Ba Ile ba Bokana e le Barorisi ba Thabileng
BATHO ba boholo-holo ba Jehova Molimo, ba ne ba laeloa ho “thaba ka ’nete” ha ba ne ba bokana bakeng sa borapeli. (Deuteronoma 16:15) Kannete Likopano tsa Setereke tsa “Barorisi ba Thabileng” tsa 1995/96 li file Lipaki tsa Jehova mabaka a utloahalang a thabo.
Letoto lena la likopano le ile la haha tumelo ho tloha ha le qala. Le boetse la bontša hore na thabo e ka fumanoa joang lefatšeng le sa thabang. A re hlahlobeng kopano ena letsatsi ka letsatsi.
‘Rorisang Jehova . . . Le be ba Thabileng!’
Sehlooho se ka holimo sa letsatsi la pele la kopano se ne se thehiloe ho Pesaleme ea 149:1, 2. (NW) Puo, “Re na le Lebaka la ho Hooa ka Thabo” e ile ea qanolla tšebeliso ea boprofeta bo ho Esaia khaolo ea 35. Bo phethahalitsoe Iseraeleng ea boholo-holo ’me ka ho khethehileng mehleng ea rōna ka ho tsosolosetsoa ha barapeli ba Jehova naleng le bophelong bo botle paradeiseng ea moea. Ka hona, ba tlileng kopanong ba ne ba e-na le lebaka la ho hooa ka thabo ka seo Molimo a rerileng ho se etsetsa batho ba hae paradeiseng ea moea le Paradeiseng ea sebele e tlang e haufi haholo.
Puo ea sehlooho, “Ba Khethollehile e le Barorisi ba Thabileng Lefatšeng Lohle,” e ile ea araba potso ena: Ke’ng se re khethollang lefatšeng lena? Ke borapeli ba rōna bo kopaneng ba Jehova. Ho sa tsotellehe hore na Lipaki tsa Jehova li phela hokae lefatšeng lena, li bua le ho ruta ka tumellano. Hape, li thabela morero o phahameng oa Jehova oa ho halaletsa lebitso la hae le ho tlosa qoso bobusing ba hae ka ’Muso oa hae. Leha ho le joalo, Jehova o re thusa joang ho ba le sebaka morerong oa hae? O behile ’nete ea Lentsoe la hae le halalelang tlhokomelong ea rōna. Molimo o re file moea oa hae o halalelang. O re hlohonolofalitse ka boena ba lefatše lohle le tokisetso ea borapeli bo hloekileng. Lelapa la rōna la machaba le re thusa ho sebeletsa Jehova ka thabo e khōlō ea pelo.
“Ho Ipoloka re Arohile ’me re se na Letheba Lefatšeng” e ile ea hatisa tlhoko ea ho qoba matheba a leeme le ho khethollana ka lihlopha. (Jakobo 2:5-9) Ba bang ba ka thabela botsoalle feela le ba semelo kapa ba boemo ba lichelete bo tšoanang le ba bona, ba hlokomoloha Bakreste-’moho le bona ba futsanehileng kapa ba hlokang. Ba bang ba ka ’na ba sekamela ho amohela ba nang le boemo ba boikarabelo ka phuthehong. Ba lebala hore tokelo e khōlō ka ho fetisisa eo leha e le mang a ka bang le eona ke ea ho ba Paki ea Jehova. Ka lebaka leo, ha rea lokela ho lumella litšekamelo tsa lefatše ho re silafatsa le ho senya khotso ea phutheho.—2 Petrose 3:14.
Puo, “Na Ke Loketse ho Kena Lenyalong?” e ile ea bontša hore ba bangata ba kena lenyalong ka potlako. Ba bang ba kena lenyalong ho balehela boemo bo thata lapeng kapa hobane lithaka tsa bona li kena lenyalong. Leha ho le joalo, mabaka a utloahalang a lenyalo a akareletsa takatso e tšoanang ea ho phehella lipakane tsa puso ea Molimo, lerato la sebele, tlhokahalo ea bolekane le tšireletseho, le takatso ea ho hōlisa bana. Koetliso ea moea ke ea bohlokoa ho lokisetseng lenyalo. Har’a lintho tse ling, ho na le tlhokahalo ea ho ba le litšoaneleho tse ratehang ka ho apara botho bo bocha. Hape ke habohlokoa ho tiisa hore eo ho lebeletsoeng hore e tla ba molekane a fane ka bopaki ba ho ba le kamano ea sebele le Jehova le hore o sebelisana ka tlhompho le ba bang. Hape ke bohlale ho batla keletso ho Bakreste ba hōlileng tsebong.—Liproverbia 11:14.
