Ho Khutlela Lerōleng—Joang?
“ULERŌLE, ’me u tla khutlela lerōleng.” Ha motho oa pele, Adama, a ne a utloa mantsoe ana, o ne a tseba seo a lokelang ho se lebella. O ne a entsoe ka lerōle la lefatše ’me o ne a tla khutlela hona lerōleng. O ne a tla shoa hobane a ne a sa mamela ’Mōpi oa hae, Jehova Molimo.—Genese 2:7, 15-17; 3:17-19.
Bibele e bontša hore batho ba entsoe ka lerōle. E boetse e re: “Moea o etsang sebe ke oona o tla shoa.” (Ezekiele 18:4; Pesaleme ea 103:14) Lefu le ’nile la tlisetsa ba limilione masoabi ’me khafetsa ho ile ha phahama lipotso mabapi le ho patoa ha litopo tsa batho.
Litloaelo Tsa Nakong e Fetileng le Tsa Hona Joale
Litopo tsa batho li ne li patoa joang har’a batho ba Molimo mehleng ea boholo-holo? Tlalehong ea eona e qalang, Bibele e bolela litsela tse sa tšoaneng tsa ho tšoara bafu, ho akarelletsa ho ba epela fatše. (Genese 35:8) Mopatriareka Abrahama le mosali oa hae Sara hammoho le mor’a bona Isaka le setloholo Jakobo ba ile ba patoa lehaheng la Makpela. (Genese 23:2, 19; 25:9; 49:30, 31; 50:13) Baahloli ba Baiseraele Gideone le Samsone ba ile ba patoa ‘mabitleng a bo-ntat’a bona.’ (Baahloli 8:32; 16:31) Sena se bontša hore ho ba le litša tsa mabitla tsa lelapa ho ne ho ratoa haholo har’a batho ba Molimo ba boholo-holo. Ha Jesu Kreste a e-shoa lekholong la pele la lilemo C.E., setopo sa hae se ile sa behoa ka lebitleng le neng le sa tsoa fatoa lefikeng. (Matheu 27:57-60) Kahoo, ka tloaelo litopo tsa batho li ne li epeloa fatše kapa li behoa mabitleng. Ena e ntse e le tloaelo le hona joale libakeng tse ngata lefatšeng ho pota.
Leha ho le joalo, libakeng tse ling tsa lefatše kajeno, khaello e khōlō ea sebaka le theko e phahameng ea litša li entse hore ho be thata haholoanyane ho fumana litša tsa mabitla. Ka hona, batho ba bang ba nahana ka litsela tse ling tsa ho pata litopo tsa batho.
Ho qhala molora ka mor’a ho chesa litopo tsa batho ho ntse ho ata haholoanyane. Hona joale hoo e ka bang karolo ea 40 lekholong ea bafu, Engelane, e patoa ka mokhoa ona. Sweden, moo karolo e ka holimo ho 80 lekholong ea litopo tse shoetseng metseng e meholo li chesoang, ho khethiloe libaka tse itseng tsa meru bakeng sa ho qhalla molora oa tsona teng. ’Me Shanghai le metseng e meng e meholo e lebōpong la leoatle Chaena, mebuso ea metse eo e tšehetsa ka chelete ho qhalloa ha liqubu tseo leoatleng ka makhetlo a ’maloa ka selemo.
Ke hokae moo molora o ka qhalloang teng? Hase kae le kae feela tjee. Mohlomong ba bang ba tšaba hore ho qhaloa ha molora oo ho senya tikoloho. Leha ho le joalo, bonneteng kotsi leha e le efe e neng e ka etsahala ea seoa e felisoa ke ho chesoa. Ba litša tse itseng tsa mabitla Engelane le ba lirapa tsa khopotso United States ba behella ka thōko libaka tse nang le mohloa le lirapa tsa lipalesa hore e be mabala ao ho qhalloang ho ’ona. Ha e le hantle, Bakreste ba amehile ka ho khetheha ka pono ea Mangolo ka ho chesa litopo le ho qhala molora oa tsona.
Pono ea Mangolo ke Efe?
Moprofeta Esaia ha a phatlalatsa kahlolo khahlanong le “morena oa Babilona,” o ile a re: “U lahliloe hole le lebitla la hao.” (Esaia 14:4, 19) Na ho qhaloa ha molora ho lokela ho bapisoa le boemo bo joalo ba tlotlollo? Che, kaha ha ho letho le buang ka ho chesoa ha litopo le ho bolokoa kapa ho qhaloa ha molora oa tsona.
