Lipaki tsa Jehova Lefatšeng Lohle—Colombia

COLOMBIA ke naha e khethehileng ea Amerika Boroa. Leoatle la Atlantic le la Pacific ka bobeli a kopetse naha ena e aparetsoeng ke ho foqoha ha seretse se chesang. Mocheso oa mabalane o fapane le serame sa Lithaba tsa Andes tse litlhōrō li phahameng tse koahetsoeng ke lehloa.a

Le hoja Colombia e tsebahala ka khauta le liemerauda, batho ke bona bao e leng letlotlo la eona la bohlokoa ka ho fetisisa. Kajeno, Jehova o tlatsa ntlo ea hae ea moea ka khanya. Barapeli ba khahlehang, ba lakatsehang ba phallela ho eona likarolong tsohle tsa lefatše, ho kopanyelletsa le Colombia.—Haggai 2:7.

Baokameli ba Mosebetsi Baa Khahloa

Sontaha sa la 1 November, 1992, e bile letsatsi le tšoaeang ho nehelanoa ha ofisi e ncha ea lekala le mehaho ea khatiso tsa Mokhatlo oa Watch Tower, Facatativá, lik’hilomithara tse 42 ka leboea-bophirimela ho Bogotá. Maeto a ho bona lekala a bile le phello e matla ho baeti. Moeti e mong ha a khutlela fekthering eo a sebetsang ho eona ka thabo o ile a phehella baokameli ba hae hore ba ee ’me ba bone mokhatlo oo e leng ‘mohlolo oa bokhoni ba tšebetso, taolo, le cheseho ea basebetsi.’ Nakong ea leeto la bona le ileng la latela ka mor’a moo ho ea bona lekala lena, baokameli bana ba ile ba bontša thahasello e matla ’me ba botsa lipotso tse ngata.

Baokameli bana ba ne ba batla ho romela batsamaisi ba bona, balaoli, le liforomane—ha e le hantle, basebetsi bohle ba bona—hore ba nke leeto lena la ho bona sebaka. Beke ka ’ngoe, ba ne ba lokisetsa basebetsi ba 15 ho isa ho ba 25 bakeng sa maeto a ho bona sebaka ho fihlela ha lebotho lohle la basebetsi ba 1 300 le ka bona tlhophiso e joalo ea bokhoni ba tšebetso.

Basebetsi ba bona ba baloang ka makholo ba nkile leeto la ho bona mehaho ea lekala le ho shebella video e reng Jehovah’s Witnesses—The Organization Behind the Name. Ba khahliloe ke boholo ba mokhatlo le boholo ba mosebetsi oa lefatše ka bophara oa ho bolela ka ’Muso, ba hlolloa ke bophahamo ba theknoloji e sebelisoang mesebetsing ea Mokhatlo. Ba bangata ha ba tloha ba utluoa ba re ba ikutloa eka ba ne ba ‘tloha Paradeiseng ba khutlela lefatšeng le se nang tlhophiso.’

’Nete e Finyella Mefuta Eohle

Ho finyelloa batho ba mefuta eohle ka litaba tse molemo. (1 Timothea 2:3, 4) Ka mohlala, eo e neng e le moqapi le moeta-pele oa sehlopha sa ’mino oa rock oa heavy metal o ile a amohela ’nete ea Bibele, a etsa liphetoho bophelong ba hae, ’me hang-hang ea e-ba pula-maliboho oa kamehla. Hamorao o ile a khetheloa ho ba mohlanka ea sebeletsang. Batho ba bangata haholo bao e neng e le litho tsa lihlopha tsa likhukhuni ba ithutile ho beha kholiseho ea bona le tšepo ’Musong oa Jehova. Hona joale ba tšoarehile ho boleleng molaetsa oa lefatše le lecha la khotso.

Ba lemaletseng lithethefatsi le ba li rekisang le bona ba retelehetse ’neteng. Mohlankana e mong eo hona joale e leng Paki e ne e le mookameli oa masimo a lithethefatsi le laboratori ea cocaine likhoeng ka lilemo tse hlano pele a ikarohanya le bophelo ba mofuta oo. O fumane thabo ka ho ithuta le ho sebelisa melao-motheo ea Bibele. Likoeta tse ahlotsoeng, ha li susumetsoa ke thuto e tiileng ea Bibele chankaneng eo li koalloang ho eona, li rapela ka tieo hore Jehova a li tšoarele libe tsa tsona le hore a li amohele e le bahlanka ba hae.

Ka hona batho ba mefuta eohle ba arabela molaetseng oa ’Muso. Colombia, joaloka libakeng tse ling, Jehova ka tsela eo o tlatsa ntlo ea hae khanya.

[Mongolo o botlaaseng ba leqephe]

[Lebokose le leqepheng la 8]

BOITSEBISO BO AMANG NAHA

Selemo sa Tšebeletso sa 1993

TLHŌRŌ EA BA FANANG KA BOPAKI: 60 854

KAROLELANO: Paki e le 1 ho 558

BA BILENG TENG SEHOPOTSONG: 249 271

KAKARETSO EA BAHOELETSI BA BO-PULA-MALIBOHO: 8 487

KAKARETSO EA LITHUTO TSA BIBELE: 100 927

PALO EA BA KOLOBELITSOENG: 5 183

PALO EA LIPHUTHEHO: 751

OFISI EA LEKALA: FACATATIVÁ

[Setšoantšo se leqepheng la 9]

Basebeletsi ba ofisi ea lekala le baromuoa ka 1956

[Setšoantšo se leqepheng la 9]

Setšoantšo sa ofisi ea lekala se nkiloeng sefofaneng