Ho Khomarela Haufi Mokhatlo o Hlophisitsoeng oa Molimo

JOALOKAHA HO BOLETSE ROY A. RYAN

Sandhill, Missouri, le ne le bitsoa ka tsela e nepahetseng, kaha e ne e hlile e le leralla la lehlabathe sebakeng sa mapolasi se tletseng maralla. Motsana ona o mateanong a litsela o ne o le lik’hilomithara tse hlano ka bophirimela ho Rutledge ’me o ne o e-na le matlo a robeli kapa a robong feela, kereke ea Methodist, le lebenkele le lenyenyane leo ho teeloang tšepe ho lona. Ke ile ka tsoalloa moo ka October 25, 1900.

NTATE e ne e le setei sa tšepe sa motsana oo. Le hoja batsoali ba ka ba ne ba e-ea kerekeng ka seoelo, ’Mè o ile a nkisa sekolong sa Sontaha Kerekeng ea Methodist. Ke ne ke sa rate lebitso Methodist, ke lumela hore motho o lokela ho bitsoa Mokreste; leha ho le joalo ke ile ka ba le lenyora la ’nete ea Bibele le thahasello ea bophelo bo sa feleng.

Ha ke ne ke le lilemo li 16, ke ile ka sebetsa seporong sa Santa Fe. E mong oa Liithuti tsa Bibele tsa Machaba (kamoo Lipaki tsa Jehova li neng li bitsoa ka nako eo) eo lebitso la hae e neng e le Jim o ile a tl’o sebetsa le sehlopha sa rōna se sebetsang seporong, ’me ’na le eena re ne re atisa ho sebetsa hammoho. Jim o ne a bua, ’me ke ne ke mamela seo a neng a se bua ka Bibele. Se ne se utloahala se le molemo ho ’na, kahoo ke ile ka mo kōpa hore a nkalime e ’ngoe ea libuka tsa hae.

Jim o ile a nkalima moqolo oa pele oa Studies in the Scriptures, o neng o phatlalalitsoe ke C. T. Russell oa Mokhatlo oa Liithuti tsa Bibele tsa Machaba. Ha ke o khutlisa, ke ile ka re a mphumanele meqolo e eketsehileng. Nakoana ka mor’a moo, Jim o ile a tlohela ho sebetsa seporong, ’me lekhetlong le latelang ke ile ka ’mona seterateng Rutledge, a ntse a nka liodoro tsa buka e nang le litšoantšo Scenario of the Photo-Drama of Creation. Hamorao o ile a ’memela libokeng tsa sehlopha tse neng li tšoareloa lapeng la hae. Sontaha se seng le se seng, ke ne ke tsamaea lik’hilomithara tse hlano ho ea Rutledge bakeng sa liboka.

Ha makasine oa Golden Age (oo hona joale e leng Tsoha!) o ne o hlahisoa ka 1919, ke ile ka batla ho qala ho ea tšebeletsong ea tšimo. ’Na le Seithuti se seng sa Bibele se secha re ne re ikemiselitse ho aba makasine ona o mocha ka ntlo le ntlo. Re ne re ikutloa re batla re tšaba ho etela batho motseng oa rōna, kahoo re ile ra palama terene ’me ra ea motseng o haufi. Ha re fihla hoseng, e mong le e mong oa rōna o ile a ikela ka tsela ea hae ’me ra kokota menyakong ho fihlela motšehare oa mantsiboea, esita le hoja re ne re sa koetlisetsoa mosebetsi ona. Ke ile ka nka liodoro tsa lipeeletso tse peli, e ’ngoe e ne e le ea monna eo ke neng ke sebetsa le eena seporong.

Ka October 10, 1920, ke ile ka kolobelletsoa letangoaneng le haufi le Rutledge. Batsoali ba ka ba ne ba hanyetsa ho kopanela ha ka le Liithuti tsa Bibele tsa Machaba. Sena se ne se bakoa ke khanyetso e hlohlelletsoang ke baruti eo Liithuti tsa Bibele li ileng tsa ba le eona nakong ea lilemo tsa ntoa tsa 1914-18. Leha ho le joalo, hamorao, ntate o ile a qala ho tla libokeng tse ling tsa Liithuti tsa Bibele, ’me hape o ne a bala The Golden Age. Pele a e-shoa, ’mè o ile a qala ho thahasella haholoanyane kutloisiso ea rōna ea ’nete ea Bibele. Empa lelapeng heso ha ho na ea ileng a etsa ’nete ena hore e be ea hae.