Jesu Kreste o ile a bua ka tsoho ea bafu e tlang ho etsahala lefatšeng nakong ea Puso ea hae ea Lilemo tse Sekete ha a ne a re: “Bohle ba mabitleng a khopotso ba tla utloa lentsoe la [ka] ’me ba tsoe.” (Johanne 5:28, 29) Leha ho le joalo, hore ha ho hlokahale lebitla le khethehileng hore motho a tsosoe ho totobatsoa ke litlhaloso tse ling tsa boprofeta ba tsoho ea bafu. Tšenolo 20:13 ea bolela: “’Me leoatle la nehelana ka bafu ba ho lona, ’me lefu le Hadese tsa nehelana ka bafu ba ho tsona.” Kahoo, ho tsotellehang hase hore na motho o ‘khutletse lerōleng’ hokae kapa joang. Ho e-na le hoo, ke hore na Molimo oa mo hopola le ho mo tsosa na. (Jobo 14:13-15; bapisa le Luka 23:42, 43.) Ka sebele Jehova ha a hloke mabitla a ipiletsang ho mo thusa hore a hopole batho. Ho chesoa ha setopo ha ho thibele motho hore a tsosoe bafung. ’Me haeba ho qhaloa ha molora ho etsoa ka sepheo se nepahetseng le ka ntle ho litšebeletso tsa bolumeli ba bohata, ho ke ke ha e-ba khahlanong le Mangolo.
Ba tšehetsang ho qhaloa ha molora ba lokela ho ela hloko molao oa naha. Ba boetse ba lokela ho nahanela maikutlo a ba shoetsoeng le a ba bang. Bahlanka ba Jehova ba etsa hantle ha ba e-ba seli hore ho sebelisa bolokolohi ba bona ba Mangolo tabeng ena ho se tlise thohako lebitsong le letle leo Bakreste ba le jereng. Hona ke habohlokoa haholo linaheng tseo ho tsona ho chesa litopo le ho qhala molora oa tsona ho lumeletsoeng ka molao empa ho e-s’o amohelehe ka ho feletseng sechabeng. Ka sebele, Mokreste o tla qoba litloaelo le mekhoa leha e le efe e thehiloeng tumelong ea ho se shoe ha moea oa motho.
Ho Lokoloha ka ho Feletseng Mabitleng!
Ba bang ba buellang ho qhaloa ha molora ba bolela hore ke ho lokoloha ho pateng mabitleng. Leha ho le joalo, ho tla tlisa tokoloho e khōlō ka ho fetisisa e tla ba ho phethahala ha tšepiso ea Bibele ea hore “e le sera sa ho qetela, lefu le tla etsoa lefeela.”—1 Bakorinthe 15:24-28.
Hona ho bolela hore ’nģalo tsa bafu, mabitla, esita le ho chesa litopo le ho qhala molora oa tsona, e tla ba lintho tsa nako e fetileng. E, lefu ha le sa tla hlola le e-ba teng. Tlas’a pululelo ea bomolimo moapostola Johanne o ile a ngola: “Eaba ke utloa lentsoe le phahameng le tsoang teroneng le re: ‘Bonang! Tente ea Molimo e ho moloko oa batho, ’me o tla lula le bona, ’me e tla ba batho ba hae. ’Me Molimo ka boeena o tla ba le bona. ’Me o tla hlakola meokho eohle mahlong a bona, ’me lefu ha le sa tla hlola le e-ba teng, leha e le ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.’”—Tšenolo 21:3, 4.
Tsena tsohle li tla etsahala ha ho shoa ha batho ho bakiloeng ke sebe sa Adama ho felisoa ka ho feletseng tlas’a ’Muso oa Molimo. Nakong eo batho ba mamelang ha ba sa tla hlola ba tobana le tebello ea ho khutlela lerōleng.
[Litšoantšo tse leqepheng la 29]
Mekhoa e tloaelehileng ea ho sebetsana le litopo tsa batho
[Setšoantšo se leqepheng la 31]
Ho qhala molora Koung ea Sagami, Japane
[Tlhaloso ea Moo Setšoantšo se Nkiloeng Teng]
Courtesy of Koueisha, Tokyo