Puo ena e hlahisang leseling e ile ea lateloa ke e nang le sehlooho, “Batsoali ba Thabisoang ke Bana ba Bona.” Hangata ho tsoaloa ha ngoana ke nako ea thabo e khōlō. Leha ho le joalo, ho tsoala bana ho boetse ho tlisa boikarabelo bo boholo. (Pesaleme ea 127:3) Kahoo, ke habohlokoa hore bana ba rutoe ho rata Jehova. Batsoali ba ka etsa sena ka ho bua kamehla ka Jehova ho bana ba bona le ka ho sebelisa melao-motheo ea Lentsoe la hae ka lapeng.
Letsatsi la pele la kopano le ile la qetella ka ntho e sa lebelloang—ho lokolloa ha bukana e ncha Lipaki Tsa Jehova le Thuto. E hlalosa ka ho hlakileng hore Lipaki “li khothaletsa bacha ba tsona ho sebetsa ka thata le ho nka ka ho teba mesebetsi eo ba e abetsoeng sekolong.” Hape khatiso ena e hlalosa liphello tse tsotehang tsa litlelase tsa ho ithuta ho bala le ho ngola tseo Lipaki tsa Jehova li ’nileng tsa li khanna ka lilemo tse ngata Nigeria, Mexico le linaheng tse ling. Bukana ena e tla thusa matichere ho bona hore re nka thuto e le ea bohlokoa.
‘Kamehla a re Hlahiseng Sehlabelo sa Thoriso ho Molimo’
Sehlooho se boletsoeng ka holimo sa letsatsi la bobeli se ne se thehiloe ho Ba-Heberu 13:15. (NW) Lenaneong la hoseng ho fanoe ka sehlooho sa neheletsano se reng “Ho Arabela Pitsong ea ho Rorisa Jehova.” Lilemo ha li thibele motho ho arabela pitsong ena. Pesaleme ea 148:12, 13 e khothaletsa bahlankana, baroetsana, maqheku le bana ho rorisa Jehova. Bahlanka ba bangata ba thabileng ba Jehova ba ’nile ba khona ho eketsa thoriso ea bona. Lefatšeng lohle, ba fetang 600 000 ba kopanela mosebetsing oa ho bolela oa nako e tletseng, kapa tšebeletso ea bopula-maliboho. Ba fetang 15 000 ba kopanela mosebetsing oa bopula-maliboho bo khethehileng, ’me ba ka holimo ho 15 000 ba tšebeletsong ea Bethele.
“Ho Sebeletsa ka Botšepehi le Mokhatlo o Hlophisitsoeng oa Jehova” ke puo e ileng ea bontša hore botšepehi ke ba bohlokoa bakeng sa bahlanka ba Molimo. Ho tšepahala ho Jehova ho bolela ho khomarela ho eena ka boinehelo bo matla hoo ho sebetsang joaloka sekhomaretsi se matla. Botšepehi bo hloka hore re qobe ho tlōla litaelo tsa Bibele ka boomo, ebang ba bang ba re bona kapa che. Hape bo re hloka hore re tšepahale ho boloka lithuto tsa Bibele tse fumanoang limakasineng tsa Molula-Qhooa le Tsoha! hammoho le lijo tse ling tsa moea tse fanoang ke Mokhatlo oa Watch Tower. Puo ena e ile ea lateloa ke puo ea kolobetso. E ne e le thabo e kaakang ha ba eang kolobetsong ba fana ka bopaki ba boinehelo ba bona ho Jehova!
Mantsoe a Hosea 4:1-3 e bile selelekela bakeng sa puo ea motšehare oa mantsiboea “Bokhabane Kapa Boitšoaro bo Bobe—U Hahamalla Hofe?” Le hoja pono ea lefatše ea bokhabane e senyehile, Bakreste ba tlameha ho etsa ‘boiteko bo tiileng’ ho hahamalla boitšoaro bo botle. (2 Petrose 1:5) Sena se qala ka hore na motho o nahana joang. Haeba monahano oa hae o le khabane, o tla bua mantsoe a hloekileng, a hlomphehang le a hahang ’me o tla phehella ho tšepahala litšebelisanong tsa hae le ba bang. Ho hahamalla bokhabane ho boetse ho akareletsa ho phehella ho ba le kutloisiso le kutloelo-bohloko ho Mokreste-’moho ea utloang bohloko ba ho tšoenyeha kapa ho tepella maikutlo.—1 Ba-Thessalonika 5:14.
Puo e ’ngoe, “Itebele Khahlanong le Maraba a Diabolose,” e ile ea lemosa Bakreste khahlanong le ho ipepesetsa litšusumetso tsa bodemona. Tabeng ea phekolo ea boloetse, ho hlokahala hore Bakreste ba be seli ka mokhoa oa phekolo, o kang ho tšerehanya, o nang le lefotha la tšebelisano le matla a phahametseng tlhaho. Ho seng joalo, seo motho a se etsang ho hlokomela bophelo ba hae ba ’mele ke taba ea botho.
