingaka li hlokomela hore litšelo tsa mali li entse hore lesea le be le lefu le leng le bolaeang. Physician’s Weekly e tlaleha hore, “Ha a le lilemo tse 2 1/2 mokuli o phetse hantle ntle ho ntho e le ’ngoe feela. Ngoana o ile a tšeloa mali kamor’a hore a buuoe pele ho hlahlojoa [ha oona] bakeng sa (kokoana hloko ea AIDS) ho fetoha tlamo ’me hona joale o na le AIDS.”