Ha Mesebetsi e Etsa Motho Lekhoba

BOKHOBA ba lintho le bokhoba ba mesebetsi bo tšoana le literene tse peli tse eang ’nģa e le ’ngoe seporong se tšoanang.a Bo bong le bo bong bo leba sebakeng se tšoanang kapa bo na le morero o tšoanang: ho fetola maikutlo le ho sira maikutlo a bohloko. Ha re hlahlobeng mehlala e meng ea bokhoba ba mesebetsi.

Bokhoba ba Mosebetsi

Bokhoba ba mosebetsi bo ’nile ba bitsoa bokhoba bo hlomphehang. Ebile, makhoba a mosebetsi ke bahiruoa ba molemo. Leha ho le joalo, ka hare ba ka ’na ba ikutloa ba sa khotsofala. Mosebetsi e ka ba tšitiso maikutlong a bohloko kapa telekiso e feteletseng ea kananelo.

Leqhoa le sireletsa ea thelelisang leqhoeng hore a se ke a khangoa ke metsi; mosebetsi o sireletsa lekhoba la mosebetsi hore le se ke la tetebela maikutlong. Joaloka ea thelelisang leqhoeng, lekhoba la mosebetsi le ka etsa hore ba bang ba hlolloe ke tsela eo le bontšang thahasello e makatsang mosebetsing. Empa ho hang hase ha sebele. Hangata ke eng e sollang ka tlaase? Moeletsi oa bophelo ba kelello Linda T. Sanford oa ngola: “Ha lekhoba la mosebetsi le sa tšoareha mosebetsing, le ka hloelloa setha ke maikutlo a tšajoang a ho tepella maikutlong, matšoenyeho, bohale, ho nyahama le ho hloka morero.”

Qobello e tebileng ea makhoba a mangata a mosebetsi e hlahisa hore ke tšobotsi ea nako e telele, mohlomong e thehiloeng khōlisong ea motho. Sena e ne e le ’nete ka mosali eo re tla mo bitsa Mary. Ho tloha ha a le lilemo tse tšeletseng o ne a leka ho hapa lerato la ntate oa hae eo e neng e le lekhoba la tahi ka ho mo phehela le ho etsa mosebetsi oa ntlo. O re: “O ile oa qala ho fetoha qobello. Ke ne ke e-na le boikutlo ba hore ha nka etsa ho eketsehileng kapa haeba nka etsa hamolemonyana, o tla nthata. Sohle seo ke ileng ka se fumana e ne e le ho tšoauoa liphoso.”

Leha Mary e se e le motho e moholo o ntse a loantšana le monahano ona o fosahetseng. O re: “Ka hare ke ntse ke ikutloa ke se na thuso. Ke ntse ke utloa hore ke tšoanela ho hapa lerato, hore ha ke na bohlokoa ntle leha ke sebetsa. Lipokanong tsa botsoalle ke sebetsa ka thata ho pheha le ho tšola, joalokaha eka ke leka ho hapa tokelo ea ka ea ho ba moo.”

Bakeng sa ba tšoanang le Mary, ho hlokahala pono e leka-lekaneng ea mosebetsi. Bibele e rorisa ho sebetsa ka thata. (Liproverbia 6:6-8; 2 Ba-Thessalonika 3:10, 12) Jehova Molimo ka boeena oa sebetsa. (Pesaleme ea 104:24; Johanne 5:17) Empa le ka mohla ha a qobellehe. Jehova o ile a bona botle mesebetsing ea hae ea pōpo eseng feela ha e se e qetiloe empa esita le nakong ea pōpo.—Genese 1:4, 12, 18, 21, 25, 31; bapisa le Moeklesia 5:18.

Mosebetsi e Moholo oa Jehova Molimo, Mora oa hae, Jesu, ka ho tšoanang o ile a bonahatsa khotsofalo ea botho mosebetsing oa hae. (Liproverbia 8:30, 31) Jesu o ile a tšepisa balateli ba hae hore le bona ba ne ba tla fumana khatholoho ka ho sebetsa le eena. Hammoho ba ile ba thabela kabelo ea bohlokoa bo boholo. Empa sena ha sea ka sa ba thibela ho phomola.—Mattheu 11:28-30; Mareka 6:31; bapisa le Moeklesia 4:6.

Mohlomong motsoali o ile a fetisa maikutlo a hore bohlokoa ba hao bo itšetlehile ka seo u se etsang kapa hore lerato le ne le tla bolokoa ho fihlela le hapiloe. U tla imoloha ka ho tseba hore sena hase pono ea Jehova ea botsoali bo nepahetseng. Lentsoe la hae lea eletsa: “Bo-ntat’a bana, se halefiseng bana ba lōna, ba tle ba se ke ba nyahama lipelo [“ba ikutloa ba le tlaase,” The Amplified Bible].” (Ba-Kolosse 3:21) Jehova ha a boloke lerato ho fihlela le hapiloe. Lerato la hae hase ntho eo a e bonahatsang feela ka mor’a hore motho a qale ho mo rata le ho mo sebeletsa. Ka sebele, Bibele e re bolella hore ‘o re ratile pele,’ e, leha “re sa le baetsalibe,” Molimo o ile a nka bohato ba pele ho re rata. (1 Johanne 4:19; Ba-Roma 5:6-8) Ho feta moo, Jehova ha a tšoaee phoso boitekong ba rōna bo tiileng ba ho etsa thato ea hae. Ka hona, tšebeletso ea rōna ho eena e e-ba ponahatso ea sebele ea lerato la rōna ho eena.