Letsatsi la bobeli le ile la qetella ka ntho e thabisang e sa lebelloang—ho lokolloa ha buka e ncha e kenang ka pokothong e reretsoeng ho thusa batho ba pelo li tšepahalang ho hatela pele boinehelong le kolobetsong kapele. Buka ena e ncha e maqephe a 192 e na le sehlooho se reng Tsebo e Isang Bophelong bo sa Feleng. Buka ea Tsebo e teka ’nete ka tsela e hahang. Ha e lebise tlhokomelo ho hanyetseng thuto e fosahetseng ea bolumeli. Puo e hlakileng le taba e utloahalang li tla nolofatsa ho sebelisa buka ena ho khanna lithuto tsa Bibele le ho thusa batho ho utloisisa tsebo e thabisang ea Molimo.
‘Nyakallang, ’Me le Thabe ka ho sa Feleng’
Mantsoe ana a tsoang ho Esaia 65:18 e ne e le sehlooho sa letsatsi la boraro la kopano. Ho phethahatsoa ha boprofeta ba Bibele ho supa 1914 e le selemo seo ka sona tsamaiso ena e mpe e ileng ea kena matsatsing a eona a bofelo. Ke ka lebaka leo neheletsano ea lipuo e nang le sehlooho, “Barorisi ba Thabileng Qetellong ea Tsamaiso Ena” e ileng ea hapa tlhokomelo ea bamameli haholo. Libui li ile tsa bontša kamoo ba limilione tse likete ba susumetsoang kateng ke moea oa lefatše oa meharo le oa pefo. Ka nako e loketseng, ba tla ahloloa e le karolo ea lefatše leo ’musi oa lona e leng Satane. Kahoo, hona joale ke nako ea ho etsa khetho. Ke lehlakore lefe leo re batlang ho ba ho lona? Na re batla ho rapela Jehova le ho phahamisa bobusi ba hae, kapa na re tla lumella Satane ho ba ’musi oa rōna ka ho etsa lintho tse mo thabisang? Kaofela ha rōna re lokela ho ema lehlakoreng la Jehova ka ho sa belaetseng.
Puo ea phatlalatsa ea kopano, “Rorisang Morena oa Bosafeleng!” e file bohle ba neng ba tlile kopanong ntho e matla eo ba ka nahanang ka eona. Le hoja mohopolo oa bosafeleng o bonahala o phahametse kutloisiso ea batho ba fokolang, Jehova o o utloisisa ka ho feletseng. Mopesaleme o ile a bina: “Jehova ke Morena oa ka mehla, ea sa feleng.” (Pesaleme ea 10:16) Morena enoa oa bosafeleng o butse tsela hore batho ba thabele bophelo bo sa feleng ka Mora oa hae, Jesu Kreste. (Johanne 17:3) Sebui se ile sa re: “E, rōna batho ba baetsalibe re ka fumana bophelo bo sa feleng ka thuto ea bomolimo le ka ho ba le tumelo sehlabelong sa thekollo sa Jesu.”
Ha kopano e se e tla fela, ba tlileng kopanong ba ile ba hahuoa ke puo ea ho qetela, e nang le sehlooho, “Ho Rorisa Jehova ka Thabo Letsatsi le Letsatsi.” Ho ne ho khothatsa ho fumana litlaleho tsa tsoelo-pele ea mosebetsi oa ho etsa barutuoa ho pholletsa le lefatše. Ba tlileng kopanong ba ile ba susumeletsoa ho ‘boka Jehova ka matsatsi ’ohle le ho rorisa lebitso la hae ka ho sa feleng.’—Pesaleme ea 145:2.
Liketso tsa bobatana tse ke keng tsa hlalosoa li hlokisa lefatše thabo. Leha ho le joalo, batho ka bomong ba nang le tumelo e feletseng ho Jehova ba ka ba le thabo ea bomolimo. Kaha ke baena lefatšeng lohle, ke ka lebaka leo Lipaki tsa Jehova li ka phetang mantsoe a latelang a ho Pesaleme ea 35:27, 28: “Ke moo ba ratang taba e lokileng ea ka ba tla bina ba nyakaletse; ba tla re ka matsatsi-tsatsi: Jehova o moholo, ea ratang molemo oa mohlanka oa hae! ’Me leleme la ka le tla tumisa ho loka ha hao le lithoko tsa hao ka matsatsi-tsatsi.”
[Litšoantšo tse leqepheng la 7]
Malapa a tla rua molemo bukaneng ea “Lipaki Tsa Jehova le Thuto”
[Litšoantšo tse leqepheng la 8, 9]
Buka e ncha, “Tsebo e Isang Bophelong bo sa Feleng,” e teka ’nete ea Bibele ka tsela e hahang
[Setšoantšo se leqepheng la 9]
Ba bangata ba ile ba kolobetsoa e le ha ba bontša boinehelo ba bona ho Jehova
[Setšoantšo se leqepheng la 9]
Ba tlileng kopanong ba ile ba susumetsoa haholo ke tšoantšiso “Ho Hlompha ba Tšoanelehang Botsofaling ba Bona”