Baboleli ba ’Muso baa Tlaleha
Ho Paka Sekolong
“U TIEE matla ho iketsa ea lumelehang ho Molimo, mosebeletsi ea se nang ho nyatsuoa, ea rutang lentsoe la ’nete ka ho loka,” ao ke mantsoe a moapostola Pauluse ha a ngolla mohlankana Timothea. (2 Timothea 2:15) Bana ba bangata ba Lipaki tsa Jehova ba na le monyetla oa ho paka ka litaba tse molemo tsa ’Muso oa Molimo sekolong. Ha ba lihlong ho etsa joalo ’me barutuoa ba bang ba bangata ba ba ananela ka baka leo.
◻ Mohlala oa sena o tsoa Martinique. Moroetsana ea tsejoang sekolong e le e mong oa Lipaki tsa Jehova tichere ea hae e ne e atisa ho batla maikutlo a hae litabeng tsa bolumeli. O ne a ile a buisana ka makhetlo le tichere ena, ’me tichere ea amohela libuka tse ling tsa Watch Tower.
Ka letsatsi le leng ha qhoma puisano sehlopheng ka ngatafalo e tlōtseng ea baahi ba lefatše. Ha ho buisanoa ka hore na ho ka thibeloa hore lefatše le tlale baahi haholo joang, ha boleloa ka ho thibela kemolo le ho ntšoa limpa. Barutuoa ba bang ba ne ba emela ho ntšoa ha limpa ’me ba bang ba ho hanyetsa. Tichere ea botsa khaitseli e monyenyane hore na maikutlo a eona ke afe. A bolela hore a ka thabela ho fana ka tlhaloso e feletseng ka le hlahlamang. Mantsiboeeng ao a lokisetsa, ’me ka letsatsi le hlahlamang a tla le limakasine tse ling tsa Tsoha! tse neng Ii hlalosa ka Mangolo taba ea ho ntšoa ha limpa. Hoba a bale taba, a botsa sehlopha lipotso, ’me qetellong ea puisano “sehlopha kaofela sa itlhalosa hore se hanana le ho ntšoa ha limpa,” kamoo a bolelang. Barutuoa ba bang ba beeletsa makasine oa Tsoha!
◻ Phihlelo e ’ngoe e tsoa Sweden moo baena ba ’nileng ba mengoa hangata ho ea fana ka lipuo likolong. Mosebeletsi e mong oa pula-maliboho ea khethehileng oa Lipaki tsa Jehova o ne a memetsoe ho fana ka lipuo tse ngata sehlopheng. Tichere ea re: “Re ’nile ra ba le baruti ba bang mona, empa ba ipapalla katara feela e be ba bolella barutuoa hore ba itšoare hantle. Hoo ho hotle,” kamoo tichere e boletseng, “empa ke rata hore barutuoa ba ka ba ithute ho hong hape.” Eaba o etsa litokisetso tsa hore Paki e tle ’me e tsamaise thuto ea kamehla ea Bibele le sehlopha.
Barutuoa ba sehlopheng sena, hammoho le batho ba hohle lefatšeng kajeno, ba na le lipotso tse ngata tseo ba batlang ha li arabeloa ka maemo a lefatše kapa mathata a lelapa le a kahisano. Ke tokelo e kaakang bakeng sa Lipaki tsa Jehova tse sekolong hore li sebetse ka masene ho inehela boithutong ba botho le libokeng tsa phutheho, e le hore li rue kutloisiso ea Bibele le ho thusa ba joalo ho ithuta likarabelo tsa Bibele! Maele a Bibele aa eletsa: “Ea nang le tokelo, u se ke ua lesa ho mo etsa ka molemo, ha ho le matleng a hao.”—Liproverbia 3:27.