Ho Nyarela ka Litabeng

Na li Fetiloe ke Nako?

Ho ea ka moprista oa kereke ea Chache e Adelaide, Australia, litemoso tse khahlanong le tšusumetso ea ’mele e ka lebisang bofebeng le bootsoeng li fetiloe ke nako ’me li tsoa mehloling eo e seng ea Bokreste. Tlhahlobong ea hae ea moraonyana tjena mabapi le likamano tsa botona le botšehali, o bolela hore balekane ba tšepisaneng lenyalo ha ba etse sebe haeba ba e-ba le likamano tsa botona le botšehali pele ho lenyalo. Tlhahlobo ena e boetse e tiisa hore bosodoma bo ka ’na ba amoheleha mabakeng a mang. Ho ea ka Courier Mail ea Brisbane, moemeli oa Uniting Church ea Australia “o lumellane le melao ea motheo ea tlaleho ena.”

Leha ho le joalo, Bibele e bolela hore ke thato ea Molimo hore bohle ba “pheme bohlola” le hore ‘ba litšila, ba rapelang litšoantšo, babōki le bafebi, basodoma, le masholu, le ba lakatsang leruo, le matahoa, le ba sebang ba bang, le ba utsoang, ba joalo ba ke ke ba rua lefa la ’muso oa Molimo.’ (1 Ba-Thessalonika 4:3, 4, TLP; 1 Ba-Korinthe 6:9, 10) Ka sebele, ba amohelang Bibele e le Lentsoe le bululetsoeng la Molimo ba lumela hore pono ea lona ka botona le botšehali e tsoa ho ’Mōpi ea bohlale. Phello ho ba phelang ka litekanyetso tsa Bibele e paka hore melao ena ea boitšoaro eo ho boleloang hore e fetiloe ke nako e ntse e tlatsetsa botsitsong ba lelapa ’me e fana ka tšireletso khahlanong le maqeba a tebileng a maikutlo le mafu a nyonyehang a hlahang ka baka la boitšoaro bo bobe.

Thibelo ea Bohlokoa

Tšebeliso e mpe ea lithethefatsi ke bothata bo tebileng. Kahoo, tsela ea bohlokoa ea ho sireletsa bacha tšebelisong e mpe ea lithethefatsi ke efe? Puisanong e hatisitsoeng koranteng ea Brazil O Estado de S.Paulo, moprofesa oa France le ngaka ea mafu a kelello Claude Olievenstein o ile a hatisa tlhokahalo ea melao le tšehetso e lerato. O itse: “Kajeno ha batho ba bua ka lithethefatsi, mosebetsi oa mapolesa, tsamaiso ea boahloli, le sekolo ke tsona tse qolloang. Leha ho le joalo, tlhokahalo e khōlō ke ea ho thibela lelapa [ho sebelisa lithethefatsi]. . . . Bana ba bangata ha ba tsebe hore na taolo ea ntate ke eng. Ntate ha a eo; ho bonahala hore o itokolotse.”

Ha Ngaka Olievenstein a hlalosa lebaka leo ho thibeloa ha tšebeliso ea lithethefatsi ho leng bohlokoa ka lona lelapeng, oa phaella: “Re phela sechabeng sa tsoelo-pele moo batho ba soabelang boitšoaro bo botle. Ha bana ba rōna ba qala ho itšoara ka tsela e itseng ka baka la lithethefatsi, lebaka ke hore re khaolitse ho ba ruta boitšoaro. Sechaba sa rōna se fetohile se thata, se se nang boikutlo, se tšoarehileng ka mesebetsi. Batho ba nahana ka ho loanela feela ho phela.”

Ho ea ka makasine Superinteressante, phuputso ea U.S. e tiisa bohlokoa ba taolo ea botsoali. Koranta ena e re: “Bacha ba sebetsang hantle litlhahlobong tsa sekolo le ba tsitsitseng maikutlong haholoanyane ba tsoa malapeng ao batsoali ba ileng ba sebelisa matla a bona ho beha melao e hlakileng ea boitšoaro le ho fana ka tokoloho har’a meeli e hlalositsoeng hantle. Ka ho tšoanang, bacha ba bangata ba lemaletseng lithethefatsing le joaleng ho bonahala molao o fokola haholo malapeng a joalo.”

Ka lebaka le letle Bibele e eletsa batsoali: “Laea mora oa hao, o tla u fa phomolo, a nyakalatse moea oa hao.” (Liproverbia 29:17) E, khalemelo e tšehelitsoeng ke Bibele e ka thusa batsoali ho thibela tšebeliso e mpe ea lithethefatsi le ho ntlafatsa boleng ba bophelo ba lelapa lohle.