Na U se U Itokiselitse ho ba Teng?
◼ Ho ba teng kae? Kopanong ea Setereke ea “Ho Mamela Molimo” ea Lipaki Tsa Jehova! Letoto la likopano tsa matsatsi a mararo, le qalileng United States bofelong ba beke ea ho qetela ka May, le lokiselitsoe ho tšoaroa likhoeli tse ’maloa tse latelang metseng e meholo e makholo lefatšeng ka bophara. Ho ka etsahala hore e ’ngoe e tšoareloe motseng o haufi le uena.
Libakeng tse ngata ho tla qaloa ka 9:30 hoseng ka lenaneo la ’mino. Sehlooho sa Labohlano se re “Mamelang Lentsoe la ka, ’me ke Tla ba Molimo oa Lōna.” (Jeremia 7:23) Ka mor’a lipuo tsa hoseng tse nang le sehlooho se reng “Re ‘Entsoe ka Mokhoa o Hlollang’” le se reng “Tsoho—Lebaka Leo Tšepo eo e Lokelang ho ba ea Sebele ho Uena,” lenaneo le qetella ka puo ea sehlooho e reng, “Ho Latela Mohlala ha U Ntse U Mamela Molimo.”
Lenaneo la Labohlano thapama le na le lipuo tse reng “Le ’Ne le ‘Behe Kelello Linthong Tsa Moea’ ’Me le Phele,” “Itebeleng Khahlanong le Mefuta Eohle ea Meharo” le “Le se ke la Latela Lipale Tsa Bohata Tse ‘Qapiloeng ka Bomene-mene.’” Ebe ka mor’a moo lipuo tse peli tsa neheletsano li totobatsa lintlha tsa sehlooho tse tsoang bukeng ea Bibele ea Hagai le ea Zakaria. Lenaneo la letsatsi leo le qetella ka puo e reng “Mahlomola ’Ohle a Haufi le ho Fela!”
Sehlooho sa lenaneo la Moqebelo se re “Ho Mamela ho Tloha Pelong” “Linthong Tsohle,” se thehiloeng ho Baroma 6:17 le 2 Bakorinthe 2:9. Lenaneo la hoseng le akarelletsa neheletsano e likarolo li tharo e nang le sehlooho se reng “Ho Thabile Malapa a Bolokang Litekanyetso Tsa Bomolimo.” Le na le lipontšo le lipuisano hape le lebisa tlhokomelo tabeng ea hore na litho tsa lelapa—monna, mosali le bana—li ka tlatsetsa joang thabong ea lelapa. Lenaneo la hoseng le qetella ka puo e reng “E ea Lōna e Mpe e Bolele E,” ’me ka mor’a moo ho tla ba le monyetla oa hore ba tšoanelehang ba kolobetsoe.
Lipuo tsa Moqebelo thapama li akarelletsa tse reng “Faposa Mahlo Hore a se ke a Bona se se Nang Thuso” le “Khutlelang ho Molisa oa Meea ea Lōna.” Ho latela puo e likarolo li peli ea neheletsano e reng “Mamelang ba Etellang pele.” Puo e qetellang ea thapama, e nang le sehlooho se reng “Ha e le Hantle ke Eng Seo Bibele e se Rutang?” ke eona e ikhethang kopanong ena.
Lenaneo la Sontaha hoseng le tšohla sehlooho se reng “Mamela Mantsoe Ana ’Ohle . . . Hore Lintho li U Tsamaele Hantle,” e thehiloeng ho Deuteronoma 12:28. Neheletsano e likarolo li tharo e nang le sehlooho se reng “Thusang Ba bang ho Mamela Seo Bibele e se Rutang” e fana ka thuso e molemo ea ho qala le ho khanna lithuto tsa Bibele tse atlehang.
Lenaneo la hoseng le phethela ka tšoantšiso ea moaparo oa boholo-holo e nang le sehlooho se reng “Hahamalla Lipakane Tse Tlotlisang Molimo.” E etelloa pele ke puo e reng “Bacha—Na Lipakane Tsa Lōna li Tla Etsa Hore le Atlehe?” Puo ena e hlekela tšoantšiso ea Bibele sebae, e buang ka Timothea e monyenyane, ea ileng a beha mohlala oa tšebeletso e se nang boithati eo bacha ba kajeno ba khothalletsoang ho e etsisa. Lenaneo la ho qetela la kopano ka Sontaha thapama le na le puo ea phatlalatsa e reng, “Ho Mamela ha Rōna ho Lebisoe ho Mang?”
Etsa litokisetso tsa ho ba teng hona joale. E le ho fumana hore na e tla tšoareloa hokae haufi le haeno, e-ea Holong ea ’Muso ea moo ea Lipaki tsa Jehova kapa u ngolle bahatisi ba makasine ena.