Liphoofolo—Thabo ea ho ba le Tsona ka ho sa Feleng
KA SEBELE ho na le liphoofolo tsa mefuta e mengata hakaakang, e ’ngoe le e ’ngoe ho bonahala e e-na le boitšoaro le litšobotsi tse e khethollang! Ho li bontša lerato le kutloelo-bohloko e ka ba ntho e hulelang motho ho ’Mōpi oa tsona. Sena se pakiloe ke taba ea Maria.
Hoo e ka bang lilemo tse tharo tse fetileng, ha Maria a ne a lula Lisbon, Portugal, ntja ea hae eo a e ratang e ile ea lahleha, ’me o ile a etsa tsebiso ka sena seea-le-moeeng. E mong oa Lipaki Tsa Jehova, ea neng a kholisehile hore o bone ntja eo e hlalosoang, o ile a iteanya le Maria. Bobeli ba bona ha ba kopana, ba ile ba fumana ntja eo, ’me Paki ea bolella Maria hore kaha o ne a rata liphoofolo haholo, ka sebele o ne a tla thabela ho phela lefatšeng le lecha leo Molimo a le tšepisitseng. Paki e ile ea hlalosa hore batho ba ne ba tla ba khotsong le liphoofolo tsohle.
Maria o ile a amohela memo ea ho ea sebokeng se seng sa Lipaki. Seo a ileng a se utloa le ho se bona moo se ile sa mo susumelletsa hore a batle ho khanneloa thuto ea Bibele. Ha thuto e ntse e tsoela pele, Maria o ile a susumetsoa ka ho teba ke seo a ithutileng sona ka Jehova Molimo le litšepiso tsa hae tsa bophelo bo sa feleng lefatšeng le lecha la ho loka. (Pesaleme ea 37:29; Johanne 17:3) Qetellong, ka la 16 February, 2002, o ile a tšoantšetsa boinehelo ba hae ho Jehova ka kolobetso ea metsing.
Morero oa Molimo oa Pele
Joaloka Maria, ba bangata ba ’nile ba hlolloa ke bopaki ba hore morero oa Molimo oa pele bakeng sa batho oa hore ba phele ka ho sa feleng lefatšeng la paradeise le ho hlokomela liphoofolo tsohle tsa lona qetellong o tla phethahatsoa. (Genese 1:28) Bibele e bolela hore ‘Molimo ha aa ka a bōpela lefatše lefeela’ empa ‘o le etselitse hore le be le baahi.’ Ho totobetse hore batho ba ne ba lokela ho thabela lefatše le liphoofolo tsa lona ka ho sa feleng.—Esaia 45:18.
Bibele e tsoela pele ho hatisa boikemisetso ba Molimo ba ho phetha morero oa hae oa pele oa ho ba le lefatše la paradeise. O re: “Ke o boletse,” a phaella ka ho re: “Ke tla boela ke o phethe.” Jehova o boetse a laela: “Le lentsoe la ka le tsoang molomong oa ka le tla ba joalo. Le ke ke la khutlela ho ’na le se na litholoana, empa ka sebele le tla etsa seo ke se thabelang, ’me ka sebele le tla atleha ho seo ke le rometseng sona.”—Esaia 46:11; 55:11.
Ho hlakile hore morero oa Molimo oa pele e ne e le hore batho ba thabele paradeise ea lefatšeng ka ho sa feleng. Re ka kholiseha ka ho feletseng hore qetellong morero oo o tla phethahala. A re hlahlobeng tlhase e fanoeng ka Bibeleng ea hore na bophelo bo tla ba joang lefatšeng le lecha la Molimo. Re tla bona hore ka sebele liphoofolo tsohle tse thapileng le tse hlaha, li tla ba khotsong ka botsona hape li tla ba khotsong le batho.—Esaia 65:17, 21-25; 2 Petrose 3:13.
Liphoofolo Tse Ruuoang Lefatšeng le Lecha la Molimo
Lefatšeng le lecha la Jehova, batho ba tla khona ho thetsa moetse oa tau e makhisa, ho pholla boea bo mechato ba nkoe esita le ho robala hlatheng ba sa tšabe phoofolo leha e le efe hore e tla ba ntša kotsi. Hlokomela tšepiso ena ea Molimo: ‘Ka sebele ke tla etsa hore sebata se kotsi se fele naheng, ’me batho ba tla lula lefeelleng ba sireletsehile ba robale morung.’—Ezekiele 34:25; Hosea 2:18.
Ka sebele, liphoofolo tse hlaha ka nako eo li tla ikokobetsa, esita le ho bana ba banyenyane! Bibele e re: “Phiri e tla lula ka nakoana le konyana e tona, lengau le bothe le potsanyane, ’me namane le taoana e moetse le phoofolo e fepehileng hantle li be hammoho; moshanyana o tla li etella pele.”
Empa hoo hase phetho! Lengolo leo le tsoela pele: “Khomo e tla fula le bere; manamane a tsona a tla botha hammoho. Le tau e tla ja joang joaloka poho. Ka sebele ngoana ea anyang o tla bapalla mokoting oa masumu; ngoana ea khoesitsoeng o tla kenya letsoho mokoting o kenyang leseli oa noha e chefo. Li ke ke tsa ntša kotsi leha e le efe kapa tsa baka tšenyo leha e le efe thabeng eohle ea ka e halalelang; hobane ka sebele lefatše le tla tlala tsebo ea Jehova joalokaha metsi a koahetse leoatle.”—Esaia 11:6-10.
Lefatšeng la Jehova le lecha, ho ke ke ha e-ba le bothata ba batho ba khobokaneng ka bongata metseng e meholo eo ho sa thabiseng hore bona le liphoofolo tseo ba li ruileng ba phele ho eona. Ke ’nete hore le kajeno ba bangata ba thabela liphoofolo tsa bona, ’me ba bangata ba na le boikutlo bo leka-lekaneng ka tsona le ho li hlokomela. Empa ak’u inahanele feela ka tebello e babatsehang ea ho thabela liphoofolo tse ruuoang lapeng ka ho sa feleng lefatšeng le lecha la ho loka! Tlhokomelo e lerato eo li tla e fuoa ka sebele e tla tlotlisa ’Mōpi e Moholo oa lintho tsohle tse phelang.
Haeba ha u e-s’o ithute ka merero e babatsehang ea Molimo—joalokaha Maria ea ratang liphoofolo a ne a sa ka a ithuta eona ho fihlela morao tjena—re u mema ka mofuthu hore u ikopanye le bahatisi ba makasine ena kapa e mong oa Lipaki Tsa Jehova, ea tla thabela ho u thusa ho ithuta ka merero eo.
[Setšoantšo se leqepheng la 18]
Lefatšeng le lecha la Molimo, liphoofolo li tla thabeloa ka ho sa feleng