Baboleli ba ’Muso Baa Tlaleha

U se ke ua Tsilatsila ho Bolela Litaba tse Molemo

HA BAFUPUTSI ba Europe ba qala ho etela Kou ea Venezuela le Letša la Maracaibo, sebaka se moeling oa lebōpo la leoatle se ne se tletse matlo a manyenyane a ruletsoeng ka joang a hahiloeng holim’a litšiea a okametseng metsi a sa tebang. Pono ena e ne e ba hopotsa Venice, Italy, moo batho ba hahileng matlo a bona moeling oa metsi. Kahoo bafuputsi bao ba buang Sepanishe ba ile ba reha sebaka seo Venezuela, e bolelang “Venice e Nyenyane.”

Kajeno, naheng ena e ntle ho na le mofuta o mong oa lenaneo la kaho, ea moea. Lipaki tsa Jehova li tšoarehile mosebetsing oa ho jala peō ea ’Muso ha ho hlaha monyetla o mong le o mong o loketseng. Kotulo ea moea e bang teng e tlisa thoriso e khōlō ho “Mong’a kotulo,” Jehova Molimo.—Matheu 9:37, 38.

Ha molebeli ea tsamaeang a etetse phutheho e ’ngoe seterekeng sa Zulia ka leboea-bophirimela ho Venezuela, Lipaki tsa moo li ile tsa lokisetsa hore eena le mosali oa hae ba etele sehlekehleke se senyenyane se haufi se bitsoang Toas. Ha ba ntse ba eme moleng ba emetse ho palama seketsoana sa hoseng se eang sehlekehlekeng seo, mosali oa molebeli ea tsamaeang, Mery, o ile a etsa tlhahiso ho ea tsamaeang le eena, morali’abo rōna oa pula-maliboho oa nako e tletseng, ea hore ba bue le basebetsi ba bang ka seketsoaneng. Morali’abo rōna oa pula-maliboho o ile a lumela.

Ha a atamela setei se seng, Mery o ile a hlahisa buka ea Tsebo e Isang Bophelong bo sa Feleng. O ile a se bontša khaolo ea “Ho Haha Lelapa le Hlomphang Molimo,” eo se ileng sa bonahala se e ananela. Eaba Mery o hlalosa hore se ka ba le thuto ea Bibele lelapeng la sona, se sebelisa buka ena. Se ile sa amohela buka eo, ’me ha etsoa litokisetso tsa hore e mong a se etele lelapeng la sona.

Nako e khutšoanyane hamorao, ho ile ha e-ba le kopano e khethehileng ea letsatsi le le leng sebakeng seo. Mery o ile a makala hakaakang ha a bona setei seo, e leng Monghali Nava, hammoho le mosali oa sona le barali ba banyenyane ba babeli! Mery o ile a botsa mosali oa sona hore na o ikutloa joang ka thuto ea bona ea Bibele ea lelapa. Karabo ea hae e ne e makatsa haholo.

O ile a re: “Ke leboha Jehova hore ebe re ithutile ’nete.” Eaba oa hlalosa: “Ha u ne u bua le monna oa ka, o ne a sa tsoa ntlohela ka lebaka la mosali e mong. Hape o ne a noa haholo. Ka linako tse ling ha a tahiloe, o ne a hlekefetsa batho, e leng seo batho ba neng ba sa se rate motsaneng oo o sehlekehlekeng. O ne a boetse a sebelisana le meea. Leha ho le joalo, tsebo ea Bibele eo a ileng a e fumana ha a ntse a ithuta e ile ea mo thusa ho etsa liphetoho tse khōlō bophelong ba hae. O khaolitse mekhoa eohle ea hae e sa hloekang. Batsoali ba hae, ba Mak’hatholike, ba khahliloe haholo ke liphetoho tsena. Ba thabetse hore ebe joale ke monna le ntate ea nang le boikarabelo.”

Monghali Nava o ile a kolobetsoa ka 1996 ’me hona joale ke mosebeletsi oa nako e tletseng. Mosali oa hae, Jenny, o ile a kolobetsoa ka 1997. Ramotse oa toropo eo o ile a khahloa haholo ke liphetoho tsa setei sena sa liketsoana hoo le eena a ileng a kōpa thuto ea Bibele. Barali bao babo rōna ba thabile hakaakang hore ebe ha baa ka ba tsilatsila ho bolela litaba tse molemo ha ba ntse ba eme moleng ba emetse seketsoana hoseng hoo!

[Setšoantšo se leqepheng la 7]

Ho arolelana litaba tse molemo le setei sa liketsoana ho ile ha e-ba le liphello tse thabisang