Nako ea ho Lekoa

Mehleng eo ea pele, ho ne ho e-na le batho ba bararo feela ntle ho ’na ba neng ba e-tla ka mehla libokeng tsa thuto ea Bibele Rutledge. Qetellong ba bararo bana ba ile ba tlohela mokhatlo o hlophisitsoeng. E mong e ne e le sebui se hloahloa, se neng se fana ka lipuo tsa Bibele tsa phatlalatsa sebakeng seo. Leha ho le joalo, o ile a ikhohomosa ka bohlale ba hae ’me a ikutloa hore ke ho itlosa seriti ho kopanela boboleling ba ntlo le ntlo joalokaha Bakreste ba pele ba ile ba etsa.—Liketso 5:42; 20:20.

Ha ba bararo bana ba khaotsa ho kopanela le Liithuti tsa Bibele tsa Machaba, ke hopola ha ke ne ke ikutloa joaloka moapostola Petrose nakong eo Jesu a neng a bua le batho ka ‘ho ja nama ea Jesu le ho noa mali a hae.’ Ba bangata ba ile ba mo tlohela ka nako eo, ba khopisitsoe ke thuto ea hae. Ka hona, Jesu o ile a botsa baapostola: “Na le lōna le rata ho ikela na?” Petrose o ile a arabela: “Morena, re ka ea ho mang? Ke uena ea nang le mantsoe a bophelo bo sa feleng.”—Johanne 6:67, 68.

Le hoja Petrose a ne a sa utloisise ka botlalo seo Jesu a neng a se bolela ka ‘ho ja nama ea Jesu le ho noa mali a hae,’ o ne a hlokomela hore Jesu o na le lipolelo tsa bophelo. Eo ke tsela eo ke neng ke ikutloa ka eona ka mokhatlo o hlophisitsoeng. O ne o e-na le ’nete esita le hoja e ne e se ka mehla ke neng ke utloisisa ka botlalo sohle seo ke se balang likhatisong. Leha ho le joalo, ka mehla ha ho builoe ntho eo ke sa e utloisiseng, le ka mohla ke ne ke sa e hanyetse. Hamorao, taba e ne e hlakisoa, kapa ka linako tse ling lintlha tsa maikutlo li ne li lokisoa. Ka mehla ke ne ke thabela hore ke ’nile ka leta ka mamello ho hlakisetsoa lintho.—Liproverbia 4:18.

Ho Fetohela Bopula-malibohong

Ka July 1924, ke ile ka ba teng kopanong ea machaba Columbus, Ohio. The Golden Age e ile ea e hlalosa e le “kopano e khōlōhali ea Liithuti tsa Bibele e kileng ea tšoaroa ka lilemong tseo.” Mono qeto e susumetsang e bitsoang “Qoso” e ile ea amoheloa. Boitsebiso bo fumanoeng le moea o bontšitsoeng kopanong eo li ile tsa nkhothalletsa hore ke be mosebeletsi oa nako e tletseng, kapa pula-maliboho.

Ha ke khutla kopanong, ke ile ka tlohela ho sebetsa seporong, ’me ’na le Seithuti se seng sa Bibele re ile ra qala ho sebeletsa re le bo-pula-maliboho hammoho. Leha ho le joalo, ka mor’a nako e ka etsang selemo, bophelo ba batsoali ba ka bo ile ba mpefala ho isa boholeng ba hore ba hloke thuso ea ka. Ke ile ka tlohela ho bula maliboho ’me ka fumana mosebetsi k’hamphaning ea liphaephe, empa kaha batho ba sebetsang moo ba ne ba se na tšusumetso e ntle, ke ile ka tlohela mosebetsi oo ’me ka ea khoebong ea ho hōlisa linotši le ho rekisa mahe a tsona.

