Na U Pula-maliboho e Etsang Lintho ka Tsela e Tsitsitseng?
MAHLO a ntate aa phatsima ha a butse matsoho ’me a letetse morali oa hae ea qalang ho tataea. Ha ka tšohanyetso a oela, o mo khothatsa hore a leke hape. Oa tseba hore ka potlako o tla tsitsa ’me a tiee.
Ka tsela e tšoanang, mosebeletsi e mocha oa pula-maliboho a ka ’na a hloka nako le khothatso pele a ka fumana botsitso bo hlokahalang bakeng sa hore a atlehe joaloka ’moleli oa ’Muso oa nako e tletseng. Ka lilemo tse mashome, bo-pula-maliboho ba bangata ba tsoela pele ba sebetsa ka thabo. Ba seng bakae ba lahleheloa ke botsitso ka lebaka la liphetoho tseo ba neng ba sa li lebella maemong a bona. Ba bang ba bile ba lahleheloa ke thabo ea bona. Naheng e ’ngoe, karolo ea 20 lekholong ea ba qalang ho bula maliboho e tlohela lilemong tse peli tse qalang tšebeletsong ea bona ea nako e tletseng. Ke eng e ka tlosang pula-maliboho mosebetsing oo o thabisang ka ho fetisisa? Na ho na le se ka etsoang ho qoba litšitiso tsee?
Le hoja bokuli, litlhoko tsa lichelete le boikarabelo ba lelapa li ka etsa hore ba bang ba tlohele tšebeletso ea nako e tletseng, ho ba bang tšitiso e ’nile ea e-ba ho hlōleha ho boloka botsitso bo nepahetseng pakeng tsa boikarabelo bo fapa-fapaneng ba Bokreste. Botsitso bo bolela “boemo boo ho bona karolo e ’ngoe, setho, tšobotsi kapa tšusumetso li sa imeleng tse ling kapa e be tse khōlō ho feta tse ling.”
Jesu Kreste o ile a bontša barutuoa ba hae hore na mosebetsi oa ho bolela le ho etsa barutuoa o lokela ho etsoa joang. Tšebeletsong ea hae, o ile a boela a hlakisa hore na botsitso bo ka fumanoa joang. Jesu o ile a bontša hore baeta-pele ba bolumeli ba Bajuda ba ne ba sa tsitsa, a ba bolella: “Le fana ka karolo ea leshome ea koena le dille le kumine, empa le hlokomolohile litaba tse tōma haholoanyane tsa Molao, e leng, toka le mohau le botšepehi. Lintho tsena e ne e le tlamo ho li etsa, empa leha ho le joalo eseng hore ho hlokomolohuoe lintho tse ling.”—Matheu 23:23.
Molao ona o sebetsa hantle ka ho tšoanang le kajeno, haholo-holo tšebeletsong ea bopula-maliboho. Ba susumelitsoe ke cheseho le boikemisetso bo botle, ba bang ba nkile bopula-maliboho ntle le ho bo lokisetsa ka ho feletseng kapa ho nahana sohle seo bo se akarelletsang. (Luka 14:27, 28) Ba bang ba tšoarehile ka ho fetelletseng tšebeletsong ea tšimo hoo ba hlokomolohileng likarolo tse ling tsa bohlokoa tsa Bokreste. Ke joang ba ka finyellang botsitso le ho bo boloka?
Lula U le Matla Moeeng!
Le ka mohla Jesu ha aa ka a hlokomoloha bomoea ba hae. Le hoja matšoele a neng a e-tla ho tla mo mamela le ho folisoa a ne a mo jella nako, o ne a behella ka thōko nako bakeng sa thapelo e nahannoeng ka botebo. (Mareka 1:35; Luka 6:12) Bopula-maliboho bo tsitsitseng kajeno bo boetse bo hloka hore pula-maliboho e sebelise ka hohle litokisetso tsohle tse teng bakeng sa ho ipoloka e le matla moeeng. Pauluse o ile a beha lebaka: “Leha ho le joalo, na uena, ea rutang e mong osele, ha u ithute?” (Baroma 2:21) Ka sebele e ka ba phoso hore motho a tlatse nako eohle ea hae ka ho bolella ba bang ha ka nako e tšoanang a hlokomoloha ho ba le nako bakeng sa thuto ea botho e tšoanelehang le ho rapela kamehla.
