Ntoa—Letšoho le ho Tsoa Kotsi Kelellong
“RE NE re le mosebetsing oa bolebeli oo ho sa kang ha etsahala letho le lebe. Moofisiri oa rōna, monna ea bonolo, ea mosa, o ne a se mosebetsing oa bosole, o ne a re khutlisetsa meleng ea rōna. Molebeli e mong a re phephetsa. Le pele moofisiri oa rōna a araba, lesole le tšohileng le emeng moleng o ka mor’a rōna le ile la thunya, la nepa moofisiri sefahlehong. Monna eo o ile a shoa, ’me a khangoa ke mali a hae.” Ho Edward B——, lesole la Brithani, seo sohle se akarelitse boemo bo ntšang kotsi kelellong ba Ntoa ea II ea Lefatše.
Ba bang ba leka ho pata seo ntoa e neng e hlile e le sona. Ka mohlala, Ntoa ea I ea Lefatše e ile ea buelloa ke batho ba bang e le “karolo ea Armageddone—ntoa ea ho qetela ea Molimo khahlanong le Bobe . . . le ntoa ea masole a loanang ka lisabole a palame lipere, joalokaha eka ho bapaloa bolo ea cricket.” (The Faces ofPower) Ho ne ho se joalo. E ile ea hlalosoa hamolemo ke mongolli oa litaba Ernest Hemingway ha a ne a ngola hore e ne e le “ntoa e khōlō ka ho fetisisa, e bolaileng batho ba bangata, polao e sehlōhō ka ho fetisisa e kileng ea etsahala holim’a lefatše”—ho fihlela Ntoeng ea II ea Lefatše.
Polao e sehlōhō joalo e tšoaile lintoa tsohle tsa lekholong lena la lilemo esita le pele ho moo. “Ntoa e ’ngoe le e ’ngoe historing, ho sa tsotellehe hore e bakiloe ke eng kapa ho lokafatsoa ha eona, e ’nile ea ba e silafatsang, e makatsang le e theolang boitšoaro ba bohle ba amehang,” ho ngotse Malcolm Browne. Vietnam, o bone ka ho tobileng bopaki ba polao e sehlōhō le masisapelo a ntoa, empa o ikutloa hore “boholo ba sehlōhō se etsahetseng Viet Nam hase ntho e ncha phihlelong ea batho.”—The New Face of War.
Ha e le hantle lihlōhō tse tšoanang li ile tsa bonoa nakong ea Ntoa ea II ea Lefatše. Jeremane le Japane li ile tsa etsuoa lesupi ’me palo ea masole le baahi ba tsona ba bolailoeng ebile limillione. United States e ile ea lahleheloa ke ba ka bang 400 000, Brithani ba 450 000, ’me Fora ba fetang halofo ea millione. Ho lekanyetsoa hore Soviet Union e lahlehetsoe ke ba limillione tse 20. Ha e thathamisa seo e se hlalositseng e le “tlhōrō ea masisapelo a batho,” buka World War ll e tlalehile: “Mahiatsipa ’ohle a ntoa, ho kopanyelletsa le baahi, ebile bonyane limillione tse 50.”
Mahlatsipa a baahi ebile karolo ea seo Gerald Priestland bukeng ea hae Priestland—Right and Wrong a se hlalositseng e le “ntoa e felletseng: ntoa ea banna, basali le bana, ho sa tsotellehe hore na ba tsoa kae kapa ba etsa eng, kapa hore na lilemo tsa bona li kae kapa ba hloka hakae.” O itse, sena se ile sa tšoauoa ha “mabotho a ne a chesa Hamburg le Dresden, ’me Majeremane a ripitla Liverpool le Coventry.”
Polao e sehlōhō ea batho ba limillione tse mashome ntoeng ebile ntho e soabisang. Empa ho thoe’ng ka ba ileng ba phonyoha ntoa “e silafetseng, e makatsang le e theolang boitšoaro”? Ba ameha joang? Ba mamella liphello tsa ntoa joang? Lihlooho tse latelang li tla hlahloba lipotso tsena.