Ho ea lehoetleng la 1933, batsoali ba ka ba ne ba hlokahetse bobeli ba bona, ba ntšiea ke lokolohile boikarabelong. Kahoo nakong ea selemo ka 1934, ke ile ka tlohela linotši tsa ka tlhokomelong ea motho e mong, ka ikahela koloi e nyenyane e huloang hore ke lule ho eona, ’me ka qala tšebeletsong ea nako e tletseng hape ke le pula-maliboho. Qalong ke ne ke sebetsa le Paki e hōlileng haufi le Quincy, Illinois. Hamorao ke ile ka khutlela Missouri, moo ke ileng ka kopanela le sehlopha sa bo-pula-maliboho.

Ka 1935 ho ne ho e-na le komello e khōlō karolong e ka Bochabela bo hare ea naha, ’me kaha re ne re sebetsa karolo eo e hlileng e leng ea temo, e ne e le mosebetsi o boima. Ha ho na motho ea neng a e-na le chelete, kahoo batho ba nang le teboho ba ne ba atisa ho re fa lijo kapa lintho tse ling ha re ba siela lingoliloeng.

Ho Bula Maliboho Karolong e ka Boroa

Mariheng ao re ile ra fallela Arkansas ho phema boemo ba leholimo bo batang. Re ile ra tseba ho aba libuka tse eketsehileng karolong eo ’me ra fumana lijo tse kentsoeng ka makoti-koting tseo re neng re ka li sebelisa. Re ne re atisa ho amohela lintho tse ling tseo re neng re ka li rekisa hore re fumane chelete, ho kopanyelletsa lisebelisoa tse entsoeng ka aluminum, tšepe e tšehla ea khale kapa koporo, lirediethara tsa likoloi tsa khale le libeteri. Lintho tsena li ne li etsa hore re be le chelete ea peterolo bakeng sa Ford ea ka ea ’Motlolo oa A eo re neng re e sebelisa tšebeletsong.

Re ile ra sebeletsa Newton, Searcy, le libaka tsa Carroll tse Sehlabeng sa lithaba sa Ozark. Liphihlelo tseo re bileng le tsona ka ho bolela bathong ba thaba ea Arkansas li ka tlatsa buka. Kaha mehleng eo litsela e ne e le tsa boholo-holo kapa li le sieo, re ne re etsa mosebetsi oa rōna o mongata re tsamaea ka maoto. Bo-pula-maliboho ba bang sehlopheng sa rōna ba ne ba atisa ho palama lipere ho etela batho ba libakeng tse phahameng tsa lithaba.

Ka nako e ’ngoe re ile ra utloela ka monna ea thahasellang ea bitsoang Sam, eo qetellong re ileng ra mo fumana a lula thoteng ea thaba. O ile a re amohela ka cheseho ’me o ne a thabetse hore re robaletse. Le hoja mosali oa Sam a ne a sa thahaselle molaetsa oa rōna, Rex, mor’a oa hae ea lilemo li 16, o ne a o thahasella. Ha re tsamaea, Sam o ile a re mema hore re khutle hape. Kahoo libeke tse peli hamorao, re ile ra lula le bona hape.

Ha re tsamaea ka lekhetlo la bobeli, ebile mosali oa Sam ea ileng a re mema hore re khutle hape. O ile a re re bile tšusumetso e molemo ho Rex. O ile a hlalosa: “Ke moshemane ea mobe haholo ea sebelisang mahlapa, ’me ha ke nahane hore o kile a rohakana haesale lōna bashemane ting le le mona.” Lilemo hamorao ke ile ka kopana le Rex hape ha a ne a le sekolong sa boromuoa sa Gileade South Lansing, New York. Liphihlelo tse kang tsena li ntliselitse khotsofalo e khōlō ho pholletsa le lilemo.

