Na U sa Hopola?

Na u thabetse ho bala litokollo tsa morao-rao tsa Molula-Qhooa? Haeba ho joalo, u tla fumana e le ho thahasellisang ho hopola tse latelang:

▫ Na ’nete ea bolumeli e ka fumanoa?

Jesu Kreste o ile a re: “Le tla tseba, ’nete, ’me ’nete e tla le lokolla.” (Johanne 8:32) Jesu ha aa ka a bolela feela hore ’nete e ka fumanoa empa o bontšitse hore ho e fumana hoa hlokahala borapeling ba rōna ho Molimo. O ile a bolella mosali oa Mosamaria: “Barapeli ba ’nete ba tla rapela Ntate ka moea le ka ’nete.” (Johanne 4:23)—4/15, leqepheng la 5.

▫ Robert Estienne e ne e le mang, ’me o ile a iketsetsa botumo joang?

Robert Estienne e ne e le mohatisi ea phetseng lekholong la bo16 la lilemo. O ile a nehela bophelo ba hae ho hatisoeng ha Mangolo a Halalelang ’me a loanela ho senola mantsoe a Bibele joalokaha a ne a ngotsoe qalong. Mokhoa oa hae oa ho arola taba e ngotsoeng ea Bibele ka litemana tse nang le linomoro ke oona mokhoa o sebelisoang hohle kajeno.—4/15, maqepheng a 10, 14.

▫ Re rua molemo joang ho baleng Bibele letsatsi le letsatsi?

Kamehla Mangolo a ba le moelelo o mocha ho rōna, ’me boprofeta bo mabapi le mehla ea qetello bo hatiseha haholoanyane leseling la seo re se boneng, re se utloileng, le seo rōna ka borōna re fetileng ho sona. Ha phihlelo ea rōna ea bophelo e ntse e atoloha ’me re sebetsana le mathata ka katleho, re ananela ka ho feletseng haholoanyane keletso ea Bibele. (Liproverbia 4:18)—5/1, leqepheng la 14.

▫ Litemana tsa Bibele li ka hopoloa joang?

Ha u ntse u bala Bibele, tšoaea litemana tseo u li khethileng tseo u batlang ho li hopola, kapa u li kopiletse likareteng ’me u li behe moo u tla li bona letsatsi le letsatsi. Ha u ntse u leka ho tšoara litemana ka hlooho, thuisa ka tsona ’me u li sebelise. Se leke ho tšoara tse ngata haholo ka hlooho ka nako e le ’ngoe, mohlomong e le ’ngoe feela kapa tse peli beke ka ’ngoe.—5/1, maqepheng a 16, 17.

▫ Ke boitsebiso bofe boo Kosepele ea Luka e nang le bona boo e leng keketso ho seo bangoli ba bang ba Likosepele ba faneng ka sona?

Le hoja boholo ba se tlalehiloeng ke Luka bo tšoana le se tlalehong ea Mattheu, karolo ea 59 lekholong e fapane. Luka o tlalehile mehlolo e tšeletseng e ikhethang bukeng ea hae feela ’me a tlaleha le litšoantšo tsa Jesu tse fetang palo eo ka makhetlo a mabeli tse sa boleloang ke bangoli ba bang ba Likosepele.—5/15, leqepheng la 12.

▫ Ke mahlaseli afe a leseli la ’nete a ikhethang a ileng a senoloa ka 1935?

Selemong seo, batho ba Jehova ba ile ba utloisisa hore bongata bo boholo bo boletsoeng ho Tšenolo 7:9, 14 e ne e se sehlopha sa bobeli sa leholimo, empa e ne e le ba nang le tšepo ea lefatšeng. (Johanne 10:16)—5/15, leqepheng la 20.

▫ Ke ka litsela life tse sebetsang re ka tšelisang ba shoetsoeng?

Mamela. Fana ka tiisetso. E-ba ea fumanehang. Nka bohato ba pele ha ho lokela. Ngola lengolo kapa karete e tšelisang. Rapela le bona. (Jakobo 5:16) Tsoela pele u ba thusa.—6/1, maqepheng a 13, 14.