Bokhoba ba Thelevishene

Ba bang ba bitsa ho shebella TV ho feta tekanyo bokhoba. Marie Winn oa ngola ho The Plug-In Drug: “Ho fapana le lithethefatsi kapa tahi, phihlelo ea thelevishene e lumella ea nkang karolo ho thiba lefatše la sebele ’me a kene boemong ba monyaka le ba ho se sebetse ha kelello.”

Ka ho hlakileng, ha ho na phoso ka ho tlosoa boikarabellong ba bophelo—ka nakoana. Empa bashebelli ba bang ha ba sa hlola ba khutlela linthong tsa sebele. Monna e mong eo ka tšohanyetso a neng a se a ke ke a shebella TV kaha e robehile o ile a re: “Ke utloa eka kelello ea ka e ne e thethebantsoe lilemo tseo tsohle. Ka tsela e ’ngoe e itseng ke ne ke hokeletsoe mochineng oo ’me ke sitoa ho itokolla.” Mocha ea bitsoang Kai o hlalosa qobello e tšoanang: “Ha ke batle ho shebella thelevishene haholo kamoo ke etsang empa ha ke khone ho itšoara. E nketsa hore ke e shebelle.”

Ho shebella TV ho feta tekanyo ho sitisa matla a ho nahana. Bibele e khothaletsa ho nahana ka tsela ea ho thuisa, ho hlokang nako ea hore motho a be mong. (Joshua 1:8; Pesaleme ea 1:2, 3; 145:5; Mattheu 14:23; Luka 4:42; 5:16; 1 Timothea 4:15) Sena se tšosa batho ba bangata. Ba tšoha haholo ha ba potolohiloe ke khutso. Ba tšaba ho ba bang feela le maikutlo a bona. Ka lehlapha-hlapha ba tsoma ntho leha e le efe hore ba koale sekheo seo. TV e ba pheko ea kapele. Leha ho le joalo, leha e le karolo ea eona e molemohali, TV ke feela se nkelang bophelo ba sebele sebaka.

Papali ea Chelete e Qobellang

Papali ea chelete e thehiloe meharong. Empa papali ea chelete e qobellang hangata ke ho fetang feela taba ea chelete.b Nigel o re: “Ke ne ke hloka ‘ho nkeha’ hoo hore ke balehele maemo a sebele. Ho ne ho tšoana hantle le ho sebelisa sethethefatsi.” Ho motho ea bapalang papali ea chelete ka ho qobelleha, tšebetso ea ho bapala papali ea chelete hangata ke moputso e le hona. Liphello ha li tsotellehe. Nigel o ile a lahleheloa ke metsoalle ea hae. Ba bang ba lahleheloa ke malapa a bona. Ba bangata ba lahleheloa ke bophelo ba bona bo botle. ’Me e batla e le bohle ba lahleheloang ke chelete ea bona. Empa ke ba fokolang ba khaotsang, kaha ho hlōla kapa ho hlōloa hase hona hoo e leng taba. Ke ho bapala papali eo—tšebetso eo—ho fetolang maikutlo le ho fana ka ho nkeha hoo e kang ha sethethefatsi.

Papali ea chelete e ka ba tšitiso mathateng a bophelo, empa e ke ke ea etsa hore a fele. Motho ea tsoileng likotsi tse mpe o hloka ho fetang pilisi e bolaeang bohloko. Maqeba a hae a lokela ho phekoloa. Haeba ho na le maqeba a entseng hore motho a bapale papali ea chelete, o lokela ho a hlokomela le ho a phekola. Sena se hloka sebete, empa qetellong sea putsa.

Itokolle

Ho itokolla bokhobeng leha e le bofe, tsieleho e ka hare eo hangata e ntšetsang bokhoba pele e ke ke ea iphapanyetsoa. Lekhoba le lokela ho leka ho sebetsa bothata mohloling oa bona. Sena ke phephetso. Eo pele e neng e le lekhoba o re: “Ha u khaotse habonolo lilemo tse 30 tsa lithethefatsi le tahi, haholo-holo ha bokhoba ba hao e ne e le khakanyo ea bothata bo tebileng.”

Leha ho le joalo, ho itokolla bokhobeng ho tšoaneloa ke boiteko. Mary, mosebetsi ea qobellehang ea boletsoeng pejana, o ho hlalosa hantle. O re: “Ka lilemo ke ne ke baleha lintho tseo ke neng ke tšaba ho talimana le tsona. Empa joale kaha ke se ke talimane le lintho tseo, hoa makatsa hore na li bonahala li le nyenyane hakae.”

Ena e bile phihlelo ea ba bangata ba hlōtseng bokhoba ka katleho. Ho e-na le ho tsoela pele e le “makhoba a mekhoa e senyang,” ba rapeletse ‘matla a tlōlisang’ hore ba talimane ka katleho le phephetso ea ho hlōla bokhoba.—2 Petrose 2:19, Today’s English Version; 2 Ba-Korinthe 4:7.

[Mongolo o botlaaseng ba leqephe]

[Setšoantšo se leqepheng la 19]

Ho lekhoba la mosebetsi, mosebetsi o bonahala o le bohlokoa ho feta lelapa

[Setšoantšo se leqepheng la 19]

Papali ea chelete e ka fetola maikutlo a motho ’me ea hlahisa ho nkeha hoo e kang ha lithethefatsi

‘Lentsoe bokhoba le ka sebelisetsoa mefuta eohle ea boitšoaro bo qobellang.’

Dr. J. Patrick Gannon.