“Ka Sebele Lena ke Lebitso la Molimo le Halalelang le le Leholo ka ho Fetisisa”

Nicholas oa Cusa o ile a bua mantsoe ao therong eo a ileng a fana ka eona selemong sa 1430.a O ne a thahasella lintho tse ngata, ka mohlala, o ile a ithuta Segerike, Seheberu, filosofi, thuto ea bolumeli, lipalo le linaleli. Ha a le lilemo li 22, e ile ea e-ba setsebi sa molao oa Roma e K’hatholike. Ka 1448 o ile a khethoa hore e be mok’hadinale.

Hoo e ka bang lilemo tse 550 tse fetileng, Nicholas oa Cusa o ile a theha lehae la maqheku Kues, eo hona joale e seng e bitsoa Bernkastel-Kues, e leng toropo e lik’hilomithara tse 130 ka boroa ho Bonn, Jeremane. Hona joale, hona mohahong ona ho na le laebrari ea Cusa e nang le libuka tse ngotsoeng ka letsoho tse fetang 310. E ’ngoe ea tsona ke Codex Cusanus 220 eo ho eona ho nang le thero ea Cusa ea 1430. Therong eo e bitsoang In principio erat verbum (Lentsoe le ne le le Tšimolohong), Nicholas oa Cusa o ngotse lebitso la Molimo ka Selatine e le Iehoua eseng Jehova.b Mabapi le lebitso la Molimo, leqepheng la 56 ho na le polelo e latelang: “Molimo o ithehile lona. Ke Tetragrammaton, e leng litlhaku tse ’nè tsa Seheberu tse emelang lebitso la Molimo. . . .” Ka sebele lena ke lebitso la Molimo le halalelang le le leholo ka ho fetisisa. Polelo ea Nicholas oa Cusa e lumellana le ’nete ea hore lebitso la Molimo lea hlaha libukeng tsa pele tsa Mangolo a Seheberu.​—Ex. 6:3.

Buka ena ea mathoasong a lekholo la bo15 la lilemo ke e ’ngoe ea libuka tsa khale ka ho fetisisa tse ngotsoeng ka letsoho tseo ho tsona Tetragrammaton e fetoletsoeng e le “Iehoua.” Bopaki bona bo ngotsoeng ke bo bong bo bontšang hore ka makholo a lilemo lingoli li ’nile tsa tloaela ho fetolela lebitso la Molimo ka litsela tse ling tse batlang li tšoana le “Jehova.”

[Mongolo o botlaaseng ba leqephe]

[Setšoantšo se leqepheng la 16]

Laebrari ea Cusa