▫ Ke eng seo baena le bo-khaitseli ba moea ba ka se etsang ho thusa ba lulang malapeng a arohaneng bolumeling hore ba tiisetse?

Kamehla, buisana le bona ka mantsoe a khothatsang, a nepahetseng le a tšelisang. (1 Ba-Thessalonika 5:14) Sena se ba etsa hore ba khatholohe kelellong le ’meleng. Ha ho khoneha le ha ho loketse, ba kenyelletse mesebetsing ea hao ea puso ea Molimo le ea boikhathollo. Ba kenyelletse lithapelong tsa hao. (Ba-Roma 1:9, Bibele—Phetolelo e Ncha; Ba-Efese 1:16)—6/1, leqepheng la 29.

▫ Ke meputso efe e fumanehang ka ho ba le mamello tšebeletsong ea tšimo?

Mamello e thusa baboleli ba ’Muso ho tiisetsa ho iphapanya leha e le hofe kapa khanyetso. Ho e-na le ho phehisana khang le beng ba matlo ba halefileng, basebeletsi ba nang le mamello ba tla khona ho arabela ka mosa kapa ba itsamaele ba khutsitse, kahoo ba boloka khotso le thabo. (Mattheu 10:12, 13) Ho feta moo, batho ba kang linku ba tla huleloa molaetseng oa ’Muso.—6/15, leqepheng la 9.

▫ Ke hobane’ng ha ho le bohlokoa hakaale ho tseba ’nete ea Bibele?

Ho tseba ’nete ho re lokolla mashanong, lithetsong le litumela-khoeleng. Ha re phela ka ’nete, e re matlafaletsa ho tiisetsa mathata ’me e re susumetsa ka tšepo e re nolofaletsang ho ema re tiile tlas’a teko.—7/1, leqepheng la 8.

▫ Ke boikarabelo bofe bo ka sehloohong boo phutheho ea Bakreste ba tlotsitsoeng e ileng ea bo nka ho Iseraele oa nama?

Ke tokelo ea ho pakela boholo ba Jehova har’a lichaba. (Esaia 43:21; 1 Petrose 2:9)—7/1, leqepheng la 19.

▫ Mantsoe a moapostola Petrose a bolela eng ha a re monna o lokela hore ‘a hlomphe’ mosali oa hae? (1 Petrose 3:7)

Monna ea hlomphang mosali oa hae ha a mo nyenyefatse kapa ho mo theola. Ho e-na le hoo, o bontša ka mantsoe a hae le ka liketso tsa hae—ha ba le bang leha ba le bathong—hore o mo nka e le oa bohlokoa. (Liproverbia 31:10-31)—7/15, leqepheng la 19.

▫ Ke hobane’ng ha ho ka thoe ke ho bontša lerato ho leleka moetsalibe ea sa bakeng ka hare ho phutheho ea Bokreste?

Ho khaola ke pontšo ea lerato ho Jehova le litsela tsa hae. (Pesaleme ea 97:10) Ho bontša lerato bakeng sa ba tsoelang pele tseleng ea ho loka hobane ho tlosa ka hare ho bona motho ea ka bang le tšusumetso e ’mpe; ’me hona ho boetse ho sireletsa bohloeki ba phutheho. (1 Ba-Korinthe 5:1-13)—7/15, leqepheng la 25.

▫ “Mohlanka ea khabane, ea bohlale,” eo Jesu a buileng ka eena ho Mattheu 24:45-47 a ka tsejoa joang kajeno?

Ba tsebahala haholo-holo ka mosebetsi oo ba o etsang oa ho lokisetsa litokollo tse thehiloeng Bibeleng, ka ho ruta le ka ho bolela “evangeli ena ea ’Muso” le ka botšepehi ba bona Lentsoeng la Molimo, Bibele. (Mattheu 24:14; 28:19, 20)—8/1, leqepheng la 16.