Tšebeletso ea Bethele

Ha ke ne ke etsa kōpo ea ho ba pula-maliboho, ke ile ka etsa le kōpo ea ho sebeletsa ntlo-khōlō ea Lipaki tsa Jehova e New York, e bitsoang Bethele. Nakong ea selemo ka 1935, ke ile ka hlokomelisoa hore kōpo ea ka e amohetsoe le hore ke lokela ho itlaleha Kingdom Farm ea Mokhatlo oa Watchtower e South Lansing, New York, ho qalisa tšebeletso ea ka ea Bethele. Ke ile ka etsa litokisetso hang-hang hore Paki e ’ngoe e nke koloi ea ka e huloang eo ke neng ke bula maliboho ka eona.

Ke ile ka khanna ho ea New York ka Ford ea ka ea ’Motlolo oa A, ’me ke ile ka fihla ka hoo e ka bang metsotso e mashome a mararo ka mor’a hora ea leshome hoseng ha May 3, 1935. Hoo e ka bang ka hora ea pele motšehare oa mantsiboea ao, ke ile ka abeloa mosebetsi oa ho ratha patsi. Letsatsing le latelang ke ile ka bolelloa hore ke lokela ho itlaleha molikong oo ho hlahisoang lebese ho ’ona ho thusa ho hama likhomo. Ke ile ka sebetsa moo ho hlahisoang lebese teng ka lilemo tse ’maloa, ka linako tse ling ke hama hoseng le mantsiboea ’me nakong ea motšehare ke sebetsa le lihlopha tse sebetsang lirapeng le lihlopha tse kotulang masimo. Ke ne ke boetse ke hlokomela linotši le mahe a tsona a butsoitseng bakeng sa lelapa la Bethele. Ka 1953, ke ile ka isoa lefapheng leo ho etsoang chisi ho lona.

E mong oa batho ba ileng ba ama bophelo ba ka ka lebaka la mohlala oa hae o hlahelletseng oa boikokobetso, botšepehi, le ho utloa Jehova e ne e le Walter John “Pappy” Thorn. E ne e le e mong oa Liithuti tsa Bibele tse 21 tse khethiloeng ka 1894 ho ba li-pilgrim tsa pele—banna ba neng ba etsa mosebetsi o tšoanang le oa balebeli ba potoloho ba kajeno—ba etela liphutheho tse ngata ho li khothatsa. Ka mor’a lilemo tse ngata tsa mosebetsi oa ho tsamaea, Moena Thorn o ile a tla Kingdom Farm ’me a sebetsa ntlong ea likhoho. Ka makhetlo a mangata ke ne ke mo utloa a re: “Nako le nako ha ke inahana haholo, kamoo ho ka boleloang ka teng, kea inka ke ipee sekhutlong, ’me ke re: ‘Lerōlenyana tooe. U na le eng seo u ka ikhohomosang ka sona?’”

Monna e mong ea inyenyefalitseng eo e ileng ea e-ba mohlala o motle bakeng sa ka e ne e le John Booth, eo hona joale e leng setho sa Sehlopha se Busang sa Lipaki tsa Jehova. O ’nile a qotsoa ka lilemo ha a re: “Hore na u sebeletsa hokae ha se habohlokoa empa hoo e hlileng e leng habohlokoa ke hore na u sebeletsa mang.” Ke polelo e bonolo, empa e nepahetse hakaakang! Ho sebeletsa Jehova ke tokelo e khōlōhali ho li feta kaofela!

E ’ngoe ea liketsahalo tse hlahelletseng tšebeletsong ea ka Bethele e bile ho buloa ha sekolo sa boromuoa sa Gileade Kingdom Farm ka 1943. Ho kopana le bo-pula-maliboho ba tsoang likarolong tse ngata tsa lefatše ka sebele e ne e le ho thabisang. Mehleng eo ho ne ho e-na le liithuti tse ka bang lekholo sehlopheng ka seng, kahoo likhoeling tse ling le tse ling tse tšeletseng ba bacha ba lekholo ba ne ba e-tla Kingdom Farm. Ho abuoa ha mangolo ho ne ho hohela batho ba likete-kete ho tla mehahong ena ea thuto libakeng tse ka leboea tsa mapolasi New York.