Kumiko e bile pula-maliboho ka lilemo tse 20. Le hoja a e-na le bana ba bararo le monna ea sa lumelang, o fumane ho tsoa phihlelong hore nako e molemo bakeng sa ho bala le ho ithuta Bibele ke pele a robala. Ha a ntse a ithuta, ka ho khetheha o hlokomela lintlha tseo a ka li sebelisang tšebeletsong ea tšimo e le hore a ka boloka tšebeletso ea hae ea kamehla e le nakong ’me e thahasellisa. Bo-pula-maliboho ba bang ba atlehileng ba tsoha hoseng pele ho litho tsohle tsa lelapa bakeng sa ho thabela ho iphepa moeeng lihoreng tse khutsitseng tsa hoseng. U ka ’na ua behella nako e ’ngoe e loketseng ka thōko bakeng sa ho lokisetsa liboka le ho tsamaisana le lingoliloeng tsa morao-rao tsa Bokreste. Haeba u batla ho boloka thabo ea tšebeletso ena, thuto ea botho hase ntho e ka etsoang ka lepotla-potla kapa e ka hlokomolohuoang.
Ho Tsitsisa Boikarabelo ba Lelapa
Batsoali ba bo-pula-maliboho ba boetse ba lokela ho hopola hore karolo e khōlō ea “thato ea Jehova” bakeng sa bona e akareletsa ho hlokomela malapa a bona ka litlhoko tsa nama, tsa maikutlo le tsa moea. (Baefese 5:17; 6:1-4; 1 Timothea 5:8) Ka linako tse ling esita le molekane ea lumelang le litho tsa lelapa tse lumelang ba tšoha hore ba ke ke ba fumana mofuthu le tšehetso tse tsoang ho mosali kapa ’mè hang ha a qala ho bula maliboho. Maikutlo a joalo a fella ka hore ba arabele ka tsela e sa bontšeng thahasello takatsong ea hae ea ho ba pula-maliboho. Leha ho le joalo, ka ho lokisetsa hantle le ho nahana esale pele, botsitso bo ka fumanoa.
Bo-pula-maliboho ba bangata ba ikitlaeletsa ho etsa mosebetsi oohle oa bona oa boboleli ha litho tsa lelapa li le sieo lapeng. Kumiko ea boletsoeng pejana o ba le lelapa la hae ha ba e-ja lijo tsa hoseng, a bone ha monna oa hae le bana ba tsamaea hoseng, ’me o ba teng hae pele ba khutla. O sebelisa matsatsi a Mantaha bakeng sa ho pheha lijo tsa mefuta-futa nako esale pele e le hore a ka lokoloha ’me a khona ho ja lijo le lelapa la hae ho e-na le ho phathahana ka kichineng. Ho otla linonyana tse peli ka lejoe le le leng, joaloka ho etsa mesebetsi e meng ea lelapa nakong eo a phehileng ka eona, le hona hoa thusa. Ka tsela eo, Kumiko o bile o fumana nako ea ho mema metsoalle ea bana ba hae ’me a ba thenthe ka limona-mona.
Ha bana ba hōlela lilemong tsa bona tsa bocha, hangata ba hloka tlhokomelo e eketsehileng ea batsoali ba bona bakeng sa ho sebetsana le maikutlo a macha, litaba-tabelo, lipelaelo le tšabo tse ba sithabetsang. Sena se bolela ho falimeha le ho etsa liphetoho kemisong ea motsoali eo e leng pula-maliboho. Nahana ka Hisako, ’mè oa pula-maliboho ea nang le bana ba bararo. O ile a etsa joang ha morali oa hae e moholo a bontša ho felloa ke thabo le cheseho bakeng sa liboka tsa Bokreste le tšebeletso ea tšimo ka lebaka la ho tosoa ke metsoalle ea hae ea sekolong? Tlhokahalo ea sebele e ne e le hore morali oa hae a etse hore ’nete e be ea hae ’me a kholisehe ka ho feletseng hore ho ikarola lefatšeng e ne e le tsela e molemohali.—Jakobo 4:4.
Hisako oa bolela: “Ke ile ka etsa qeto ea ho ithuta le eena hape lithuto tsa motheo bukeng ea Phela ka ho sa Feleng letsatsi le leng le le leng. Qalong, re ne re ithuta metsotso e se mekae le morali oa ka eo hangata a neng a tletleba ka ho khakhathoa ke mala le hlooho ha e ne e le nako ea thuto. Empa ke ile ka ithuta le eena kamehla. Ka mor’a likhoeli tse seng kae, boikutlo ba hae bo ile ba ntlafala haholo, ba lebisa boinehelong le kolobetsong ea hae ka mor’a nakoana.” Hona joale Hisako o thabela tšebeletso ea nako e tletseng ’moho le morali oa hae.