Ho Fuoa Mosebetsi o Mong

Ha sekolo sa Gileade se ne se fallisetsoa Brooklyn ’me ho rekisoa sebaka se seholo sa bolulo le moaho oa liklase South Lansing, sebaka seo ho etsetsoang lebese ho sona se ile sa fallisetsoa Mapolasing a Watchtower a Wallkill, New York. Kahoo lehoetleng la 1969, ke ile ka isoa polasing e Wallkill ’me ka tsoela pele ho etsa chisi ho fihlela ka 1983. Eaba ke fuoa mosebetsi o mong, ’me ke ile ka qala ho sebetsa ho ntlafatseng tikoloho.

Ha ho ne ho buisanoa le ’na nakong e itseng e fetileng, ke ile ka botsoa hore na ke ile ka nahana eng ka ho fuoa mosebetsi o mong ka mor’a lilemo tse 30 ke etsa chisi. Ke ile ka buoa ka bokhutšoanyane: “Ha hoa ka ha nkhathatsa, hobane ebile ke ne ke sa rate ho etsa chisi.” Ntlha e ne e le hore re ka thaba ha re sebeletsa Jehova kabelong efe kapa efe haeba re e-na le pono e nepahetseng ’me re inehela ka boikokobetso tataisong ea puso ea Molimo. Kahoo le hoja ke ne ke sa rate ho etsa chisi haholo, ke ne ke thabela kabelo ea ka hobane e ne e thusa lelapa la Bethele. Haeba re sebeletsa Molimo oa rōna o moholo, Jehova, ka botšepehi ’me re sa ngongorehe, re ka thaba ho sa tsotellehe hore na kabelo ea rōna ke efe.

Lilemong tsa ka tsa bofokoli, ha ke nahane hore nka ba boemong bo molemo ho feta ho sebeletsa Bethele. Ke hlokometsoe hantle ’me ke ’nile ka tseba ho tsoela pele ho phetha kabelo ea ka ea mosebetsi esita le hoja ke le lilemo li 90. Ka lilemo tse ngata joale, ke bile le tokelo ea ho nka karolo ea ka ho etella pele lenaneong la borapeli ba hoseng ba lelapa la Bethele mona Mapolasing a Watchtower. Ha ke e-na le monyetla, ke khothalletsa ba bacha Bethele ho sebelisa litokelo tsohle tsa tšebeletso tseo ba li fuoang le ho ithuta ho li khotsofalla le ho li thabela.

Ka lilemo, ke ’nile ka tseba ho etela libaka lisele ka makhetlo a ’maloa—India, Nepal, Bochabela ba Hōle, le Europe. Keletso e latelang e ka ba e thusang ho bao ba leng liphuthehong tsa habo bona ka ho fapana tsa batho ba Jehova ho potoloha lefatše: Thaba ’me u khotsofale maemong a hao a joale ’me u hōle ka tsela ea moea mobung oo u lenngoeng ho ’ona.

Ke khethile ho lula ke le lesoha, kaha ho ’nolofallelitse ho tsoela pele ke sa sitisehe tšebeletsong ea ka ho Molimo. E le moputso bakeng sa botšepehi, Molimo oa rōna o moholo o re file tebello ea bophelo bo sa feleng. Bakeng sa ba bangata, hoo ho tla bolela bophelo bo sa feleng lehaeng la paradeise mona lefatšeng. Ba bang ba rōna ba talimme pele bophelong bo sa feleng leholimong, ho hlokomela kabelo efe kapa efe eo re e fuoang.

Ba bang ba nahana hore lilemo tsa ka tse 90 e bile bophelo bo bolelele, bo enneng haholo. Bophelo ba ka e bile bo enneng empa eseng bo bolelele ka ho lekaneng. Ka ho lula haufi le mokhatlo o hlophisitsoeng oa Molimo le mantsoe a hae a ’nete, re ka eketsa bophelo ba rōna ka ho sa feleng.a

[Mongolo o botlaaseng ba leqephe]

[Setšoantšo se leqepheng la 26]

Moena Ryan lilemong tsa hae tse qalang a le maloka le Ford ea hae ea ’Motlolo oa T