Bo-ntate ba bo-pula-maliboho le bona ho hlokahala ba ele seli hore ba se tšoarehe haholo ka ho hlokomela ba thahasellang tšimong le ka boikarabelo ba bona ba phutheho hoo ba hlōlehang ho neha bana ba bona ba ntseng ba hōla tšehetso e matla ea maikutlo le tataiso e ba loketseng. Ena ke ntho eo monna a ke keng a e fetisetsa ho mosali oa hae. Moholo ea tšoarehileng oa Mokreste eo e bileng pula-maliboho ka nako e telele, ’me a boetse a tsamaisa khoebo e nyenyane, o ipha nako ea ho ithuta le bana ba hae ba bane e mong le e mong ka nako ea hae. (Baefese 6:4) Ho phaella moo, o lokisetsa liboka tsa beke le beke le lelapa la hae. Bo-pula-maliboho ba tsitsitseng ha ba hlokomolohe malapa a bona mabapi le litlhoko tsa nama kapa tsa moea.
Botsitso ho Tse Amanang le Moruo
Pono e nepahetseng litlhokong tsa letsatsi le letsatsi ke karolo e ’ngoe eo bo-pula-maliboho ba lokelang ho ikitlaeletsa eona hore ba boloke botsitso bo nepahetseng. Mona hape, re ka ithuta ho eketsehileng mohlaleng o motle oa Jesu le keletsong ea hae. O ile a lemosa khahlanong le ho tšoenyeha ka ho feteletseng ka lintho tse bonahalang. Ho e-na le hoo, o ile a khothalletsa barutuoa ba hae hore ba behe ’Muso pele, a tšepisa hore Molimo o tla ba hlokomela joalokaha a hlokomela pōpo eohle ea hae. (Matheu 6:25-34) Ka ho latela keletso ena e molemo, bo-pula-maliboho ba bangata ba khonne ho lula tšebeletsong ea nako e tletseng ka lilemo, ’me Jehova o hlohonolofalitse boiteko ba bona ba ho fumana ‘bohobe bakeng sa letsatsi ka leng.’—Matheu 6:11.
Moapostola Pauluse o ile a eletsa Bakreste-’moho le eena hore ‘ho ba le kahlolo e molemo ha bona ho tsejoe ke batho bohle.’ (Bafilippi 4:5) Ka sebele, ho ba le kahlolo e molemo ho tla re hloka hore re hlokomele bophelo ba rōna ba ’mele ka ho nepahetseng. Bo-pula-maliboho ba tsitsitseng ba ikitlaetsa ho ba le kahlolo e molemo mokhoeng oa bona oa bophelo le boikutlong ba bona malebana le lintho tse bonahalang, ba tseba hore ba bang ba shebile boitšoaro ba bona.—Bapisa le 1 Bakorinthe 4:9.
Bacha ba kenelang tšebeletso ea bopula-maliboho ba lokela ho qoba ho sebelisa hampe seatla se bulehileng sa batsoali ba bona. Haeba ba lula lapeng, e tla ba ho bontša botsitso bo nepahetseng le kananelo ho kopanela mesebetsing ea lelapa le ho fumana mosebetsi oa nakoana o tla ba nolofalletsa hore ba kenye letsoho litšenyehelong tsa ho tsamaisa lelapa.—2 Bathesalonika 3:10.
Bo-pula-maliboho ba Tsitsitseng ke Tlhohonolofatso ea Sebele
E ka ’na eaba u pula-maliboho e sebetsang ka thata hore e boloke botsitso bo loketseng. E-ba le tšepo. Joalo feela kaha ngoana a hloka nako bakeng sa ho ithuta ho tsitsa ’me a tsamaee, bo-pula-maliboho ba bangata ba hōlileng tsebong ba bolela hore ho ile ha ba nka nako ho finyella botsitso bakeng sa ho hlokomela mesebetsi eohle ea bona.
Har’a likarolo tse ling tseo bo-pula-maliboho ba loanelang botsitso ho tsona ke ho etseng thuto ea botho, ho hlokomeleng litho tsa lelapa le ho iphumaneleng litlhoko tsa bona tsa nama. Litlaleho li bontša hore bo-pula-maliboho ba bangata ba phethahatsa boikarabelo ba bona ka tsela e ikhethang. Ka sebele ke tlhohonolofatso ho batho bao ba phelang le bona le thoriso ho Jehova le mokhatlo oa hae o hlophisitsoeng.